1. ¿Imaraj yanapämäshun sasacunapa pasarpis mana jaguiypa Jehovata adurananchipaj?

 BIBLIAGA nin cay tiempucho “runakuna aläpa nakananpaq kashqanta” (2 Tim. 3:1). Lapan runacuna imayca sasacunapa o ajacunapa pasapäcun y Diospa sirvejnincunapis nacanchi waquincuna chiquimashganchipita. Chayno captinpis, ¿imaraj yanapämäshun mana jaguiypa Jehovata adurananchipaj? Imaypis mana gongashwanchu “kawaq Dios” Jehová noganchiwan caycashganta (Jer. 10:10; 2 Tim. 1:12).

2. Imayca sasacunapa pasarpis, ¿imacunamantaj yarpashwan?

² Jehovaga lapan sasacunapa pasaycashganchita ricaycan, y yanapämänanchita munan (2 Crón. 16:9; Sal. 23:4). Chaycunaman yarparga yanapämäshun imayca mana alicunapa pasarpis aguantanapaj. Ricärishun unay rey David imapa pasashganta.

3. Jehová cawaj Dios cashganta David niptenga, ¿ima niytataj munaycargan?

³ David Jehovata reguir payman yäracurgan. Chaymi rey Saúl y waquincunapis gaticachaycaptinmi Jehovata mañacurgan yanapänanpaj (Sal. 18:6). Jehová mañacuyninta wiyashganta y yanapashgantapis ricar Davidga nergan Jehová cawaj Dios cashganta (Sal. 18:46). ¿Imataj David niyta munaycargan? Juc libruga nin David chayno nishganwan “musyachicuycargan Jehovaman alapa yäracushganta, paymi seguro caycargan Jehová cutin cutin sirvejnincunata yanapashganpita”.  David cawaynincho ricarganmi Jehová yanapashganta, chaymi convencido caycargan Jehová cawaj Dios cashganta. Chayga shacyächergan Jehovata mana jaguiypa adurananpaj y sirvinanpäpis (Sal. 18:28, 29, 49).

4. ¿Imanotaj yanapämäshun Jehová cawaj Dios cashgantano ricaptinchi?

⁴ Jehová cawaj Dios cashganpita seguro caycaptinchi yanapämäshun payta mana jaguiypa imaypis sirvinanchipaj, ima sasacunatapis aguantananchipaj y lapan shongunchiwan Dios munashganta rurananchipaj. Chaynopa paypita imapis raquichimäshunchu.

CAWAJ DIOSMI CALPATA GOSHUNQUI

5. ¿Imataj yanapämäshun sasacunapa pasashganchicho? (Filipenses 2:13).

⁵ Imayca sasacunata aguantanapäga mana gongananchichu cawaj Dios Jehová yanapämashganchita. Lapanta puedej cashganraycu paypäga manami sasachu ima problemacunata alchananpaj, jina valurta gomäshun aguantananchipaj (leiriy Filipenses 2:13). Chayta musyarga, ima problemacunapis yurimuptin manami manchacushwanchu. Ichic problemacunacho Jehová yanapämashganchita ricarga, segurumi caycäshun jatun problemacunachopis yanapämänanchipaj.

6. ¿David imacunapa pasargan Jehovaman más yäracunanpaj?

⁶ Ricärishun David jovinlaraj caycaptin Jehovaman más yäracunanpaj imacunapa pasashganta. Papäninpa uyshancunata liyunpis osupis apacuptin, David valurcharcur ishcanta wanuchergan uyshancunata salvananpaj. Payga musyarganmi Jehovapa calpanwan chayta rurashganta, chaymi manami nerganchu ‘calpaynëwan chayta rurashcä’ nir (1 Sam. 17:34-37). Davidga cada cadala chaycunaman yarpachacojmi. Chaynopa segurumi caycargan Jehová imaypis payta yanapänanpaj cajpita.

7. ¿Imamantaj David yarpachacurgan, y chayga imanotaj yanapargan?

⁷ Tiempuwan David mozula caycaptinraj, Israel soldaducunata watucoj aywargan. Chaychomi jatun runa Goliat jutiyoj cayno niycargan: “¡Israel soldädukuna, [...] mayqaykipis pelyanantsipaq shamuy!”. Chayta wiyarga soldaducuna pasaypa manchacärergan (1 Sam. 17:10, 11). ¿Imanir? Paycuna alapa yarpachacurgan Goliat jatusaj cashganman y paycunata fiyupa ashlipashganman (1 Sam. 17:24, 25). David ichanga yarpachacurganchu Goliat israelitacunata ashlipashganta, sinoga “kawaq Tayta Diospa soldädunkunata achäquita” ashipashganta (1 Sam. 17:26). Davidga yäracurgan unay uyshancunata salvananpaj Jehová yanapashganno cananpis yanapänanpaj. Chaymi Jehovapa yanapacuyninwan Goliat-ta vencirgan (1 Sam. 17:45-51).

8. Sasacunapa pasaptinchi, ¿imaraj yanapämäshun Jehovaman más yäracunapaj? (Fotutapis ricay).

⁸ Jehová Davidta yanapashga pruebapa pasashgancho, chaymi noganchipis yarpänanchi pruebacunapa pasar cawaj Dios Jehová yanapämäshunmi (Sal. 118:6). Chaypäga unay siervuncunata Dios imano yanapashganman yarpäshun. Chay yanapacuycunaga Bibliachomi caycan leinapaj (Is. 37:17, 33-37). Jina jw.org paginachopis más yanapacuycunata tarinchi imano canan wichan hermanunchicunata Jehová yanapashganta. Jinamanpis yarpay  cawayniquicho imano Jehová yanapäshushgayquita. Capazchi Davidno juc osuta o liyunta mana vencishgayquichu. Pero imanopapis yarpänayqui Jehová imalachopis yanapäshushgayquita. Ama gongaychu amigun canayquipaj invitashushgayquita (Juan 6:44). Yarparay imano yanapäshushgayqui mana jaguiypa aduranayquipaj. Chaymi Jehová Diosta mañacuy yarpächishunayquipaj imano mañacuyniquita contestashga, sasacunapa pasaptiqui o nacashgayqui hora imano yanapäshushgayquita. Chayman yarpaptiqui segurumi caycanqui imaypis Jehová yanapäshunayquipaj.

9. ¿Imacunataj ama gongashwanchu pruebacunapa pasaptinchi? (Proverbios 27:11).

⁹ Jehová cawaj Dios cashganta musyarga, yanapämäshun shumaj tantianapaj imanir nacanchi. Pruebacunapa pasaptinchi Satanás munan Jehovata jaguinapaj (Job 1:10, 11; leiriy Proverbios 27:11). Chaura alapa sasacunapa pasaptinchi Jehovata mana jaguiptinchega, ricächicuycanchi Satanás lula cashgantami y Jehovata cuyashganchita. ¿Gobiernucuna michaycäshunquichu librina Diosta mana aduranayquipaj, payta sirvishgayquiraycu guellayniqui pishiycäshunquichu y predicaciunchopis runacuna wiyayta munanchu? O ¿más pruebacunapapis pasaycanquichu? Chayno captenga, yarpay Diosta cushichiyta munar chaycunapa pasashgayquita. Jehovaga manami permitingachu mana aguantanayquipaj caj pruebacunapa pasanayquipaj (1 Cor. 10:13). Paymi calpata goshunqui aguantanayquipaj.

CAWAJ DIOSGA BENDICISHUNQUIPÄMI

10. ¿Imataj ruranga Diosninchi siervuncunapaj?

¹⁰ Jehovaga siervuncunata bendicinmi (Heb. 11:6). Canan tiempo cushicuyta gomanchi, y shamoj tiempucho mana ushacaj cawaytapis. Chaytaga pay imanopapis cumplengami alapa poderyoj captin. Chaymi  paypäga shongupita arunchi unay siervuncuna rurashganno. Mä ricärishun Timoteo rurashganta (Heb. 6:10-12).

11. ¿Imamantaj Timoteo yarpargan Jehovapaj ali arucoj cananpaj? (1 Timoteo 4:10).

¹¹ (Leiriy 1 Timoteo 4:10). Timoteuga lapan shongunwanmi yäracurgan Jehová payta bendicinanpaj. Chaymi ali arucoj Jehovapaj cargan y waquincunatapis yanapargan. ¿Imataj rurargan? Apóstol Pablo Timoteuta nergan ali yachachicoj cananpaj y ejemplunwanpis waquincunata yanapänanpaj. Jina nergan waquincunata cuyacuywan anyapänanpaj (1 Tim. 4:11-16; 2 Tim. 4:1-5). Chayta rurashganta waquincuna mana agradecicuptinpis, Timoteuga musyarganmi Jehová bendicinanpaj cajta (Rom. 2:6, 7).

12. ¿Imapitataj ancianucuna seguro caycanman? (Fotutapis ricay).

¹² Timoteuno ancianucunapis seguro caycanman ali aruyninta Jehová ricashganta y valuranpis. Paycuna congregaciuncho caycajcunata shacyächin, predican y ali yachachin. Jina waquin ancianucuna Saluncunapis sharcachinanpaj yanapacun y desgraciacuna captinpis. Hospitalcho caycaj hermanucunatapis watucan yanapänanpaj. Paycunaga musyan congregaciunga Jehovapita cashganta, chaymi lapan shongunwan yanapacun. Y segurumi capäcun Jehová bendicinanpaj cajta (Col. 3:23, 24).

13. ¿Imanotaj Jehová sienticun calpachacushgayquita ricar?

¹³ Anciano mana carpis, imalachopis yanapacushwanmi. Ali calpachacuptinchega Jehová cushicungami. Aycalawanpis guellayniquiwan yanapacuptiqui congregaciuncho, reuniuncho maquiquita jogarcuptiqui manchacurpis comentanayquipaj y pilatapis perdunaptiquega, Jehovaga cushicunmi. Capaz ninqui ‘ichiclata ruraycä’, pero cayta yarpay: Jehovaga rurashgayquita alapami  valuran. Payga cuyashunqui y bendiciuntapis goshunqui (Luc. 21:1-4).

CAWAJ DIOSPITA IMAYPIS WITICUSHUNCHU

14. ¿Imanirtaj ninchi Jehová rasunpa cashganta yäracurga payta imaypis cäsucushun? (Fotutapis ricay).

¹⁴ Jehová rasunpa cashganta yäracurga, mandamashganchita imaypis cäsucushun. Chaytami rurargan José. Juc warmi punucunanpaj inquitaptinpis pay ‘mana’ nergan, Jehová Diosta cuyashganraycu (Gén. 39:9). Noganchipis tiempunchita jorgunanchi mañacunapaj y Palabrantapis leinapaj, chaynopa Jehovawan más amigo cashun. Joseno Jehovapa amigun captinchega ima mana alitapis manami rurashunchu Jehovata mana laquichinapaj (Sant. 4:8).

15. ¿Imataj yachacunchi israelitacuna Diosta mana cäsucushganpita? (Hebreos 3:12).

¹⁵ Pipis gongaptin Jehová cawaj Dios cashganta, mana alicunamanpis rasla jaticunmanmi. Yarpärishun chunyaj jircacho ima pasashganta israelitacunawan. Paycuna dudar galaycurgan Jehová yanapänanpaj, jina nerganpis: “¿Noqantsiwan TAYTA DIOS kaykanku o manaku?” (Éx. 17:2, 7). Y tiempuwanga contranmanpis churacargan. Paycunano cayta manami munanchichu (leiriy Hebreos 3:12).

16. ¿Imacunataj yäracuyninchita ushacächinman?

¹⁶ Cay caway vidachoga Diosta cäsucunapäga manami facilchu. Achca runacuna nipäcun ‘Dios mana canchu’. Jina Diosta mana cäsucojcuna ali cawashganta ricanchi. Chaycunaman alapa yarparga, yäracuyninchitapis ushacächinmanmi. Dudaytapis galaycushwanmi Dios mana yanapämänanchipaj cajta. Salmo 73 cajta escribej runapis chaypa pasargan. Payga ricargan mana cäsucoj runacunapis cushishga cawaycashganta. Chaymi Diospita dudayta galaycurgan (Sal. 73:11-13).

17. ¿Imaraj yanapämäshun Jehovalaman yäracunapaj?

¹⁷ ¿Imataj yanapargan Salmuta escribej runataga? Payga yarpargan, Diosta mana cäsucojcuna  ushacächishga cananpaj (Sal. 73:18, 19, 27). Jina yarpachacurganpis Diosta cäsucushganga quiquinpa ali cashganta (Sal. 73:24). Noganchipis yarpachacushwanmi Diosta sirvishganchiraycu achca bendiciuncunata charashganchita. Tapucushwanmi: ¿Imanoraj cawäman Diosta mana sirviptëga? Chayman yarpachacuptinchega yanapämäshun imaypis Jehovata cäsucunapaj y salmistano cayta nishun: “Qamman yärakamushqäqa lapanpitapis mas alimi kaykan” (Sal. 73:28).

18. ¿Imanirtaj manchacushunchu shamoj tiempucho ima pasaptinpis?

¹⁸ Cawaj Diosta sirvishganchiraycu imayca problemacunapa pasaptinchipis aguantashunmi (1 Tes. 1:9). Cawaj Diosninchega imaypis yanapämäshun y cuidamäshunmi. Unaypis siervuncunata yanapashgami, chaynola cananpis ruranga. Jatun nacaypis chayamungami y japalanchi manami caycäshunchu (Is. 41:10). Chauraga Jehovaman yäracur cayno nishun: “Tayta Dios yanapaykämaptinmi imatapis mana mantsakütsu” (Heb. 13:5, 6).