1, 2. Canan wichan cawashganchega, ¿imanotaj tincun Lot cawashgan wichanwan?

 LOTGA alita ruraj runa cargan, chaymi Jehovata alapa respetar cuyashpan mana cäsucoj runacuna mana alicunata rurashganta ricar pasaypami chiquej. Bibliaga nin, “tsay markakunacho taq fiyu runakuna jutsata rurar kawapäkuptin” payga laquicur goyargan (2 Ped. 2:7, 8). Noganchipis Lot ricacushganno ricacunchi. May chaychopis ricanchi imano runacuna Diospa leynincunata manacajman churashganta, waquincunaga ni ichiclapis respetanchu. Cay mundo chayno captinpis, Diosnilanchita cuyar manchacuptinchega pay munashganno cawaj runa cashun (Prov. 14:2).

² Chaymi Jehová Proverbios libruwan shumaj shacyächimanchi imano chayta ruranapaj. Aumi, lapanchimi olgucuna, warmicuna, jovincuna, edayashgana cajcuna, chaycho caycaj consejucunapita yachacushwanmi.

3. ¿Imanir-raj shongunchitaga chapaycushwan Proverbios 17:3 nishganno? (Fotucunatapis ricay).

³ Runacunaga ricayta manami camäpacunchu shongunchicho ima caycashganta. Jehová ichanga lapantami rican y musyanmi ima yarpashganchitapis (leiriy Proverbios 17:3). Chaymi imaypis shongunchita chapaycushun imapis mana ganratananpaj. Chaypäga cada cadala payman masraj guelicushun (Juan 4:14; 1 Juan 5:18, 19). Chaynopa cuyashganchi y respetashganchipis miraycungapaj. Consejuncuna shongunchicho caycänanpaj calpachacuptinchega Jehovaga cuyaycalämäshunmi. Jina tantiacoj cashpan Satanás munashgancunata, ni cay munducho mana alicuna caycashgantapis rurashunchu.  Ima tentaciunlapis captin cayno tapucushwan: “Diosnilä amatar cuyamaptin y nogaraycur wamranta cachamushga captin, ¿imanir-raj payta laquichëman?” nir. Chayman yarparcurga Jehová chiquishgancunata chiquishun y yarpaylapis yarpashwanchu ima juchamanpis ishquinapaj (1 Juan 4:9, 10).

4. ¿Imanotaj juc cristianata yanapargan Jehovata manchacushgan?

⁴ Croaciapita Marta b jutiyoj cristianaga, fornicación jucha ruraytash munaycargan. Cayno wilacun: “Cutin cutin shongü mana ali munashganta rurayta munaj cä. Sasami cargan chayman yarpayta jaguirinäpaj. Ichanga Jehovata cuyar manchacushgämi yanapaycalämashga juchaman mana chayanäpaj”. Martaga yarpachacojshi chay mana ali munayninta ruraptin mana aliman chayachinanpaj cajta. Chauraga ima tentaciunlapis captenga juchamanga ama ishquishwanchu. Chayta rurarga Jehovata manami laquichishunchu y jinala payta sirviycäshun (Gén. 6:5, 6).

5. ¿Imataj yachacunqui Leo imapa pasashganpita?

⁵ Jehovata manchacoj runaga cuentata gocun mana ali amiguncuna mana alicunaman chayachinanpaj y juchancunatapis mana pacaycunchu. Leo cristianupita parlarcushun, payga Congo naciuncho tiyan. Bautizacushganpita chuscu watacuna pasariptinshi mana ali amigucunawan juntacar galaycurgan. ‘Noga mana alicunata mana ruraptëga juchaman mana ishquishächu’ nirshi yarpargan. Ichanga ichiclacho alapa upyayta y jucwan jucwan cacuytapis galaycurgan. Chaymannash payga yarpar galaycurgan Testigo taytancuna yachachishganta y unaycho cushish caycashganta. Chaura yarpachacurganshi cambiananpaj y congregaciunman cutirgan. Canan Leuga precursor especial y ancianuno yanapacun.

6. ¿Ima clase ishcay warmicunapita canan yachacurcushun?

 ⁶ Diosta mana cäsucoj runacunaga jucwan jucwan cacular y ganra ruraycunata o pornografía nishganta ricaycular cawacärin (Efes. 4:19). Chaymi alapa ali caycan jinala Jehovapita yachacurcunapaj, chaynopa payta manchacur mana alicunapita witicunapaj (Prov. 16:6). Cananga yachacurcushun Proverbios 9 caj capitulupita, chaychoga ishcay warmicunapita parlaycämun. Juc cajga tincun tantiacoj cashganwan y juc cajna mana tantiacoj cashganwan. c Lapanchimi cay capitulupitaga shumaj yachacurculäshunmi. Cay ishcay warmicunaga mana yarpachacojcunata cayno nipäcun: “Yanukushqä mikuyta mikunaykipaq y rurashqä vïnuta upunaykipaq fiestaman shapäkamuy” (Prov. 9:1, 5, 6, 13, 16, 17). ¿Ichanga jucnin jucnin nishganga maymantaj chayachicun? Ricärishun.

7. ¿Imataj pasan “mana tantiyakuq” warmita chasquipacojcunawan Proverbios 9:13-18 nishganno? (Dibujutapis ricay).

⁷ “Mana tantiyakuq” warmipita parlar galaycushun (leiriy Proverbios 9:13-18). Payga mana yarpachacojcuna wasinman aywananpaj gayacamur cayno nin: “¡Mana tantiyakuq mözukuna y jipashkuna! ¡Kayman shapäkamuy!”. Ichanga chay warmi nishganta chasquipacojcunaga manami musyapäcunchu wanunanpaj cashganta. Proverbios libruchoga juc warmicunapitapis wilacamunmi. Chaycho caycan runanta jarucoj warmi y jucwan jucwan cacoj warmipis. Paycunawan jaticarga “wanuytami tarinkipaq” nin (Prov. 2:11-19). Proverbios 5:3-10 textucunachopis nin wayrapacoj warmiwan jaticarga “manaraqpis aykätami ushakankipaq”.

8. “Mana tantiyakuq” warmi nishganta wiyajcunaga, ¿imataj yarpachacärinman rurananpaj?

⁸ “Mana tantiyakuq” warmi nishganta wiyajcunaga shumaj yarpachacärinman nishganta chasquipacunanpaj o manapis. Tantiarinapaj, pipis televisiunta o celularninta ricaycaptin ilajpita ganra fotucuna o pornografía nishgan yurimuptin o yarpaynilancho jucwan cacuyta munaptin, ¿imataraj chay hora ruranman?

9, 10. ¿Imanirtaj fornicación juchaman ishquishwanchu?

⁹ Proverbios librucho “mana tantiyakuq” warmiga nin: “Suwakuy yakuqa masmi mishkin”. ¿Ima ninantaj chayga? Juc runa warminwan casaracur ishcan punucäriptin o cacäriptenga Jehovapa ricaynincho ali carcaycan. Bibliachoga chaytami tincuchin chuya pucyupita  yacuta upuycashgantano (Prov. 5:15-18). Ichanga pipis Diospa leyninta mana cäsucur jucwan jucwan cacäriptenga, tincuchin ‘suwakuy yakuta’ upuycashgantano. Chayno clase runacunaga pacapaylapa chayta ruran y juchancunata pacaycur öraga ali tucärin cushish cawacuycashganta. Pero chayno yarparga quiquincuna engañacuycan, Jehovaga lapantami ricaycan. Chaymi mana munanchichu imapis Jehovapita raquicächimänanchipaj, chayga pasaypa laquicuypämi canman (1 Cor. 6:9, 10).

¹⁰ Imapitapis más aliga caycan “mana tantiyakuq” warmi nishganta mana cäsupänapaj. ¿Imanir? Pipis jucwan jucwan cacäriptin o fornicación juchata rurarga, quiquintapis cuyacunchu, gueshyaj ricacunman, familiantapis raquicächinman o pengaymanpis chayanmanmi. Y mana chaylachu, Jehovawan amistänintapis ushacächinman, jina ima gueshyawanpis contagiacur wanuyman chayanman (Prov. 7:23, 26). Chaymi Proverbios capítulo 9 versículo 18 ushanancho nin chay warmi “nishqanta chaskipaqkunaqa manami musyapäkuntsu wanunanpaq kashqanta”. Chauraga, ¿imanirtaj chaychica runacuna chay warmi nishganta chasquipan? (Prov. 9:13-18).

11. ¿Imanirtaj pasaypa melanaypaj caycan pornografía ricayga?

¹¹ Achcajmi fornicación juchaman ishquirgan pornografía nishgan o ganra ruraycunata ricashganpita. Chaycunaga may chaychopis caycan. Pipis chaycunata ricaycur ‘chayga imananpischu’ niptenga quiquintami engañacuycan. Jina juc cutilapis ricaycuptin mastaraj ricayta munanga, yarpaynintapis ganratanga y umanpita chaycunata jorguyta munaptenga alapa sasarämi canga (Col. 3:5; Sant. 1:14, 15). Chaypitapis mana ali munaynincunata ushacächinanpaj trucan ricashgancunata mastaraj rurayta munaycunga.

12. ¿Imatataj rurashwan mana alicunaman yarpächej fotucuna yurimuptin?

¹² Lapanchipämi imapitapis más valuryoj caycan Jehovawan amistäninchi. Chauraga, ¿imataraj juc cristiano ruranman celularninta ricaycaptin ilajpita pornografía nishgan o ganra ruraycuna yurimuptin? Jucla jucladupa ricaranman y upichirpis upirichinmanmi. Y ima nishwantaj waquin fotucuna ganra ruraycuna mana captinpis chaycunata ricar mana alicunaman yarpachacächimaptinchi. Shongulanchichopis adulterio juchata rurayta mana munarga chaycunatapis ricashwanchu (Mat. 5:28, 29). Tailandiapita David jutiyoj anciano cayno nin: “Nogaga cayno tapucö: ‘¿Jehovaga cushicungachuraj cay fotucuna pasaypa mana ali mana caycaptinpis ricaraycarla captë?’. Chayman yarpar yanapaman ali cajta acranäpaj”.

13. ¿Imaraj yanapämäshun ali cajcunata acranapaj?

¹³ Proverbios 9:10 nin: “Tantiyakuq kaytaqa qalaykunki TAYTA DIOSTA mantsakurmi”. Chauraga ali cajcunataga acrashun Jehovata manchacur, payta laquichiyta mana munarmi. Caypita maslata wilacamun Proverbios 9 caj capítulo galaycunancho, chaycho juc warmipita wilacur tincuchin rasunpa tantiacoj caywan.

14. Proverbios 9:1-6 textucuna nishganno, ¿imata ruranapätaj Jehová nimanchi?

¹⁴ (Leiriy Proverbios 9:1-6). Camacojninchi fiyupa yachaj captin, Jehová juc shumaj invitaciunta ruramanchi (Prov. 2:6; Rom. 16:27). Proverbios librucho wilacamun juc jatun wasi ganchis columnayoj cashganta. Cayga yarpächimanchi Jehová alapa ali o garacoj Dios cashganman, payga pitapis chasquinmi consejuncunata ali shongulanwan cäsucuyta munaptin.

15. ¿Imata ruranapätaj Jehová nimanchi?

 ¹⁵ Tantiacoj warmipita parlar Proverbios 9 caj capitulucho nin “uywakunata pishtarkur ali alilata yanukurqan” y “ali vïnuta rurarkur [...] mësaman sirvirqan” (Prov. 9:2). Nircur, mana yarpachacojcunata cayno nin: “Yanukushqä mikuyta mikunaykipaq” shapäcamuy. Cayga yarpächimanchi Jehová alapa ali car imayca alicunata gomashganchita. Chaymi cäsucunanchi chay warmi nishganta. Payga munaycunmi yachaj y ali cananchita. “Pay munashqanno kawaqkunataqa imapitapis tsapanmi” (Prov. 2:7). Chauraga Jehovata manchacurga alicunata rurashun, consejuncunata imaypis cäsucushun, chaynoparaj cushishga cawacushun (Sant. 1:25).

16. ¿Imataj Alain rurargan Jehovata manchacur y imataj pasargan?

¹⁶ Alain cristianupita parlarcushun, payga ancianuno yanapacun y juc escuelacho profesorno arun. Payga nin: “Achca aroj masëcuna yarpapäcun pornografía videucuna ali cashganta wamracunata yachachinapaj”. Ichanga Alain chayno yarpanchu, chaymi cayno wilacun rurashganta: “Waquin profesorcunata tantiachergä imanir chay videucunata mana ricaycunäpaj, chaytaga rurargä Jehovata manchacurmi”. Payga chayta rurar “tantiyakuq runano shumaq kawapäkuy” nishgan consejuta cäsucuycargan (Prov. 9:6). Chayta ricaycurshi waquin aroj masincunaga Bibliatapis estudiar y reuniunmanpis aywayta galaycurgan. Alain rurashganga tantiachimanchi Jehovata manchacuyga yanapämanchi ali cajcunata acranapaj.

17, 18. “Tantiyakuq” warmi nishganta chasquipacojcunaga, ¿imapitataj mayna cushicärin y imataj shuyarpaycan shamoj tiempupaj? (Dibujutapis ricay).

¹⁷ Cay ishcay shumaj tincuchicuycunawan, Jehová shumaj tantiachimanchi imataj ruranapaj rasunpa cushishga cawacuyta munar. “Mana tantiyakuq” warmi nishganta chasquipacojcunaga, shamoj tiempuman mana yarpachacur shongun munashgalanta rurapäcun. Y jucwan jucwan cacärir ali cawacushganta ali tucärin, ichanga manami musyapäcunchu “wanunanpaq kashqanta” (Prov. 9:13, 17, 18).

¹⁸ “Tantiyakuq” warmi nishganta chasquipacojcuna ichanga rasunpa cushishga cawapäcun. Aumi, Jehovapa mesanchoga imayca ali y mishqui micuycuna caycan (Is. 65:13). Chaymi profeta Isaiaswan cayno escribichergan: “Shumaq mayapäkamay. Cäsukamarqa ali mikuytami taripäkunkipaq. Ali alilata mikur kushishqami kawapäkunkipaq” (Is. 55:1, 2). Jehovaga Palabranwan yachaycächilämanchi pay chiquishgancunata chiquinapaj y cuyashgancunata  cuyanapaj (Sal. 97:10). Jina cushicurcunchi waquincunata yachachiptinchi tantiacoj runacunaman ticrananpaj. Imanomi Proverbios 9 caj capitulucho wilacushgan ashmaycuna marca jananman aywaycur gayacamun, noganchipis paycunano “¡mana tantiyakuq mözukuna y jipashkuna!” cayman shapäcamuy ninchi. Chaura noganchi o pipis chay invitaciunta chasquiycurga, canan y shamoj tiempuchopis ali cawacäringa. “Tantiyakuq runano shumaq” cawacurga imaycamapis cawacushun (Prov. 9:3, 4, 6).

19. ¿Imatataj rurananchi Eclesiastés 12:13, 14 textucuna nishganno? (“ Bendiciuncuna Diosta manchacuypita” recuadrutapis ricay).

¹⁹ (Leiriy Eclesiastés 12:13, 14). Taytalanchi Jehovataga jinala respetar manchacushwan, ushanan junajcunacho cawayninchi alapa sasa captinpis. Chayta rurarga shongunchita chapaycushun, alita yarpaj, alita ruraj runa cashun y Jehovapita raquicäshunchu. Jina Diosnilanchita respetar cuyashpanchi waquincunatapis yanapashwan tantiacoj runacunaman ticrananpaj y Jehová munashganno cawacunanpaj.