1. ¿Imataj munapäcun cristiano caj taytacunaga?

 TAYTACUNA, musyanchimi shongupita munashgayquita wamrayquicunata yanapänayquipaj Jehovata reguinanpaj y cuyananpäpis. Ichanga Diosta mana ricaptinchega, ¿imanopäraj yachachinquiman Dios rasunpa cashganta creinanpaj y payman guelicunanpäpis? (Sant. 4:8).

2. ¿Imawantaj taytacunaga wamrancunata yachachinman Jehovapita y imano cashganpitapis?

² Achca taytacuna Bibliapitami wamrancunata yachachin Diosman guelicamunanpaj (2 Tim. 3:14-17). Ichanga Bibliaga wilacun wamracuna y jovincunaga jucnopapis Diospita yachacur payman witinanpaj. Proverbios libruchoga wilacun juc tayta wamranwan parlaycashganta, chaycho payga wamranta shacyächin Jehová camashgancunata ricaycur cuentata gocunanpaj Dios imano cashganta (Prov. 3:19-21). Chaymi canan ricärishun imano taytacuna Dios camashgancunawan wamrancunata Jehovapita yachachinman y imano cashganpitapis.

3. ¿Imanotaj taytacuna wamrancunata yanapanman?

³ Bibliaga nimanchi Diosninchi imano cashgantaga musyanchi “llapan camashancunata ricarmi” (Rom. 1:20). Taytacuna, ¿manachu wamrayquicunawan junto caycar o viajipa aywar cushicunquichu? Alichi canman chaycunata rurar paycunata parlapänayquipaj Jehová lapan camashgancunapita y imano cashganpitapis. Ricärishun imacunata taytacuna yachacunman Jesús rurashganpita.

4. ¿Imanotaj Jesús Dios camashgancunawan discipuluncunata yachachergan? (Lucas 12:24, 27-30).

⁴ Yarpachacuy imano Jesús yachachicushganta. Juc cuticho  discipuluncunata nergan ricapäcunanpaj cuervo avicunata y lirio waytacunatapis (leiriy Lucas 12:24, 27-30). Jesús chay horachoga juc uywapita o juc plantapitapis parlanmanchi cargan, ichanga discipuluncuna reguishgan avipita y waytapitapis parlapargan. Paycunaga ricarganchi cuervucuna vuelaycajta y lirio waytacunapis tucturaycashganta chacracunacho. Jesús chaycunapita parlar maquinwanpis señalarganrächi. ¿Y imataj nircur rurashga chaycunapita parlar? Discipuluncunata yachachergan Dios garacoj y ali shongu cashganta. Chauraga cuervucunata o waytacunatapis cuidaptenga, yäracuypaj sirvejnincunatapis masraj cuidanmanmi cargan.

5. ¿Imacunataj Dios camashgancunapita wamrayquita parlapanquiman Jehovapita yachachinayquipaj?

⁵ Taytacuna, ¿imanotaj gamcunapis Jesusno yachachicunquiman? Capaz wamrayquiwan parlapacur ninquiman gampaj maygan planta o uywapis más gustashushgayquipita. Nircur tantiarcachiy chaycuna imata Jehovapita yachachishunqui, y paytapis tapucunquiman maygan uywa o plantapis más gustashganta. Chaycunapita wamrayquicunawan parlapaptiquega shumaj wiyashunqui y mayraj parlapacunayquipaj caycanga.

6. ¿Imataj yachacunchi Christopherpa maman rurashganpita?

⁶ Cayga manami ninanchu taytacuna imaycataraj ashinanpaj juc uywapita o plantapitapis wamranta yachachinanpaj. Jesús cuervo avicunapita parlar manami nirganchu imata micushganta, o maycho punushganta, o waytacunapis imano rurashga cashganta. Capaz wamrayquipäga ali canman chayta yachacuptin, ichanga Jehovapita yachachinapäga, manami imaycataraj nishwanchu. Christopher jutiyoj cristiano cayta yarpan: “Mamanëga manami imaycataraj nimajchu Jehová camashgancunapita yachachimänanchipaj. Jatun jircacunata ricaycurga cayno nej: ‘¡Tagay jircacunaga jatunmi y cuyaylapaj! ¿Manachu Jehovaga alapa munayniyojmi?’. O lamarpa aywarpis nej: ‘¡Ricay lamar alapa pulchajyaycajta! Chayno cananpäga Diosninchi alapa poderyojchi’”. Christopher nin: “Walcala parlapämashganchicunawan shumaj yarpachacächipäcamaj”.

7. ¿Imanopataj wamrayquicunata yanapanquiman Jehová camashgancunaman yarpachacunanpaj?

⁷ Wamrayquicuna winashganman tupu, yachachinquiman Jehová camashgancunaman yarpachacunanpaj y pay imano cashganpitapis yachacunanpaj. Chaypäga maygan plantapitapis o uywapitapis parlar, cayno tapupanquiman: “¿Cayga imataj Jehovapita yachachishunqui?” nir. Paycuna ima contestashganta wiyarga almiracunquirächi (Mat. 21:16).

8. ¿Imataj israelitacunataga ruranman cargan wamrancunawan nänicunapa purir?

⁸ Israelitacunaga juc mandatuta chasquergan, wamrancunata yachachinanpaj Jehovapita ‘nänicunacho’ purir (Deut. 11:19). Israelcho caycaj nänicunapa purirga imayca uywacuna y waytacunapis caycarganchi pipis ricaycunanpaj. Chaura israelita taytacunaga chaycunapita wamrancunata parlapänan cargan Jehová ima camashgancunapita musyananpaj. Canan wichanpis taytacunata chayta ruranmanmi. Ricärishun waquincuna imata rurashganta.

9. ¿Imataj yachacunqui Punitha y Katya rurashganpita?

⁹ Indiapita Punitha jutiyoj juc mama, cayno nin: “Chacracho caycaj familiäta watucaj aywarcuptë, Jehová camashgancunapita wamräcunata parlapacärë. Chaycho achca  runacuna y carrucunapis mana captin, paycunapäga más facilmi caycan Jehová imacunata camashgancunapita yachacunanpaj”. Taytacuna, wamrayquicunaga manachi gongangachu cuyaylapa sitiuman pasiaj aywashganta, masraj plantacunapis uywacunapis ricashga captin. Katya jutiyoj mama, Moldavia naciunpita, cayta wilacun: “Yarpämi ganyan cashganno taytäcunaga chacracunapa pasiaj apapäcamashganpita. Paycunaga wamralaraj caycaptë yachachimargan Jehová camashgancunata ricaycur shumaj yarpachacunäpaj y imano cashgantapis reguinäpaj. Chaymi paycunata gracias nëmi”.

10. ¿Imataj taytacuna ruranman ciudäpita yargunanpaj sasa captenga? (“ Taytacunapaj yanapacuycuna” recuadruta ricäriy).

¹⁰ ¿Y chacracunapa aywanayquipaj sasa captenga? Amol jutiyoj cristianuga, Indiachomi tiyan, nin: “Tiyaycä sitiuchoga, taytacunaga achca horacunaraj arunanmi y chacra cashgancunaman pasiaj aywanapäga öraga cuestanmi. Ichanga Jehová camashgancunata ricaycunapaj y imano cashganpitaga juc parquichopis, o ventanapa ricachacurpis parlayta puedinchimi”. Taytacuna, gamcunapis cercalayquicho imayca caycajcunata shumaj ricarga, achcami caycanga wamrayquicunata yachachinayquipaj Jehová imacunata camashganta (Sal. 104:24). Capaz caycanman pishgucuna, chucluscuna, plantacuna y mascunapis. Alemaniapita Karina panilanchi nin: “Mamanëga alapami cushicun waytacunata ricaycur. Chaura wamralaraj caycaptë, pasiaj aywarga nänipa cuchuncunacho caycaj cuyaylapa waytacunata ricachimaj”. Jina Diospa marcanga videucunatapis y publicaciuncunatapis jorgamushga Jehová camashgancunapita yachachicunapaj. Aumi, imaycacuna caycan tucuynopa wamrayquicunata yachachinayquipaj Diosninchi camashgancunata ricaycur yarpachacunanpaj.  Canan waquilanlata ricärishun Jehová imano cashganpita wamrayquicunawan parlapacunayquipaj.

11. ¿Imataj taytacuna ruranman wamrancuna ricänanpaj Jehová cuyacoj cashganta?

¹¹ Jehová cuyacoj cashganta wamrayquicuna ricananpäga, uywacuna wawancunata imano cuyacuywan cuidashganpitami parlapanquiman (Mat. 23:37). Jina parlanayqui Jehová imaycacunata camashganpita, y maygantaj más gustashunqui. Guepa parrafucho parlashganchi Karinaga cayno nin: “Nänipa purircaycaptë mamanë nimaj shumaj ricänapaj tucuy casta cuyaylapaj waytacuna cashganta y yarpachacunäpaj Jehovapa cuyacuyninman. Watacuna pasashgana captinpis, jinala shumaj ricaycur yarpachacö cada waytacunapa colornin y imano rurashga cashgantapis. Chayga yarpächiman Jehová amatar cuyamashganchita”.

12. ¿Imataj taytacuna ruranman wamrancuna ricänanpaj Jehová alapa yachaj cashganta? (Salmo 139:14; fotucunatapis ricay).

¹² Wamrayquicunata yanapay ricänanpaj Jehová fiyupa yachaj cashganta, paynoga pipis canchu (Rom. 11:33). Chaypäga yacupita parlapanquiman imano pucutayman ticrashganta y nircur tamyano o rashtanopis shicwashganta (Job 38:36, 37). Jina quiquinchipis imano rurashga caycashganchipita parlapanquiman (leiriy Salmo 139:14). Vladimir jutiyoj tayta imano rurashganta ricärishun. Pay wilacun: “Juc cuticho wamrä bicicletanta manejaycashganpita ishquir o tunir juc guerita ruracurgan. Junajcuna pasarcuptinna sano caycargan. Chaura warmëwan tantiachicärergä Jehová chayno camamashganchipita, cuerpunchi quiquilan alchacänanpaj. Ichanga runacuna rurashgancunaga manami chaynochu. Tantiarinapaj, ‘juc carro chocacuptenga manami quiquilan alchacanchu’ nipäcurgä. Caywanga wamrä shumaj tantiargan Jehová alapa yachaj cashganta”.

13. ¿Imataj taytacuna ruranman wamrancuna ricänanpaj Jehová poderyoj cashganta? (Isaías 40:26).

¹³ Jehová nimanchi ñuquircur cieluta ricänapaj y yarpachacunapaj imano poderninwan lapanta camashganta y goylarcunapis sitiuncho caycashganta (leiriy Isaías 40:26). Gamcunapis wamrayquicunata ninquiman cieluta ricaycur yarpachacunapaj imacuna  cashganta. Taiwán naciunpita juc cristiana yarpan wamra cashgancho ima pasashganta. Nin: “Juc cuticho mamanëwan ciudäpita yargusquir chacracuna cashganman o campuman aywargä juc ishcay junaj chaycho quedacärinäpaj. Chacaycho ricapäcurgä cielo shumaj achicyaycamushganta y goylarcunapis junta cashganta. Chay wichan estudiaj masëcuna cayta wacta ruranäpaj nipäcamaj, Jehovata jaguirinäpaj manchacurgä. Mamanë nimargan yarpachacunäpaj imano Jehová poderninwan lapan goylarcunata camashganta, y yarparänapaj nogatapis chay poderninwan yanapämayta puedishganta payta mana jaguinäpaj. Chay cuticho Dios camashgancunata ricashgäpita pacha, paylata masraj reguiyta munargä, ima captinpis jinala sirvinäpaj”.

14. ¿Imanotaj taytacuna Dios camashgancunawan wamrancunata yachachinman Jehová cushishga Dios cashganta?

¹⁴ Jehová camashgancunacho musyachimanchi cushishga y imaycata ruraj Dios cashganta. Imaycata estudiajcunaga ricargan uywacuna puclashganta, pishgucunapis y pescaducunapis chaytami ruran (Job 40:20). Wamrayquicunaga ricarganchi milwapita rurashga pelotitawan juc mishi cosa puclashganta, o pishpicunapis quiquincunapura puclashganta, y chayta ricar asicurganchi. Yapaycho wamrayqui chayta ricar asicushganta ricaptiquega ali canman yarpächinayquipaj Jehovaga cushishga Dios cashganta (1 Tim. 1:11).

15. ¿Imaraj taytacunata yanapanman wamrancuna ima yarpashganta musyananpaj? (Proverbios 20:5; fotutapis ricay).

¹⁵ Öraga sasami canman wamracuna problemancunata taytancunata wilapänanpaj. Chayno captenga, ¿imaraj yanapäshunqui wamrayquicuna yarpashganta musyanayquipaj? (Leiriy Proverbios 20:5). Waquin taytacunaga chaypita wamrancunawan parlapacun pasiaj aywashgancho o Jehová camashgancunata ricaycur. ¿Imanir? Chaychoga ima bullapis o imapis canchu tranquilo parlapacuycashganta  mana pantachinanpaj. Taiwán naciunpita Masahiko jutiyoj tayta caytapis nin: “Tiempunchita jorguptinchi wamranchicunawan caycänapaj, capaz jircacunapa purir o lamarpa aywar paycuna cushishga carcaycan. Chaura más facilnami caycan imapa pasaycashganpita parlananpaj o imano sienticushganpita wilacunanpaj”. Isgun caj parrafucho parlashganchi Katya nin: “Escuelapita yargusquir mamanëga juc cuyaylapaj parquiman apamaj. Chaycho tranquila caycar escuelacho ima pasaycämashganta o yarpachacächimashganpita paywan parlapacamoj cä”.

16. ¿Imacunataj caycan pipis familianwan Dios camashgancunata ricaycur ali goyänanpaj?

¹⁶ Achcajmi tiempunta camacächin Jehová camashgancunata ricaycur pasiananpaj y cushicärinanpäpis, chayga yanapacunmi familiacho juc shongunola caycänanpaj. Bibliapis nin caycan “asina timpupis” y “fistata rurana timpupis” (Ecl. 3:1, 4). Jehová lapanta shumajmi camashga, chaycunata ricaycur cushicärinapaj y imaycatapis ruranapaj. Achca runacuna cushicärin monticunapa aywaptin, lamarpa, chacracunapa o jircacunapapis puriptin. Wamracunapis cushi cushila parquicunacho puclar corricachan, uywacunatapis ricachacun, mayucho, gochacho o lamarchopis armacärin. Chauraga Jehová camashgancunaga imayca caycan, chaycunata ricaycur o yataycurpis cushish cawanapaj.

17. ¿Imanirtaj taytacunaga wamrancunata yanapanman Dios camashgancunata ricaycur cushish cawacunanpaj?

¹⁷ Mushoj Pachacho taytacuna wamrancunawan Dios lapan camashgancunata ricaycur masraj cushicärenga. Maygan uywacunatapis manchacushwannachu, paycunapis noganchita mana manchamäshunchu (Is. 11:6-9). Tiempunchipis aypala canga Jehová lapan camashgancunata reguinapaj (Sal. 22:26). Ichanga taytacuna ama shuyaraychu chay tiempo chayamunantaraj Jehová camashgancunapita wamrayquicunata yachachinayquipaj shumaj reguinanpaj. Cananlapitana Dios camashgancunawan paycunata yachachiptiquega, rey Davidnochi ricacur cayno nenga: “Tayta Dios, manami gamnöga canchu. Gam rurashayquitano ruräga manami pipis canchu” (Sal. 86:8).