1929 watacho, 22 diciembre quillacho yurirgä Noville, las Ardenas marcacho. Chaychoga isgun granjacunami cargan, chayga caycan Bastoña cercalancho, Bélgica naciuncho. Yarpämi wamrala caycar familiäwan cushishgala cawacushgäta. Shulca caj Raymond wauguëwan junaj junaj wäcapa lechinta gapej canchi. Y cosecha wichanga lapanchimi chacrapa aywaj canchi. Chay marcächoga jucninchi jucninchimi yanapanacärej cä.

Taytä Emile y mamä Alice, católicos cashpan cada domingo misaman aywacoj. Pero 1939 watacho, Inglaterra naciunpita precursorno yanapacoj waquin hermanucuna taytäta inscribichergan Consolación revistata chasquinanpaj (canan chay revistata reguinchi ¡Despertad! jutiwan). Taytäga jinan horami cuentata gocurgan rasunpa cajta tarishganta, chaymi Biblia estudiayta galaycurgan. Chaycamaga papänë vecinücunawan ali apanacärej, pero misaman manana aywaptin enemiguntano ricargan. Taytätaga cutin cutinmi nipäcoj Iglesiata mana jaguinanpaj, y chayraycu pasaypa rimanacärej.

Taytäta vecinucuna mana ali tratajta ricarmi laquicoj cä. Galanancho wilacushgäno chaypämi lapan shongüwan Diosta mañacurgä yanapämänanpaj. ¡Cushicurgämi ichic ichiclapa vecinücuna mana fastidiamaptinchi! Chayta ricarmi convencido caycargä Jehovaga mañacuyninchita wiyamashganchipita.

1940 watacho, 10 mayo quillacho, Alemania nazi atacargan Bélgica naciunta y chaycho runacunaga gueshpir aywacärergan. Familianchipis Francia naciunman, sur caj ladupa aywacurganchi. Viajaycashganchichomi Alemania naciunpa soldaduncuna y Francia naciunpa soldaduncunawan peliaycajtapis ricarganchi.

Wasinchipitapis imaycanchicunata apacärergan, chaymi cutiptinchi Bobbie algulanchi  chasquimarganchi. Lapan pasamashgancunata ricarmi tapucurgä ‘¿imanirtaj may chaycho guerracuna y nacaycuna caycan?’ nir.

Chay wichancho precursorno y ancianuno yanapacoj Emile Schrantz a hermano watucamarganchi. Payga Bibliawanmi shumaj tantiachimarganchi imanir nacaycashganchita, jina waquin tapucushgäcunatapis contestamargan. Chayga yanapämashga convencido caycänäpaj Jehová cuyacoj Dios cashganta, y paywan ali amigo canäpaj.

Guerra manaraj ushaptin waquin hermanucunawanpis tincoj canchimi. 1943 watacho, agosto quilla José-Nicolas Minet hermano, wasinchiman visitamarganchi y juc discursutapis gorgan. Usharirna tapurgan ‘¿pitaj bautizacuyta munan?’ nir. Noga, papänë y tiyüpis maquinchita jogarirganchi, y quimsanchi juc tacsha mayulacho bautizacurganchi.

1944 watacho, diciembre quillacho, Alemania nación soldaduncunawan atacargan occidente cajpa, y galaycurgan batalla de las Ardenas nishgan. Cercalancho tiyashganchiraycu wasinchipa sotanulancho quilla entero pacacurganchi. Juc junajcho uywäcunata garapacunäpaj yargurgä, chaylachomi bombano pashtar galaycurgan, micuynëcuna shuntarashgan wasipa techunpis vuelargan. Chaycho puriycargan juc soldado americano, y gaparaypa nergan: “¡Umpurcuy, umpurcuy!”. Jucla ladunman aywaycur latacuycurgä, payga cascupämargan chapämänanpaj.

Guerra ushaycuptenga, Lieja congregaciuncho caycaj hermanucunawan parlapacärergämi, chay marcaga nogacuna caycashgäpita 90 kilometrucunano cargan. Tiempuwanga Bastoña marcacho waquincunawan juntacarcur Bibliapita yachacärergä. Nircur impuestucuna ricaycho arur galaycurgä, chay tiempulacho abogadupäpis estudiargä. Tiempuwanna juc notariupa secretariun cargä. 1951 watacho Bastoña marcacho asamblea ruracargan, chaymanga 100 runacunano shamurgan. Chaycho reguirgä Elly Reuter cristianata, payga cushishgala aroj precursora cargan,  marcanpita 50 kilometrostano shamurgan bicicletanwan. Enamoranacärergä y casaracunäpaj aunicärergä. Estados Unidos Escuela de Galaad nishganmanmi Elly invitashga caycargan, chaymi encargado hermanucunata guelganan cargan nogawan caycashganta wilacunanpaj. Guelgashgantaga Nathan knorr hermanunchi contestamurgan ‘capazchi imaylapis runayquiwan aywanqui Galaad escuelaman’ nir. 1953 watacho casaracurganchi.

Chay watacho Elly warmëwan juc jatun asambleaman aywapäcurgä, chayga ruracargan Nueva York marcacho Estadio de los Yankees nishgancho, temanmi cargan “Sociedad del Nuevo Mundo”. Chaycho caycashpä juc hermano nimargan ‘quedacushun, gampaj juc ali trabajo caycan’. Jehovata ruwacurcur ‘mana’ nipäcurgä. Y Bélgica naciunman cuticärergä Bastoña marcacho chunca publicadorcunata yanapacärinäpaj. Juc wata pasarcuptenga, Serge jutiyoj wamralanchi yurergan. Ichanga laquicuypaj cargan gueshyashganraycu ganchis quillacuna pasashgancho wanucuptin. Mañacuynëcunacho Jehovata wilapäcurgä pasaypa laquicuycashgäta, y payga ishcäcunata yarparächimargan wanushgacuna sharcapäcamunanpaj cajta, chayga alapa shacyächipäcamargan.

1961 watacho trabajuta tarergä walca tiempula arunäpaj, chaynopa precursor regularno yanapacunäpaj. Pero chay junajla Bélgica naciuncho sucursalpita juc hermano gayamargan. Paymi tapumargan: “¿Congregaciunta watucamojno yanapacuyta munanquimanchuraj?” Nogana nergä: “¿Manachuraj naupataga precursornöraj yanapacärëman?”. ‘Aumi’ nipäcamargan, chaymi pusaj quillacuna precursorno yanapacärergä y 1962 wata, setiembre quillacho congregaciuncunata watucamojnona galaycurgä.

lshcay watacuna pasarcuptenga, Bruselas Betelcho yanapacärinäpaj invitapäcamargan; 1964 watacho octubre quilla galaycärergä. Betelchoga achca bendiciuncunatami chasquipäcurgä. 1965 watacho hermanulanchi Knorr chayamurgan y sucursalcho masraj yanapacunäpaj carguta chasquergä, chayta manami yarpargächu. Tiempo pasarcuptenga Elly warmiläta nogatawan Galaad escuelaman invitapäcamargan, 41 caj clase cargan. 13 watacuna pasargan ‘capazchi aywapäcunqui’ nir wauguilanchi Knorr parlashganpita. Chay escuelata usharcurga Bélgica Betelman cutipäcurgä.

Achca watapami abogaduno yanapacurgä hermanunchicuna Jehovata libre adurananpaj Europacho y juc naciuncunachopis (Filip. 1:7). Chaycho arurmi 55 naciuncunacho achca autoridäcunata reguirgä, chay naciuncunachoga hermanunchicuna Diosta libre sirviyta puedirganchu. Chay wichancunaga mana gongaylapami  Diosta ruwacoj cä yanapämänanpaj. Autoridäcunawan parlarga, manami ali abogado cashgälata musyachicurgächu, sinoga paycunata Diosta sirvej cashgäta nej cä. Jehovaga imaypis pushamarganmi, yarpargä Biblia cayno nishganta: “Mayu maypa aywananpaq TAYTA DIOS kamakätsishqannömi reypa yarpayninkunatapis kamakätsin” (Prov. 21:1).

Yarpämi Europacho alto carguyoj runawan parlashgäta cutin cutin ruwacuptërämi. Juc cuticho nimargan ‘pichga minutula caycan nogawan parlanayquipaj’ nir. Jinan horami uyticur Diosta ruwacurgä. Chaypitana chay autoridä nimargan ‘¿imataj ruraycanqui?’ nir. Nogana nergä: “Diostami agradecicuycä gamraycu, gampis paypa ministrunmi caycanqui” nir. ‘¿Imataj ninqui?’ nimargan, chaypitana ricächergä Romanos 13:4 textuta, y chayga yarpachacächerganmi. Chauraga paywanga manami pichga minutucunalachu parlargä, 30 minutuscunano cargan. Jina nimargan: “Gamcuna alimi Diosta sirvipäcunqui” nir.

Europacho achca watacunapami Jehovapa testiguncunaga juiciuman aywapäcush cay munduwan mana talucashganchiraycu, wamracunaraycu y impuestucunaraycurpis. Achca juiciucunachomi ganashganchi, pero chay lapanpa guepancunachoga quiquin Jehovami caycashga. Aumi, 140 juiciucunatano ganashganchi Tribunal Europeo de Derechos Humanos nishgancho.

1990 watacuna wichanpis Philip Brumley, Valter Farneti y nogalapis yanapacushganchi imaycata rurar Cuba naciunchopis hermanunchicuna Diosta libre adurapäcunanpaj. Bélgica naciuncho caycaj Cuba embajadatapis cartata apachicurgä y chaycho parlapacärergä juc autoridäwan. Parlapacärishgäga alinomi cargan, pero imapis jucla alchacarganchu.

Imano captinpis, Jehovata ruwacurcur 5 mil Bibliacunata Cubaman apachicärergä. Cubacho autoridäcunaga imatapis nipäcurganchu. Biblianchicunaga hermanunchicunata alimi aypucargan. Jehová yanapaycalämashganchita ricarmi yapay permisuta jorgurcur 27.500 Bibliacuna masta apachicurganchi, jina chaynola lapanpis aypucargan. ¡Amatar cushicurgä Cuba naciuncho hermanunchicunapa Bibliancuna jucnin jucninpa cashganta!

Achca cutimi Cuba naciunman aywargä hermanunchicuna tranquilula Diosta sirvinanpaj abogaduno yanapacunäpaj. Viajashgäraycu shacya shacyala parlapacur más autoridäcunatapis reguirgä.

1994 watacho, Ruanda naciuncho cawaj runacuna quiquincunapura wanuchinacärish, 1.000.000 runacunano wanupäcush. Hermanulanchicunapis wanupäcushgami chay wichan. Paycunata yanapänapäga juclami imatapis camacächishganchi.

Yanapänapaj Kigali sitiuman chayaycurga, ricashganchimi traducinapaj Oficina y publicaciunninchicunata churacunapaj sitio balacera cashganraycu uchcu uchcu caycashganta. Wilapäcamashganchi hermanulanchicunataga machetewanräshi wanuchipäcush. Jucnin jucnincuna imano yanapanacärishgantapis wilapäcamashganchi. Tutsi tribupita juc hermanuta reguishganchimi, payshi 28 junajcunano pacaraycashga juc ichic uchculacho, hutus tribupita Testigucuna paytaga yanapaycashga. Chay marcacho reuniuntapis rurashganchimi 900 cristiano masinchicunata espiritual cajcho shacyächinapaj.

Nircur República Democrática del Congo naciunman aywarganchi. Ruandapita achca hermanucuna gueshpir aywacärergan Goma marcaman pacacunanpaj, paycunatami ashir aywarganchi. Paycunata mana tarirmi Jehovata mañacurganchi yanapämänanchipaj paycuna cashganman chayanapaj. Chaylachomi juc runa noganchiman shamurgan y payta tapushcanchi ‘¿Jehovapa testiguncunata maygalantapis reguinquichuraj?’ nir. ‘Au, nogami Testigo caycä, Comité de Socorro cashganman apashayqui’ nir pushamashcanchi. Chaycho hermanucunawan cushi cushila parlapacurganchi, nircur 1.600 hermanunchicunawan juc reuniunta rurarganchi espiritual cajcho shacyächinapaj. Jehovapa testiguncunata Pushajcunapa cartantapis leiparganchi. Chay cartacho cayno nergan: “Cuyashga hermanuläcuna, gamcunapaj cada cadalami Jehovata mañacuycä. Payga manami jaguishunquichu”. Chayta wiyaycurmi hermanunchicuna alapa cushicärergan. ¡Jehovapa testiguncunata Pushajcuna nishgancunaga rasunpami cargan! Cananga Ruanda naciuncho 30 milpitapis más Testigucuna cushi cushila Jehovata sirvircaycan.

2011 wata, warmilä Elly wanushga, casaracushgäpita 58 watacuna pasashga. Nanaycaj shongulätaga Jehová shogayculashgami. Jina yanapämashga vecinücunata Diospa Gobiernunpita parlapashgäcuna.

90 watapitapis masna charaycaptëpis, jinalami waran waran Diospita yachachicuycä. Bélgica sucursalchoga yanapacuycärämi Departamento de Asuntos Legales nishgancho, imapa pasashgäpitapis waquincunawanga parlapacärëmi y waquin mozu betelitacunatapis watucojmi aywä yanapänäpaj.

Punta rurashga oraciunnëpitaga 84 watacunano pasashga. Lapan watacunacho calpachacushgä Jehovapa amigun canäpaj. ¡Agradecicömi Tayta Jehovata, payga lapan mañacushgäta wiyaycalämashgami! (Sal. 66:19). b