1, 2. ¿Imatataj ruranchi manaraj bautizacur?

 CHAYLARAJ pasashgan pichga watacunacho, aypala runacuna bautizacärergan Jehovapa testiguncuna cananpaj. Timoteo rurashganno, achcajmi Bibliapita yachacurgan wamra cashganlapita (2 Tim. 3:14, 15). Waquincunaga mayurna caycar o edayashgana caycar yachacurgan. Juc edayashga warmi Testigucunawan Bibliapita yachacur 97 watayoj caycaptin bautizacurgan.

² ¿Gamga pilawanpis Bibliapita yachacuycanquichu? Taytayquicuna Testigo captenga, ¿Bibliapita yachaycächishunquichu? Chayno captenga mayna yarpachacuycanquichi bautizacunayquipaj. ¡Y chayga alapa alimi canman! Pero manaraj bautizacurga, Jehovata auninayqui paylata sirvinayquipaj. Cay yachachicuycho chaypita maslata tantiarcushun. Jina ricashun imanirtaj mana manchacunquimanchu Jehovalata sirviyta auninayquipaj y bautizacunayquipäpis.

¿IMATAJ JEHOVATA SIRVINAPAJ AUNICUYGA?

3. ¿Pïcunatataj acrashga o raquishga cargan Jehovalata sirvinanpaj?

³ Bibliachoga parlamunmi waquin runacuna acrashga o raquishga cashganta Dioslata sirvinanpaj. Israel marcaga acrashga cargan Jehovalata adurananpaj. Pero waquin israelitacunaga juc ruraycunata rurananpaj acrashga cargan. Jehovaga Aaronta acrargan sumo sacerdote cananpaj. Chaymi umanman görrata jatiparcur goripita rurashga vinchata apargan, chayga ricächicurgan Jehová payta acrashganta (Lev. 8:9). Nazareucunapis acrashga o raquishgami cargan Jehovalata sirvinanpaj. Moisés chasquishgan Leychoga  niycargan paycuna vinuta mana upunanpaj, ajchanta mana rutucunanpaj y wanushga cajcunamanpis mana witipänanpaj (Núm. 6:2-8).

4. 1) ¿Ima ninantaj Jehovata sirvinapaj aunicuyga? 2) ¿Imata rurartaj shongunchi munashganchino cawanchinachu? (Dibujutapis ricay).

⁴ Noganchipis Jehovata auniptinchi paylata sirvinapaj, niycanchi Jesuspa discipulunman ticranapaj y Diospa voluntäninta imapitapis más puntaman churanapaj. Jesús nergan: “Pipis discïpulü kayta munarqa kikin munashqanno ama kawatsuntsu” (Mat. 16:24). Chaywanga Jesús niycargan cawacuyninchi y ima munashganchipis Jehovalapaj cananpaj. Chaura gam Jehovalata sirvinayquipaj aunirga, chiquinayqui pay lapan chiquishgancunata (2 Cor. 5:14, 15). Chayga ninan fornicación o jucwan jucwan cacuyta juchatapis chiquinayqui (Gál. 5:19-21; 1 Cor. 6:18). Y chaycunata cäsucunayquipaj, ¿sasachuraj canman? Manami, Jehovata cuyashgayqui y mandätuncunapis yanapäshushgayquita ricarga cushishgalachi cäsucunquiman (Sal. 119:97; Is. 48:17, 18). Nicholas cristianuga nin: “Diospa leynincunata manami ricashwanchu carcelcho caycar imatapis rurayta mana puedishganchino, sinoga fiyu leuncunapita chapaycämashganchitano”.

5. 1) Pipis Jehovata sirviyta munarga, ¿imataraj ruranman? 2) ¿Jehovata sirvinapaj aunishganchega bautismuwan igualchuraj caycan? (Fotucunatapis ricay).

⁵ Pipis Jehovalata sirviyta munarga, juc oraciuncho Diosta aunin paylata adurananpaj y voluntäninta imapitapis más puntaman churananpaj. Chaywanga Jehovata auniycan lapan shongunwan, calpanwan, yarpayninwan y voluntäninwan cuyananpaj (Mar. 12:30). Mañacuyninchicho Jehovata  aunishganchitaga paylami musyan. Ichanga bautizacurga waquincuna cuentata gocärin mayna Jehovata sirvinapaj aunishganchita. Pero Jehovata aunishganchega manami ratulapächu caycan. Chaymi imanopapis calpachacunchi aunishganchita cumplinapaj y Jehovapis chaytami shuyaran (Ecl. 5:4, 5).

¿IMARAJ YANAPASHUNQUI JEHOVALATA SIRVIYTA AUNINAYQUIPAJ?

6. ¿Imaraycurtaj pipis auninman Jehovata sirvinanpaj?

⁶ Pipis Jehovalata sirvinanpaj aunicuyta munarga, payta cuyashganpitami canman. Chay cuyacuyga manami jinaylapitachu yurimun, sinoga Jehová imano cashganta ichic ichiclapa yachacur payta masraj cuyar galaycunchi y shumaj tantiashganchipis munaynin ima cashganta (Col. 1:9). Bibliapita shumaj yachacurga ali tantianchi 1) Jehová rasunpa cashganta, 2) Biblia paypita shamushganta y 3) marcanpis caycashganta voluntäninta rurananpaj.

7. Pipis Jehovata sirviyta munarga, ¿imataj mayna ruraycanman?

⁷ Pipis Jehovata sirvinanpaj aunicuyta munarga, Bibliapa más alinnin caj yachachicuycunata tantianman, Diospa mandätuncunata mayna cäsucuycanman y puedishganmanno creenciancunatapis waquincunata parlapaycanman (Mat. 28:19, 20). Jina Jehovata amatar cuyar, lapan shongunwanmi paylata aduraytapis munanmanmi. ¿Gamga chaynochu ricacunqui? Jehovata lapan shonguyquiwan cuyaptiquega quiquiqui auninayqui payta sirvinayquipaj y bautizacunayquipäpis; manami ruranquichu Bibliapita yachachishojniquita cushichiyta munarlachu. Y joven cashpayquega, taytayquicunata  cushichiyta munarlachu o amiguyquicuna bautizacuycashganta ricarlachu bautizacunquiman.

8. ¿Imacunapitataj agradecido caycar yanapämäshun Jehovata sirviyta auninapaj? (Salmo 116:12-14).

⁸ Jina Jehová gamraycur lapan rurashgancunamanpis yarpachacunquiman, chayga yanapäshunqui agradecido car payta sirviyta auninayquipaj (leiriy Salmo 116:12-14). Bibliaga nimanchi lapan alicunata chasquishganchicunaga “kamaq Taytantsipitami kaykan” (Sant. 1:17). Cuyashgan Wamrantapis cay Pachaman cachamurgan alapa cuyamashpanchi. Chaymi cananga Diospa amigun caytapis puedinchimi y imaycamapis cawayta shuyaraycanchi (1 Juan 4:9, 10, 19). Chauraga, Jehovata auniptinchi sirvinapaj ricacämun pay noganchipaj lapan rurashgancunapita y cuyacoj cashganpitapis agradecido caycashganchita (Deut. 16:17; 2 Cor. 5:15). Chaypitami maslata tantiachicun cushishgala imaypis cawanapaj libro 46 caj yachacuycho, 4 caj yachachicuycho, jina cay videupis caycan ricanapaj: Imatataj rurashwan cuyacoj Diosninchiraycur.

¿LISTUNACHU CAYCANQUI JEHOVATA SIRVIYTA AUNINAYQUIPAJ Y BAUTIZACUNAYQUIPAJ?

9. ¿Imanirtaj pipis quiquinpa voluntäninpita Jehovata sirviyta auninman?

⁹ Öraga caynochi yarpanqui: ‘Diosta sirviyta auninäpaj y bautizacunapäga pishiycämanraj’ nir. Yarpanquichi más cambiucunataraj cawayniquicho ruranayquipaj y yäracuyniquipis más jatunraj cananpaj (Col. 2:6, 7). Pero ama gongaychu lapan estudianticunaga mana igual cashganta. Waquincunaga Jehovata alapa cuyar rasla cambiucunata ruran, juccunaga wamralaraj o jovinlaraj caycaptin decidipäcun Diosta sirvinanpaj. Chaymi shumaj yarpachacurcuy y quiquiquipa voluntäniquipita decidinayqui listunachush caycanqui bautizacunayquipaj o manapis (Gál. 6:4, 5).

10. ¿Imataj ruranquiman pishiycäshuptiquiraj Jehovata sirviyta auninayquipaj y bautizacunayquipaj? (“ Taytayquicuna Testigo captin” recuadrutapis ricay).

¹⁰ Cuentata gocuptiqui Jehovata sirviyta auninayquipaj manaraj listo caycashgayquita ama laquicuychu, sinoga jinala calpachacuy. Jehovatapis mañacuy yanapäshunayquipaj cambiucunata ruranayquipaj (Filip. 2:13; 3:16). Seguro canayqui pay mañacuyniquicunata wiyananpaj y yanapäshunqui sirvejninman ticranayquipaj (1 Juan 5:14).

IMANIRTAJ WAQUINCUNA MANCHACÄRIN BAUTIZACUNANPAJ

11. ¿Imanotaj Jehová yanapämanchi paypita mana raquicäcunapaj?

¹¹ Waquincuna listuna caycaptinpis Jehovata sirviyta auninanpaj y bautizacunanpäpis manami ruranchu. Paycunaga manchacärinmi jatun juchata rurananpaj y congregaciunpita gargushga cananpaj. Pero Bibliachoga Jehová sirvejnincunata aunicun yanapänanpaj “pay munashqanno” cawacunanpaj y alicunata rurapäcunanpaj (Col. 1:10). Chaymi gampis manchacuycarga, seguro caycay waquincunata yanapashganno Jehová gamtapis yanapäshunqui alicunata ruranayquipaj (1 Cor. 10:13). Pipis jatun juchaman ishquishga carpis, shongupita arrepenticurga congregaciunpita gargushga cangachu. Jehovaga yanapämanchimi paylata sirvir caycänapaj.

12. ¿Imataj rurananchi jatun juchaman mana ishquinapaj?

¹² Juchasapa cashganchiraycur, öraga ima  tentaciunmanpis ishquiyta munashwanchi (Sant. 1:14). Pero, ima tentaciunpis captenga quiquiquipitami caycan acranayquipaj chayman ishquinayquipaj o manapis. Waquincunaga nipäcun ima munashgancunata controlayta mana puedishganta. Pero chayga manami rasunchu. Lapanchimi yachacuyta puedinchi ima munashganchicunata y yarpashganchicunatapis controlayta. Chaypäga Jehovata lapan junajcuna mañacunanchi, Biblianchita leinanchi, reuniuncunaman y predicaciunmanpis aywananchi. Chaycunata rurarga valurcharcushun Jehovata aunishganchita cumplinapaj. Ama gongashunchu Jehovapis yanapaycämashganchita (Gál. 5:16).

13. ¿Imataj yachacunchi Josepita?

¹³ Jehovapita raquicayta mana munarga, mayna yarpachacunanchi imata ruranapaj ima tentaciunpis manaraj yurimuptin. Bibliachoga wilacunmi achca runacuna chayta rurashganta, paycunapis noganchino juchasapa cargan. Jucmi cargan José. Potifarpa warminga cutin cutin Joseta nergan paywan punucunanpaj. Pero Josega mayna musyarganna imata rurananpaj. Chaychi nergan: “¿Imanöparaq Tayta Diosta rabyanätsir jutsata rurayküman?” (Gén. 39:8-10). Chaywanga cuentata gocunchi, José mayna musyashganta imata rurananpaj Potifarpa warmin punucunanpaj manaraj niptinpis. Chaymi decidido caycargan juchaman mana ishquinanpaj.

14. ¿Imaraj yanapämäshun Jehová chiquishgancunata chiquinapaj?

¹⁴ Noganchipis, ¿imataj rurashwan Joseno canapaj Jehovapita mana raquicäcunapaj? Cananlapitana yarpachacushwan imata ruranapaj juc tentación captin. Yachacushwanpis Jehová chiquishgancunata jucla chiquinapaj, chaycunamanga ni ichiclapis yarpashwanchu (Sal. 97:10; 119:165). Chayta rurarga ima tentaciunpis captin mayna musyashunmi imata ruranapaj, juchamanga manami ishquishunchu.

15. ¿Imata ruraptiquiraj ricacämunga Jehovata cuyashgayquita? (Hebreos 11:6).

¹⁵ Rasunpa cajta mayna tarishga carga, munaycanquichi Jehovata lapan shonguyquiwan sirvinayquipaj. Pero, ¿imalapis michaycäshunquichu Jehovalata sirviyta auninayquipaj y bautizacunayquipaj? Chayno captenga Davidno ruray, payga Jehovata cayno mañacurgan: “Tayta Dios, imano  kawashqätapis rikaykalämay. Shonqü alita o mana alita yarpashqantapis musyaykulay. Yarpashqäpis, parlashqäpis o rurashqäpis mana ali kaptinqa tantiyaykatsilämay. Qamwan imayyaqpis kawanäpaq yachaykatsilämay” (Sal. 139:23, 24). Jehovata lapan shonguyquiwan cuyashgayquega ricacämunga paylata sirvinayquipaj auniptiqui y bautizacuptiqui. Jehovaga aunicun sirvejnincunata bendicinanpaj (leiriy Hebreos 11:6).

JEHOVAPITA IMAYPIS AMA RAQUICAYCHU

16, 17. ¿Imanotaj Testigucunapa wamrancunata Jehová congregaciunman pushamun? (Juan 6:44).

¹⁶ Jesusga nergan quiquin Jehová pitapis marcanman pushamushganta (leiriy Juan 6:44). Chayga cushicuypämi ¿au? ¿Imaylapis chayman yarpachacushcanquichu? Jehovaga pipapis shonguncho alicunata ricaycur marcanman pushan. Paypäga cada sirvejnincuna alapa valuryojmi caycan. Gamtapis chayno ricashunqui (Deut. 7:6).

¹⁷ Joven, taytayqui o mamayqui Bibliapita yachaycächishuptiquega capaz yarpanquiman paycunaraycu congregaciuncho caycashgayquita y Jehová mana pushashushgayquita. Pero Bibliaga nimanchi Jehovaman guelicuy y paymi noganchiman guelicamunga (Sant. 4:8; 1 Crón. 28:9). Cayga ninan, gam puntaman guelicuptiqui o witiptiquiraj Paypis gam cajman witimunga o guelicamunga. Congregaciuncho lapan caycajcunata quiquin Jehovata jucninta jucnintami marcanman pushamurgan. Testigucunapa wamrancunapis chaynolami pasan. Chauraga Santiago 4:8 nishganno pipis Diosman guelicamuptinraj, Jehovapis pay cajman guelicamunga (2 Tesalonicenses 2:13 textuwan tincuchiy).

18. ¿Imataj yachacushun gatejnin yachachicuycho? (Salmo 40:8).

¹⁸ Jesús bautizacurmi listuna caycargan Taytan lapan mandashgancunata cushi cushila rurananpaj (leiriy Salmo 40:8; Heb. 10:7). Gampis Jehovalata sirvinayquipaj auniptiqui y bautizacuptiquega, Jesusnomi ruraycanqui. Gatejnin yachachicuyga yanapäshunqui bautizacushgana captiquipis Jehovata mana cachaypa sirvinayquipaj.