1. ¿Ima bendiciuncunatataj chasquinchi Diospa marcancho caycar?

 ¡JEHOVAPA marcancho caycarga alapa cushicuypämi! Cay ushanan tiempucho imayca mana alicuna miraycaptinpis, Jehovapa marcanchoga juc familianomi caycanchi (Sal. 133:1). Jehovapa consejuncunaga yanapämanchi familianchiwan cushishga cawacunapaj (Efes. 5:33–6:1). Jina yachaytapis gomanchi mana ali yarpashganchicunata trucachinapaj y cushishga goyänapaj.

2. ¿Imata ruranapaj calpachacunanchiraj, y imanir?

² Chayno captinpis, lapanchi calpachacunanchirämi Jehovata mana cachaypa sirviycänapaj. ¿Imanir? Capaz waquincuna ima parlashgan o rurashganpis laquichimashwan. Jina quiquinchipis cutin cutin pantarcuptinchi o ima juchatapis rurar guelanäcurishwanmi. Pero cay yachachicuyga yanapämäshun Jehovata sirviycarla caycänapaj: 1) pilapis ofendimaptinchi, 2) majanchi o warminchi laquichimaptinchi y 3) pantashganchipita mana valejno ricacuptinchi. Jina yachacushun unay Diospa sirvejnincuna noganchicunano imacunapa pasashganta.

MAYGAN CRISTIANO MASINCHILAPIS OFENDIMAPTINCHI

3. ¿Imaraj öraga pasanman Diospa sirvejnincunata?

³ Imaraj pasanman. Öraga cristiano masinchicuna imatapis rurar o parlar rabianächimashwan. Capaz nanaj shiminpa parlapamashwan o mana ali tratamashwanpis. Jina ancianucunapis pantarcunmanmi. Chaycunata ricar waquincunaga manami segurunachu caycan, cayga Diospa rasunpa marcan cashganta. Chaymi jucnin jucnin yanapanacunanpaj  trucan, jagayashpan waquincunata parlapaytapis mana munannachu y reuniuncunamanpis mana aywannachu (Sof. 3:9). ¿Chayno rurarga alichuraj caycan? Ricärishun imata yachacunchi unay Diosta sirvej runa chaycunapa pasashganpita.

4. ¿Ima sasacunapataj Pablo pasargan?

⁴ Unay Diosta sirvej runa rurashgan. Apóstol Pabluga musyarganmi yäracoj masincuna juchasapa cashganta. Jerusalencho caycaj congregaciunman chayaptin, achcajmi payta manchacurgan y mana yäracurganpischu (Hech. 9:26). Waquincunaga washantapis parlapäcurgan (2 Cor. 10:10). Jina ricarganpis apóstol Pedro pantashganta, y chayga waquin cristianucunatapis laquichinmanmi cargan (Gál. 2:11, 12). Juc cuticho yanagajnin Marcuspis cachariycur aywacushga cargan (Hech. 15:37, 38). Chay lapancunata ricar Pabluga paycunawan manana juntacanmannachu ni parlapanmannachu cargan. Pero chayta rurananpaj trucan paycunaman yäracurgan y Jehovata sirviycarla caycargan. ¿Imataj yanapargan?

5. ¿Imataj Pabluta yanapargan yäracoj masincunapita mana raquicäcunanpaj? (Colosenses 3:13, 14; dibujutapis ricay).

⁵ Pabluga yäracoj masincunata cuyajmi, chaymi paycuna pantashgancunaman yarparajchu. Sinoga cutin cutin pantarcuptinpis perdunarganmi (leiriy Colosenses 3:13, 14). ¿Pabluga Marcuswan amistanacurganchuraj? Aumi. Punta caj viajincho Marcos cachariycur aywacuptinpis, Pabluga manami rabiashgachu o jagayashgachu caycargan. Tiempuwan Colosas congregaciunta cartacamushgancho Pablo nergan Marcusga alapa valuryoj cashganta y payta shacyächishganta (Col. 4:10, 11). Romacho preso caycarpis, Pabluga mañacurgan Marcos aywar yanapänanpaj (2 Tim. 4:11). Chaura yäracoj masincuna pantarcuptinpis Pabluga paycunapita manami raquicarganchu. ¿Imataj chaypita yachacunchi?

6, 7. ¿Imaraj yanapämäshun hermanunchicuna juchasapa captinpis cuyanacur cawacunapaj? (1 Juan 4:7).

⁶ Imataj yachacunchi. Jehovaga munan yäracoj masinchicunawan cuyanacur cawacunapaj (leiriy 1 Juan 4:7). Pipis congregaciunpita mana cuyacuywan tratamaptinchega jucla ama rabiacushwanchu. Sinoga yarpachacushwan mana munaycar chayno tratamashganchita o calpachacuycashgantapis alicunata rurananpaj (Prov. 12:18). Jehovaga amatar cuyamanchi juchasapa  captinchipis. Juchata rurashga carpis payga jucla jagayäcunchu ni manacajpa churamanchichu (Sal. 103:9). Chaymi Taytanchi Jehovano cananchi y waquincunatapis perdunashwan (Efes. 4:32–5:1).

⁷ Ama gongashunchu cay mundupa ushacaynin caylachona cashganta, chaymi hermanunchicunawan juc familianola cawacushwan. Cay ushanan tiempuchoga pasaypa chiquishga car, capaz carcelmanpis apamäshun. Chay wichanga hermanunchicuna yanapämänanchita necesitashun (Prov. 17:17). Españapita juc anciano Josep a jutiyoj chaypa pasargan. Guerraman mana aywashganpita payta y waquin hermanucunatapis carcelcho wichgarachergan. Payga nin: “Tacsha cuartulacho caycar, imalapitapis rabiachinacärej cä. Chaymi calpachacunä cargan aguantanacunäpaj y imaypis perdunanacunäpaj. Chayga yanapämashcanchi juntula caycänapaj y mana Testigo caj presucunapitapis cuidacärinäpaj. Juc cuticho ricrä vendashga caycaptin imatapis rurayta puedishgächu, pero juc hermano ropäta tacshapämaj y imanolapis yanapämargan. Chayta ricar cuentata gocurgä rasunpa cuyacuy ima ninantaj”. ¡Chaymi hermanunchicunawan imalapitapis jagayächinacushga carga alimi caycan cananlapitana amistanacunapaj!

MAJANCHI O WARMINCHIPIS LAQUICHIMAPTINCHI

8. ¿Ima sasacunapataj casaducuna pasapäcun?

⁸ Imaraj pasanman. Bibliaga wilacun casaducuna o majachacashgacuna problemacunapa pasananpaj (1 Cor. 7:28). Warmipis olgupis juchasapa carcaycan. Jina gustuncunapis y imano cashganpis manami igualchu caycan. Waquincuna juc marcapita captin costumbrincuna y imano ashmashga cashganpis jucnomi canman. Y chaycunaga más claro ricacan casado vidachona. Chaymi öraga majachacashgacuna problemacunapa pasapäcun. Waquincunaga ima problematapis alchananpaj trucan jucnin jucnin culpanacärin o jitapänacun y raquicaytapis yarpapäcun. ¿Pero chayga alichuraj caycan? b Ricärishun unaycho Diosta cuyaj warmi casado vidancho problemacunapa pasarpis imata rurashganta.

9. ¿Imacunapataj Abigaíl casado vidancho pasargan?

⁹ Unay Diosta sirvej warmi rurashgan. Abigailga casaracushga caycargan Nabalwan, chay runaga mana tantiacoj y fiyumi cargan (1 Sam. 25:3). Abigailpäga sasachi cargan chayno runawan ali tiyananpaj. Chaymi munarga jaguirirchi aywacunman cargan. Juc cuticho, Nabalta y ashmaynincunatapis David wanuchiyta munargan mana ali tratashganpita (1 Sam. 25:9-13). Chayta musyar Abigailga gueshpicunman cargan David runanta wanuchinanpaj. Pero chaypa trucan Davidta ruwacurgan runanpa juchanta perdunananpaj (1 Sam. 25:23-27). ¿Imanirtaj chayta rurargan?

10. ¿Imanirtaj Abigailga runanta cacharganchu casado vidancho problemacunapa pasarpis?

¹⁰ Abigailga Jehovata cuyajmi. Chaymi matrimoniupita o casado vidapita Jehová ima nishganta respetargan. Payga musyarganchi Adanwan Evata quiquin Jehová matrimoniuman  juclachashganta (Gén. 2:24). Abigailga shumaj tantiargan Jehová matrimoniuta juc ratulapaj mana camacächishganta. Chaymi Jehovata cushichiyta munar runanta y wasincho caycajcunatapis salvargan. Runanta David mana wanuchinanpaj, Abigailga jucla imaycacunata alistargan camaripänanpaj y juchayoj mana captinpis perdunananpaj mañacurgan. Mana manchacoj y ali warmi cashgantami ricar Jehovaga alapachi cuyargan. Ricärishun majachacashgacuna imataj yachacunman Abigailpita.

11. 1) ¿Imataj Jehová munan casaducuna rurananpaj? (Efesios 5:33). 2) ¿Imataj yachacunchi Carmen rurashganpita? (Fotucunatapis ricay).

¹¹ Imataj yachacunchi. Jehovaga munan casaducuna matrimoniunta respetapäcunanpaj, y chaytaga ruranman runan o warminpis mana ali geniuyoj captin. Payga cushicunmi casaducuna calpachacuptin ima problemacunatapis alchananpaj, alapa cuyacuywan y respetuwanpis tratanacuptin (leiriy Efesios 5:33). Carmen imapa pasashganta ricärishun. Payga sojta watayojna casada caycaptin Testigucunawan Bibliapita yachacur bautizacurgan. Payga nin: “Runäga manami cushicurganchu Testiguman ticrashgäpita, cada cadala nanaj shiminpa parlapämaj y wasëpitapis aywacunäpaj nimargan”. Pero Carmen runanta manami jaguirganchu, sinoga 50 watacunapa imaycacunata rurargan cuyacuywan y respetuwan tratananpaj. Cayno nin: “Watacuna pasashganmanno yachacurgä runäta entiendinäpaj y cuyacuywanpis parlapänäpaj. Musyargämi matrimoniuga alapa valuryoj cashganta, chaymi raquicaymanga chayayta manami munargächu. Jehovata cuyashgämi yanapämashga valurcharcunäpaj”. c Casado vidayquicho problemacuna captenga, seguro caycay Jehová yanapäshunayquipaj ali cawacärinayquipaj.

PANTASHGANCHICUNAPITA LAQUICUYCARLA CAYCAPTINCHI

12. ¿Imanoraj ricacushwan jatun juchaman ishquishga carga?

¹² Imaraj pasanman. Jatun juchaman ishquerga pasaypa mana valejnochi ricacushwan. Bibliapis nimanchi juchanchicunaraycu shongunchi alapa nanaycunraj y imapis nitiycämashganchitano ricacunchi (Sal. 51:17). Chayno ricacurgan juc cristiano Robert jutiyoj, payga achca watacunapa calpachacuycargan siervo ministerial cananpaj.  Pero jatun juchaman ishquir cuentata gocurgan Jehovata traiciunashganta. Cayno nin: “Pasaypa mana alimi ricacurgä, achca lasaj guepicuna nitiycämajtano sienticurgä. Wagaylata munaj cä y Jehovatapis mañacoj cä. Yarpargä Jehová manana wiyamänanpaj cajta”. Jatun juchaman ishquerga shongunchi creichimänanchita munan Jehová jaguimashganchita y paypaj manana valishganchita (Sal. 38:4). ¿Imaylapis chayno ricacushcanquichu? Chayno captenga, unaycho Diosta sirvej runa imata rurashgan yanapäshunqui, payga jatun juchata rurashga carpis jinala Jehovata sirvirgan.

13. ¿Ima jatun juchataj Pedro rurargan y imanirtaj chayman chayargan?

¹³ Unay Diosta sirvej runa rurashgan. Juc chacay pishiycaptin Jesusta wanuchinanpaj, apóstol Pedruga cutin cutin pantaycurgan. Payga ali tucur nergan waquin apostulcuna Jesusta cachariptinpis pay mana cachaycunanpaj cajta (Mar. 14:27-29). Nircur, Getsemaní jardinchopis cutin cutin punucashga quedacurgan (Mar. 14:32, 37-41). Y Jesusta chiquejnincuna charircuptinna, Pedro gueshpir aywacurgan (Mar. 14:50). Chaypitapis, quimsa cuti Jesusta niegargan mana reguishganta (Mar. 14:66-71). ¿Imanotaj Pedro ricacurgan cuentata gocurir jatun juchacunata rurashganpita? Pasaypa laquicur, wagar galaycurgan (Mar. 14:72). Y nircur amigun Jesús guerucho warcuraycajta ricar, pipitapis más juchayoj cashgantachi yarpargan.

14. ¿Imataj Pedruta yanapargan Jehovata sirvir siguinanpaj? (Garancho caycaj dibujuta ricäriy).

¹⁴ Pantaycurpis Pedruga calpachacurganmi Jehovata sirvir siguinanpaj. Payga yäracoj masincunapita manami raquicarganchu (Luc. 24:33). Jesuspis cawarircamur Pedruta yuripargan shacyächinanpaj (Luc. 24:34; 1 Cor. 15:5). Y pantashgancunapita juzgananpaj trucan Jesusga amigun Pedruta nergan más cargucunata chasquinanpaj (Juan 21:15-17). Pedruga musyarganmi jatun juchata rurashganta, chayno captinpis valurcharcurganmi alicunata rurananpaj. ¿Imanir? Payga convencido caycargan Jesús payman yäracushganta y yäracoj masincunatapis listo caycashganta yanapänanpaj. Ricärishun imataj chaypita yachacunchi.

15. ¿Imapitataj seguro caycänapaj Jehová munan? (Salmo 86:5; Romanos 8:38, 39; fotutapis ricay).

¹⁵ Imataj yachacunchi. Jehovaga munan convencido caycänapaj cuyamashganchita  y perdunamänanchipäpis listo caycashganta (leiriy Salmo 86:5; Romanos 8:38, 39). Juchata rurashganchipita laquicuycarga, ama gongashunchu Jehová jinala cuyamashganchita y perdunamänanchitapis munashganta. Jina ancianucunapa yanapacuycunatapis ashinanchi. 12 caj parrafucho parlashganchi Robert cristianuga, cayno nin: “Quiquiläman yäracuycargä ima juchamanpis mana ishquinäpaj cajta”. Pero nircur juchaman ishquirna cuentata gocurgan ancianucunapa yanapacuyninta necesitashganta. Robert nin: “Ancianucunaga japaläta manami cachaycamarganchu, sinoga shumaj tantiachimargan Jehová cuyaycämashgantaraj y mana jaguimashganta”. Noganchipis seguro caycashwan Jehová alapa cuyamashganchita y shongupita arrepenticuptinchi, yanapacuyninta ashiptinchi y calpachacuptinchi alicunata ruranapaj payga perdunamanchimi (1 Juan 1:8, 9). Ama gongashunchu Jehová amatar cuyamashganchita, chayga yanapämäshun pantarcuptinchipis jinala sirviycänapaj.

16. ¿Imanirtaj mana ajayaypa Jehovata sirviyta munanqui?

¹⁶ Cay ushanan tiempucho cawayninchi sasa captinpis alicunata ruranapaj calpachacuptinchi Jehová cushicunmi. Waquincuna laquichimaptinchipis payga yanapämäshunmi mana guelanäcurinapaj y sirviycarla caycänapaj. Chaymi calpachacushun hermanunchicunata cuyanapaj y ofendimaptinchega perdunananchi. Casado vidacho ima problemacuna captinpis alchananchi, chaynopa ricächicushun Jehovata cuyashganchita y matrimoniutapis respetashganchita. Jatun juchata rurarga Jehovapa yanapacuyninta ashinanchi, cuyacuywan corrigimashganchita y perdunamashganchitapis chasquicunanchi. “Tsayno kaykaptinqa mana ajayaypa alikunalata rurashun”, chaynopa Jehová bendiciuncunata gomäshun (Gál. 6:9).