Ishcay jatun guerra galacuycuptin, taytäcuna Estoniapita aywacärirgan Alemaniaman, chaycho noga yurishcä. Chaypita Canadá naciunmanna aywacärergä, Ottawa marcapa cercalancho. Waccha capäcushgäraycur walpacunata ashmanan wasipa läduncho tiyapäcoj cä, chaymi runtulapis caycargan micunapaj.

Juc junaj mamanë Bibliacho yachacushganpita cushicur wagarganrämi, Testigucuna leipashga cargan Apocalipsis 21:3, 4 nishganta. Ichic tiempo pasariptinla taytäwan mamanë bautizacärergan.

Taytäga chacaycunapa aroj Sudbury (Ontario) nej fabricacho. Waraynin alapami utishga caycarpis lapan sabaducuna predicaciunman apapäcamaj shulca caj panë Silviatawan. Inglés rimayta shumaj mana yachacurpis chayta ruraj. Nircur cada semana Wilacamoj revistapitapis lapäcuna yachacärej cä. Taytäcuna yachachimashganga yanapämargan Jehovata cuyanäpaj, chaymi chunca watayoj caycaptë bautizacurgä 1956 watacho. Paycuna Jehovata alapami cuyashganga cawaynëcho yanapämashgami.

Escuelata usharcuptë ichic guelanacur galaycurgä. ‘Precursorno yanapacuptëga, imayraj guellayta shuntashaj maypapis avionwan viajanäpaj’ nir yarpaj cä. Chaymi juc radiucho arur yaycurgä, chayga gustamarganmi. Ichanga chacaycama arunäpaj captin reuniuncunaman aywargänachu y Diosta mana cuyaj runacunawanpis juntacar galaycurgä. Pero Bibliacho yachacushgätaga manami gongaj cächu, chaymi calpachacurgä cambiucunata ruranäpaj.

Oshawa (Ontario) marcapa aywacuptë, Ray Norman, panin Lesli y waquin precursorcunatapis reguipäcurgä. Lapancuna ali chasquipäcamargan y cushi cushila capäcushganta ricar yarpachacächimargan precursorman ticranäpaj. Paycunapa yanapacuyninwan 1966 watacho precursorno yanapacur galaycurgä. Cushi cushila Jehovata sirvir caycargä, ichanga manami musyargächu ima más alicunata chasquinäpaj cajta.

Escuelachoraj caycaptë, Toronto (Canadá) Betelcho arunäpaj mañacurgä. Precursorna caycaptë invitamargan chuscu watacuna yanapänapaj. Ichanga manchacurgä Leslita manana ricanäpaj  Betelman aywacuptë, payga gustamarganmi. Pero Jehovata mañacur valurcharcurgä Betelman aywanäpaj, y Leslita laquishga ‘aywalä’ nergä.

Betelchoga ropacunata maylar y secretariunopis aroj cä. Leslina precursora especialno yanapacur galaycurgan Gatineau (Quebec) marcacho. Payman imaypis yarpachacur ‘¿alichuraj cargan cayman shamunäpaj?’ nir tapucoj cä. Cushicuypämi cargan Leslipa turin Rayta invitaptin Betelman, paywan compañero capäcurgä. Chaynopa Lesliwan yapay parlapacur galaycurgä. Tiempo pasariptinna, casaracärergä febrero 27, 1971 watacho.

Nircur mandapäcamargan francés rimayta parlaj congregaciunman, Quebec marcacho. Walca watacuna pasariptin nipäcamargan congregaciunta watucamojno yanaparcunapaj. Ichanga 28 watayojla caycar, ichic manchacurgä imano chayta ruranäpaj. Pero Jeremías 1:7 y 8 nishganga shacyächimarganmi. Öraga yarpachacoj cä imano aywamänanpaj. Viajipa aywar warmiläga punuyta camäpacojchu y accidenticunapapis pasashga cargan. Chayno captinpis payga nimaj: “Jehová nimaptinchi chayta ruranapaj, ¿manachuraj rurashwan?”. Chaura invitamashganchita chasquicur, 17 watacuna congregaciuncunata watucar yanapacärergä.

Congregaciuncunata watucar imayca ruranapaj caycargan, öraga tiempöpis carganchu Lesliwan ishcalä maypapis yargunapaj. Yachacunämi cargan tiempöta shumaj camacächinäpaj. Juc lunes tutapa wiyargä puncöta tacaycajta, quicharcuptë ricargä juc canastacho caycashgan fruta, queso, tanta, vinuwan copacuna y juc papelcho niycargan: “Warmiyquiwan maylapapis yarguy pasianayquipaj”. Ichanga discursücuna ruranäpaj captin, Leslita nergä mana puedicänanpaj. Pay tantiarcuptinpis, ichic laquishga ricacurgan. Discursüta ruranäpäna caycaptë concienciäga niycämargan Lesliwan yargunäpaj. Chaura Efesios 5:28 y 29 nishganta yarpar tapucurgä: “¿Jehová caywan yarpaycächimanchuraj tiempöta raquinäpaj warmëpäpis?” nir. Jinan hora Jehovata mañacur warmiläta nergä yargupäcunapaj. Chayta wiyar payga cushicuycurgan. Juc mayu cuchunpa pasiaj yagurir juc mantelta mashtapar apashganchita micupacärergä. Chay junaj ishcaläcuna cashgäga alapa shumajmi cashga. Discursütapis preparacuytami puedirgä.

Cushicuypämi cashga Columbia Británica nishganpita Terranova cashgancama congregaciuncunata watucar. ¡Aviuncho viajanäpaj munashgäga cumplicuycarganmi! Juc ishcay cuticho yarpargä Galaad escuelaman aywanäpaj, ichanga juc naciuncho misionero caytaga munargächu. ‘Misionerucunaga quevä nogano runa canman’ nir yarpaj cä. Jina manchacoj cä mandamänanpaj África  naciunman, chaycho guerracuna y gueshyacunapis captin. Cushish caycargä yanapacuycashgä marcacho.

1992 watacho, Unión Soviética nishgancho caycaj waquin naciuncunacho yapay Diospita librina yachachicur galaycushga captin, nipäcamargan Estoniacho misionerucunano yanapacärinäpaj. Chaytaga manami shuyarashganchichu. Jehovataraj yapay mañacärinä cargan, y tapucärej cä: “Jehová chayman mandaycämaptinchega, ¿manachuraj aywashwan?” nir. Chaura invitaciunta chasquicur aywacärergä, y rurilächo cushicur nergä: “Manami mandaycämanchu África naciunman”.

Chayapäcushgälapita estonio rimayta yachacur galaycurgä. Quillacuna pasariptinla yapay nipäcamargan congregaciuncunata watucärinapaj. Chaura letón, lituano y ruso rimaycunata yachacärinä cargan, países bálticos nishgan quimsa naciuncunacho y Kaliningrado (Rusia) naciuncho 46 congregaciuncunata y achca grupucunatapis watucärinapaj. Chay rimaycunata pashtachinapaj alapa sasa captinpis, hermanucunaga imaypis shacyächimar ‘alitami ruraycanqui’ nipäcamaj. Y 1999 watacho juc sucursal quichacargan Estoniacho, chaura nipäcamargan chaycho arunapaj Toomas Edur, Lembit Reile y Tommi Kauko hermanucunawan.

Siberiaman gargushga achca hermanucunata reguipäcurgä, carcelarash caycar nacaycarpis y familianpita carucho caycarpis, manami piñashgala capäcojchu. Imaypis cushishgala Diospita yachachicur carcaycargan. Chaynolami nogacunapis cushish cayta munapäcurgä, ima sasacuna captinpis.

Watacuna pasashganmanno, jamacärinapaj tiempunchita mana raquishganchiraycur, warmilä Lesliga pasaypa yamacashga ricacurgan, y manami musyargächu chayga fibromialgia gueshya cashganta. Chaura Canadamanna cutinapaj yarpapäcuycargä. Chaymi Sucursalcunata Ricajcunapaj escuelaman invitapäcamaptin, musyapäcurgächu imata decidinapaj; chayga Patterson (Nueva York) marcacho ruracanman cargan. Nircur Jehovata cutin cutin mañacärishgäpitana aunipäcurgä aywanapaj. Escuelachona caycar Lesliga tratamientucunata chasquergan aliyänanpaj. Chaura yapay unayno rurayninchicunata rurapäcoj cä.

Estonia naciunchona carcaycaptë, juc chacaycho central mundialpita nishgan juc waugui gayaycamar tapupämargan: “¿Gamcuna aywanquimanchuraj República Democrática del Congo naciunman yanaparcunayquipaj? Waray nimanqui aywarcunayquipaj o manapis” nir. Chayta wiyar musyargächu imata contestanäpaj. Warmilä punucashgana caycaptin, imatapis nergänachu. Chay chacaycho Jehovata mañacur warämurgä, lapan yarpachacächimashgancunata wilargä. Chayga pasargan 2008 watacho.

Warayninna Leslita wilaptë nipäcurgä: “Jehová  invitaycämanchi Africaman ayawanapaj. ¿Imanoparaj musyashwan chaycho cayta mana gustamashganchita manaraj aywashga carga?”. Chaura 16 watacunana Estoniacho capäcushgäpita, Kinsasa (Congo) marcaman viajapäcurgä. Chaycho sucursalpa huertanga shumajmi, jauca ricacunqui. Chayaycurla Lesliga Canadapita chararashgan juc tarjetata cuartunchicho churargan, “Maycho murushushgayquicho tuctumuy” niycargan. Hermanucunata reguir, wilacamushgancunata wiyar y waquincunata Bibliapita yachachir cushish capäcurgä. Tiempuwanna Jehovapa bendiciunninwan Africacho caycaj 13 sucursalcunata watucar reguipäcurgä tucuy hermanucunata y marcancunacho ima cashgancunatapis. Chaycho cayta manami manchacurgänachu, Jehovata ‘gracias’ nergä chayman mandapäcamashganpita.

Manami imaypis micupäcushcächu chucluscunataga. Ichanga Kinsasa (Congo) marcacho runacuna chaycunata mishqui mishqui micuycashganta ricar, nogacunapis micupacur galaycärergä.

Jina micuycunatapis apaycur y hermanunchicunata shacyächinapaj juc marcacunaman viajapäcurgä, chaycho pelia cashganraycur warmicuna y wamracunapis nacaycargan. Achca hermanucunapa micuynincuna alapa mana captinpis, paycunaga Jehovatawan marcanta lapan shongunwanmi cuyaj y yäracoj runacunami capäcoj. Chayta ricar nogacunata alapami shacyächipäcamargan. Achcajmi wasiyniynaj quedacushga cargan, y murushgancunatapis ogrargan. Cayga yarpächimargan öraga imapis ushacanmanmi, ichanga Jehovawan amistäninchitaga imapis ushacächinchu. Sasacunapa pasaycarpis hermanunchicunaga manami alapa quejacurganchu. Chayga yarpächimargan ima problemacunapis yurimuptin valurcharcur aguantanapaj.

Yachacashgana carcaycaptë, nipäcamargan Hong Kong sucursalcho yanapacärinäpaj. Chayman mandapäcamänanpäga manami imaypis shuyarargächu. Guepa watacunacho Jehová mayna yanapämashganchita ricar, imatapis nipäcurgänachu. Chaura Africacho cuyashga  amigunchicunapita despidicur, 2013 watacho nimashganchi cajman viajapäcurgä.

Sasami cargan chino cantonés rimayta yachacärinäpaj, jina Hong Kong marcacho cawayga manami facilchu. Ichanga hermanunchicunaga ali chasquipäcamargan y chaycho micuycunapis gustapäcamargan. Testigucuna rasla miraycuycargan. Ichanga localcuna alapa chaniyoj captin, Jehovapa testiguncunata Pushajcunaga waquin localninchicunata ranticurgan y jucläduchona Sucursal cananpaj nipäcurgan. Y walca tiempulachona, 2015 watacho Lesliwan aywacärergä Corea del Sur nishganman; cananyaj chaycho sirvipäcuycä. Chaychopis mushoj rimayta yachacunapaj sasarämi. Ichanga hermanucunaga imaypis shacyächipäcaman, ‘ichic ichiclapa coreano rimayta más shumajtana parlapacuycanqui’ nipäcaman.

Öraga manami facilchu canman jucla mushoj amigucunata ruranapaj. Ichanga quiquinchi pilawanpis parlar galaycuptinchi o micupacunapaj invitaptinchi, rasla amigucunata tarinquimi. Hermanunchicunaga cuyamanchimi, Diosninchega lapanchitami camamashcanchi jucninchi jucninchi shongupita cuyanacunapaj y ali amigucuna capäcunapaj (2 Cor. 6:11).

Ishcäcuna yachacärishcä waquincunata ricaycunapaj Jehová ricashganno, y pruebacuna o problemacuna captin Pay chaycho caycan yanapämänanchipaj. Guelanashga o laquishga hora caycar, amigöcunapa cartancunata leipäcoj cä valurcharcärinäpaj. Jehovaga imaypis mañacamushgäcunata contestapäcamajmi y calpantapis gopäcamaj.

Watacuna pasashganmanno Lesliwan cuentata gocärergä alapa ali cashganta tiempunchita camacächinapaj ishcäcunapaj. Jina mushoj rimayta yachacur pantaycurga, asipacoj cä. Cada chacaycho yarpapäcö chay junajcho imano Jehová yanapäcamashganta, nircur mañacushgäcunacho agradecicärëmi.

Rasun cajchoga, manami imaypis yarpargächu misioneruno waquin naciuncunacho sirvinäpaj. Ichanga Jehovapa yanapacuyninwanga mana shuyarashganchi cajtapis ruranchi, y chayga alapami cushichiman. Profeta Jeremías nishganno ricacö, payga nergan: “TAYTA DIOS, ¡mana munaykaptïmi profëta kanäpaq churamashqanki!” (Jer. 20:7). Jehovaga mana shuyarashganchi cajcunata y achca bendiciuncunata gopäcamargan. ¡Wamra cashgächo aviunwanpis viajayta munashgämi cumplicurgan! Jehovapa bendiciunninwan pichga continenticunapita achca sucursalcunata watucärergä. Warmilä Leslitapis agradecicuycömi cay lapancho cushi cushila yanapämashganpita.

Imaypis yarpächinacärë Jehovapaj aruycashganchita. Canan wichan chasquishganchi bendiciuncunaga manami igualanchu shamoj tiempucho chasquinapaj cajcunawan. Diosnilanchi Jehová cuyamashpanchi lapan runacuna munashgan cajcunata tarichengapaj (Sal. 145:16).