1. ¿Imacunatataj öraga manchacushwan?

 WAQUIN hermanucuna imacunapa pasashganta ricärishun. Néstor y warmin Mariaga Diospita yachachicunanpaj necesitaycaj sitiucho yanapacuytash munargan. * Pero chayta rurananpäga charashgancunalawan cawapäcunanpaj yachacärinan cargan. Y chayman yarpararga manchacärirganshi, ‘manami cushishga cawacushaj’ nirshi yarpapäcurgan. Biniam jutiyoj wauguinchega tiyan Testigucunata chiquishgan marcacho. Testiguman ticraycuptinshi payga manchacurgan gaticachashga cananpaj cajta musyarir. Pero masraj manchacurganshi familiancunata wilapänanpaj captin Testigo cashganta. Y Valeria paninchitash doctorcuna nipäcurgan fiyupa cáncer gueshyawan nacaycashganta. Payga Jehovata cäsucur yawarta churacuyta mana munajchu, imanopapis calpachacurganshi juc doctorta tarinanpaj yawarniynaj operananpaj. Payga manchacurganmi wanucuyta.

2. ¿Imanirtaj imapitapis alapa manchacushwanchu?

² ¿Guepa parrafucho hermanunchicuna wilacushganno gampis chayno imaylapis ricacushcanquichu? Achcajmi chayno ricacushcanchi. Alapa manchacuycarla caycarga, öraga ilajpita mana alicunata rurar Jehovapa amistänintapis ograrishwanmi. Y Satanasga chayta munan. Payga chaypita Jehovata mandamashganchicunata mana cäsucunapaj, chayga canman runacunata manana yachachicunapaj (Apoc. 12:17). Satanasga pasaypa fiyu, mana ali y poderyojmi. Pero  valurcharcushun, canmi juc yanapacuy payta mana manchacunapaj. Mä ricärishun.

3. ¿Imaraj yanapämäshun manchacuycarla mana caycänapaj?

³ Jehová cuyamashganchita y noganchiwan caycashganta seguro caycarga, Satanás manami manchachimäshunnachu (Sal. 118:6). Salmo 118 escribejga imayca laquicuycunapa pasargan. Achca chiquejnincuna caycargan, y juccunaga munayniyojmi cargan (9 y 10 versiculucuna). Öraga imayca yarpachacuycunapa pasargan (13 caj versículo). Jina jatun juchata rurashganpitapis Jehová corrigiycurganmi (18 caj versículo). Chayno captinpis payga cayno nergan: “Mana mantsakütsu”. Payga musyarganmi Jehová corregiptinpis jinala cuyaycashganta. Jina seguro caycargan ima captinpis cuyacoj Diosnin imaypis yanapänanpaj cajta (Sal. 118:29).

4. Jehová cuyamashganchipita seguro caycarga, ¿imacunatataj mana manchacushunnachu?

⁴ Jucninchi jucninchimi seguro caycashwan Jehová cada ununchita cuyamashganchita. Chayno captenga, chayga caycunacho yanapämäshun mana manchacunapaj: 1) familianchita manteninapaj mana puediptinchi, 2) runa masinchita y 3) wanunanchipaj captin. Juc caj parrafucho parlashganchi hermanucunaga seguro carcaycargan Jehová paycunata cuyashgantami, cayga yanapargan manana manchacärinanpaj.

5. Familianta ricajcunataga, ¿imaraj yarpachacächinman? (Garancho caycaj fotuta ricäriy).

⁵ Familianta ricajcuna cristianucunaga calpachacärinmi warminta, wamrancunata manteninanpaj (1 Tim. 5:8). Chayno captiquega yarpachacushcanquichi COVID-19 gueshyaraycur aruyniynaj quedacunayquipaj. Capazchi manchacur nishcanqui ‘cananga imanotaj familiäta mantenishaj, y cuartütapis pagashaj’ nir. Aruyniynaj quedacurga ‘maychoraj aruyta tarishaj’ nirchi yarpachacushcanqui. Y Nestorwan María yarpashganno, gampis manchacushcanquichi walcalawan cawacunayquipaj. Satanasga chaycunapita provechacurgan waquincuna Jehovata sirviyta jaguirinanpaj.

6. ¿Imataj creichimänanchipaj Satanasga munan?

⁶ Satanasga imanopapis creichimänanchipaj munan Jehová noganchipaj mana yarpachacushganta, y familianchita manteninapaj captenga Jehová mana yanapämänanchipaj cajta. Chayno yarparga Satanaspa tranpanmanmi ishquishwan; jina aruyninchita imanopapis cachayta manami munashunchu Diospa Palabranpa contrancho caycaptinpis.

7. ¿Imataj Jesús nimanchi?

⁷ Taytalanchi Jehovataga Jesusmi shumaj reguin, chaymi cayno nimanchi: “Manaraq manakuptikipis Taytaykiqa ima pishïshushqaykitapis musyaykannami” (Mat. 6:8). Jesuspis musyanmi Jehová imaypis listo caycashganta necesitashganchicunata tarichimänanchipaj. Cristianucunaga Diospa familianpita caycanchi. Chauraga Jehová ricamajninchi captin, 1 Timoteo 5:8 textucho familianta ricajcunata mandashganta, quiquinpis rurangami.

8. 1) ¿Imaraj yanapämäshun mana manchacunapaj familianchita manteninapaj mana puedirga? (Mateo 6:31-33). 2) ¿Imataj yachacunchi fotucho casaracushga cajcuna ruraycajta ricar?

⁸ Jehová noganchita y familianchitapis cuyamashganchita seguro caycarga, imaypis yäracuycäshunmi imapis mana faltachimänanchipaj (leiriy Mateo 6:31-33). Jehová cuyamashpanchimi lapan necesitashganchicunata goycalämänanchipaj munan. Pachata  camaycurga manami juc ishcay plantacunalatachu o micuylatachu rurashga cawacunapaj. Chaypa trucanga, cuyamashpanchimi imaycacunata rurashga cushi cushila cay Pachacho cawacunapaj (Gén. 2:9). Öraga chay junajlapaj micunapaj captinpis, Jehovata ‘gracias’ nishun. Jehovaga manami gongamashganchichu, chay junajpaj micuyta goycalämashcanchi (Mat. 6:11). Cayta ama gongashunchu: Jehovapa voluntäninta ruranapaj imaycacunata rurarga, canan y shamoj tiempucho chasquinapaj caj bendiciuncunaga manami tincunchu lapan jaguishganchicunawan. Nestorwan Mariapis chayta cawaynincho ricargan (Is. 65:21, 22).

9. ¿Imataj yachacunqui Néstor y María rurapäcushganpita?

⁹ Nestorwan Mariaga Colombiapita capäcun, imaycancuna captinshi ali cawacärej. Paycuna nipäcun: “Más walcalawan cawapäcuyta munapäcurgä predicaciuncho más yanapacunäpaj, ichanga manchacärergämi walcalawan cawacur cushishga mana capäcunäpaj”. ¿Imataj rurapäcurgan? Jehová cawaynincho cutin cutin cuyacuywan yanapashgantashi yarpapäcurgan. Y chaynola rurananpaj yäracurshi ali pagashga aruynincunata jaguirergan; jina wasintapis ranticurgan y Diospita yachachicunanpaj necesitaycaj sitiuman aywapäcurgan chaycho yanapacunanpaj. Chay lapanta rurashganpita, Néstor nin: “Ishcäcunami ricargä Mateo 6:33 wilacushgan rasunpa cashganta. Manami imapis pishipämarganchu. Cananga unaypitapis más cushishga cawapäcö”.

10. ¿Imanirtaj runacunaga runa masinta manchacun?

¹⁰ Unaypitanami runacunaga quiquinpura alapa nacachinacärin (Ecl. 8:9). Waquincunaga autoridäyoj captin mana alicunata rurapäcun, juccunana runa masinta suwacun, escuelacho caycajcunaga estudiaj masincunata ashlipäcun y jurapan, o juccunaga familiancunatapis manami cuyapanchu. ¡Chaychi runacunaga runa masinta manchacun! ¿Imanotaj Satanás chaypita provechacun?

11, 12. ¿Imanotaj Satanás provechacun runacunata manchacuptinchi?

¹¹ Satanasga munan runacunata manchacushpanchi manana predicanapaj, y Jehová mandamashganchita mana cäsucunapaj. Paymi waquin autoridäcunaman yarpayta churashga Diospa sirvejnincunata chiquinanpaj  y gaticachananpaj (Luc. 21:12; Apoc. 2:10). Diablupa maquincho cay mundo captinmi, achca runacuna manacajcunata parlapäcun Jehovapa testiguncunapita, y luta yachachicuycunatapis yachachicun. Chaura waquincuna chaycunata creir, noganchipita burlacärin y mana alipa tratamanchi (Mat. 10:36). Pero Satanás rurashgancunaga manami manchacächimanchinachu, payga apostulcuna cawashgan wichanpis chayta rurashga (Hech. 5:27, 28, 40).

¹² Pero Satanasga manami gobiernucunalawanchu manchachimanchi. Jina provechacun waquincuna manchacuptin castancuna ima nipäcunanpaj Testiguman ticraptin. Juccunaga familiancunata masraj manchapäcun Testigo cashganraycur gaticachashga cananpaj cajpita. Paycunaga familiancunata alapa cuyapäcun, Jehovata reguinanpaj y cuyananpaj munapäcun. Chaymi Diospita y sirvejnincunapita manacajta parlaptin laquicärin. Pero öraga Diospa contrancho caycaj familiancunaga Testiguman ticraycunmi. ¿Imataraj rurashwan castanchicuna noganchipita imatapis musyayta mana munaptenga?

13. Castanchicuna contranchicho caycaptinpis Jehová amatar cuyamashganchipita seguro caycarga, ¿imanotaj yanapämanchi? (Salmo 27:10).

¹³ ¡Cuyaylapaj y cushicuypämi caycan Salmo 27:10 (leiriy) texto wilacushgan! Jehová amatar cuyamashganchita yarparga waquincuna contranchicho caycaptinpis manchacushunchu, payga bendicimäshunmi imaycacunata aguantashganchipita. Jehovaga necesitashganchicunatami goycalämäshun, yanapämäshun ali caycänapaj y yäracuyninchipis miraycunanpaj. Juc caj parrafucho Biniam wauguipaj parlashganchi chaytami ricashga.

14. ¿Imataj yachacunqui Biniam pasashganpita?

¹⁴ Biniamga Testiguman ticraycurgan autoridäcuna fiyupa gaticachananpaj cajta musyaycarpis. Payga wilacun: “Manami yarpargächu autoridäcuna pasaypa gaticachamänanpaj cajta. Pero masga manchacurgä taytä mana munashganta rurashgäpita piñacuptin, y familiäcuna conträman churacaptin y manana respetamänanpaj cajta musyar”. Chayno captinpis payga yarparargan Jehová cuyaycashganta y sirvejnincunata yanapashgantami. Biniam nin: “Yarpachacurgä imano Jehová sirvejnincunata  yanapashga micuynincuna mana captin, colorninraycur chiquishga captin y marcanraycur atacashga captin. Musyargämi Jehová bendecimänanpaj payman lapan shongüwan yäracuptë. Achca cutimi carcelman apapäcamargan y magapäcamarganpis. Pero chaycunapa pasarga cuentata gocurgä Jehovalaman yäracuptinchega pay yanapämanchimi”. Biniam wauguinchipäga Jehovami Taytan japuy cargan, y hermanunchicunaga familian japuymi.

15. ¿Imanirtaj öraga wanunapaj cajta manchacunchi?

¹⁵ Bibliachoga wanuyta tincuchin chiquimajninchitano (1 Cor. 15:25, 26). Imaylapis wanunapaj cajman yarpachacurga laquicunchimi, masraj quiquinchi gueshyaycaptinchi o maygan castanchipis chayno caycaptin. ¿Imanirtaj imaylapis wanunapaj cajman yarpachacurga manchacunchi? Jehovaga camamashcanchi imaycamapis cawacunapaj (Ecl. 3:11). Pero wanunapaj cajta ichiclata manchacuptinchega alimi, yanapämanchi cawayninchita cuidanapaj. Chaymi ima micushganchita cuidanchi, fisicata ruranchi, ima peligrucunapita witicunchi, doctorman aywanchi y jampicunatapis upunchi.

16. ¿Imanotaj Satanás provechacun wanuyta manchacuptinchi?

¹⁶ Satanasga musyanmi imaycanopapis cawayta munashganchita. Chaymi cawayninchita salvanapajraycur Jehovawan amistäninchita ushacächinapaj cajtapis yarpan (Job 2:4, 5). ¡Pero manami chaynochu! Satanasga pasaypa fiyu wanunanchipaj munan, chaymi wanuyta manchacushganchipitami provechacun Jehovata mana cäsucunapaj (Heb. 2:14, 15). Öraga fiyu runacuna manchachimanchi Jehovata sirviyta mana jaguiptinchi wanuchimänanchipaj y chaypa guepanchoga Satanasmi caycan. Jina ilajpita gueshyaptinchi Jehovata mana cäsucur imatapis lutanpa ruranapaj munan. Öraga doctorcunapis o Testigo mana caj familianchicunapis capazchi nimäshunmi yawarta churacunapaj Diospa leyninpa contrancho caycaptinpis. O capaz pipis nimäshunmi Diospa Palabranpa contrancho caycaj jampicunata chasquinapaj.

17. Romanos 8:37-39 wilacushganno, ¿imanirtaj wanucuytaga manchacushunchu?

¹⁷ Manami pipis wanucuytaga munanchichu, pero musyanchimi imaylapis wanuptinchega, Jehová jinala cuyaycämäshunmi (leiriy Romanos 8:37-39). Jehovata cuyaj wanojcunaga paypa yarpaynincho caycan, manami pitapis gonganchu (Luc. 20:37, 38). Jehovaga wanushgacunata cawarachimuyta munaycan (Job 14:15). Payga cuyashga Wamranta cachamurgan noganchiraycur wanunanpaj chaynopa imaycamapis cawacunapaj (Juan 3:16). Musyanchimi Jehová amatar cuyamashganchita y cuidamashganchitapis. Chaymi gueshyaptinchi o pipis jurapamaptinchi wanuchimänanchipäga, jinala Jehovata cäsucunchi. Aumi, payta mañacunchi consolamänanchipaj, calpata tarichimänanchipaj y yachayta gomänanchipaj. Chaytami Valeria runanwan rurapäcushga (Sal. 41:3).

18. ¿Imataj yachacunqui Valeria pasashganpita?

¹⁸ Valeria 35 watayoj caycaptinshi doctorcuna nergan cáncer gueshyawan caycashganta. Payga wilacun Jehová cuyashganta imano yanapashgantami wanuyta mana manchacunanpaj. Cayno nin: “Doctorcuna cancerwan caycashgäta nimananpäga manami shuyarargächu y cawacuyta munarga chayta operacunapämi cargan, pero manami facilchu  cashga. Achca doctorcuna yawarniynaj operamayta munajchu. Manchacashga caycargä, pero, Jehovata cäsucuyta munar ‘yawartaga manami churacushächu’ nergä. Lapan cawaynëcho Jehová tucuynopa cuyamashganta ricar, canan noga payta cuyashgäta ricächicuyta munargä. Cada cadala doctorcuna mana ali noticiata gomaptin más calpata tarej cä Diablupa contranman churacänäpaj. Jehovatami cushichiyta munargä. Tiempuwanga yawarniynaj operamargan y lapan alimi cashga. Saludnëraycur luchaycärämi, pero Jehovaga lapan necesitashgäcunata gopäcamargan. Yarpämi juc semana pishiycaptin doctorcuna cancerwan caycashgäta nimänanpaj, chay semana reuniuncho “Afrontemos con valentía los golpes de la vida” yachachicuyta estudiapäcushgäta.​ * Chayga alapa alimi cashga, cutin cutin leipäcoj cä. Jehovatami agradecicö cay yachachicuypita y waquin yachachicuycunapitapis, caycunaga ishcäcunata yanapämargan jaucala caycänapaj y ali cajta acranäpaj”.

19. ¿Imataj ichiclacho pasanga?

¹⁹ Jehovami achca hermanunchicunata yanapashga imaycacunata aguantananpaj y Diablupa contranman churacänanpaj (1 Ped. 5:8, 9). Gamtapis yanapäshunqui chayta ruranayquipaj. Payga ichiclacho Jesusta y 144.000 cajcunata mandanga “Diablu rurashqankunata ushakätsinanpaqmi” (1 Juan 3:8). Chaypitana cay Pachacho Diospa sirvejnincunaga ricashun aunimashganchita imano cumplicunanpaj cajta, payga nimanchi: “Manami pipis nakatsishunkipaqnatsu. Jawka kawarmi pitapis mana mantsakunkipaqnatsu” (Is. 54:14; Miq. 4:4). Chay junaj chayamushgancama calpachacushun manchacuycarla mana caycänapaj.

20. ¿Imataj yanapämäshun ima manchacushganchita vencinapaj?

²⁰ Cada cadala masraj yäracushun Jehová cuyamashganchita y chapämänanchipaj cajmanpis. Chaypäga yarpachacushun imano Jehová sirvejnincunata yanapashganta y waquincunatapis chaypita parlapäshun. Jina ama gongashunchu quiquinchitapis Jehová imano yanapämashganchipita imayca mana alicunapa pasashganchipita. Jehovaga yanapämäshun ima manchacushganchicunatapis vencinapaj (Sal. 34:4).