1, 2. Bautizacunayquipaj pishiycäshuptiquega, ¿imanirtaj guelanäcunquimanchu? (Garancho caycaj fotucunata ricäriy).

 CUSHICUNCHIMI bautizacunayquipaj mayna yarpashga carga. ¿Listunachu caycanqui chayta ruranayquipaj? ‘Au’ niptiquega y ancianucunapis acuerducho caycaptenga, ama dudaychu bautizacunayquipaj. Chayta rurar cushi cushila cawacunqui Jehovata sirvir.

² Ichanga ‘bautizacunayquipaj pishiycäshunquiraj’ ancianucuna nishuptiqui o gampis dudaycar-raj captiquega, ama guelanaychu. Mozularaj o mayurna captiquipis jinala calpachacuy bautismuman chayanayquipaj.

3. Etiopiapita alto carguyoj runaga, ¿imataj Felipita nergan, y imataj tapucushwan? (Hechos 8:36, 38).

³ (Leiriy Hechos 8:36, 38). Etiopiapita alto carguyoj runaga “¿imataj bautisacunäpäga pishin?” nir Felipita tapupargan. Cayga tantiachimanchi pay bautizacuyta munaycashganta. Ichanga, ¿listunachu caycargan chayta rurananpaj?

4. ¿Imanirtaj ninchi Etiopiapita runaga mastaraj yachacuyta munaycashganta?

⁴ Etiopiapita runaga “Tayta Diosta adurajmi Jerusalenman aywasha caran” (Hech. 8:27). Chaura payga judiumanchi ticracushga cargan. Escrituras Hebreas nishganta reguej, y chaycho Jehovapita yachacurgan. Ichanga mastaraj yachacuyta munargan. Felipe paywan tincurga, ¿imataj ruraycargan? Profeta Isaías escribichishgan libruta leiraycargan (Hech. 8:28). Chaychoga Jesuspita parlaj profeciacuna caycargan. Etiopiapita runaga yachacushganlawan conformacunanpaj  trucan, mastaraj yachacuyta munargan.

5. ¿Imataj rurargan Etiopiapita runa yachacushganwan?

⁵ Payga alto carguyoj runami cargan, “Etiopiacho rayna Candacepa tesurërunmi caran” (Hech. 8:27). Achca ruraynincuna rurananpaj caycaptin alapa ocupaduchi caycargan. Chayno captinpis tiempunta jorgurgan Jehovata adurananpaj. Manami conformacushgachu Diospita yachacushganlawan, sinoga mastaraj rurayta munargan. Jerusalencho caycaj templuman Jehovata adurananpaj Etiopiapita aywaj. Caruta viajar alapa chaniyoj cashganta musyaycarpis, payga Jerusalenman aywaj Jehovata adurayta munar.

6, 7. ¿Imataj Etiopiapita runaga rurashga Jehovapaj cuyacuyninta mirachinanpaj?

⁶ Etiopiapita runa mana musyashgantami Felipe shumaj tantiachergan, jucmi cashga Jesús Mesías cashganta (Hech. 8:34, 35). Etiopiapita runaga alapami cushicurgan Jesús payraycur lapan rurashganta musyar. Payga yachacushganlawan conformacunman cargan, y alto carguyoj car jinala respetashga canman cargan. Ichanga Jehovatawan Jesusta alapa cuyashganmi mirashganraycur bautizacuyta munargan, Jesuspa discipulunman ticrananpaj. Felipiga ricargan listuna caycashganta, chaymanna bautizargan.

⁷ Etiopiapita runa rurashganga yanapäshunqui imata ruranayquipaj bautismuman chayanayquipaj. Nircur gampis payno ninquichi: “¿Imataj bautisacunäpäga pishin?” nir. Cananga ricärishun imanotaj gampis paynola jinala yachacunquiman, yachacuycashgayquimanno practicaman churanayquipaj y Jehovata cuyashgayqui mirachinayquipaj.

8. Juan 17:3 nishganno, ¿imataj ruranquiman?

⁸ ¿Jesús Juan 17:3 (leiriy) textucho nishganga yanapäshushcanquichu Bibliapita yachacur galaycunayquipaj? Achcajtami chayta yanapashga. Jesús nishganga yanapämanchi yachacuyta mana jaguirinapaj. Rasunpa japalan Diospita yachacuytaga manami imaypis ushashwanchu (Ecl. 3:11). Imaycamapis cawar paypita jinala Jehovapita yachacushun y reguishganchimanno masraj guelicushunpis (Sal. 73:28).

9. Bibliapa fácil yachachicuynincunata yachacurnaga, ¿imatanataj rurashwan?

⁹ Pipis Jehovapita yachacur galaycuptenga, galaycunan caj yachachicuycunatarämi yachacun, y apóstol Pablo chaypita parlar nergan fácil yachacuycuna cashganta. Chaywanga manami niycarganchu mana ali caycashganta, sinoga “pishi wamra mikuyta  manaraq yachakur lëchilataraq upuqnömi” caycashganta nergan (Heb. 5:12; 6:1). Payga cristianucunatami niycargan manami conformacunanpaj galaycunan caj yachachicuycunata tantiashganlawan, sinoga Diospa Palabranpita más shumaj yachacurcunanpaj. ¿Gampis chayta yachacunayquipaj munanquimanchu? ¿Calpachacuycanquichu más pogunayquipaj, jina Jehovapa y munayninpitapis yachacunayquipaj?

10. ¿Imanirtaj waquincunapäga öraga sasami canman estudiananpaj?

¹⁰ Waquincunapäga öraga sasami canman estudiananpaj. ¿Y gamtaga escuelayquicho yanapäshushcanquichu leinayquipaj y estudianayquipaj? ¿Chayta rurar cushicushcanquichu? ¿O librucunata leinapäga ‘sasami, mana yachacächu’ nir jaguirishcanqui? Waquincunapis öraga chayno ricacurgan. Ichanga Jehovaga yanapäshunayquita munan. Payga juchaynajmi y ali yachachicojpis, Paynoga pipis canchu.

11. ¿Imanirtaj ninchi Jehovaga ali yachachicoj cashganta?

¹¹ Jehovaga nin ali yachachicoj cashganta (Is. 30:20, 21). Payga pacienciawan, cuyacuywan yachachimanchi, jina ricaycämun pipis alicunata rurananpaj calpachacuycashganta (Sal. 130:3). Mana puedishganchita ruranapaj cajtaga manami mañamanchichu. Payga tojshunchitapis shumajta rurashga, y chaywanga imapis tincunchu (Sal. 139:14). Jina camamashcanchi imatapis yachacuyta munanapaj, y munaycunmi imaycamapis chayta rurar cushicunapaj. Chaymi ali canman cananlapitana Bibliapita shumaj yachacuyta más munanapaj (1 Ped. 2:2). Chaypäga, ¿imaraj yanapämäshun? Munashganchi cajta logranapaj camacächishun y cada cadala Bibliata leir shumaj tantiarcushun (Jos. 1:8). Jehovaga yanapäshunqui Bibliapita cada cadala leir y leishgayquiman yarpachacur masraj cushicunayquipaj.

12. ¿Imanirtaj Jesuspa vidanpita y yachachicushganpitapis yachacunanchi?

¹² Tiempuyquita jorguriy Jesús cawashganman y yachachicushganman yarpachacunayquipaj. Cay sasa tiempucunacho Jehovata sirvinapäga, alapa ali caycan Jesús rurashgancunata ruranapaj (1 Ped. 2:21). Jesús discipuluncunata claro nergan ima sasacunapätaj pasapäcunanpaj (Luc. 14:27, 28). Ichanga musyarganmi payno Jehovata mana cachaycunanpaj (Juan 16:33). Jesuspa vidanpita yachacuy y camacächiy imano cawayniquicho payno ruranayquipaj.

13. ¿Imatataj Jehovata cutin cutin mañacunquiman, y imanir?

¹³ Bibliata estudiarga manami munanchichu maslata yachacunapaj, chaypitapis masga Jehovata reguiyta, cuyayta, y payman yäracuyta munanchi (1 Cor. 8:1-3). Cada cadala Jehovapita masraj yachacushgayquimanno, mañacuy yanapäshunayquipaj yäracuyniqui masraj mirananpaj (Luc. 17:5). Payga yanapäshunquipämi. Biblia nishganno gampis Jehovata shumaj reguiptiquega, yäracuyniqui sinchi canga; chayga yanapäshunqui pogunayquipaj y pay munashganno cawacunayquipaj (Sant. 2:26).

14. ¿Imanotaj Pedruga shumaj tantiachicurgan alapa ali cashganta yachacushganchimanno cawacunapaj? (Dibujutapis ricay).

¹⁴ Apóstol Pedruga shumaj tantiachicurgan Jesuspa gatirajnincunaga yachacushganmanno cawacunanpaj. Chaypäga Noé ima rurashganpita parlargan. Jehovaga Noeta nergan locu tamyata apamur fiyu runacunata ushacächinanpaj.  Chaura Noewan familian salvacärinanpäga manami conformacunmanchu cargan musyashganlawan, sinoga juc ruraymi caycargan rurananpaj. Y chaypita parlar Pedruga nergan locu tamya manaraj galaycuptin arcata Noé ruraycashganta (1 Ped. 3:20). Noewan familianga Jehová nishgannomi rurargan, chaymi juc jatun arcata sharcachergan (Heb. 11:7). Pedruga Noé rurashganta bautismuwan tincuchergan, “chayno salbasha captinmi chay büquita wampuchej yacuga bautisacushayqui yacu-japuy caycan” nergan (1 Ped. 3:21). Imanomi Noewan familian achca watacunapa arcata sharcachergan, chaynolami gampis rurashgayquicunaga yanapaycäshunqui bautismuman chayanayquipaj. Chaypäga, ¿imataraj ruranquiman?

15. ¿Pipis rasunpa arrepenticurga imacunataj ruranman?

¹⁵ Juc ruray ruranapaj manaraj bautizacurga caycan juchanchicunapita shongupita arrepenticunapaj (Hech. 2:37, 38). Pipis rasunpa arrepenticuptenga cambiucunata ruranmanmi. ¿Jehová chiquishgan ruraycunata rurayta jaguishcanquinachu? Chayga canman jucwan jucwan cacunapaj, cigarro mucayta, lisuracunata o mana ali palabracunata parlanapaj (1 Cor. 6:9, 10; 2 Cor. 7:1; Efes. 4:29). Chaycunata manaraj rurashga carga, calpachacuy chaycunata jaguirinayquipaj. Bibliapita yachachicojniquiwan o ancianucunawanpis parlapacunquiman consejucunata mañacunayquipaj. Jovinlaraj caycar taytayquicunawan tiyaycarga, consejucunata mañacunquimanmi ima viciucunatapis jaguirinayquipaj, chaynopa bautismuman chayanayquipaj.

16. Espiritual caj ruraycunapita parlaycarga, ¿imacunapitataj parlaycanchi?

¹⁶ Jina alapa alimi caycan espiritual caj ruraycunatapis ruranayquipaj, chayga caycan reuniuncunaman aywanayquipaj y predicanayquipäpis (Heb. 10:24, 25). Publicador no bautizado captiquega cada cadala yachachicuy, chayta rurarga más cushishga ricacunqui (2 Tim. 4:5). Jovinlaraj caycar taytayquicunawan tiyaycarga tapucuy: “¿Imaypis paycuna yarpaycächiman reuniuncunaman o predicaciunman aywanäpaj? ¿O quiquëmi calpachacö chayta ruranäpaj?” nir. Quiquiquipitanami chay lapanta ruraptiquega,  musyachicuycanqui yäracuyniqui miraycashganta, Jehovata cuyashgayquita y agradecido cashgayquitapis. Espiritual caj ruraycunawan ocupado caycarga, Tayta Dios munashganno cawaj runa cashgayquita ricächicuycanqui. Y chayga Jehovata regalucunata goycushgayquino canman (2 Ped. 3:11; Heb. 13:15). Jehovaga manami munanchu imatapis mala gana ruranapaj, payga cushicun imatapis shongunchipita goycuptinchi (2 Corintios 9:7 textuwan tincuchiy). Noganchipis cushicunchimi más ali cajta Jehovata goycuptinchi.   

17, 18. ¿Imaraj yanapäshunqui bautismuman chayanayquipaj, y imanir? (Proverbios 3:3-6).

¹⁷ Bautismuman chayanayquipäga öraga imayca chapacuna canmanmi. Capaz waquincuna gampita burlacunman o creenciayquiraycur chiquishunquimanpis (2 Tim. 3:12). Jina capaz luchaycanqui ima viciucunatapis jaguirinayquipaj, ichanga öraga laquicunquichi yapay ishquiriptiqui. O capaz laquicunquipis bautizacunayquipaj alapa pishiycäshushgayquita yarpar. ¿Imaraj yanapäshunqui jinala valurcharcunayquipaj? Jehovata cuyashgayquimi.

¹⁸ Jehovata cuyashgayquega ima chararashgayquicunawanpis manami tincunchu (leiriy Proverbios 3:3-6). Payta lapan shonguyquiwan cuyaptiquega, ima chapacuna captinpis guepaman cutinquichu, valurcharcur jinala sirvinquipaj. Bibliachoga wilacun Jehová sirvejnincunata alapa cuyar mana cachaycushganta, payga jinala sirvejnincunata cuyaycanmi (Sal. 100:5). Y Diosga pay nirajta camashushcanqui (Gén. 1:26). Chauraga, ¿imanotaj Jehovata cuyashgayquita musyachicunquiman?

19. ¿Imataraj ruranquiman Jehová gamraycur rurashganta agradecicunayquipaj? (Gálatas 2:20).

¹⁹ Puntataga agradecido canquiman (1 Tes. 5:18). Waran waran tapucuy: “¿Imanotaj cay junajcho Jehová musyachimargan cuyamashganta?” nir. Nircur mañacuptiqui jucnin jucninpitami oraciunniquicho agradecicuy. Pay lapan goshushgayquicunacho amatar cuyashushgayquita ricay. Apóstol Pablupis chayno ricacurgan (leiriy Gálatas 2:20). Nircur tapucuy: “¿Nogapis imata rurartaj Jehovata cuyashgäta musyachicöman?” nir. Jehovata cuyashgayquega yanapäshunqui tentaciuncunaman mana ishquinayquipaj, problemacunata aguantanayquipaj,  y espiritual caj ruraycunatapis ruranayquipaj. Chayta rurashpayqui musyachicunqui Taytalayqui Jehovata alapa cuyashgayquita.

20. ¿Imanotaj pipis Jehovaman dedicacun, y imanirtaj shumaj yarpachacunman chayta rurananpaj?

²⁰ Tiempuwanga Jehovata alapa cuyashgayquimi yanapäshunqui juc shumaj oraciunta ruranayquipaj, Jehovaman dedicacunayquipaj. Chayta rurar paylapäna imaypis canquipaj, juc oraciuncho payta auninqui imacuna captinpis paylata sirvinayquipaj. Chaytaga cawayninchicho juc cutila ruranchi. Ama gongaychu, Jehovata sirvinayquipaj aunishgayquitaga cumplinquimanmi, chayga ima decidishgayquipitapis más ali caycan (Sal. 50:14). Satanasga imaycanopapis munanga Jehovapaj cuyacuyninchi ushacäcunanpaj manana sirvinapaj. Ichanga chay pasanantaga ama jaguiriychu (Job 27:5). Taytayqui Jehovata amatar cuyashgayqui yanapäshunqui aunishgayquiwan cumplinayquipaj y payman masraj guelicunayquipaj.

21. ¿Imanirtaj ninchi bautizacurir lapan mana ushacashgantana?

²¹ Jehovaman dedicacushgana captiqui, ancianucunawan parlacaramuy imacunata nircur ruranayquipaj. Ichanga ama gongaychu bautizacurir lapan ushacashgantana, sinoga chayraj galaycuycanqui imaycamapis Jehovata sirvinayquipaj. Chaymi cananlapitana Jehovapaj cuyacuyniquita sinchiyächiy y yarpachacuy imacunata ruranayquipaj waran waran cuyacuyniqui más mirananpaj. Chayga yanapäshunqui bautismuman chayanayquipaj. Chay junajga mana gongaypämi canga. Chayraj Jehovata sirvinayquipaj galaycuycaptiquipis. Jehovatawan Wamranta cuyashgayqui jinala mirayculächun.