1. ¿Imata ricartaj waquincuna cushicärin chayraj puntata reuniunman aywarga? (Fotutapis ricay).

 JUC runashi warminwan chayraj puntata Diosta aduranapaj wasiman aywan. Hermanucuna cushishga y shacyala chasquishganta ricarshi cushicärin y jucnin jucninpis cuyanacärishganta rican. Wasinpäna cuticuycaptinshi warmi cajga runanta nin: “Jehovapa testiguncunanoga manami canchu, y chayga gustamanmi”.

2. ¿Imanirtaj waquincunaga Jehovata sirviyta jaguirergan?

² Congregaciuncho hermanucuna cuyanacärishganta ricarga alapa shumajmi. Cayga manami ninanchu Jehovapa testiguncuna juchaynaj runacuna cashganta (1 Juan 1:8). Hermanucunata cada cadala masraj reguiptinchega, imacunacho pantashgantapis ricashunmi (Rom. 3:23). Waquincunaga Jehovatapis sirviyta jaguirergan o congregaciunpita raquicäcurgan juccuna pantashgancunata ricar, chayga laquicuypämi.

3. ¿Imanotaj musyacan pïcuna rasunpa cristianucuna cashganta? (Juan 13:34, 35).

³ Cay yachacuypa galaycunancho caycaj textuman yarpachacushun (leiriy Juan 13:34, 35). ¿Imanotaj musyacanman cargan pïcuna Jesuspa discipuluncuna cashganta?  Cuyanacäriptinmi, manami juchaynaj cashganchitachu. Jesusga manami nirganchu: ‘Chayrämi gamcuna musyapäcunqui discipulücuna cashgayquita’, payga nergan: “[Chayrämi] pïmaypis musyapäkunqa discïpulükuna kashqaykita”. Chaywanga Jesús niycargan discipuluncuna y waquin runacunapis cuentata gocärinanpaj pïcuna rasunpa cristianucuna cashganta, chayga cargan jucnin jucnin cuyanacärishganta ricar.

4. ¿Imatataj waquincuna öraga tapucärinman?

⁴ Öraga waquincuna manami Jehovapa testigun cajcunaga tapucunmanchi: “¿Imanirtaj runacuna cuyanacäriptinraj ricächicun rasunpa cristianucuna cashganta? ¿Imanotaj Jesús cuyacoj cargan apostulnincunawan? ¿Y imanotaj payno ruräman?”. Achca watapana bautizashgana caycajcunapis ali canman chayno tapucunanpaj. Chayga yanapämäshun waquincuna pantarcuptinpis cuyacoj canapaj (Efes. 5:2).

5. ¿Ima cuyacuypitataj Jesús parlaycargan Juan 15:12, 13 textucunacho?

⁵ Jesusga claro tantiachicurgan gatirajnincuna cuyanacärinanpaj, chayga musyacanman cargan rasunpa cristianucuna cashganta (leiriy Juan 15:12, 13). Paycunata cayno nergan: “Caymi nogapa mandamintö: ‘Gamcunata noga cuyashänölla jucniqui-jucniquipis cuyanacuy’”. ¿Imataj chaywan niycargan? Jesusga nergan rasunpa cuyacoj caj cristianuga yäracoj masincunaraycur wanuymanpis chayanmanmi. b

6. ¿Imataj Biblia yachachimanchi cuyacuypita?

⁶ Diospa Palabranmi yachachimanchi alapa ali cashganta cuyanacunanchipaj. Achcajmi nipäcun cay versiculucuna alapa gustashganta: “Diosga cuyacojmi” (1 Juan 4:8); “runa-masiquita cuyanqui quiquiqui  [cuyacushgayquino]” (Mat. 22:39); “rasunpa cuyanacorga imapitapis perdunanacuy” (1 Ped. 4:8), y “cuyanacuyga manami imaypis ushacangachu” (1 Cor. 13:8). Cay versiculucuna y waquincunapis tantiachimanchimi alapa ali cashganta piwanpis cuyacoj canapaj.

7. ¿Imanirtaj Satanás camäpacunchu runacuna juc shongunola caycänanpaj y cuyanacärinanpäpis?

⁷ Achcajmi tapucärin: “¿Imanotaj musyäman maygan rasunpa religión cashganta? Lapancuna rasun cajta yachachicuycashganta nin. Ichanga Diospita tucuy creenciacunata yachachicun”. Satanás achca luta religiuncunata camacächergan runacunata pantachinanpaj. Ichanga camäpacunchu may chaypita runacuna juc shongunola caycänanpaj y cuyanacärinanpäpis. Jehovalami chayta ruran. ¿Imanir? Pay cuyacoj captin. Jina espiritunta y bendiciunnintapis chasquejcunala rasunpa cuyanacärin (1 Juan 4:7). Chaymi Jesús nergan rasunpa discipuluncunaga cuyanacärinmanmi.

8, 9. ¿Imanotaj Jehovapa testiguncuna cuyanacushganmi waquincunata yanapargan?

⁸ Jesús nishganno, achca runacuna cuentata gocärish pïcuna rasunpa cristianucuna cashganta cuyanacushganta ricar. Yan jutiyoj cristiano yarpan juc asambleaman puntata aywashganpita Testigo manaraj captin, chayga ruracargan wasinpa cercalancho caycaj estadiucho. Chay estadiumanga maynash unaycho aywashga cargan juc partiduta ricänanpaj. Payga nin: “Canan ichanga manami unay shamushgänochu cargan. Testigucunaga cuyacoj cargan, ali vistishga caycargan y wamrancunapis ali comportacärej”. Caytapis nin: “Masga gustamargan paycuna jaucala y cushishga caycashganta ricar, y chayta noga ashiycargä. Manami yarpächu chay cuticho ima yachachicamushgantapis, ichanga Testigucuna ali comportacushganga umächomi grabashga quedacurgan”. c Pay ricashganga cargan jucninchi jucninchi rasunpa cuyanacushganchipitami. Hermanunchicunataga alapa cuyashpanchimi cuyacuywan y respetuwan tratanchi.

⁹ John jutiyoj cristianupis yarpan chayraj puntata reuniunman aywashganpita imano waquincuna chasquishganta. Lapancuna ali shimilapa parlapanacärishganta wiyar y ali comportacushganta ricar, nergan: “Jucnin jucnin rasunpa cuyanacushganta ricaycur cuentata gocurgä rasunpa religión cashganta”. d Paycuna pasashganno achcami caycan Jehovapa testiguncuna rasunpa cristianucuna cashganta ninapaj.

10. ¿Ima pasaptintaj musyacanga rasunpa cuyacoj cashganchita o manapis? (Ichic wilacuyta ricay).

¹⁰ Galanancho nishganchinopis, hermanunchicunaga manami juchaynajchu. Chaymi imaylapis imalatapis rurar o parlar ofendimashwanmi (Sant. 3:2). e Chay hora ricacanga rasunpa cuyacoj cashganchita o manachu. ¿Imaraj yanapämäshun rasla mana ofendicunapaj? Jesús rurashgantami ricärishun (Juan 13:15).

11. ¿Imano runataj cashganta juc cuticho Santiaguwan Juan musyachicurgan? (Dibujucunatapis ricay).

¹¹ Jesús manami shuyararganchu gatirajnincuna juchaynaj cananpaj. Chaypa trucan,  imacunacho pantashganpita cuyacuywanmi corregirgan Jehovapa ricaynincho ali caycänanpaj. Juc cuticho apostulnincuna Santiaguwan Juan mamäninta ruwacurgan Jesusta mañacunanpaj Diospa Gobiernuncho jatun carguta gonanpaj (Mat. 20:20, 21). Chayta rurar paycuna ali tucurcaycargan y yargaj cashganta musyachicuycargan (Prov. 16:18).

12. ¿Imanirtaj ninchi waquin apostulnincunapis pantapäcushganta?

¹² Chay cutichoga manami ishcanlachu pantapäcurgan. Bibliaga nin: “Chayno ruwacushanta wiyar waquin caj chunca disïpuluncunaga chay wauguipaj rabyaran” (Mat. 20:24). Chay horaga capaz lapancuna rimanacuymanraj chayashgachi. Waquin apostulcunaga caynopis nirganchi: “¿Pïcunataj gamcuna carcaycanqui chay cargucunata mañacärinayquipaj? Manami gamcunalachu Jesusta gatir arupäcushcanquichu. Nogacunapis gamcunano chay cargucunata chasquëmanmi” nir. Imano captinpis, chay cuticho apostulcunaga manami cuyacuywanchu tratanacurgan.

13. Apostulnincuna pantarcuptinpis, ¿imanotaj Jesús tratashga? (Mateo 20:25-28).

¹³ ¿Imataj Jesús rurashga? Payga piñacurganchu. Manami nirganchu más humilde y cuyacoj runacunata ashinanpaj paycunapa trucan, ni más ali apostulcuna cananpäpis. Chaypa trucan, ali shonguyoj  cashganta musyar pacienciawan corregirgan (leiriy Mateo 20:25-28). Yapaychopis apostulnincuna rimanacäriptin pï más ali cashganpita, Jesusga imaypis cuyacuywanmi trataycurgan (Mar. 9:34; Luc. 22:24).

14. Jesuspa apostulnincuna cawashgan wichan, ¿imanotaj runacuna capäcoj?

¹⁴ Jesusga musyarganmi apostulnincuna maycho y imano ashmashga cashganta (Juan 2:24, 25). Chay wichan pushacoj religiosucunaga ali tucoj cashpan ali cargucunata chasquiyta y waquincuna alabananta munaj (Mat. 23:6; cay videuwan tincuchiy Asientos del frente en la sinagoga, de la nota de estudio de Mateo 23:6). Paycunaga ali tucärejmi waquincunapita más ali cashganta (Luc. 18:9-12). f Chaymi Jesusga musyarganmi apostulnincuna quiquincunata imano ricacushganta y waquincunatapis (Prov. 19:11). Jesusga manami shuyararganchu apostulnincuna juchaynaj cananta y paycuna pantarcuptinpis manami piñacurganchu. Ali shonguyoj capäcushganta musyar, pacienciawan yanapargan humilde y cuyacoj capäcunanpaj.

15. ¿Imataj yachacunchi Santiaguwan Juan pasashganpita?

¹⁵ Santiaguwan Juan rurashganpitaga achcatami yachacunchi. Manami alichu caycargan mañacärinanpaj Diospa Gobiernuncho ima cargucunata munashganta. Jina waquin apostulcunapis rurashgancuna juc shongula caycänanpaj trucan, raquicächinmanchi cargan. Chaymi Jesusga 12 apostulnincunata cuyacuywan y ali shimilapa corregirgan. ¿Imataj yachacunchi? Manami yarpashwanchu waquincuna pantashgancunalaman, sinoga imataj ninchi o ruranchi pantashganta ricar. Chaymi imaylapis ajayashga o piñashga ricacuptinchi juc hermano ofendimashganchipita, tapucunanchi: “¿Imanirtaj rurashganga alapa rabiachimashga? ¿Quiquëpis imalachopis mejoranapaj caycanchuraj? ¿Chay hermanuga sasa problemacunapa pasaycanchuraj? Ruramashgancuna piñachimaptinpis, ¿manachuraj más ali canman chayta gonganäpaj y cuyacoj canäpaj?”. Waquincunata imaypis cuyacuywan trataptinchega, rasunpa cristianucuna cashganchita musyachicuycanchi.

16. ¿Ima mastataj Jesuspita yachacunchi?

¹⁶ Jesús rurashganga yachachimanchi manami jucla hermanunchiwan piñacunapaj, sinoga tantiashwanmi imanir imalatapis chayno ruran (Prov. 20:5). Jesusga musyarganmi waquincunapa shonguncho ima caycashganta, noganchi ichanga manami. Chaymi hermanunchicuna pantarcuptinpis pacienciacoj cananchi (Efes. 4:1, 2; 1 Ped. 3:8). Chaypäga paycunata ali reguishganchimi yanapämäshun. Ricärishun juc waugui pasashganta.

17. ¿Imataj pasargan congregaciunta watucamoj waugui juc hermanuta ali reguinanpaj calpachacushganpita?

¹⁷ África orientalcho congregaciuncunata watucamoj waugui yarpan juc hermanuta reguishganta. Puntalachoshi ricargan toscu niraj runano cashganta. ¿Imataj payga rurashga? Nin: “Paywan mana juntacänapaj trucan, shumaj reguiyta munargä”. Chayta  rurashpan yachacurgan chay hermano imano winashga cashganraycur chayno cashganta. Caytapis nin: “Unay rurashgancunata jaguirinanpaj calpachacushganta musyar y espiritual cajcho alapa pogushganta ricar, payta masraj respetargä. Ali amigucunaman ticrapäcurgä”. Hermanucunata ali reguiptinchi y imapa pasashgancunata shumaj tantiaptinchega, sasanachu canga cuyacuywan tratanapaj.

18. ¿Ima tapucuycunatataj ruracunanchi pipis ofendimaptinchi? (Proverbios 26:20).

¹⁸ Öraga maygan hermanunchipis ofendimaptinchega capaz parlapacuytaraj munashwanmi. Ichanga chayta manaraj rurar, tapucushwan: “¿Ima pasashganpita lapantachu musyä?” (Prov. 18:13). “¿Mana munarchuraj chayta rurashga?” (Ecl. 7:20). “¿Nogapis unaycho chaynochu rurashcä?” (Ecl. 7:21, 22). “Paywan parlaptëga, ¿rasunpachu alchacanga o más jatun problemamanchuraj ticranga?” nir (leiriy Proverbios 26:20). Cay tapucuycunaman yarpachacurga, hermanunchicunata cuyashpanchi capaz ima pasashganta gongayta munashwanmi.

19. ¿Imataj ruranapätaj calpachacuycäshunla?

¹⁹ Jehovapa testiguncuna marcano musyachicun Jesuspa rasunpa discipuluncuna cashganta. ¿Y imanotaj jucninchi jucninchi chayta musyachicushwan? Hermanunchicuna pantarcuptinpis jinala cuyaptinchimi. Chayta ricaycur waquincuna cuentata gocärenga maygan rasunpa caj religión cashganta y noganchicunawan cuyacoj Diosninchi Jehovata sirviyta munapäcunga. Chaymi jinala calpachacuycäshun piwanpis cuyacoj canapaj, chaynopa ricacämunga rasunpa cristianucuna cashganchita.