1, 2. ¿Imataj pasan pipis bautizacuptin?

 PIPIS bautizacuptenga Jehovapa familian rurincho caycan. Y chayga ¡cushicuypämi! Rey David nishgannopis paycunaga cushishga caycar cayno nipäcun: “Kushishqami kawan templuyki patiucho taq runaqa. Paytami akrashqanki nawpaykicho tänanpaq” (Sal. 65:4).

² Jehovapa marcanmanga manami jinaylapitaga pipis yaycunchu. Guepa yachachicuycho ricashganchino, Jehovaga acraycunraj pïcuna amiguncuna cananpaj (Sant. 4:8). Pipis Diosta sirvinanpaj auniptin y bautizacuptenga, Jehovapa amigunmanmi ticraycun. Y paycunata Jehová nin: “Gamkunaman bendicionnïta putsuy putsuy churamushaq” nir (Mal. 3:10; Jer. 17:7, 8).

3. ¿Imatataj rurananchi lapan bautizacushga cristianucuna? (Eclesiastés 5:4, 5).

³ Bautizacurga chayraj Diosta sirviyta galaycunchi. Chaymi ima tentaciuncuna y ima pruebacunapis captin lapan cristianucuna calpachacunanchimi Diosta aunishganchino cawacunanchipaj (leiriy Eclesiastés 5:4, 5). Jina Jesús rurashgantapis rurananchi y mandätuntapis cäsucunanchi (Mat. 28:19, 20; 1 Ped. 2:21). Cay yachachicuyga chayta ruranapaj yanapämäshun.

IMA CAPTINPIS JESUSTA IMAYPIS GATIRAY

4. Lucas 9:23 textucho Jesús nishganga, ¿ima ninantaj?

⁴ Bautizacurerga ama yarpaychu ima chapacunapis mana cananpaj Diosta sirviycashgayquicho. Jesusga discipuluncunata nergan payta gatirashganraycu imayca sasacunapa pasananpaj, chayga canman cargan waran waran nacananpaj  guerunta apajno (leiriy Lucas 9:23). Chaywanga Jesús discipuluncunata manami niycarganchu imaypis nacaycarla cawacunanpaj. Sinoga niycargan achca bendiciuncunata chasquirpis öraga fiyu nacaycunapa pasananpaj (2 Tim. 3:12).

5. Diospa Gobiernunta puntaman churajcunaga, ¿ima bendiciuncunataj chasquinman cargan?

⁵ Diospa Gobiernunta puntaman churashgayquipita capaz familiayquicuna chiquishunqui y mana alipis ricashunqui. Jina ali pagashga trabajuyquitapis jaguishcanquichi (Mat. 6:33). Chayno captenga seguro caycay Jehová mana gongashganta paypaj lapan rurashgayquita (Heb. 6:10). Quiquiqui cawayniquicho ricashcanquichi Jesús nishganga rasunpa cashganta, payga nergan: “Pipis wayinta, wawqinkunata, paninkunata, mamanta, taytanta, [warminta,] tsurinkunata y chakrankunatapis noqa rayku y ali wilakuynï rayku kachariq kaqqa kay vïdacho pachak (100) kuti mastami chaskinqa. Tsawraqa wayinkuna, wawqinkuna, paninkuna, mamankuna, tsurinkuna y chakrankuna paypa kanqa. Chaskikamashqanpitami itsanqa chikipäkunqa. Tsayno kaptinpis juk vïdacho mana ushakaq kawaytami tarinqa” (Mar. 10:29, 30). Lapan bendiciuncuna chasquishgayquicunaga masrächi caycan Jehovata sirvinayquipaj lapan jaguishgayquipita (Sal. 37:4).

6. ¿Imanirtaj bautizashgana caycarpis valurcharcunayquiraj shonguyqui munashganno lutancunata mana ruranayquipaj?

⁶ Bautizashgana captiquipis, valurcharcunayquirämi shonguyqui munashganno lutancunata mana ruranayquipaj (1 Juan 2:16). Bautizacurpis juchasapa runa caycanquiraj. Öraga apóstol Pablunochi ricacunqui, payga nergan: “Shonqücho Tayta Diospa leyninkunata cäsukuyta munaptïpis jutsa ruraymi ali yarpaynïwan pelyaykan. Vincimar prësutano tsarirkamarmi jutsa rurayman tunitsiman” (Rom. 7:22, 23). Mana ali munayniquicunawan lucharga capaz laquicurpis galaycunquimanmi. Pero ama gongaychu Jehovata sirvinayquipaj aunishgayquita, chayga calpatami goshunqui ima tentaciunmanpis mana ishquinayquipaj. Aumi, Jehovata sirvinayquipaj aunishgayquiman yarparga imaypis decidido caycanqui paypita mana raquicäcunayquipaj. ¿Imanirtaj chayta ninchi?

7. Jehovata sirvinapaj aunishga carga, ¿imanotaj yanapämanchi?

⁷ Pipis Diosta sirvinanpaj auniptenga, shongun munashganno cawacunnachu. Dios chiquishgan ruraycunatapis chiquin (Mat. 16:24). Chaymi ima pruebalapis o tentaciunpis captenga manami chayraj yarpachacur galaycunchichu imata ruranapaj, sinoga imaypis decidido caycanchi Jehovalata sirvir caycänapaj. Jehovata sirvinapaj aunirga, nishcanchi shongunchi munashgancunata manana ruranapaj. Jobno cayta munanchi, payga tucuy pruebacunapa pasarpis ‘cawashgäyajga Jehovata manami cachaycushächu’ nergan (Job 27:5).

8. ¿Imanotaj yanapämanchi Diosta sirvinapaj aunishganchiman yarpachacuptinchi?

⁸ Diospa voluntäninta ruranapaj aunishganchiman yarpachacurga calpatami tarishun ima juchamanpis mana tuninapaj. Tantiarinapaj, ¿alichuraj caycanman casado cajcunawan asipaylapa milluycachir parlapaptinchi? ¡Manami! Jehovata sirvinapaj aunishganchicho, payta nishcanchi chaycunata mana ruranapaj. Chauraga puntalapitana shongunchicho ima mana ali munaycunapis mana captenga, imapis mana cangachu juchaman chayachimänanchipaj. Fiyu  runacuna mana alicunata rurashgancunapita witicunanchi (Prov. 4:14, 15).

9. Diosta sirvinapaj aunishganchiman yarpachacurga, ¿imanotaj yanapämanchi Diospa voluntäninta puntaman churanapaj?

⁹ ¿Imataraj rurashwan ima aruypis michämaptinchi reuniuncunaman aywanapaj? Chay aruyta o trabajutaga manachi chasquishwanchu. Chaypäga maynachi yarpachacushcanchi Jehovata sirvinapaj michämashganchi aruycunata mana chasquinapaj. Chayno trabajuman yaycurga sasami canga Jehovapa voluntäninta más puntaman churanapaj. Jesusga imaypis decidido caycargan Taytanta cushichinanpaj y noganchipis payno rurayta munanchi. Chaymi imaypis decidido caycänanchi Diosta sirvinapaj michämashganchi aruycunata mana chasquinapaj y chiquishgancunatapis mana ruranapaj (Mat. 4:10; Juan 8:29).

10. ¿Imanotaj Jehová yanapämanchi Jesusta imaypis gatiränapaj?

¹⁰ Tucuy problemacunapa y tentaciuncunapa pasarga, imaypis decidido caycashwan Jesusta gatiränapaj. Diosninchi Jehová aunimanchi yanapämänanchipaj, Bibliaga cayno nin: “Lapan pruëba pasashushqayki wakin runakunatapis pasanmi. Probashushpaykipis Tayta Diosqa manami kachaykushunkipaqtsu. Tsaymi pruëbata awantar jutsaman mana ishkinaykipaq imaypis yanapashunki” (1 Cor. 10:13).

IMATARAJ RURANQUIMAN JESUSTA IMAYPIS GATIRÄNAYQUIPAJ

11. ¿Imacunata rurartaj Jesusta imaypis gatiraycanquipaj? (Fotucunatapis ricay).

¹¹ Jesusga lapan shongunwanmi Jehovata sirvirgan, y cada cadala mañacurpis payman masraj yäracurgan (Luc. 6:12). Gampis bautizashgana caycarpis achca ruraycuna  caycanrämi ruranayquipaj Jehová Diosman masraj guelicamunayquipaj. Bibliaga nimanchi ayca watacuna Diosta sirviycarpis jinala calpachacuycäshunraj pay munashganno cawacunapaj (Filip. 3:16). Ricashcanquichi waquin hermanucuna decidishganta Jehovata sirvishgancho mastaraj rurananpaj. Waquincunaga Diospita yachachicojcunapa escuelanman aywargan y juccunaga juc marcaman aywacärergan yanapacoj. ¿Gampis paycunano rurayta munanquimanchuraj? ¡Chayno captenga alimi canman! Jehovapa sirvejnincunaga imaypis calpachacuycan Diosta sirvishgancho masta rurananpaj (Hech. 16:9). Canan chaycunata rurayta mana puedirga, ama yarpaychu waquincuna gampita más välishganta. Jehovapa ricayninchoga más ali caycan imatapis aguantashganchimi (Mat. 10:22). Cayta ama gongaychu: Jehovaga alapami cushicun gam puedishgayquimanno lapan rurashgayquicunata ricar. Chaynopa bautizacushgayquipitana Jesusta imaypis gatiraycanqui (Sal. 26:1).

12, 13. ¿Imataraj ruranquiman Diosta sirvinayquipaj ganasniqui manana captenga? (1 Corintios 9:16, 17; “ Imataj rurashwan ushanancama corrinapaj” recuadrutapis ricay).

¹² ¿Imataraj ruranquiman oraciunniquicuna shongupita manana captin, predicaciunman yargurpis manami cushicunquinachu y Bibliayquitapis leinayquipaj ganasniqui manana captenga? Bautizacushgayquipitana chayno ricacuptiquega, ama yarpaychu Jehovapa espiritun gamwan manana caycashganta. Öraga juchasapa cashpanchi chayno ricacunchi. Chaymi Diosta cushi cushila sirvinayquipaj ganasniqui manana captenga, yarpachacuy apóstol Pabluman. Payga Jesusno rurayta munarpis öraga  pishipashga o ganasninpis manami carganchu alicunata rurananpaj (leiriy 1 Corintios 9:16, 17). Chaymi payga nergan Diospita wilacunanpaj voluntänin mana captinpis calpachacurgan chasquishgan cargunta cumplinanpaj. Pablo öraga guelanaycarpis calpachacurganrämi Diospita yachachicunanpaj.

¹³ Chauraga juchasapa cashpayqui imalapis guelanächishuptiquega ama laquicuychu. Chaypa trucanga valurcharcunayqui mana munaycarpis alicunata ruranayquipaj. Chayta rurashpayquiga quiquiquitami yanapäshunqui, aumi alipämi canga. Chaymi calpachacunayqui Bibliayquita leinayquipaj, predicanayquipaj y mañacunayquipaj. Chaycunaga yanapäshunqui bautizacushgayquipitana Jesusta imaypis gatiraycänayquipaj. Jina rurashgayquicunata ricar congregaciuncho hermanucunapis cushicungapaj (1 Tes. 5:11).

“KIKIKIKUNA TANTIYAKÄRIY”

14. ¿Ima tapucuycunataraj öraga ali caycan ruracunapaj y imanir? (2 Corintios 13:5).

¹⁴ Bautizacushgana captiqui ali canman cada cadala yarpachacunayquipaj rurayniquicuna y cawayniquipis imano caycashganta (leiriy 2 Corintios 13:5). Yarpachacuy junaj junaj mañacuycanquicush, Bibliayquita leishgayquiman yarpachacuycanquicush, reuniuncunaman y predicaciunmanpis aywaycanquicush. Imaycanopapis calpachacunquiman chaycunata ruranayquipaj, chaycunaga cawayniquicho yanapäshunqui. Caycunata tapucunayqui: “¿Yachänachu Bibliapita waquincunata shumaj tantiachicunäpaj? ¿Imalapis caycanchuraj ruranäpaj Diospita cushi cushila yachachicunäpaj? ¿Mañacuynëcunacho ricacämunchuraj Jehovaman lapan shongüwan yäracushgäta? ¿Calpachacuycächu lapan reuniuncunaman aywanäpaj? ¿Imataraj ruräman reuniuncunacho atentula caycänäpaj y más ali comentanäpaj?”.

15, 16. ¿Imataj yachacunqui Robert cristiano imapa pasashganpita?

¹⁵ Jina ali canman cuentata gocunapaj imacunacho pantashganchita o imacunataj sasa cashganta ‘mana’ ninapaj. Robert cristianuta ima pasashganta ricärishun. Robert cayno wilacun: “Ishcay chunca watayoj caycaptë, trabajuta usharirna juc warmi aroj masë invitamargan wasinman aywanäpaj. Payga nimargan, ‘acu wasëman imalatapis ruranapaj, cananga manami pipis canchu’ nir. Puntalachoga manami musyargächu imata ninäpaj, nircur-raj ‘mana’ nishcä”. Robert tentaciunman mana ishquishganga alimi cargan. Pero nircur yarpachacurgan ima pasashganman y  cuentata gocurgan puntalapita imata rurananpaj cajta. Payga nin: “Manami Joseno jucla ‘mana’ nishcächu (Gén. 39:7-9). Manami shuyarashgächu sasa cananpaj ‘mana’ ninäpaj. Cuentata gocushcä calpachacunäpäraj caycashganta Jehovapaj cuyacuynëta mirachinäpaj”.

¹⁶ Gampis juc tentaciuman o pruebaman mana ishquishga carga alimi caycan. Chayno captinpis alichi canman Robert cristianuno cayno tapucunayquipaj: “¿Alapa sasachu cargan chayta ‘mana’ ninäpaj?” nir. Cuentata gocuptiqui imalachopis mejoranayquipaj cashganta ama laquicuychu, sinoga yarpachacuy imacunata ruranayquipaj yapaycho rasla ‘mana’ ninayquipaj. Jehovatapis mañacuy y imaypis decidido caycay Jehovalata cäsucunayquipaj (Sal. 139:23, 24).

17. Juchaman ishquerga, ¿imaraj pasanman Jehovapa jutinta?

¹⁷ Robert mozuga caytapis nin: “Aroj masë jipashpa wasinman mana aywaptëga pay nimargan ‘alimi rurashcanqui, pruebaman ishquishcanquichu’ nir. Y noga tapuptë imanir chayno nimashganpita, payga nimargan unaycho Testigo cashgan juc amigun paytashi nergan Testigo caj jovincuna ishcay cara cashganta, ima tentaciunlapis captenga rasla chaycunaman ishquipäcun. Chaura payshi amigunta nergan chay pruebata nogawan rurananpaj. Pero nogaga chayman ishquirgächu, ¡alapa cushicö Jehovapa jutinta mana ganratashgäpita!”.

18. Bautizacushgayquipitana, ¿imata ruranayquipätaj decidido caycanqui? (“ Ishcay shumaj yachachicuycuna” recuadrutapis ricay).

¹⁸ Jehovata sirvinayquipaj auniptiqui y bautizacuptiquega ricächicuycanqui Jehovapa jutin imaypis alabashga cananta munashgayquita. Ama gongaychu pay altanto caycashganta ima problemacunapa y tentaciuncunapa pasarpis aguantashgayquipita. Jehovaga cushicunmi valurcharcuptiqui paylata cäsucunayquipaj y bendiciuncunatapis goshunquipaj. Payga espiritunwan valurta goshunqui alicunata ruranayquipaj (Luc. 11:11-13). Bautizacushgana captiquipis yanapäshunqui Jesusta imaypis gatir caycänayquipaj.