1. ¿Imataj rurashwan Jehovapa junajnincho salvacärinapaj?

 UNAYCHO Jehová chiquejnincunata ushacächergan. Chaynolami Bibliacho Jehovapa junajninpita parlaptenga, parlaycämun Armagedón guerracho chiquejnincunata ushacächinanpaj cajta (Is. 13:1, 6; Ezeq. 13:5; Sof. 1:8). Jesús discipuluncunata chay junajpita parlar nergan imaypis “kamarikushqala karkaykay”. Chay junajga galaycunga lapan luta religiuncunata ushacächir galaycuptin y ushanga Armagedón guerracho. Chay junajcho salvacärinapäga, cananlapitanami calpachacushwan camaricushgala carcaycänapaj (Luc. 12:40; Mat. 24:21).

2. ¿Imanirtaj yachacunanchi naupa caj Tesalonicenses nishganpita?

² Cristiano masincunata yanapayta munarmi, Pabluga naupa caj Tesalonicenses 5 caj capitulucho shumaj tincuchicuycunawan tantiachicamurgan Jehovapa junajnin imano cananpaj (2 Tes. 2:1-3). Chay junaj chämunanpaj alapa pishiycashgantaraj musyarpis, cristianucunata shumaj tantiachicamurgan imanir camaricushgala carcaycänanpaj. Canan ricärishun: 1) imanotaj chay junaj canga, 2) pïcuna salvacärenga y 3) imatataj rurashwan camaricushgala carcaycänapaj. Pablo nishganga noganchitapis yanapämäshunmi.

3. ¿Imanirtaj ninchi chacaypa suwa ilajpita shamushganno Jehovapa junajnin cananpaj? (Dibujucunatapis ricay).

³ “Tsakaypa elaqpita suwa shamushqanno” (1 Tes. 5:2). Suwacojcunaga ilajpita pitapis suwapan, masga chayta ruran chacaypa pipis punuycaptin o mana shuyashgan horacho. Chaynolami Jehovapa junajninpis ilajpita chämuptin,  achcajmi manchacashga carcaycanga. Chayta ricar, rasunpa cristianucunapis almirashgachi carcaycanga imapis ilajpita pasaptin. Jehovaga sirvejnincunataga salvaycalämäshunmi, chiquicojnincunata ichanga manami.

4. ¿Imanirtaj ninchi Jehovapa junajninga “warmita wachay nanay elaqpita tsarishqanno” cananpaj?

⁴ Juc gueshyaj warmiga manami musyanchu imaytaj wachananpaj o gueshyapacunanpaj. Ichanga hora chayamuptin wamran yurinanpaj, nanay pasaypa miraycuptinpis payga musyanmi ichiclacho pasananpaj wamran yuriptin. Chaynolami Jehovapa junajninpis “warmita wachay nanay elaqpita tsarishqanno” canga (1 Tes. 5:3). Jehovapa junajnin imay junaj o imay hora chayamunanpaj mana musyarpis, yäracunchimi chayga rasunpa ilajpita pasananpaj y chiquimajnichicunapitaga manami pipis gueshpingapächu.

5. ¿Ima tincuchicuywan mastaj Pablo Jehovapa junajninta tincuchin y imanir?

⁵ Jehovapa junajninpita Pablo yapay parlar tincuchergan pacha warashganno cananpaj (1 Tes. 5:4). Maygan suwacojpis chacaypa imatapis apacunanpaj yarpachacushga carga, öraga tiempupita cuentata mana gocur pachapis warämunmanmi y runacunapis ricanman suwacuycashganta. Chaynolami jatun nacay galaycuptinpis canga. Fiyu runacuna mana alicuna rurashganga claro ricacämunga y pengaycho quedanga. Noganchicuna ichanga manami paycunanochu canchi. Chaymi cananlapitana imaycacunata ruraycanchi chay junajcho camaricushgala carcaycänapaj. Chaypäga Jehová chiquishgancunata ruranchichu y Palabrancho “kuyapäkuq kanki, alilata ruranki y rasun kaqlata rimanki” nishgantapis cäsucunapaj calpachacunchimi (Efes. 5:8-12). Nircur Pabluga ishcay  tincuchicuycunawan masraj tantiachicamun chay junajcho pïcuna mana salvacärinanpaj.

6. ¿Imanirtaj ninchi cay munducho runacunaga “punukashqano” cashganta? (1 Tesalonicenses 5:6, 7).

⁶ “Punukashqano” cajcuna (leiriy 1 Tesalonicenses 5:6, 7). Pipis punuycaptenga imatapis musyanchu, imatapis ruranchu, pitapis yanapayta camäpacunchu. Chaynolami cay munducho caycaj runacunapis espiritual cajcho punucashgano carcaycan (Rom. 11:8). Paycunaga cuentata gocärinchu ushanan junajcunacho cawaycashganchita y jatun nacaypis caylachona cashganta. Waquincunaga Jehovapa junajninpita musyaycarpis, ‘chayga imayraj canga’ nipäcun. Juccunana cay munducho imayca pasaycashgancunata ricar ricchapacaramun y Diospitapis yachacuytaraj munapäcun. Ichanga chayga ratulapämi caycan, nircur yapay unay ruraynincunaman cutipäcun (2 Ped. 3:3, 4). Pabluga nergan chayno clase runacuna mana salvacärinanpaj, noganchicuna ichanga musyanchimi imaypis camaricushgala carcaycänapaj, masraj cay ushanan junajcunacho.

7. ¿Imanirtaj ninchi Jehová ushacächinanpaj caj runacunaga “shinkashqano” cashganta?

⁷ “Shinkashqano” cajcuna. Pipis shincashga captenga cuentata mana gocushpan imatapis lutanpa ruran. Chaynolami fiyu cajcunapis Diospa yachachicuynincunata cäsucärinchu y shongun munashganta imatapis rurar wanuyman apacoj nänipa aywarcaycan. Pabluga nergan chayno clase runacunata Jehová ushacächinanpaj (1 Tes. 5:6). Payga cristianucunata consejaycurgan shincacoj runacunano mana cananpaj, sinoga ali juiciuwan cawacunanpaj. ¿Imanirtaj chayno nergan? Ali juiciuyoj caj cristianuga shumaj yarpachacur-raj imatapis acran rurananpaj y imapis pasaptin laquicuypaj captenga manami yarpachacuycarla caycanchu. Jehovapa junajnin caylachona caycaptin, más sasarämi canga cay munduwan mana talucänapaj, masraj política asuntucunacho. Chayno captinpis ama yarpachacushwanchu imata ruranapaj, Taytalanchi Jehovaga santo espiritunwan yanapaycalämäshunmi mana yarpachacuycarla cawanapaj y imatapis shumaj yarpachacur-raj ruranapaj (Luc. 12:11, 12).

8. ¿Imatataj rurashwan 1 Tesalonicenses 5:8 nishganno imaypis camaricushgala y ali juiciuwan cawacunapaj? (Dibujutapis ricay).

⁸ Unaycho soldaducunaga imaypis camaricushgala caycanman cargan peliaj aywananpaj. Chaynolami cristianucunapis cananchi. Chaymi Pabluga nergan imaypis “chalëcuntsi jatishqanömi” y “cascuntsi jatishqanömi” caycänapaj (leiriy 1 Tesalonicenses 5:8). Chaytaga ruranchi yäracoj y cuyacoj captinchi, jina Jehovapa aunicuynincunapis cumplicunanta shuyaraptinchi. Chaycunami yanapämäshun salvacärinapaj.

9. Yäracoj cashpanchega, ¿imanotaj yanapämanchi?

⁹ Imanomi juc chaleco soldadupa shongunta chapaycun, chaynolami yäracoj y cuyacoj cashganchega yanapämanchi Jesusta gatirpänapaj y Jehovata sirvir mana cachaycunapaj. Lapan shongunchiwan yäracunchi sirvejnincunata Jehová bendicinanpaj cajta (Heb. 11:6). Imayca sasacunapa pasarpis yäracoj cashpanchi guepaman manami cutinchichu. Ricärishun imano waquin hermanucuna guellayraycur o chiquishga cashganraycur nacaycarpis Jesusta gatirayta jaguipäcunchu y chayga yäracuyninchitami sinchiyächenga. Jina Diospa voluntäninta puntaman churajcunapita, chararashgancunalawan cawajcunapita  yachacushganchipis yanapämäshun imaycayoj cayta mana ashinapaj. b

10. Jehovatawan runa masinchicunata cuyashpanchi, ¿imatataj rurananchi?

¹⁰ ¿Ima mastataj yanapämäshun camaricushgala y ali juiciuwan cawacunapaj? Cuyacuyninchimi (Mat. 22:37-39). Chaymi, ima captinpis Jehovata cuyashpanchi valurcharcunchi runacunata yachachicunapaj (2 Tim. 1:7, 8). Jina waquin runacuna creencianchicunawan acuerducho mana caycaptinpis, jinala calpachacunchi telefunupapis o cartapapis predicanapaj. Y chaytaga ruranchi paycunata cuyashpanchimi. Galananlacho ali mana chasquimaptinchipis, yäracunchi imaylapis cambiananpaj cajta (Ezeq. 18:27, 28).

11. Hermanunchicunata cuyashganchega, ¿imanotaj yanapämanchi? (1 Tesalonicenses 5:11).

¹¹ Hermanunchicunata cuyashganchitaga ricacämun shacyächinacuptinchi y jucninchi jucninchi yanapänacuptinchi (leiriy 1 Tesalonicenses 5:11). Chaymi musyaycar hermanunchicunapa contrancho imatapis ruranchichu, ni igual cutichinchichu ofendimaptinchipis. Soldaducuna jucnin jucnin yanapänacuptinpis, öraga peliaycashgancho maygan soldado masintapis cutaycunman; ichanga chaytaga manami adredichu ruran (1 Tes. 5:13, 15). Congregaciunta ricajcunata respetaptinchega paycunata cuyashganchita ricacämun (1 Tes. 5:12). Tesalónica congregaciunta Pablo cartacamuptin, chay congregaciunga chaylaraj camacächishga cargan. Chaura ancianucunaga mushojlaraj car pantacurganchi, chayno captinpis paycunata respetanan cargan. Jatun nacay galaycunanpäna caycaptin, capaz ima wilacuycunatapis sucursalpita o Jehovapa testiguncunata pushajcunapita chasquishunnachu. Chaymi alapa ali caycan cananlapitana congregaciunninchicho caycaj ancianucunata respetar cuyanapaj. Ama gongashunchu Jesús paycunawan gatirajnincunata pushaycashganta. Chaymi ima captinpis camaricushgala caycashwan y  ancianucuna pantashgancunalamanga yarparäcushwanchu.

12. ¿Imanotaj shuyarashganchi cajga yanapaycalämanchi?

¹² Imanomi juc casco soldadupa umanta chapaycun, chaynolami ima shuyarashganchega yarpayninchita y cay munducho imaycacunapita chapaycalämanchi. Jina shuyarashganchi cajman yarparga yanapämanchi ima pasaptinpis mana yarpachacuycarla y jaucala caycänapaj (Filip. 3:8). Chaynoshi Wallace y Laurinda cristianucuna ricacärergan África naciuncho sirviycaptin. Jucpa maman wanushganpita ishcay semana pasariptinlash, jucpapis maman wanucurgan. Y pandemiaraycurshi naciunninman cutiyta camäpacurganchu pampaycunanpaj. “Manami yarpachacöchu mamanë wanunanpäna caycaptin imano caycashganta, sinoga Mushoj Pachacho cawarimuptin imano carcaycänanpaj cajman. Chayman yarpar shacyächiman y calpatapis goman laqueza chäramuptin jaucala ricacunäpaj” chayno nin Wallace hermanunchi.

13. ¿Imatataj rurashwan Jehová espiritunta goycalämänanchipaj?

¹³ Diospa santo espiritunga calpayojyächimanchi, yanapaycalämanchi alicunata ruranapaj y mana yamacaypa Jehovata sirvinapaj (Rom. 12:11). Chaymi Pabluga santo espirituta ni ima chapatapis mana churanapaj nergan (1 Tes. 5:19). Diosninchi espiritunta goycalämänanchipäga mañacushwanmi, Palabranta leishwan y waquin cristiano masinchicunawan juc shongunola caycashwan. Chaynopa Jehovapa espiritun yanapaycalämäshun pay munashganno cawanapaj (Gál. 5:22, 23).

14. ¿Imatataj mana rurashwanchu Jehovapa espiritunta chasquinanchipaj? (Fotucunatapis ricay).

¹⁴ Jina imano portacushganchi y rurayninchicunapis ali caycanman Jehová espiritunta goycalämänanchipaj. Manami munanchichu ima chapapis michämänanchipaj Jehovapa espiritunta chasquinapaj. Tantiarinapaj, Jehovaga espiritunta gomäshunchu mana ali munaycunaman yarpaptinchi (1 Tes. 4:7, 8).  Bibliapis nimanchi “Espíritu Santu tantiyatsishqanta […] manakaqman ama churapäkunkitsu” (1 Tes. 5:20). Jehovaga espiritunwan runacunata tantiachergan ichiclacho imacuna pasananpaj. Musyanchimi ichiclana pishiycashganta Jehovapa junajnin o Armagedón chayamunanpaj, capaz cawaycashganchi hora chayamungapis. Chaymi calpachacunanchimi ali portacärinapaj y “jutsata mana ruraypa Tayta Dios munashqanno” cawacunapaj (2 Ped. 3:11, 12).

15. ¿Imatataj rurashwan pipis mana pantachimänanchipaj? (1 Tesalonicenses 5:21).

¹⁵ Ichiclacho Diospa chiquejnincuna nipäcunga cawayninchi seguro cashganta y “imapis mana pasananpaq” (1 Tes. 5:3). Ichanga chay wilacuycunaga runacunata pantachinanpaj canga. ¡Aumi!, supaycunapita shamunga (Apoc. 16:13, 14). Chaycuna noganchicunata mana pantachimänanchipaj Pabluga nergan “shumaq tantiyakärinki” (leiriy 1 Tesalonicenses 5:21). Metalwan aroj runaga ima metaltapis chullurcachinraj rasunpa goripita cashganta musyananpaj. Chaynolami ima wilacuycunatapis creinapäga shumajraj tantiarcushwan rasunpa cashganta o manapis. Chaymi leishganchi, wiyashganchi o ricashganchi wilacuycunata tincuchishun Bibliacho o publicaciuncunacho nishganwan. Y chaytaga masraj rurashwan jatun nacay caylachona caycaptin. Unaycho Tesalónica caycaj cristianucunapis chayta rurapäcunman cargan. Chayta rurashpanchega, supaycunapita shamoj wilacuycunaga pantachimäshunchu (Prov. 14:15; 1 Tim. 4:1).

16. ¿Imatataj lapalanchi shuyaraycanchi, y imatataj ruraycashwan?

¹⁶ Jatun nacay chayamuptin cawaycar-raj caycaptinchi o wanushgana caycaptinchipis ushanancama yäracoj sirvejnincunataga Jehová imaycamapis cawayta goycunga. Cielupaj acrashga cajcunaga Jesuswan gobernapäcamunga y waquincunaga juc cuyaylapaj Pachacho cawapäcunga. Musyanchimi Jehová marcantaga salvananpaj cajta, ichanga musyanchichu waray o warantin ima pasamänanchipaj cajta (Sant. 4:14). Chaymi shuyarashganchi cajman imaypis yarpachacushun y camaricushgala shuyarcushun Jehovapa junajninta.