1. David Jehovapita parlar, ¿imatataj nergan?

 SASA o aja tiempucho cawaycanchi, chaymi öraga ima problemapis o imapis pasaptin ilajpita cawayninchita cambianman. Pero, ¡Jehová yanapämänanchipaj listo caycashganta musyarga cushichimanchi! Pasaj yachachicuycho ricashganchi Jehová cawaj Dios cashganta y yanapämänanchitapis munashganta. Cada cadala Jehová yanapämashganchita ricar, cuentata gocunchi pay rasunpa cawaycashganta (leiriy Salmo 18:46). David Jehovapita parlar nergan gagano cashganta. ¿Imanirtaj Jehová cawaj Dios caycaptin David nergan gagano cashganta?

2. ¿Imatataj canan yachacushun?

² Cay yachachicuycho ricashun imanir ninchi Jehová gagano cashganta y imacunata paypita yachacunchi. Nircur yachacushun imanir chapämajninchi gaga Jehovaman yäracushun y imanomi payno cananchi.

IMANOTAJ JEHOVAGA GAGANO CAYCAN

3. ¿Maygan textucunacho wilacun Jehová gaga japuy cashganta? (Ricay fotuta).

³ Bibliacho parlaptin Jehová gagano cashganpita tantiachimanchi pay imano cashganta. Y achca cuticunacho Diospa sirvejnincuna Jehovata alabaycur gaga japuy cashganta nipäcun. Deuteronomio 32:4 textuta escribejga nergan Jehová gagano cashganta, y paymi imapitapis chapämanchi.  Habacucpis Jehovata nergan: “Tsapämaq qaqami kaykanki” (Hab. 1:12). Jehovapis quiquinpita parlar nergan gagano cashganta (Is. 44:8). Yachacushun imano Jehová musyachicun gaga japuy cashganta y imanir payman yäracunanchi (Deut. 32:31).

4. ¿Imanirtaj ninchi Jehová chapämanchi? (Salmo 94:22).

⁴ Jehová chapämanchi. Alapa tamya captin pipis ushmacuyta mana munarga juc machayman o gagamanpis pacacunanpaj aywan. Chaynolami Jehovapis chapämanchi cawayninchicho mana alicunapa pasaptinchi (leiriy Salmo 94:22). Pay cuyamashpanchi chapämanchi imapis paywan amistäninchita mana ushacächinanpaj. Jina aunimashganchi canan lapan nacachimashganchicunatapis ushacächinanpaj jaucala cawacunapaj (Ezeq. 34:25, 26).

5. ¿Imatataj rurashwan Jehová chapämänanchipaj?

⁵ Cada cadala Jehovata mañacuptinchi ricacämun payman yäracushganchita. Mañacuptinchega, yarpayninchita y shongunchitapis Jehová chapaycun (Filip. 4:6, 7). Hermanunchi Artiom, carcelcho caycaptin Testigo cashganraycu, juc carguyoj fiyu runa mana ali tratargan. Y tapucuycunata rurar pasaypa pengachiytapis munargan. Pay nin: “Cada cadala tapupämaptin manchacoj cä. […] Chaura Jehovata mañacoj cä tranquilo caycänäpaj y yachaytapis gomänanpaj. Chay carguyoj runa imaycata ruraptinpis Jehovata jaguergächu […]. Jehovaga juc murallanomi chapämargan”.

6. ¿Imanirtaj imaypis Jehovaman yäracushun? (Isaías 26:3, 4).

⁶ Jehovaga yäracuypämi. Juc gaga imaypis sitiulancho caycan, manami cuyunchu. Chaynolami Jehovapis listo caycan imaypis yanapämänanchipaj. Payga chapämajninchi gagami imayyajpis caycan (leiriy Isaías 26:3, 4). Jehovaga imaypis aunicuynincunata cumplinmi, mañacuyninchita wiyan y tucuynopa yanapämanchi. Payga sirvejnincunata manami jaguinchu, chaymi payman lapan shongunchiwan yäracunchi (2 Sam. 22:26). Imaypis manami gonganchu payraycu lapan rurashganchita, tiempulancho bendicimäshun (Heb. 6:10; 11:6).

7. ¿Imanotaj yanapämanchi Jehovaman yäracuptinchi? (Fotutapis ricay).

⁷ Jehovaman yäracuptinchi, payta ricaycanchi chapämajninchi gagatano. Sasa o aja tiempuchopis payman yäracuptinchega japalanchi manami ricacushunchu (Is. 48:17, 18). Cada cadala yanapämashganchita ricar, masraj lapan shongunchiwan payman yäracunchi. Y pasaypa fiyu pruebacunapa pasarpis convencido caycäshun Jehovapa yanapacuyninwan aguantanapaj. Capaz öraga ‘pipis canchu yanapämänanpaj’ nir yarpanchi, pero ama gongashunchu Jehová yanapämänanchita munashganta. Vladímir cristianuga nin: “Carcelcho caycar cuentata gocurgä Jehovaman masraj yäracushgäta. Chaycho  japalä caycar yachacurgä paylami caycashganta yanapämänanpaj”.

8. 1) ¿Imanirtaj ninchi Jehová manami cambianchu? 2) ¿Imanotaj yanapämanchi Jehovata chapämajninchi gagatano ricaptinchi? (Salmo 62:6, 7).

⁸ Jehová nishganta cumplinmi. Juc jatun gagaga sitiulancho caycan, pipis cuyuchiyta puedinchu. Chaynolami Jehovapis ima munashganta y ima yarpashgantapis manami cambianchu (Mal. 3:6). Adán y Eva juchalicuptin, Jehová ima munashganta manami cambiarganchu. Pablo nergan Jehová “promitishqanta manami kutirikuykuntsu” (2 Tim. 2:13). Waquincuna imata ruraptinpis o ima pasaptinpis, Jehová imano cashganta, ima yarpashganta y leynincunata manami trucachinchu. Caycunaga tantiachimanchi Jehová imaypis listo caycänanpaj yanapämänanchipaj y sasacunapa pasaptinchipis aguantanapaj (leiriy Salmo 62:6, 7).

9. ¿Imataj yachacunqui Tatiana pasashganpita?

⁹ Jehová imano cashganman y cay Pachapaj ima munashganmanpis yarpachacuptinchega, yanapämäshun payman yäracunapaj y chapämajninchi gagatano ricanapaj. Chaura pruebacunapa pasaptinchi o laquishga caycaptinchipis tranquilo caycäshun y Jehovata jaguishunchu (Sal. 16:8). Chaytami pasargan Tatiana cristianata, payga Testigo cashganraycu sasacunapa pasargan. Pay cayno nin: “Autoridäcuna michämaptin wasëpita mana yargunäpaj, puntalachoga alapa sasami cargan, pasaypa laquishga ricacurgä”. Pero payga yarpachacurgan lapan pasashgancuna Jehovapa jutinraycu cashganta. Chayshi calpata gorgan laquishgala manana caycänanpaj. Jina payga nergan: “Cuentata gocurgä Jehovata cuyar y cäsucuyta munar chaycunapa pasaycashgäta; chayga yanapämargan quiquiläman mana yarpachacunäpaj”.

10. ¿Imatataj cananlapita ruranquiman yäracunayquipaj Jehová imaypis chapäshunayquipaj?

¹⁰ Ichiclacho sasa pruebacunapa pasashun y chay wichanga Jehovaman lapan shongunchiwan yäracuyta necesitashun. Chaymi cananlapita convencido cananchi Jehová lapan necesitashganchicunata gomänanchipaj paylata sirvir caycänapaj. ¿Imanotaj chayta rurashwan? Bibliacho caycaj wilacuycunata y canan wichan Diospa sirvejnincuna imacunapa pasashgantapis leinanchi. Yarpachacuy imano Jehová sirvejnincunata yanapashganta. Chayta rurar gampis payman yäracunqui imaypis chapäshunayquipaj.

JEHOVÁ CASHGANNOLA CANANCHI

11. ¿Imanirtaj Jehovano cananchi? (“ Joven hermanucuna rurananpaj” recuadruta ricay).

¹¹ Caycama ricashganchi Jehová chapämajninchi gagano cashganta. Canan ricashun imata rurashwan payno canapaj. Jehová cashganno cayta calpachacuptinchega congregaciuncho caycaj hermanunchicunata masraj yanapashun. Jesusga Simunta nergan Cefasnami jutin cananpaj (Cefas ninanqa  Pedro ninanmi y “Pedro ninanpis rumi nishqalanmi kaykan”) (Juan 1:42). Chaywanga Jesús niycargan Pedro hermanucunata shacyächinanpaj y yanapänanpaj ali yäracuyoj cananpaj. Congregaciuncho caycaj ancianucunapis pacacuna jatun gaganomi canman hermanucunapaj (Is. 32:2). Lapanchimi Jehovano waquincunata yanapayta puedinchi, chayta rurar juc gaga japuy waquincunapaj caycäshun (Efes. 5:1).

12. ¿Imatataj rurashwan hermanunchicunapaj gaga japuy canapaj?

¹² Sasacunapa pasaycajcunata yanapashun. Desgraciaraycu, guerraraycu o ima cashganraycu hermanunchicuna nacaptin wasinchiman ali chasquishun. Cay “ultimu tiempucho” cawayninchi más sasaman ticraptin listo caycäshun jucninchi jucninchi yanapanacunapaj (2 Tim. 3:1). Jina hermanunchicunata yanapashun espiritual cajcho y cuyashga ricacärinanpäpis. Reuniunman shamojcunata cuyacuywan chasquiptinchega, paycuna congregaciuncho cushishga y ali ricacäringa. Canan wichan cawayninchega manami facilchu, runacunaga cuyacunchu ni respetupis canchu. Pero hermanunchicunata reuniuncunacho cuyacuywan chasquiptinchega, paycuna cuyashga, seguro y cushishga ricacärin.

13. ¿Imanotaj ancianucuna canman waquincunapaj gaga japuy cananpaj? (Fotutapis ricay).

¹³ Ancianucunaga imaypis listo caycanman hermanunchicuna nacaycashgan horacho yanapacunanpaj. Capaz canman desgraciacuna captin, pitapis hospitalman ilajpita apananpaj caycaptin o laquishga caycajcunatapis Bibliawanmi shacyächinanpaj. Ancianucuna cuyapäcoj, wiyacoj y yanapänanpaj listo caycaptin, hermanucunaga mana manchacuypa rasla yanapacuyninta ashinga. Jina  Bibliapita chasquishgan consejucunatapis, cushi cushila cäsucäringa (1 Tes. 2:7, 8, 11).

14. ¿Imacunataj ruraptinchi ricacämun yäracuypaj cashganchita?

¹⁴ Yäracuypaj cananchi. Lapanchimi munanchi waquincuna noganchiman yäracamunanpaj, masraj sasacunapa pasaptin (Prov. 17:17). Pero, ¿imatataj rurashwan waquincuna noganchiman yäracamunanpaj? Jehovano cananchi. Payga lapan parlashgancunata cumplinmi, chaynola noganchipis calpachacushun lapan parlashganchicunata cumplinapaj (Mat. 5:37). Pipis yanapacunapaj caycaptenga yanapacushwanmi. Y congregaciuncho imatapis ruranapaj nimaptinchega, calpachacushun nimashganchino ruranapaj.

15. Ancianucuna yäracuypaj captenga, ¿imanotaj hermanucuna ricacärin?

¹⁵ Ancianucuna yäracuypaj captenga congregaciuncho tucuynopa yanapacun. Tantiarinapaj, juc anciano grupuncho caycaj hermanucunawan imaypis cuyacoj captenga, paycunaga imaypis necesitashgan horacho yanapacuyninta ashinga y imacunapa pasashgantapis wilapanga. Ancianucuna imay horapis yanapacunanpaj listo caycaptenga, hermanucuna alapa cuyashga  sienticäringa. Jina consejuncuna Diospa Palabran Bibliapita o publicaciuncunapita captenga, hermanucuna paycunaman masmi yäracärin. Chaynolami pasan hermanucuna imalatapis wilapashganta juccunata mana wilapaptin y ima nishgantapis cumpliptinmi.

16. Jehová nishganta imaypis ruraptinchega, ¿imanotaj quiquinchita y waquincunatapis yanapacun?

¹⁶ Jehová nishganta imaypis ruray. Jehovata lapancho cäsucuptinchi y Biblia nishganno imatapis ruraptinchi, waquincunapis chayno rurayta munanga. Bibliapita yachacuptinchi y Jehovaman más yäracunapaj calpachacuptinchega, mana jaguiypa payta imaypis cäsucushun y Jehovata jaguishunchu. Rasla cuentata gocushun cay mundo yarpashganga Jehovapa contrancho caycashganta, y imaman creishganchipita o yachacushganchipitapis ‘cayga rasunpachuraj o manachuraj’ nir dudar galaycushwanchu (Efes. 4:14; Sant. 1:6-8). Mana ali wilacuycunata chasquiptinchi Jehovaman y promesancunamanpis yäracur jaucalami caycäshun (Sal. 112:7, 8). Jina camaricushga caycashwan sasacunapa pasaycajcunatapis yanapänapaj (1 Tes. 3:2, 3).

17. ¿Imanotaj ancianucuna canman hermanucunata yanapänanpaj?

¹⁷ Ancianucuna ali juiciuyoj, ali tantiaj y ordenado capäcunman. Bibliacho yachacushgannola ali yachachicuptin, hermanucunata yanapanga jaucala y fuerte caycänanpaj (Tito 1:9; 1 Tim. 3:1-3). Ancianucuna hermanucunata cada cadala shacyächiptin y cuyacoj cashganta ricächicuptin, paycunata yanapan reuniuncunacho caycänanpaj, predicaciunchopis y Bibliapitapis yachacunanpaj. Hermanucunaga mana alicunapa pasar laquishga horacho ancianucuna yanapacun Jehovaman yäracunanpaj y shamoj watacunacho ali cawayman yarparänanpaj.

18. ¿Imanirtaj munaycunchi Jehovata alabar payman masraj witinapaj? (“ Imanotaj Jehovaman guelicushun” recuadruta ricay).

¹⁸ Jehová imano cashganta yachacushganchipita, rey Davidno cushishga ricacur noganchipis cayno nishun: “Tsapämaq TAYTA DIOS alabashqa kaykulätsun” (Sal. 144:1). Jehovaman imayyajpis yäracushwan. Lapan cawayninchicho, jina edäyashgana caycarpis seguro caycashwan yanapämänanchipaj paypita mana raquicänapaj. Chaymi payman alapa yäracur cayno nishun: Jehová Dios ‘tsapämaqnë’ caycan (Sal. 92:14, 15).