1. ¿Imataj Jehová aunipan juchancunapita arrepenticojcunata?

 JEHOVAGA Camacojninchi, Juezninchi y leycunata camacächej, jina cuyacoj Taytanchimi caycan (Sal. 100:3; Is. 33:22). Chaymi juchalicuptinchi y shongupita arrepenticuptinchega manami perdunamanchilachu, sinoga munaycunmi chayta rurananpaj (Sal. 86:5). Isaías profetanwan nishganga noganchitapis shacyächimanchimi, cayno nergan: “Jutsaykikuna pukano kaptinpis rajunöraqmi yoraq kankipaq” (Is. 1:18).

2. Waquincunawan jaucala cawacuyta munarga, ¿imatataj rurashwan?

² Juchasapa captinchimi öraga imanolapapis waquincunata ofendiycunchimi, capaz canman rurayninchicunawan o parlashganchiwanpis (Sant. 3:2). Chayno captinpis waquincunawan ali amigo cayta puedinchimi, chaypäga jucninchi jucninchi perdunanacushwan (Prov. 17:9; 19:11; Mat. 18:21, 22). Juccunawan imalapitapis jagayächinacur imarga Jehovaga shuyaran perdunanacunanchipaj (Col. 3:13). Aumi, imayca juchanchicunapita Pay perdunamashganchino noganchipis waquincunata perdunaycushwan (Is. 55:7).

3. ¿Imatataj canan yachacushun?

³ Cay yachachicuycho yachacushun imanotaj Jehová perdunacoj cashganno, noganchipis perdunacoj cashwan. ¿Ima juchacunataj ancianucunataraj wilashwan? ¿Imanirtaj Jehová munan jucninchi jucninchi perdunanacunapaj? ¿Y imatataj yachacunchi waquin hermanucuna juccunapa juchancunaraycur alapa nacashganpita?

4. 1) Juc cristiano jatun juchata ruraycuptenga, ¿imatataj ruranman? 2) ¿Imatataj ancianucuna ruranman?

⁴ Congregaciuncho pipis jatun juchata ruraycuptenga ancianucunata wilanan. 1 Corintios 6:9, 10 textucunacho chay juchacunapita waquilanlata wilacun. Chay juchacunata rurajcunaga Diospa leyninta manacajman churan. Chaymi juc cristiano chayno maygan juchatapis ruraycuptenga Jehovata mañacunman perdunaycunanpaj y congregaciunpita ancianucunawanpis parlapacärinman (Sal. 32:5; Sant. 5:14). ¿Imatataj ancianucuna ruranman? Jehovalami pitapis lapan juchancunapita perdunaycun y Wamran wanushganraycur chayta ruran. * Pero Jehovaga congregaciuncho ancianucunata churashga Biblia nishganno decidinanpaj, juchayoj caj congregaciunpita gargushga cananpaj o manapis (1 Cor. 5:12). Chaypäga ancianucuna cayno tapucärinman: ¿aproposituchuraj chay juchata ruraycushga?, ¿rurashgantaga pacarächishgachu?, ¿ayca tiempuna chay juchata ruraycargan? Y mana chaylachu, caynopis tapucärinman: ¿rasunpachu shongunpita arrepentido caycan? y ¿imacunataj caycan Jehová perdunashganta ninapaj? (Hech. 3:19).

5. ¿Imanotaj congregaciuncho caycajcunata yanapan ancianucuna rurashganga?

⁵ Juchayojta atiendinanpaj ancianucuna shuntacaptin paycunaga Diosta mañacärin y Biblia nishganno rurananpaj calpachacärin (Mat. 18:18). Y cayga, ¿imanotaj yanapacun congregaciuncho caycajcunata? Juchayoj caj mana arrepenticuptin congregaciunpita gargupäcun, chaynopa waquincunata juchaman mana ishquichinanpaj (1 Cor. 5:6, 7, 11-13; Tito 3:10, 11). Y juchayojtapis yanapan cuentata gocunanpaj pasaypa mana alita rurashganta y Jehovapa perdunninta ashinanpaj (Luc. 5:32). Juchayoj caj rasunpa arrepentido caycaptenga, ancianucuna Jehovata ruwacärin yanapänanpaj yapay amigunman ticrananpaj (Sant. 5:15).

6. ¿Pipis congregaciunpita gargushga captenga Jehová perdunanmanchuraj?

⁶ Juc cristiano juchata rurashganpita mana arrepenticuptenga congregaciunpitami gargushga canga. Y jinan naciunnincho autoridäcunapa leyninta mana cäsucushga carga, ancianucunaga manami chapangachu juchancunaraycur ima pasananpaj cajpita. Jehová autoridäcunata churashga leyta mana cäsucojcunata juzgananpaj y castigananpäpis, chayga canman arrepentido captin o manapis (Rom. 13:4). Pero tiempuwan cuentata gocuptin mana alita rurashganpita, shongupita arrepenticuptin y calpachacuptin yarpaynin y rurayninpis alina cananpaj, Jehovaga perdunaycungami (Luc. 15:17-24). Pasaypa fiyu juchata rurashga carpis, perdunashga canmanmi (2 Crón. 33:9, 12, 13; 1 Tim. 1:15).

7. ¿Imanotaj perdunaycunchi contranchicho juchalicojta?

⁷ Jehovaga musyanmi pitapis perdunaycunanpaj o manapis, manami noganchipitachu caycan, chayta musyarga cushichimanchi. Chayno captinpis maquinchichomi caycan juc rurayta ruranapaj. ¿Imapitaj parlaycanchi? Capazchi pilapis ofendimashcanchi y jatun juchatapis contranchicho rurashga, y nircur ‘disculpaycalämay’ o ‘perdunaycalämay’ nimashcanchi o manapis. Chauraga imano captinpis calpachacushwanmi payta perdunaycunapaj, cayga  ninanmi jagayashgala o rabiashgala paywan mana caycänapaj. Y öraga cayta ruranapaj sasarämi canman, masraj alapa laquichimashganchi captin. La Atalaya del 15 de septiembre de 1994 cayno nin: “Juchayoj cajta perdunaycuptinchega manami ninanchu imapis mana pasashganta. Sinoga perdunaycuptinchega ima ruramashganchita Jehovapa maquincho churanchi quiquin juzgananpaj. Payga pipitapis más ali Juez caycan”. ¿Imanirtaj Jehová munan waquincunata perdunaycunapaj y ima ruramashganchita maquincho jaguirinapaj juzgananpaj?

8. ¿Imata rurartaj Jehová cuyapämashganchita agradecicunchi?

⁸ Perdunacoj captinchega, Jehová cuyapämashganchita agradecicunchi. Juc cuticho Jesús Jehovata tincuchergan juc ali patronwan ashmayninta perdunashganta achca jaganta pagayta mana puediptin. Chay ashmay ichanga ashmay masinta manami perdunarganchu jagan walcala captinpis (Mat. 18:23-35). Caywanga Jesús yachachicurgan Jehová amatar cuyapämashganchi agradecicurga, waquincunata perdunaycunapaj calpachacushunmi (Sal. 103:9). Y caypita parlarmi guepa watacunacho La Atalaya revista nergan: “Waquincunata ayca cuti perdunaptinchipis, manami tincunchu Jesús wanushganraycur Jehová cuyapämashpanchi perdunamashganchiwan”.

9. ¿Pïcunatataj Jehová cuyapan? (Mateo 6:14, 15).

⁹ Perdunacoj captinchirämi Jehovapis perdunamäshun. Payga cuyapäcojcunatami cuyapan (Mat. 5:7; Sant. 2:13). Jesuspis chayta yachachicurgan discipuluncunata yachachiptin imano mañacärinanpaj (leiriy Mateo 6:14, 15). Y Job cawashgan wichanpita Jehová mayna chayta yachachicurgan. Elifaz, Bildad y Zofar runacunaga parlaynincunawan Jobta pasaypa laquichergan. Chaymi Jehová Jobta mandargan paycunapaj mañacunanpaj. Job chayta ruraycuptinraj Jehová payta bendiciycurgan (Job 42:8-10).

10. ¿Imanirtaj piwanpis jagayashgala caycarga quiquinchimi nacanchi? (Efesios 4:31, 32).

¹⁰ Jagayashgala caycarga quiquinchimi nacanchi. Jagayashgala caycarga lasaj guepita aparishga caycajnomi caycan, y Jehovaga munan chay guepita jitarinapaj (leiriy Efesios 4:31, 32). Payga consejamanchi: “Fiyucuna-jananga ama rabyashalla cacuychu” nir (Sal. 37:8). Cay consejuta cäsucurga yanapämanchi mana yarpachacushpa ali caycänapaj (Prov. 14:30). Pitapis nanapararla caycarga venenuta upucushgan japuy caycan. Chayga quiquinchitami malogramanchi o dañamanchi, manami ofendimashganchitachu. Waquincunata perdunaycuptinchi ichanga quiquinchitami juc regaluta ruracuycanchi (Prov. 11:17). Aumi, jaucala ricacunchi y Jehovatapis cushishgala sirviycäshun.

11. ¿Ima nintaj Biblia vengacunapaj cajpita? (Romanos 12:19-21).

¹¹ Vengacunapaj trucan Jehovapa maquinman jaguiycushun. Jehovaga manami munanchu vengacunapaj contranchicho juchalicojpita (leiriy Romanos 12:19-21). Juchasapa cashpanchi lapantaga manami musyanchichu, Jehovami ichanga lapanta musyan y ali juzgan (Heb. 4:13). Y öraga rabiashgala o laquishgala caycaptinchega imatapis lutanpa ruraycunchi. Chaymi Santiaguga escribergan pipis “rabyarga Dios munashanta manami ruranchu” (Sant. 1:20). Imaypis seguro caycashwan Jehová rurashgancunaga ali cashganta y justiciata rurananpaj cajta.

12. ¿Imataj ricacämun waquincunata perdunaptinchi?

 ¹² Perdunacuptinchega Jehová juzgananpäna yäracunchi. Waquincuna ruramashganchita Diospa maquincho cachaycuptinchega, seguro caycanchi Pay alchananpaj cajta. Diosninchega aunimanchi canan wichan ima pasamashganchicunaga mushoj Pachacho “gongacashami canga. Chaytaga manami pipis yarpangapänachu” (Is. 65:17). Pero pipis pasaypa mana alita ruramashganchi captenga, ¿jagayashgala o rabiashgala mana canapaj puedinchicu? Waquincuna wilacamushganta ricärishun.

13, 14. ¿Imataj yachacunqui Tonywan José pasashganpita?

¹³ Achca hermanucuna waquincunata perdunaycurgan contrancho pasaypa mana alita rurashga captinpis. Chayta rurashganga, ¿imanotaj paycunata yanapargan?

¹⁴ Tonyta * ima pasashganta ricärishun, payga Filipinas naciuncho tiyan. Tony Testiguman manaraj ticrarshi mayor caj juc wauguintash José jutiyoj runa wanuchishgantash musyaycurgan. Chayshi Tonyga rabiacoj y magacoj runa car vengacuytash munargan. Josega chayta rurashganpita carcelcho wichgarashga caycargan. Y tiempuwan José carcelpita yarguptinshi, Tonyga jurargan tariycurga wanuchinanpaj, chayshi pistolanta rantergan. Pero chay wichanlash Testigucunawan Bibliapita yachacur galaycurgan. Payga nin: “Bibliapita cada cadala yachacur tantiacurgä geniüta cambianäpaj, rabiashgala manana canäpaj”. Tonyga bautizacurgan y tiempuwanga congregaciunnincho ancianuno yanapacurgan. ¡Mayraj cushicurgan Josepis Testiguman ticrashganta musyaycur! Paywan tincur macalanacärergan, y Tonyga Joseta nergan perdunaycushganta. Tonyga manami camäpacunchu tantiachicunanpaj imano ricacushganta Joseta perdunashganpita. Pay perdunacoj cashganpita Jehová bendeciycurganmi.

15, 16. ¿Imataj yachacunqui Peterwan Sue pasashganpita?

¹⁵ 1985 watacho, Peterwan Sue Diosta aduranapaj wasicho reuniuncho caycaptinshi ilajpita juc bomba pashtarcamurgan.  Juc runa chay bombata churashga cargan. Chayraycurshi Sue paninchega imapis mushcuptenga mayannachu, ñawinpis y rinrinpis malogracashga quedargan. * Cada cadalash cayno tapucärej: “¿Piraj chayno pasaypa mana alita ruraycushga?” nir. Achca watacuna pasaptinnash autoridäcunaga chay runata charirgan y carcelcho wichgarachergan wanunancama caycänanpaj. Chay runata perdunashganta o mana Peterwan Sue panita tapupaptin, paycuna cayno nipäcurgan: “Jehovaga yachachimanchi pipis rabiashgala o jagayashgala caycaptenga gänasninpis canchu, mana alicunata yarpan y gueshyapis charicurcunmanmi. Chaymi galananlapita Jehovata ruwacärergä yanapämänanpaj rabiashgala mana carcaycänapaj”.

¹⁶ ¿Peterwan Sue perdunacoj cananpäga facilchuraj cashga? Manami. Paycuna cayno nipäcun: “Sue pasashganraycur nacaptenga öraga rabiacunchimi. Pero calpachacunchi chaycunalaman mana yarparäcunapaj, chayta ruraptinchega alina ricacunchi”. Caytapis nipäcun: “Chay runa imaylapis Testiguman ticraptenga Jehovapa marcanman shacamushganta alimi chasquishun. Imapa pasashgäcunaga yachachimashcanchi Bibliapa tantiachicuynincunaga yanapämanchi pitapis perdunaycuptinchega lasaj guepita jitariycushganchino cashganta. Jina ichiclacho Jehová lapanta alchananpaj cajta musyarmi shacyächimanchi”.

17. ¿Imataj yachacunqui Mayra imapa pasashganpita?

¹⁷ Mayra Testiguman ticraptenga runayojna y ishcay wamrayojna caycargan, pero runanga Bibliapita yachacuyta munarganchu. Tiempuwanshi juc warmiwan engañaycurgan y familiantapis jaguirergan. Mayra yarpan: “Runä jaguipäcamaptin pasaypa laquicurgä. Pay traicionamashganraycur pïmanpis confiacurgänachu, shongö nanaycurgan, culpä cashganta yarpargä y rabiashga caycargä”. Runanwan manana caycaptinpis traicionashgantaga manami gongaycurganchu. Mayra nin: “Chaynola achca tiempo caycaptë cuentata  gocurgä Jehovawan amistänëta ushacaycächishganta y waquincunawanpis mana ali apanacuycashgäta”. Canan Mayraga chaycunaman yarpachacunnachu, cacharishgan runanta imapis mana ali pasanantaga mana munanchu, Bibliapita yachacunanpaj shuyaran. Mayraga shamoj tiempulaman yarparan. Wamrancunata japalanla ashmashga carpis, cananga cushishgami Jehovata sirvircaycan wamrancunawan y wilcancunawapis.

18. Jehová pipitapis más munayniyoj Juez caycaptenga, ¿imapitataj seguro caycashwan?

¹⁸ Jehová pipitapis más munayniyoj Juez captin, noganchega manami yarpachacunchinachu waquincuna imano juzgashga cananpaj, quiquinmi chayta ruranga. Chayga cushichimanchimi (Rom. 14:10-12). Jehovaga musyanmi ima ali cashganta y ima mana ali cashgantapis, chaymi imaypis seguro caycashwan pay juzgaptenga ali cashganta (Gén. 18:25; 1 Rey. 8:32). Jehová mana ali cajta rurananpäga yarpaylapis mana yarpashwanchu.

19. ¿Imatataj Jehová ichiclacho ruranga?

¹⁹ Jucharaycur nacashganchita y imayca pasashganchitaga ichiclacho Jehová chay lapanta alchacächenga. ¡Mayna munanchimi chay junaj chayamunanpaj! Paymi ushacächenga tucuy gueshyacunata y ima nacachimashganchicunatapis (Sal. 72:12-14; Apoc. 21:3, 4). Aumi, chay lapancunaga gongacashganami canga. Chay junaj chayamushgancama Jehová pay nirajta camamashganchita agradecicushun y waquincunawan perdunanacur cawacushun.