1, 2. 1) ¿Imaytaj y maycho caycaptin Pablo Éfeso cristianucunata cartacamurgan? 2) ¿Imapitataj canan yachacushun?

 APÓSTOL Pablo Romacho preso caycar, yäracoj masincunata shacyächiyta munargan. Pero watucamuyta mana camäpacur paycunaman cartacunata apachicurgan. Éfeso cristianucunataga 60 o 61 wata wichan cartacamurgan (Efes. 1:1; 4:1).

² Chunca watacunanona pasashga cargan apóstol Pablo Éfeso marcacho caycashganpita, payga chaycho Diospa Gobiernunpa wilacuynincunata yachachicurgan (Hech. 19:1, 8-10; 20:20, 21). Pabluga yäracoj masincunata alapa cuyajmi y yanapayta munargan Jehovata sirviycarla caycänanpaj. Pero, ¿imanirtaj acrashga cristianucunata achquipita y chacaypitapis parlapargan? ¿Y imataj yachacunchi chay cristianucunata consejashganpita? Cay yachachicuycho chaycunapita yachacushun.

CHACAYCHO CAYCASHGANPITA YARGURGAN

3. ¿Imacunapitataj Pablo parlacamurgan Efesios 5 caj capitulucho?

³ Éfeso cristianucunata Pablo cayno nergan: “Nawpataqa qamkunapis [...] tsakaqcho kaykaqnömi kawapäkurqayki. Kananmi itsanqa [...] atsikyaqchöna kawarkaykanki” (Efes. 5:8). Pabluga achquipita y chacaypitapis parlar, shumaj tantiachicurgan Efesupita cristianucuna ima cambiucunata rurashganpita. Puntataga tantiarcushun imanirtaj Pablo nergan paycuna chacaycho caycajcunano cawapäcushganta.

4. ¿Imanirtaj ninchi Éfeso runacunaga chacaychono caycashganta?

 ⁴ Luta religiuncho caycar chacaychono caycargan. Efesupita cristianucuna rasunpa cajta manaraj yachacur, imayca luta creenciancuna y costumbrincunapis caycargan. Éfeso marcacho juc templupis caycargan diosa Ártemis nishganpaj y maychicaj runacuna chayman aywapäcoj chay imaginta adurapäcunanpaj. Jina negocianticunapis achca guellayta ganananraycu chay templupita achca acapala imagincunata rurapäcojmi ranticunanpaj (Hech. 19:23-27). Chay marcacho taj o tiyaj runacunaga brujeriatapis rurapäcojmi (Hech. 19:19).

5. ¿Imanirtaj ninchi Efesupita runacunaga juchacunata rurar chacaychono caycashganta?

⁵ Fornicación juchata ruraycur chacaychono caycargan. Efesupita runacunaga jucwan jucwan cacärej y pengacuyninpis manami carganchu. Teatrucunacho y fiestacunachopis galapächu runacuna caycargan y ganra ruraycunatapis rurapäcoj (Efes. 5:3). Runacunapäga ni ichiclapis pengacuynin carganchu (Efes. 4:17-19). Conciencianpis o shongunpis chucruyashga cargan y manami yarparganchu Diosta cuentata gonanpaj. Shumaj tantiarganchu ima ali cashganta y ima mana ali cashgantapis. Chaymi Pabluga nergan juiciuyniynaj cashganta y Dios munashganno mana cawacushganta.

6. ¿Imanirtaj Éfeso cristianucunata Pablo nergan “atsikyaqchöna kawarkaykanki”?

⁶ Pero waquin Efesupita runacunaga chacaycho caycashganpita yargushga cargan, chaymi Pabluga nergan cananga “atsikyaqchöna kawarkaykanki” (Efes. 5:8). Paycunaga Jehovapa Palabran nishganno cawacur galaycushga cargan (Sal. 119:105). Jina luta religiunninta, costumbrincunatapis y jucha ruraytapis jaguipäcurgan. Calpachacärergan Dios munashganno cawapäcunanpaj y adurapäcunanpäpis (Efes. 5:1).

7. ¿Canan cawayninchega tincunchuraj Éfeso cristianucuna pasashganwan?

 ⁷ Noganchipis rasunpa cajta manaraj yachacur, luta religiuncho caycashganchi y juchacunata rurar cawacushcanchi. Waquincunaga capaz luta fiestacunatapis rurashcanchi y mana ali vidatapis apashganchi. Pero Jehovapita yachacur ima yarpashganchita y munashganchitapis cambiashcanchi. Jina ali cajta y mana ali cajtapis shumaj tantiarcur Dios munashgannona cawacur galaycushcanchi y chayga cawayninchicho yanapämashcanchi (Is. 48:17). Chayno captinpis öraga sasami canman Tayta Dios munashgannola waran waran cawapäcunapaj. Mä ricärishun imataj yanapämäshun.

CHACAYPITA WITICUSHUN

8. Efesios 5:3-5 nishganno, ¿imacunataj chiquinman cargan Efesupita cristianucuna?

⁸ (Leiriy Efesios 5:3-5). Efesupita cristianucuna Jehová chiquishgan lapan ruraycunata chiquinman cargan, chaynopa jucha rurayman mana ishquinanpaj. Fornicación juchaman mana ishquirpis, lisuracunata o mana ali palabracunatapis manami parlanmanchu cargan. Pabluga yarpächergan chaycunata mana rurananpaj Diospa Gobiernuncho cawacuyta munarga.

9. ¿Imanirtaj cuidacunanchi ganra ruraycunapita?

⁹ Noganchipis cuidacunanchimi “Tayta Diosta mana cäsukuq runakuna lutankunata” rurashganta mana ruranapaj (Efes. 5:11). Pilapis pornografiata o ganra ruraycunata ricaptin, wiyaptin o chaycunalapita parlar cacuptin fornicación juchaman ishquinga (Gén. 3:6; Sant. 1:14, 15). Juc naciuncho achca Testigucuna internetcho juc gruputa camacächergan mensajicunata o videucunatapis apachinacunanpaj. Puntalachoga achcajmi espiritual caj ruraycunalapita parlapäcoj. Pero nircur ichic ichiclapa juc temacunapita parlar, pïcunawan cacunanpaj o sexo asuntupita parlar ushargan. Chayta rurashganpita tiempuwan achcajshi jucha rurayman o fornicaciunmanpis chayargan.

10. ¿Imata ruranapätaj Satanás munan? (Efesios 5:6).

¹⁰ Satanasga runacunapa yarpaynincunata upatacächin mana musyananpaj ima ali cashganta o ima mana ali cashgantapis (Is. 5:20; 2 Cor. 4:4). Diosta mana cäsucoj runacunaga creichimänanchita munan cay munducho caycaj mana ali ruraycuna alino cashganta (2 Ped. 2:19). Pero peliculacunacho, televisiuncho y internetchopis Dios chiquishgan ruraycuna yargamun. Diabluga imanopapis munan yarpänapaj cay munducho caycaj caway, ruraycuna y costumbricunapis alino cashganta y chaycunawan cushicunapaj (leiriy Efesios 5:6).

11. ¿Imanirtaj ali caycan Efesios 5:7 nishganta cäsucunapaj? (Fotucunatapis ricay).

¹¹ Satanasga munan Diosta mana cäsucoj runacunawan shuntacänapaj paycunano canapaj. Chaymi Pabluga Efesupita cristianucunata consejaycur nergan: “Runakuna jutsata ruraptinpis qamkunaqa ama rurapäkunkitsu” (Efes. 5:7). Noganchega Efesupita cristianucuna cuidacushganpitapis masrämi cuidacunanchi. ¿Imanir? Waquincunawan mana shuntacarpis internetcho imaycacuna caycan waquincunawan amistäta ruranapaj. Asiapita juc cristiana Angela a jutiyoj chayta rurashganpita cayno wilacun: “Ichic ichiclapa cuentata mana gocurmi,  Jehovata mana cäsucoj runacunawan amistäta rurar cushishga caycargä. Hasta yarpargäpis Jehová chiquishgan ruraycunata rurar ali caycashgäta”. ¡Pero ancianuncunaga cuyacuywanmi yanapargan ima rurashgancunata cambiananpaj! Payga nin: “Cananga internetcho caycaj programacunaman jaticashga caycächu, sinoga más ocupada caycä espiritual caj ruraycunacho”.

12. ¿Imatataj rurashwan Jehovapa mandätuncunata cäsucunapaj?

¹² Cay munducho runacunaga imayca ganra ruraycunata alitanomi ricapäcun, noganchi ichanga chaycunapita cuidacunanchi (Efes. 4:19, 20). Chaymi calpachacunanchi Diospa mandätuncunata mana cäsucoj runacunawan mana shuntacänapaj, estudiaj masinchicunawan y aroj masinchicunawan ni imaraycurlapis goturänapaj. Jina runacuna jamurpämaptinchipis valurcharcunchi Diospa leynincunata respetanapaj. Congregación rurinchopis shumajraj acrananchi pïcuna amigunchicuna cananpaj, chaypita parlaycämun 2 Timoteo 2:20-22 textucuna. Ali amigucunaga imaypis yanapämäshun Jehovata sirvinapaj.

ACHQUICHO CAYCAJCUNANO CAWAPÄCUSHUN

13. Achquicho caycajcunano cawacunapaj parlarga, ¿imapitataj parlaycanchi? (Efesios 5:7-9).

¹³ Éfeso cristianucuna chacaycho manana cananpaj Pablo consejaycurna, nircur nergan achquicho caycajcunano cawapäcunanpaj (leiriy Efesios 5:7-9). Chaywanga niycargan maycho caycarpis Dios munashganno imaypis cawapäcunanpaj. Chayno cananpäga cada cadala Biblianchita leir shumaj yachacunanchi y publicaciunninchicunatapis leinanchi. Chayta rurarga shumaj yarpachacunanchi Jesuspa yachachicuynincunaman, payga cay Pachacho achqui caycan (Juan 8:12; Prov. 6:23).

14. ¿Imanotaj Diospa santo espiritunga yanapämanchi?

¹⁴ Achquicho caycajcunano cawacunapaj munarga, Diospa santo espiritunpa yanapacuynintapis ashinanchi. Chaywanrämi  cay mundupa mana ali ruraynincunapita raquicashga caycäshun (1 Tes. 4:3-5, 7, 8). Diospa espiritunga yanapämäshun cay munducho Diospa contrancho caycaj mana ali yachachicuycuna mana pantachimänanchipaj. Jina yanapämäshunmi cuyapäcoj canapaj, alilata ruranapaj y rasun cajlata rimanapaj (Efes. 5:9).

15. ¿Imatataj rurananchi espíritu santuta chasquinapaj? (Efesios 5:19, 20).

¹⁵ Jesusga nergan Taytan mañacoj cajman espiritunta cachamunanpaj (Luc. 11:13). Chaymi mañacushganchi hora Jehovata mañacushun espiritunpaj. Jina espíritu santuta chasquinchi hermanunchicunawan reuniuncunacho Jehovata alabaptinchi (leiriy Efesios 5:19, 20). Diospa espiritunga yanapämäshun pay munashganno imaypis cawacunapaj.

16. ¿Imaraj yanapämäshun ali decisiuncunata acranapaj? (Efesios 5:10, 17).

¹⁶ Cawayninchicho imalatapis decidinapaj captenga, shumaj yarpachacunanchi Tayta Dios munashganno cananpaj y nircur rurananchi (leiriy Efesios 5:10, 17). Ima asuntupäpis Bibliacho caycaj yachachicuycunata o consejucunata ashirga, quiquin Jehová chay asuntupita ima yarpaycashgantami ashiycanchi. Chay consejucunata cäsucurga imaypis ali decisiuncunata acrashun.

17. ¿Imanotaj tiempunchita shumaj provechashwan? (Efesios 5:15, 16; dibujutapis ricay).

¹⁷ Pabluga Efesupita cristianucunata consejargan tiempunta shumaj provechananpaj (leiriy Efesios 5:15, 16). Satanasga alapami munan cay munducho ruraycunaman jatiräcushga caycänapaj y Diospa cajta manacajman churanapaj (1 Juan 5:19). Öraga Jehovata sirviyta munarpis, capaz masga yarpachacunchi guellayman, trabajuman y masta estudianapäpis. Chayno captenga cay munducho caycaj runacunano yarparna galaycuycanchi. Caycuna alino  captinpis, cawayninchichoga manami puntaman churashwanchu. Chauraga achquicho caycajcunano cawacunapaj tiempunchita shumaj provechananchi, chaytaga ruranchi Diospa cajcunata puntaman churaptinchi.

18. ¿Imacunataj Donald rurargan tiempunta shumaj provechananpaj?

¹⁸ Calpachacushunmi Diosta sirvishganchicho mastaraj ruranapaj. Chaytami rurargan Donald jutiyoj cristiano Sudafricapita. Payga nin: “Shumaj yarpachacurgä cawaynë imano caycashganta y Jehovata mañacurgä yanapämänanpaj juc trabajuta tarinäpaj, chaynopa más predicanäpaj. Jehovaga mañacuynëta contestamargan. Cananga warmëwan ishcäcuna lapan tiempüwan Jehovata sirvircaycä”.

19. ¿Imacunataj rurashwan achquicho caycajcunano imaypis cawacunapaj?

¹⁹ Efesupita cristianucunata Pablo cartacamushganga alapachi yanapargan Jehovata sirviycarla caycänanpaj y noganchitapis yanapämanchimi shumaj acranapaj imacunawan cushicunapaj y pïcunawan amistäta ruranapaj. Jina shacyächimanchi Bibliapitapis shumaj yachacunapaj, chaynopa achquicho caycajcunano cawacunapaj. Yarpächimanchi imaypis Diospa espiritunta ashinapaj pay munashganno cawacunapaj. Pablo consejashgancunata cäsucurga, ali decisiuncunata acraycur Jehovata cushichishun. Chaycunata rurarga chacaycho caycajcunanochu caycäshun sinoga achquicho caycajcunano.