1, 2. ¿Pïcunataj Jehovapa amiguncuna caycan Salmo 25:14 nishganno?

 ¿IMANO runataj cananchi piwanpis ali amigo cayta munarga? ‘Ali amigucunaga cuyanacur yanapänacärinman’ ninquichi. Y ¿ima nishwantaj manchacuypita? ¿Chayga yanapacunmanchuraj piwanpis ali amigo canapaj? Bibliachoga nin Jehovaga manchacojcunapa amigunmi cashganta (leiriy Salmo 25:14).

² Noganchipis Jehovapa amigun canapäga payta manchacushwanmi unayna o chaylaraj sirviycarpis. ¿Y imanotaj chayga canman? ¿Cayga niycanchuraj pay castigamänanchita manchacur cäsucunapaj? Ricärishun imataj yachacunchi Abdías, sumo sacerdote Jehoiadá y rey Jehoás imano Jehovata manchacushganpita.

3. ¿Imanirtaj ninchi öraga manchacuyga ali cashganta?

³ Pipis ishquiyta manchacurga luchcacaj o tunicuna nänipa manami purinchu. Jina waquincuna imalatapis rurananpaj manchacur peligroso sitiucunapitapis aywacunmi. Nircur maygan amigunpa amistäninta ograyta manchacur, cuidacunmi imatapis lutanpa mana rurananpaj o ninanpaj. Chaura manchacuyga öraga mana alicunapita chapämanchi y yanapämanchipis imatapis shumaj yarpachacur-raj ruranapaj.

4. ¿Imataj Jehovapita yarpänapaj Satanasga munan?

⁴ Elifaz Jobwan parlashganchomi nergan Jehová Diosga vengacoj, alapa piñacoj y sirvejnincunaman mana yäracushganta (Job 4:18, 19). Satanás Diablupis runacunata chayno creichiyta munan Jehovata manchacärinanpaj. Chaymi ali  caycan shumaj tantiarcunapaj ima ninantaj Jehovata manchacunapaj, chayta tantiarcurga Diosnilanchita cushi cushilami sirvishwan.

5. ¿Imanotaj pipis musyachicunman Diosta manchacushganta?

⁵ Jehovata alapa manchacoj runaga payman guelicamun, amistäninta ushacächiyta mana munanchu y shongupita cuyan. Señorninchi Jesusmi chayta ruraj (Heb. 5:7). Payga Taytanta amatar cuyashpan lapan mandamientuncunata cushi cushila cäsucoj, manami manchacuypita rurarganchu (Is. 11:2, 3; Juan 14:21, 31). Chaura Jehová Lapanta puedej, alita ruraj, alapa yachaj y cuyacoj captinmi noganchipis payta alapa respetashpanchi aduranchi. Diosninchitaga rurayninchicunawan laquichiyta manami munanchichu, chaypa trucanga shongunta cushichiyta munanchi. ¿Imanir? Payga amatar cuyaycalämanchi (Sal. 78:41; Prov. 27:11).

6. ¿Imata rurartaj Jehovata masraj manchacunchi o respetanchi? (Salmo 34:11).

⁶ Jehová camashgancunacho ricanchi fiyupa yachaj, poderyoj y cuyacoj cashganta. Chayta musyarga yanapämanchi payta masraj respetaycunapaj y cuyanapäpis (Rom. 1:20). Y chayta ruranapäga calpachacunanchirämi, manami pipis Diosta manchacurna yurinchu (leiriy Salmo 34:11). “Jehová camashgancunata ricar payta masraj respetaycö, cuentata gocö fiyupa yachaj cashpan noganchipaj musyashganta ima ali cashganta”, chayno nin Adriane hermanalanchi. Nircur chaycunaman yarpachacushganpita cayno nin: “Tayta Jehová cawayta gomashga captenga, mana imatapis rurayta munächu paypita raquicächimänanpaj”. Gampis Jehovata respetanayquipaj y masraj cuyanayquipäga, ¿tiempuyquita camacächinquimanchuraj pay camashgancunaman yarpachacunayquipaj? (Sal. 111:2, 3).

7. ¿Imanirtaj mañacuptinchega yanapämanchi Jehovata masraj manchacunapaj?

⁷ Cada cadala Diosnilanchiwan parlapacuptinchega, payta rasunpa Taytanchitano ricayta galaycunchi. Chayga yanapämanchi masraj manchacunapaj o respetaycunapaj. Pay poderyoj cashganta yarpanchi ima pruebacunatapis pasar aguantanapaj mañacuptinchi. Y cuyashgan Wamranta noganchiraycur cachamushganpita agradecicuptinchi ricächicunchi agradecido caycashganchita. Pay fiyupa yachaj cashgantaga manami gonganchichu ima problemawanpis caycar yachayta gomänanchipaj mañacuptinchi. Chayno mañacurir payta masraj respetayculanchi y amistäninchita ushacächinanpaj cajcunatapis rurayta munashwanchu.

8. ¿Imataraj rurashwan Jehovata imaypis respetar manchacunapaj?

⁸ Bibliacho caycaj Jehovapa ali sirvejnincunapita y mana alicunapitapis yachacur yanapämäshun Jehovata imaypis respetar manchacunapaj. Jehovapa ishcay sirvejnincunapita parlarcushun: Abdiasga rey Acabpa wasincho aroj y Jehoiadaga sumo sacerdote cashga. Nircur Judapa rey Jehoaspita parlarcushun, payga alicunata rurar galaycuptinpis tiempuwanga Jehovata jaguirergan.

9. ¿Imanirtaj ninchi Abdiasga Jehovata manchacoj runa cashganta? (1 Reyes 18:3, 12).

⁹ Bibliacho Abdiaspita b parlar galaycuptenga nin: “Payqa TAYTA DIOSTA mantsakuq  runami karqan” (leiriy 1 Reyes 18:3, 12). Abdías alita ruraj y yäracuypaj runa captin, reypa palaciuncho capuralninno o palaciuta ricajno yanapacurgan (Nehemías 7:2 textuwan tincuchiy). Chay wichan Jehovata sirvinapaj alapa sasa caycaptinpis, payga ruraynincunawan musyachicurgan valiente runa cashganta. ¿Imanirtaj chayta ninchi? Chay wichan Israelcho Acab rey caycargan y “payqa punta kaq reykunapitapis mas peormi jutsata rurarqan” (1 Rey. 16:30). Y mana chaylachu, Acabpa warminga Jezabelmi cargan, payga Baaltami aduraj. Jehovata fiyupa chiquishpan, achca profetancunata wanurachergan y Israelcho rasunpa caj aduraciunta ushacächiyta munargan (1 Rey. 18:4).

10. ¿Imanotaj Abdías musyachicurgan valiente cashganta?

¹⁰ Acabpa warmin Jezabel Diospa profetancunata wanuchinanpaj gaticachar galaycuptin, Abdiasga “pachak (100) profëtakunata ishkay machayman pitsqa chunka kama (50) pakaykurmi mikuyta y yakutapis” garargan (1 Rey. 18:13, 14). Chaynomi ricanchi pay valiente cashganta. Jezabelga wanuchinmanmi cargan imata ruraycashganta musyaycurga. Pay wanucuyta manami munarganchu. Chayno captinpis ‘Jehovata y yäracoj masëcunata alapa cuyashgäta ricächicur wanurpis wanushächari’ nir valurcharcurgan paycunata pacaycunanpaj.

11. ¿Imanirtaj ninchi Jehovapa achca sirvejnincuna Abdiasno valiente cashganta? (Fotutapis ricay).

¹¹ Canan wichanpis Jehovapa achca sirvejnincuna Testigucunata chiquishgan marcacunacho tiyapäcun. Autoridäcuna camacächishganta cäsucurpis, Abdías rurashganno Taytalanchi Jehovalata adurapäcun (Mat. 22:21). Chaymi jinala Diospita yachachicurcaycan y pacaylapa shuntacan shacyächinacunanpaj. Jina calpachacärin ima publicaciunpis o videucunapis tiempulancho yargunanpaj cristiano masincunapaj (Mat. 10:16, 28). Chaychomi paycunacho ricacämun Jehovata masraj manchacushganta pï runapitapis (Hech. 5:29). Henri hermanunchipita parlarcushun, payga África naciuncho unay Testigucunata chiquishgan marcachoshi tiyargan. Payshi aunirgan hermanucunaman publicaciuncunata apananpaj.  Cayno wilacun: “Jehovata alapa respetashgämi yanapämargan valurcharcur chayta ruranäpaj, nogaga pasaypa manchacoj runa cä”. Gampis lapan shonguyquiwan Jehovata manchacuptiquega Henrino valiente canquipaj.

12. ¿Imanirtaj ninchi Jehoiadawan warminga Jehovalata manchacushganta?

¹² Jezabelpa wamran Ataliaga pasaypa fiyu warmi cargan. Judacho mandacur galaycuptin, reypa lapan miraynincunata wanuchinanpaj mandargan, wilcancuna captinpis chayta rurargan (2 Crón. 22:10, 11). Ichanga sumo sacerdote Jehoiadaga Jehovata alapa manchacur y mandashgancunata cäsucur yäracoj masincunata shacyächergan Jehovalata adurapäcunanpaj. Chaymi juc cuticho Jehoiadapa warmin Jehosabeat, Ataliapa juc wilcanta pacaycurgan mana wanuchinanpaj, jutinga cargan Jehoás. Chayta rurashpan Davidpa miraynin pï rey cananpaj manami ilacarganchu. Jehoiadaga chay wichancho 100 watapitapis masrächi caycargan. Chayno captinpis, Ataliata manchacunapaj trucan Jehovata masraj manchacoj y cäsucojpis (Prov. 29:25).

13. ¿Imanotaj Jehoiadá yapay musyachicurgan Jehovalata cuyashganta?

¹³ Jehoás ganchis watayoj caycaptin, Jehoiadá yapay musyachicurgan Jehovalata cuyashganta. Chaypäga juc pactuta rurargan levitacunawan y Israel runacunapa mandajnincunawan Jehoasta rey churapäcunanpaj, payga Davidpa miraynin cargan. Chay pacto mana ali yarguptenga, Jehoiadá wanunmanchi cargan. Ichanga Jehovapa yanapacuyninwanmi Jehoiadaga Jehoasta rey cananpaj churargan y mandargan Ataliata wanuchinanpaj (2 Crón. 23:1-5, 11, 12, 15; 24:1). “Tsaypitanami TAYTA DIOSWAN pactuta rurar runakunata y reyta Joiada promititsirqan TAYTA DIOSTA cäsukur kawapäkunanpaq” (2 Rey. 11:17). “Tsaynölami templupa patiun yaykuna punkukunaman wardiakunata Joiada churarqan pitapis impüru kaqkunata mana yaykatsinanpaq” (2 Crón. 23:19).

14. ¿Imanirtaj ninchi Jehoiadá lapan rurashganta Jehová mana gongashganta?

¹⁴ “Noqata respitamaq kaqkunataqa yanapashaqmi” chayno Jehová unaycho nishga cargan (1 Sam. 2:30). Chaymi sumo sacerdote Jehoiadá lapan alicuna rurashganta Palabrancho caycänanpaj guelgachergan noganchicunata canan wichan yanapämänanchipaj (Rom. 15:4). Y mana chaylachu, Jehoiadá “Tayta Dios munashqanno kawarmi Israel runakunatapis y templutapis ali rikarqan. Tsaymi wanuykuptin Davidpa Markancho reykuna pamparashqanman pampapäkurqan” (2 Crón. 24:15, 16).

15. ¿Jehoiadá rurashganga imataj yachachimanchi? (Fotucunatapis ricay).

¹⁵ ¿Imanotaj Jehoiadá rurashganga lapanchita yanapämanchi? Ancianucunaga yachacärinman imano altanto carcaycänanpaj Jehovapa sirvejnincunata yanaparcunanpaj (Hech. 20:28). Edayashga hermanucuna Jehovata manchacur paylata cäsucäriptenga, manami gonganmanchu Jehová imaypis yanapänanpaj cajta. Jehoiadata Jehová imano tratashganman yarpachacur jovincunaga yachacärinman edayashga cajcunata respetuwan y cuyacuywan trataycunanpaj, masraj paycuna achca watapana Jehovata sirviycaptin (Prov. 16:31). Levitacunapita y Israel runacunapa mandajnincunapita lapanchi yachacunchi: pushamajninchi hermanunchicunata imaypis cäsucärinapaj (Heb. 13:17).

16. ¿Imanirtaj ninchi Jehoás tiempuwan Jehovata manana cuyashganta?

¹⁶ Jehoiadapa yanapacuyninwan mozularaj caycar rey Jehoás calpachacurgan alicunata rurar Jehovata cushichinanpaj (2 Rey. 12:2). Ichanga Jehoiadá wanucuycuptin, Jehoás y waquin israelitacuna “Asera diösapaq jawishqan raku qerukunata y ïdulukunata adorapäkurqan”. Chayga pasargan Jehovata mana aduraj Judá nacionpa autoridänincunata rey Jehoás cäsucushganpita (2 Crón. 24:4, 17, 18). Chayraycur alapa laquishga caycarpis, “profëtankunata TAYTA DIOS kacharqan wilakushqanta chaskikur pay munashqanno kawapäkunanpaq. Tsayno wilakuptinpis paykunaqa manami chaskikärirqantsu”. Jehoasga manami cäsucurganchu Jehoiadapa wamran Zacariasta, payga Diospa profetan, sacerdote y primunpis cargan, chaypa trucan Zacariasta wanuchinanpaj mandargan. ¡Manami agradecicoj runachu cargan! (2 Crón. 22:11; 24:19-22).

17. ¿Jehoás Jehovata mana manchacushganpita imataj pasargan?

¹⁷ Jehová nishga cargan: “Manakaqman churamaqkunataqa penqaymanmi churashaq”. Y chaytami Jehoasta pasargan (1 Sam. 2:30). Jehovata respetayta y manchacuyta jaguishganpita, tiempo pasariptin Siria soldaducunaga walcala caycarpis Jehoastawan “tsaytsika soldädunkunata vencipäkurqan”. Jehoás antsa jitaraycajta ricar “kikinpa yanapaqnincunala wanutsipäkurqan”, chaytaga  rurargan sacerdote Zacariasta wanuchishganpitami. Y pasaypa fiyu cashpan, “reykuna pampakushqan panteonmanqa pamparqantsu” (2 Crón. 24:23-25).

18. ¿Imatataj rurananchi Jeremías 17:7, 8 nishganno Jehoasno mana canapaj?

¹⁸ ¿Imataj yachacunchi Jehoasta pasashganpita? Jehovataga manami respetashwanchu o manchacushwanchu familianchicuna, amigunchicuna o waquin hermanucuna chayta ruranapaj nimaptilanchi. Chaypa trucanga quiquinchi calpachacunanchi Jehovapita yachacunapaj, rurashgancunaman yarpachacunapaj y mañacunapäpis; chayga yanapämäshun payta masraj cuyaycunapaj y respetanapäpis (leiriy Jeremías 17:7, 8; Col. 2:6, 7). Jehoasga alicunata rurargan sumo sacerdote Jehoiadá yanapaptilanmi, manami shongupitachu Jehovata cuyargan. Chaymi Jehoiadá wanucuycuptin y lutan yachachicuycuna yurimur galaycuptin Jehoasga Jehovata cäsucurgannachu.

19. ¿Imataj Jehová sirvejnincunapita shuyaran?

¹⁹ Jehovalata shongupita manchacurga ima problemacuna captinpis jinala aguantashwan, y Abdiaswan Jehoiadá rurashganno Jehovalata sirvishwan. Imapis Jehovapita raquichimäshunchu. Eclesiastés 12:13 textupis cayno nimanchi: ‘Tayta Diosta mantsakur mandamientunkunata cumpliy. Tsaypaqmi kay patsacho runa kawan’.