¿Imanirtaj Rutpa wanoj runanpa familian yarpargan Rutwan casacurir herencianta perdichinanpaj? (Rut 4:1, 6).

Israelitacuna cawashgan wichan, juc runa wamraynaj wanucuptenga, ¿chacrancuna pipa maquinman pasanman cargan?, ¿familianpa jutin gongacashga quedanmanchuraj cargan? Chay lapancuna Moisés chasquishgan Leychomi claro tantiachicamoj.

Juc runa wanuptin o waccha cashganraycur chacrancunata ranticuptenga, wauguin o maygan legítimo castanpis rantinmanmi cargan. Chaynopa chacrancunaga jinan familiapita canman cargan (Lev. 25:23-28; Núm. 27:8-11).

¿Imatataj rurapäcoj wanushga runapa jutin gongacashga mana ushananpaj? Wanushga runapa wauguinga viuda cajwan casaracärej juc wamrata tarinanpaj, chaynopa wanushga runapa jutin mana gongacänanpaj y herenciantapis chasquinanpaj. Jina chaytaga ruraj viuda cajmi ali caycänanpaj (Deut. 25:5-7; Mat. 22:23-28). Rutpis casacurir matrimonio de levirato o de cuñado nishgan costumbrita siguirgan.

Noemipita parlarcushun. Runanga Elimélec cargan, ichanga runan y ishcay wamrancunapis wanuptin, manami pipis cargannachu arupänanpaj o manteninanpaj (Rut 1:1-5). Judaman cutirir Noemiga lumchuynin Rut-ta nergan Boazta mañacunanpaj chacrancunata rantinanpaj, payga Elimelecpa castanmi cargan (Rut 2:1, 19, 20; 3:1-4). Ichanga Rut mañacushgan Boazpa alino captinpis, payga musyarganmi juc runaraj más legítimo castan caycashganta chayta rurananpaj (Rut 3:9, 12, 13). Bibliachoga chay runapa jutin manami wilacunchu.

Galananlachoga chay runa acuerduchomi caycargan rantinanpaj (Rut 4:1-4). Guellayta gastananpaj caycaptinpis, payga musyarganmi Noemí chachana car wamrata tariyta manana puedishganta Elimelecpa chacrancunata herenciano chasquinanpaj. Chauraga paypämi canman cargan. Chaychi puntalachoga juc ali negociuno chayta ricargan.

Ichanga nircur cuentata gocuptin Rutwan casaracunanpaj captin, manami rantiyta munargannachu. Nergan: “Tsay rantinäpaq kaq chakra manami herenciänatsu kanqa, sinöqa paypa wawanpaqmi” (Rut 4:5, 6). ¿Imanirtaj chayno nergan?

Chay runa o maygan legítimo castan Rutwan casacurir juc wamrata tariptenga, chay wamrapaj Elimelecpa chacrancuna pasanman cargan. ¿Chayga imanotaj chay runapa herencianta perdichinman cargan? Biblia mana wilacuptinpis, waquilanlata ricärishun.

• Juc, chay runaga yarparganchi Rutwan casacurir Elimelecpa chacrancuna paypaj mana cananpaj, sinoga Rutcho tarishgan wamrapaj, y achca guellayta gastashganga yangalapaj canman cargan.

• Ishcay, Noemitawan Rut-ta manteninan cargan.

• Quimsa, chay runa Rutwan más wamracunata tarerga, herencianta raquipänan cargan waquin wamrancunawanpis.

• Chuscu, chay runapa más wamrancuna mana captenga, Rutwan tarishgan wamranman Elimelecpa y paypa chacrancunapis pasanman cargan. Chauraga paypa jutin gongacashga ushacanman cargan, ichanga Elimelecpaga mana. Chaychi Noemita yanapayta manami munajchu. Boaztami nergan chayta rurananpaj, paypis Elimelecpa castanmi cargan. Boazga acuerduchomi caycargan chayta rurananpaj, payga manami munarganchu wanoj runapa jutin gongacänanpaj, “chakranpis Rutpa wawanpaqna” cananpaj nergan (Rut 4:10).

Ricashganchinopis chay runaga waquincunata yanapänanpaj trucan, jutin y herencianpis mana perdichinanpaj masga munargan. ¡Aumi, quiquinlaman más yarpachacoj! Pero rurashgancunaga yangalapami cashga, jutinpis gongacashga quedargan. Jina Boaz chasquishgantapis ogrargan. Bibliachoga Boazpa jutin yurin Mesiaspita o Jesucristupita chachancunapa wilacushgancho. Chay runa quiquinlaman yarpachacur waquincunata mana yanapashganpita mana alichomi ushargan, ¡chayga laquicuypämi! (Mat. 1:5; Luc. 3:23, 32).