1. 1 Pedro 5:2 nishganno, ¿imata rurananpätaj ancianucuna calpachacärin?

 JEHOVÁ congregaciuncunacho ancianucunatami acrashga cuyashgan siervuncunata cuidananpaj. Paycunaga lapan shongunwanmi calpachacärin Jehová munashganno hermanuncunata yanapänanpaj y ali michicoj capäcunanpaj (Jer. 23:4; leiriy 1 Pedro 5:2). ¡Alapami cushicunchi congregaciuncunacho chayno hermanucuna captin!

2. ¿Ancianucunaga ima sasacunapataj pasapäcun?

² Ancianucunapäga imayca ruraynincuna caycanmi, chayraycur öraga ima sasacunapapis pasan. Congregaciunta pushananpäga aliraj calpachacunan. Estados Uniduscho ancianuno yanapacoj Tonypita parlarcushun. Payshi tantiacurgan imaycacunata ruraycashgancho más humilde cananpaj. Pay wilacun: “Pandemia galaycuptinmi reuniunta, predicaciunta imano camacächinapaj caycargan, imalatapis ruranapaj captin ‘manami’ nej cächu. Ichanga alapa calpachacuptëpis, caycarganrämi imalatapis más ruranäpaj. Chayraycur tiempö alapa cargannachu Bibliata estudianäpaj y mañacunäpäpis”. Kosovo naciuncho Ilir hermanunchipitana parlarcushun. Guerra cashganraycur, sucursalpita wilacuycunata cäsucunanpäga sasami cargan. Payga nin: “Peligrucho caycaj hermanucunata yanapänapaj sucursalpita hermanunchicuna nimaptin, alapa manchacurgä. Masga chay wilacuycuna manami facilchu captin ruranapaj”. Asia naciunpita Tim hermanunchina wilacun, misioneruno ruraynincunata cumplinanpäga sasa cashganta: “Öraga calpaynaj y pasaypa laquishga ricacoj cä” nin. ¿Ancianucuna chaycunapa pasarga imacunatataj rurapäcunman?

3. ¿Lapanchipis imataj yachacushwan Gedeonpita?

 ³ Gedeón imano cashganpita alimi caycan ancianucuna yachacärinanpaj (Heb. 6:12; 11:32). Payga alimi yanapaj y pushaj Jehovapa siervuncunata (Juec. 2:16; 1 Crón. 17:6). Canan wichanpis ancianucuna calpachacärin, sasa tiempucho caycarpis Jehovapa siervuncunata ali pushananpaj y cuidananpaj (Hech. 20:28; 2 Tim. 3:1). Gedeonga manami japalan imatapis rurarganchu, humilde y cäsucoj cargan, jina sasacunapa pasarpis aguantarganla. Paypita ancianucuna ali yachacärinman. Gedeón rurashganga congregaciuncho caycajcunatapis yanapanga ancianucunapa ruraynincunata valurananpaj y shongupita yanaparcunanpaj (Heb. 13:17).

4. ¿Imanotaj Gedeón musyachicurgan lapantaraj rurayta mana munashganta y humilde cashgantapis?

⁴ Gedeonga humilde car lapantaraj rurayta manami munarganchu. b Juc ángel Gedeonta niptin Jehová acrashganta israelitacunata librananpaj, pay humilde car cayno nergan: “Manasés trïbu runakunacho noqapa aylüqa waktsami kaykan. Tsaynöpis noqaqa alqu wiruqlanpaqpis manami välïtsu” (Juec. 6:15). Gedeonga yarpargan Jehová mandashgantami rurayta mana puedinanpaj. Ichanga Jehovaga musyarganmi yanapacuyninwan Gedeonta lapanpis ali yargunanpaj.

5. ¿Imacunapa pasartaj ancianucuna humilde cashganta ricacämun?

⁵ Ancianucunaga humilde cashganraycurmi lapantaraj rurayta munapäcunchu (Miq. 6:8; Hech. 20:18, 19). Imatapis rurar ali yarguptin, ‘nogano pipis canchu’ nipäcunchu, jina imalachopis pantarcuptenga ‘imapäpis valëchu’ nirpis yarpachacunchu. Ichanga imaycacunapa pasashgancunachomi ricacämunga humilde cashgan o manapis. Cayman yarpay, juc ancianupa imayca ruraynincuna caycan, ichanga lapanta manami cumplinchu. Imalatapis ali ruraptenga waquincuna felicitaycun y pantariptenga jamurpayta galaycärin. Chaycunapa pasarga, ¿imanotaj Gedeón rurashgan yanapanman ancianucunata?

6. Gedeón rurashganno, ¿imatataj ancianucunapis rurapäcunman? (Fotutapis ricay).

⁶ Gedeonga waquincuna yanapänanpämi  mañacurgan. Chaynolami ancianucunapis waquin hermanucuna yanapänanpaj mañacunman (Juec. 6:27, 35; 7:24). Näga parlashganchi hermanunchi Tony, cayno wilacun: “Imano ashmashga cashgäraycurmi, mana puedishgä ruraycunatapis aunicoj cä ruranäpaj. Ichanga decidirgä Diosta aduranapaj horacho chaypita parlapacärinäpaj, y warmëtapis nergä nimänanpaj ima yarpashganta. Nircur Tal como Jesús, capacitemos a otros y confiemos en ellos nej videuta ricargä jw.org paginacho”. Chaypita Tony hermanunchega waquin hermanucunatana mañacurgan yanapänanpaj, pay cayno nin: “Congregaciunchoga lapanmi ali atiendishga caycan y nogapäpis tiempö caycanmi Jehovawan amistänëta más sinchiyächinäpaj”.

7. Ancianucuna jamurpashga captin, ¿imataj rurapäcunman Gedeonno? (Santiago 3:13).

⁷ Ancianucuna, pipis jamurpäshuptiqui jaucala capäcuy, y Gedeón rurashganpis yanapäshunquimi. Gedeonga juchasapa runa carpis jaucala caycargan Efrainpita runacuna gayapayparaj rimapaptin (Juec. 8:1-3). Rabiacunanpaj trucanga shumajla wiyargan, y cuyacuywan parlapargan. Gedeonno ancianucunapis jamurpajnincunata shumajla wiyan y cuyacuylawan parlapan (leiriy Santiago 3:13). Chayno rurashgancunawanmi, congregaciunchopis jaucala capäcun.

8. Ancianucunata felicitar ‘alitami rurashcanqui’ nipäcuptin, ¿imataj paycuna rurapäcunman?

⁸ Lapanchopis Jehovalata alabashun. Israelitacunaga Gedeonta alabayta munargan madianitacunata venciptinmi, ichanga payga nergan Jehovapa yanapacuyninwan vencishganta (Juec. 8:22, 23). Chaynolami ancianucunapis Gedeón rurashganno lapanchopis Jehovalata alabapäcunman (1 Cor. 4:6, 7). Chaymi juc ancianuta felicitaptin ali yachachicushganpita, chay ancianuga ninman ‘lapanchitami Jehovaga Palabranwan yachaycalächilämanchi’ nir. Öraga ancianucuna caynopis tapucärinman: “¿Yachachicushgäwanga Jehovatachu alabaycä? ¿O noga ali ricashga caytachu munä?” nir. Hermanunchi Timothy pasashganpita yachacushun. Ancianuman ticraptinshi, discurso rurayta alapa gustaj. Cayno wilacun: “Shumaj preparacoj cä jatun tincuchicuycunawan discursüta galaycunäpaj, y chayraycur hermanucunaga alabapäcamaj. Pero chaywanga Jehovata alabananpaj trucan noga ali ricashga cayta ashiycargä”. Tiempuwanga Timothy hermanunchi cuentata gocurgan masga Jehová alabashga cananpaj, chaymi yachachicuynincho cambiucunata rurargan (Prov. 27:21). Chayta rurashganpita payga nin: “Canan hermanucunaga nipäcaman imano discursö yanapashganta pruebacunata o problemacunata aguantananpaj y Jehovaman masraj guelicamunanpaj. Chayta wiyarga alapa cushichiman”.

9. ¿Imacunachotaj ricacämurgan Gedeón cäsucoj y mana manchacoj cashganta? (Garancho caycaj dibujuta ricäriy).

⁹ Israelitacunapa jueznin Gedeón captin, Jehová payta nergan Baalpaj rurashgan altarta ushacächinanpaj. Chaychomi ricacämunman cargan mana manchacoj y cäsucoj cashganta (Juec. 6:25, 26). Tiempuwanpis, Gedeón chaychica soldaducunata shuntaptin, Jehová ishcay cuticho nergan walcayächinanpaj (Juec. 7:2-7). Jina Jehová mandashgantami cäsucur chiquejnincunaman chacaypa yaycurgan vencipäcunanpaj (Juec. 7:9-11).

10. ¿Imanotaj musyacanman ancianucuna cäsucoj cashganta?

 ¹⁰ Ancianucunapis cäsucoj canmanmi (Sant. 3:17). Maygan ancianupis cäsucoj captenga, manami shuyaranchu waquincunala Biblia y Diospa marcan nishganta cäsucärinanpaj, quiquincunaraj chayta rurapäcun. Ichanga öraga sasami canman chayta rurananpaj. Masraj chaylaraj yargamushgan wilacuycunapita altanto mana caycaptin. Öraga caynopis capaz tapucunman, ‘¿cay wilacuyta cäsucuptëga alichuraj caycan o mana?’ nir. Y, ¿imaraj canman vidanta peligruman churar imalatapis rurananpaj caycaptenga? Chaycunapa pasarga, ¿imanotaj ancianucunaga Gedeonno cäsucoj capäcunman?

11. ¿ Imataj yanapan ancianucunata cäsucoj cananpaj?

¹¹ Wilacuycunata chasquicur cäsucäriy. Jehovaga Gedeonta nergan taytanpa altarninta imano juchuchinanpaj, Jehovapaj juc altarta maycho sharcachinanpaj y ima uywata rupachinanpaj. Jehová mandashgancunata Gedeón jucla cäsucurgan. Canan wichanpis ancianucunaga imayca wilacuycunatami chasquipäcun cartacunacho o jucnopapis. Chaycunaga yanapaycalämanchi Jehovawan más amigo canapaj y ali caycänapäpis. Ancianucunataga alapami cuyayculanchi, paycuna cäsucoj capäcuptenga yanapacun congregaciuncho lapanchi ali caycänapaj (Sal. 119:112).

12. ¿Imanotaj ancianucuna Hebreos 13:17 nishganta cäsucärinman Diospa marcancho ima cambiulapis captin?

¹² Jucnopa yanapacunayquipaj nishuptiqui, chayno ruray. Gedeonta Jehová nergan walca soldaducunalawan quedacunanpaj (Juec. 7:8). Öraga caynochi yarpargan: “¿Imanirtaj chayno Jehová mandaycäman? ¿Ganashächuraj guerrata walcajcunalawan?” nir. Chayno yarparpis Jehovata cäsucurganmi. Ancianucunapis pushacoj hermanucunapa wilacuyninta chasquicur cäsucärin (leiriy Hebreos 13:17). 2014 watacho Jehovapa testiguncunata Pushaj hermanucuna wilacärergan Diosta aduranapaj Wasicuna y Asambleapaj Localcunapis imano sharcachipäcunanpaj (2 Cor. 8:12-14). Unaychoga congregaciuncunata guellayta prestarganmi Diosta aduranapaj wasita sharcachinanpaj, nircur chay guellayta cutichipäcamoj. Canan ichanga may chaypita congregaciuncuna aycalatapis apachicushgan guellaywan chay lapanta rurapäcun. Chayta musyaycur José jutiyoj ancianuga nergan: “Waquin naciuncunacho caycaj congregaciuncunapächi chayga. Caychoga ni juclaylapis Saluncunata sharcachengachu”. Chayno yarparpis cäsucurganmi. ¿Imanir? Pay cayno nin: “Yarpargä Jehovaman lapan shongüwan yäracunäpaj Proverbios 3:5, 6 textucuna nishganno. Achca Saluncunata sharcachirpis, masga yachacurgä imano lapanchi yanaparcunapaj chay  ruraycunapaj. ¡Chayga cushicuypämi cashga!”.

13. 1) ¿Imatataj Gedeón musyarganmi? 2) ¿Imataj rurapäcunman ancianucunaga Gedeonno capäcunanpaj? (Fotutapis ricay).

¹³ Mana manchacuypa Jehovapa munayninta rurapäcuy. Manchacuycarpis y cawaynin peligrucho captinpis Gedeonga Jehovata cäsucurganmi (Juec. 9:17). Payga musyarganmi Jehová yanapänanpaj Israel masincunata cuidananpaj, chaymi jaucala ricacurgan. Testigucunata chiquishgan naciuncunacho tiyaj ancianucunaga Gedeonno valiente capäcun. Paycunaga reuniuncuna y predicaciunpis cananpaj camacächin. Manami manchacunchu carcelman apacäriptinpis, magashga captinpis o aruyninpita gargushga captinpis. c Jatun nacay wichanchoga ancianucuna cawaynintapis peligruman churar valiente cangapaj ima wilacuycunatapis cäsucärinanpaj. Capaz canga juiciupaj wilacuyta wilacärinapaj o Magogpita Gog mana ushacächimänanchita imata ruranapaj (Ezeq. 38:18; Apoc. 16:21).

14. ¿Gedeón pasaypa utishga caycarpis imataj rurargan?

¹⁴ Gedeonga alapa calpachacurganrämi israelitacunata ali pushananpaj. Juc cuticho Gedeonwan soldaduncunaga pasaypa utishga carcaycargan madianita runacunawan peliaycashganpita. Madianita runacuna gueshpir aywacäriptin, paycunaga guepanta gaticachar aywargan. Jordan mayutapis chimparganrämi chiquejnincunata taripaycur wanuchinanpaj (Juec. 7:22; 8:4-12). Chacaycho peliar madianitacuna gueshpishgan näni pasaypa sasa purinanpaj captinpis chaytami rurapäcurgan.

15. ¿Imacunaraycur öraga ancianucuna yamacashga o pasaypa uticashga ricacunman?

¹⁵ Ancianucuna öraga pasaypa uticashga o yamacashgapis ricacunman congregaciunta y familiantapis ricananpaj captin. Chayno ricacuptenga,  ¿imataj Gedeonpita yachacunman?

16, 17. 1) ¿Imataj Gedeonta yanapashga aguantananpaj? 2) ¿Imatataj ancianucuna mana gonganmanchu? (Isaías 40:28-31; fotutapis ricay).

¹⁶ Jehová calpayojyächishunayquipaj yäracuy. Gedeón chayta ruraptin, Jehová yanaparganmi (Juec. 6:14, 34). Juc cuticho, ishcay rey madianitacuna camëlluncunata muntacurcur gueshpircaycaptin Gedeonwan soldaduncunaga guepanta chaquilapa aywargan, y taripaycur wanurachergan (Juec. 8:12, 21;). Canan wichan ancianucunapis yäracärinmanmi Jehová imaypis yanapänanpaj cajta, payga “manami janjampaykachantsu ni utikantsu”. Chaymi yäracäriy imapäpis Jehová calpalanta goycushunayquipaj (leiriy Isaías 40:28-31).

¹⁷ Matthew hermanunchega hospitalcunacho hermanucuna imano atiendicunanpaj yanapacun. Ricärishun imataj payta yanapashga aguantananpaj. Payga nin: “Achca cuti, pasaypa uticashga ricacuptë, Jehovatami cutin cutin mañacurgä calpalanta goycalämänanpaj hermanunchicunata yanaparcunäpaj. Cawaynëcho ricashcä Filipenses 4:13 imano cumplicushganta. Jehovaga calpalanta goycalämashga aguantanäpaj”. Hermanunchicunata ali ricananpaj, ancianucunaga Gedeonno imaycatarämi rurapäcun. Ichanga öraga cuentata gocärin lapantaraj rurayta mana camäpacushganta. Chayno captinpis, lapan shongunwan yäracärin Jehová mañacushgancunata wiyananpaj y calpanwan imaypis yanapänanpaj (Sal. 116:1; Filip. 2:13).

18. ¿Imacunataj ancianucuna Gedeonpita yachacärinman?

¹⁸ Ancianucunaga Gedeonpita yachacärinman humilde cananpaj. Masraj ima cargutapis chasquiptin, pipis ali aruycashganpita felicitaptin o washanta parlaptin. Y cay mundo ushacänanpäna caycaptin, calpachacunmanpis cäsucoj y mana manchacoj runacuna capäcunanpaj. Jina yäracärinman imacunachopis Jehová calpanwan yanapänanpaj. Chaychi ancianucunapita parlar apóstol Pablo nergan “lapantapis ali chaskiykulay”, paycunaga congregaciunraycur imaycataraj ruran y chaypita alapa agradecicuyculanchimi (Filip. 2:29).