1, 2. 1) ¿Imataj pasan pipis bautizacuptin? 2) ¿Imatataj cay yachacuycho ricärishun?

 ¿IMAYLAPIS ricashcanquichu bautizacärinanpaj cajcunata? Discursamoj tapucamushganta contestaptinmi, paycuna seguro caycashgantami wiyacan. Familiancuna y amiguncunapis alapami cushicärin. Bautizacur yacupita yarguptin gaglancho cushishga caycashgantami ricacan, jina waquincuna maquinta pajchiycashgantapis wiyacanmi. Semana semanami waranga runacunano bautizacärin. Chaynopa paycuna caycan Jehovapa testiguncuna dedicacushga y bautizacushgana.

² Bautizacunayquipaj yarpaycaptiquega ‘Jehovata ashiycashgayquitami’ ricächicuycanqui, y cay chacaraycaj munducho achquino chipchipyaycanqui (Sal. 14:1, 2). Cay yachacuyga gampämi ruracämushga jovinla o edayashgana captiquipis. ¿Imanirtaj Jehovata sirvishwan? Cay yachacuychomi quimsalata tantiarcushun. ¿Y imatataj nishwan bautizacushgana caycajcunapita? Cay yachacuymi yanapämäshun masraj munanapaj Jehovalata sirviycarla imaycamapis caycänapaj.

3. ¿Imanirtaj Jehovapa sirvejnincunaga ali cajcunata y rasunpa cajta cuyanchi? (Salmo 119:128, 163).

³ Sirvejnincunata Jehová mandargan rasunpa cajta cuyananpaj (Zac. 8:19). Jesusga yachachimashcanchi ali cajcunalata ruranapaj (Mat. 5:6). Chayga ninan Jehovapa ricaynincho lapan shongunchiwan munanapaj ali cajcunata y limpio cajcunata ruranapaj. ¿Gamga cuyanquichu rasunpa cajta y ali cajta? Cuyanquichi. Chaymi chiquinqui luta cajcunata, manacajcunata y fiyu ruraycunatapis (leiriy Salmo 119:128, 163). Lulacojcunaga Satanasnomi rurapäcun, payga cay mundutami mandaycan (Juan 8:44; 12:31). Diabluga pasaypami munaycun Jehovapa jutinta ganratachinanpaj. Payga jinalami Diosninchipita lulacuycan, unay Edén huertacho lulacur galaycushganno. Chay cutichomi  Jehovapita nergan quiquinlapaj imatapis munaj, lula mandacoj cashganta, jina sirvejnincuna cushicunanpaj michäcushganta (Gén. 3:1, 4, 5). Chayno pasaypa lulacuptinmi achca runacuna Diosninchipita mana alicunata yarpapäcun. Runacuna rasunpa cajta mana cuyaptenga, Satanasga paycunapita provechacur tucuy mana alicunata y fiyu ruraycunata rurananpaj yarpächinmanmi (Rom. 1:25-31).

4. ¿Imanotaj Jehová ricächicurgan rasunpa cajta cuyashganta? (Dibujutapis ricay).

⁴ Jehovaga rasunpa cajtami cuyan y payta cuyajcunata tucuynopa rasunpa cajta yachachin (Sal. 31:5). Chaynopa paycunata yanapan Diablo mana engañananpäna. Jinamanpis, Jehovaga sirvejnincunata yachachin honrado runa cananpaj y ali cajcunata rurananpaj, chayga ali sienticunanpaj y jaucala cawacunanpaj yanapan (Prov. 13:5, 6). ¿Chaytaga cawayniquicho ricashcanquichu Bibliapita yachacur galaycushgayquipita? Tantiacushgayquinami Jehová mana yachachimaptinchega ni maygan runacuna ni gampis ali cawapäcunquimanchu (Sal. 77:13). Chaymi Jehovapa ali mandamientuncunata cäsucuyta munanqui (Mat. 6:33). Jina munanqui rasunpa cajta yachachicur Diablo Diosninchipita parlashgancuna lula cashganta tantiachicunayquipaj. ¿Imanotaj chaytaga ruranquiman?

5. ¿Imatataj ruranquiman rasunpa cajta y ali cajcunata cuyaycashgayquita ricächicunayquipaj?

⁵ Imano cawacuycashgayquiwanmi ricächicunqui Satanás rurashgancunata rurayta mana munashgayquita, rasunpa cajta cuyashgayquita, Jehová mandacojniqui cananpaj munaycashgayquita y ali mandamientuncunata cäsucuyta munashgayquitapis. Chaypäga juc mañacuycho Jehovalata imaycamapis sirvinayquipaj aunicunayqui. Nircur bautizacunayqui Jehovalata sirvinayquipaj aunicushgayquita lapancuna musyananpaj. Chauraga rasunpa cajta y ali cajta cuyashgayquipitami canman bautizacunayquipaj.

6. Salmo 45:4 nishganno, ¿imanirtaj Jesucristuta cuyananchi?

⁶ ¿Imanirtaj Jesucristuta cuyanqui? Chayta juc ishcaylata tantiarcushun Salmo 45:4 (leiriy) textucho. Jesusga rasunpa cajta cuyanmi, ali cajcunata y humilde canapaj yachachimanchi. Chauraga rasunpa cajta y ali cajcunata cuyaptiquega Jesustapis cuyanquimi. Yarparay imano Jesús rasunpa cajta y ali cajta lapan shongunwan cuyar imata rurashganta  (Juan 18:37). Y, ¿imata rurartaj payga humilde cashga?

7. ¿Ima ninquitaj Jesús humilde cashganpita?

⁷ Jesús humilde cashganga ricacämurgan ruraynincunacho y parlaynincunachopis. Payga imaypis Taytanta alabaj; manami munajchu runacuna payta alabapäcunanta (Mar. 10:17, 18; Juan 5:19). Jesús humilde cashganta yarpar, ¿manachu yanapäshunqui payta masraj cuyanayquipaj y rurashgancunata ruranayquipaj? ‘Au, chaynomi’ ninquichi. Payga humilde cargan Taytanpis chayno captin, Jesusga Taytanta cuyar pay imano cashganta musyachicurgan (Sal. 18:35; Heb. 1:3). ¿Manachu cayta musyarpis yanapäshunqui Jesusta masraj cuyanayquipaj?

8. ¿Imanirtaj cushicunchi Jesús Reyninchi captin?

⁸ Jesús Reyninchi captin, alapa cushicunchi. Payno mandacojga manami pipis canchu. Quiquin Jehová payta acraycur yachachergan y Rey cananpäpis churargan (Is. 50:4, 5). Jina yarparay Jesús amatar cuyamashpanchi imata rurashganmanpis (Juan 13:1). Pay Reyninchi captinmi lapan shongunchiwan cuyanapaj shuyaran. Quiquinmi nergan payta cuyajcuna o amiguncunaga mandamientuncunata cäsucur cuyashganta musyachicunanpaj (Juan 14:15; 15:14, 15). ¡Amatar cushicunchimi Jehovapa wamranpa amigun carga!

9. ¿Imacunachotaj tincun Jesuspa bautismun gatirajnincunapatawan?

⁹ Jesuspa juc caj mandamientunga cargan gatirajnincuna bautizacärinanpaj (Mat. 28:19, 20). Y chaytaga quiquinmi rurargan. Ichanga Jesuspa bautismun gatirajnincunapawan igual mana captinpis, öraga tincunmi (“ ¿Ima nishwantaj Jesuspa bautismunpita y gatirajnincunapitapis?” recuadruta ricay). Tantiarinapaj, Jesús bautizacurmi tantiachicuycargan Taytanpa voluntäninta rurananpaj listo caycashganta (Heb. 10:7). Gatirajnincunapis chayno ruran. Paycuna bautizacäriptin lapancunata musyachipäcun Jehovata aunishganta paylata sirvinanpaj, y chaypita pacha imapitapis masga Jehovapa voluntänintana puntaman churananpaj. Chayta rurashpanmi Jesusta gatirpaycan.

10. ¿Imacunaraycurtaj Jesusta cuyanquiman, y cuyashpayqui imataj ruranquiman?

¹⁰ Gam musyanquinami Jesusga Jehovapa japalan wamran cashganta y Reyninchi cananpäpis Jehová acrashganta. Musyanquipis Jesús humilde cashganta y Taytan imano cashganta musyachicushganta. Yachacushcanquipis mallagajcunata o yarganaycajcunata micuchishganta, laquishga caycajcunata shacyächishganta y gueshyaycajcunatapis jampishganta (Mat. 14:14-21). Quiquiquimi ricashcanqui canan wichan Jehovapa marcanta imano pay pushaycashganta (Mat. 23:10). Y musyanquipis shamoj tiempucho Diospa Gobiernuncho Jesús mandacuptin imaycacunata rurananpaj. Chaura, ¿imata rurartaj payta cuyashgayquita musyachicunquiman? Rurashgancunata rurar (Juan 14:21). Chaymi juc caj rurayga caycan Jehovaman dedicacur bautizacunayquipaj.

11. ¿Imaraj yanapäshunquiman bautizacunayquipaj, y imanir?

¹¹ ¿Imaraj yanapäshunquiman bautizacunayquipaj? Cayta musyanapaj ricärishun Jesús ima nishganpita Diospa más jatun caj mandamientunpita, nergan: “Tayta Diosninchïta cuyanqui llapan shonguyquiwan, llapan bïdayquiwan, llapan yarpayniquiwan, llapan callpayquiwan” (Mar. 12:30). ¿Caycho nishganno gampis chaynochu Jehovata cuyanqui?

12. ¿Imanirtaj gamga Jehovata cuyanqui? (Fotucunatapis ricay).

¹² Imaycacunami caycan Jehovata cuyanapaj. Gamga yachacushcanquinami Jehovaga  ‘pï-maytapis cawayta gocojmi’ cashganta y “Tayta Diosninchëga llapantapis alli cajcunallatami gomanchi” (Sal. 36:9; Sant. 1:17). Lapan alicunata chararashgayquicunaga Jehovapita shamun, payga garacojmi y amatar cuyamanchi.

13. ¿Imanirtaj Jesús noganchiraycur wanushganga alapa jatun regalo caycan?

¹³ Jehovaga Wamranta cachamurgan noganchiraycur wanunanpaj y chayga juc jatun regalo caycan noganchipaj. ¿Imanirtaj chayta ninchi? Jehovawan Jesusga cielucho caycar amatarchi cuyanacärej. Chaychi Jesús nergan: “Taytä kuyaman” y ‘nogapis Taytäta cuyä’ (Juan 10:17; 14:31). Y achca watacuna pasashganmanno ishcancuna masrächi cuyanacärergan (Prov. 8:22, 23, 30). Jehovapäga alapa sasachari cashga cuyashgan Wamran nacaycashganta y wanushganta ricar. Ichanga Jehová runacunata y gamtapis amatar cuyashpanmi cuyashga Wamranta cachamurgan wanunanpaj, chaynopa gampis y waquincunapis mana ushacaj cawayta tarinanpaj (Juan 3:16; Gál. 2:20). ¿Ima masraj caypita canman Jehovata cuyanapäga?

14. ¿Cawayniquicho imata acrartaj musyachicunquiman más ali cajta acrashgayquita?

¹⁴ Jehovapita cada cadala masraj yachacur payta masraj cuyar galaycushcanqui. Y munanquichi Jehovawan amistäniqui masraj miraycunanpaj canan y shamoj tiempuchopis ¿au? Jehovataga cushichinquimanmi rurayniquiwan y parlayniquiwanpis. Payga cuyacuywan nishunqui chayta ruranayquipaj  (Prov. 23:15, 16). Cawayniquicho ima rurashgayquicunawan ricacämunga Jehovata rasunpachush cuyanqui o manachu (1 Juan 5:3). Jehovata cushichinayquipaj acrashga carga, imapitapis más ali cajta acrashgayquimi canga.

15. ¿Imacunata rurartaj Jehovata cuyashgayquita musyachicunquiman?

¹⁵ ¿Imacunata rurartaj musyachicunquiman Jehovata cuyashgayquita? Jehovata mañacur auninquiman paylata imaypis sirvinayquipaj, paylami rasunpa caj Dios caycan (Sal. 40:8). Nircur bautizacunquiman waquincunata musyachicunayquipaj oraciunniquicho Jehovata aunishgayquita. Cay yachacuypa galaycunancho nishganchinopis bautizacunayquipaj caj junajga alapa cushicuypämi. Chaypita pacha gamga mananami munashgayquicunata ruranayquipächu cawanqui, sinoga Jehovapa voluntäninta ruranayquipaj (Rom. 14:8; 1 Ped. 4:1, 2). Shumaj yarpachacur-raj chayta acranayquipaj caycaptinpis, ama gongaychu cawayniquicho imayca bendiciuncunata chasquinayquipaj. ¿Imanirtaj chayta ninchi?

16. Salmo 41:12 nishganno, ¿ima bendiciuntataj Jehová goycunga payta sirvejcunata?

¹⁶ Jehovano garacojga manami pipis canchu. Achcata o ichiclatapis goycuptiquega payga masraj cutichishunquipaj (Mar. 10:29, 30). Cay mundo ushacänanpäna caycaptinpis Jehovaga yanapaycushunqui jauca jaucala, alila y cushishga cawacunayquipaj. Y shamoj tiempuchoga masraj bendiciuncunata chasquinquipämi. Bautizacurir Jehovata sirvinayquipaj acrashgayquega manami ratulapächu canman, Taytayquitaga imaycamapis sirvinquimanmi. Jehovawan gampis cuyanacushgayquega masraj miraycunga y pay imaycamapis cawashganno gampis cawacuyta puedinquimi (leiriy Salmo 41:12).

17. ¿Imataj gampita más alinnin cajta Jehovata goycunquiman?

¹⁷ Jehovaman dedicacur y bautizacurga Taytayquita goycuycanqui gampita más alinnin cajta. Lapan alicunata chararashgayquicuna y cawayniquicho lapan alicunapa pasashgayquega Jehová goshushcanqui. Chauraga cielutawan cay Pachata Camajtaga, ¿imataraj goycunquiman?  Chayga canman mana cachaypa lapan shonguyquiwan sirviptiquimi (Job 1:8; 41:11; Prov. 27:11). Chayta ruranayquipaj trucanga imapis más aliga manami canchu. Chauraga Jehovata alapa cuyashpayquimi bautizacunquiman.

18. ¿Ima tapucuycunatataj ruracunquiman?

¹⁸ Canancama yachacushganchino, ¿bautizacunquichu? Chayga quiquiquipitanami canga acranayquipaj. Chayta ruranayquipaj cayno tapucunayqui: “¿Listunachu caycä bautizacunäpaj?” nir (Hech. 8:36). Yarparay imacunaraycur bautizacunayquipaj. Juc cajga canman, rasunpa cajta y alita cajta cuyashpayqui. Tapucuriy: “¿Rasunpachu munä imaylapis lapancuna rasun cajta ninanpaj y ali cajta rurananpaj?”. Ishcay cajga canman, Jesusta cuyashpayqui. Tapucuriy: “¿Shongupitachu munä Diospa Wamran Reynï cananpaj y rurashgancunata gatirpänäpaj?”. Y quimsa cajna canman, Jehovata cuyashpayqui. Tapucuriy: “¿Jehovatachu sirviyta munä y shongunta cushichiytapis?”. Cay tapucuycunata ‘au’ nir contestashgayqui captenga, ¿imanirtaj mana bautizacunquichu? ¿Imataj michaycäshunqui? (Hech. 16:33).

19. Juc tincuchicuywan tantiachicamuy imanirtaj bautizacunquimanmi (Juan 4:34).

¹⁹ Bautizacunayquipaj manaraj decidishgayqui captenga, Jesús ima nishganmanmi yarparay (leiriy Juan 4:34). Payga nergan Taytanpa voluntäninta rurayga micuyta micushganno cashganta. ¿Imanir? Micuptinchirämi ali y sano caycanchi. Jesusga musyarganmi Taytan lapan mañamashganchicunaga bienninchipämi cashganta, dañamänanchipaj cajcunataga manami mañamanchichu. Payga munan gam bautizacunayquipaj (Hech. 2:38). Chaura chay mandamientuta cäsucuptiquega alipämi canga. Mishqui micuyta pilapis garashuptiquega, ¿manachu jucla micucurcunquiman? Chaynolami bautizacunayquipäpis canman.

20. ¿Imataj ricärishun gatejnin caj yachacuycho?

²⁰ ¿Imanirtaj waquincunaga bautizacunchu? Paycunaga yarpapäcun pishiycashgantaraj bautizacunanpaj. Rasun cajchoga Jehovaman dedicacur bautizacuyta munarga, chayga manami ratulapächu canman. Chaymi raslaga ama bautizacuychu, sinoga shumajraj yarpachacuy imataj decidinayquipaj cajta y calpachacuy listuna caycänayquipaj bautismupaj. Ichanga gam bautizacuyta munaptiquega, ¿imaraj yanapäshunqui chay junajpaj listo caycänayquipaj? Chaytaga gatejnin yachacuycho ricärishun.