1. ¿Imataraj öraga waquin Diospa sirvejnincuna ninman?

 BIBLIAGA nin “kuyashqan runakunata rikarmi TAYTA DIOS kushikun”, y chayta musyar cushicunchimi (Sal. 149:4). Pero öraga capaz waquincuna guelanashga caycar cayno ninman: “Jehovaga marcanwanmi cushishga caycan, pero ¿nogapita cushicunchuraj?” nir. Unaycho waquin Diospa sirvejnincunapäpis, öraga sasami cargan creinanpaj Jehová paycunawan cushishga caycashganta (1 Sam. 1:6-10; Job 29:2, 4; Sal. 51:11).

2. ¿Pïcunapitataj Jehová cushicun?

² Bibliaga yachachimanchi juchasapa captinchipis alicunata ruraptinchi, Jesusman yäracuptinchi y bautizacuptinchega Jehová ali nawilanwan ricamanchi (Juan 3:16). Chayta ruraptinchi waquincuna cuentata gocärin juchanchicunapita arrepenticushganchita y Jehovatapis aunishganchita voluntäninta ruranapaj (Hech. 2:38; 3:19). Jehovaga alapami cushicun chaycunata ruraptinchi amigunman ticranapaj. Y payta aunishganchino cawacunapaj calpachacuptinchega, noganchiwan cushishga caycan y amigunchimanpis ticran (Sal. 25:14).

3. ¿Ima tapucuycunataj canan contestashun?

³ ¿Imanirtaj öraga waquincuna yarpapäcunman Jehová paycunawan cushishga mana caycashganta? ¿Imanopataj Jehová musyachimanchi noganchiwan cushishga caycashganta? ¿Imaraj yanapämäshun seguro caycänapaj Jehová ali nawilanwan ricaycämashganchita?

IMANIRTAJ WAQUINCUNA YARPAPÄCUN JEHOVÁ PAYCUNAWAN CUSHISHGA MANA CAYCASHGANTA

4, 5. Imapäpis mana välishganchita yarparga, ¿imapitataj seguro caycashwan?

⁴ Achcajmi wamra cashganlapita cuyacuyniynaj o imapäpis mana välishganta yarpar winargan (Sal. 88:15). Adrián  jutiyoj cristiano cayno nin: “Imaypis yarpargä imapäpis mana valishgäta. Wamra caycaptë Jehovata mañacoj cä lapan familiäcuna Mushoj Pachacho cawapäcunanpaj, pero noga ichanga yarpargä mana merecicushgäta”. Tonypa taytancunaga manami Testiguchu cargan, cayno wilacun: “Manami imaypis nimarganchu cuyamashganta ni nogapita cushishga caycashgantapis. Imaypis ricächimargan paycuna munashganno mana cashgäta”.

⁵ Noganchipis öraga mana valejno ricacuptinchega, yarpäshun quiquin Jehová marcanman pushamashganchita (Juan 6:44). Payga ricaycanmi imano runataj caycashganchita y musyanmi shongunchi imano caycashgantapis (1 Sam. 16:7; 2 Crón. 6:30). Chauraga ricayninpaj alapa valuryoj cashganchita nimaptinchega creishwanmi (1 Juan 3:19, 20).

6. ¿Imanotaj Pablo ricacurgan unay juchancunaman yarpar?

⁶ Waquinninchicuna Bibliapita manaraj yachacur mana alicunata rurashganchiman yarpar, capaz öraga culpayojraj ricacunchi (1 Ped. 4:3). Waquincuna achca watapana Jehovata sirviycarpis, mana ali munaynincunawan luchaycanrächi. ¿Y gamga imalapitapis culpayojchu ricacunqui? Chayno captenga ama laquicuychu, waquin Diospa sirvejnincunapis chayno ricacurgan. Apóstol Pabluga unay juchancunaman yarpar pasaypa laquipaypajmi ricacurgan (Rom. 7:24). Juchancunapita arrepenticur bautizashgana caycaptinpis, payga yarpargan waquin apostulcunawan mana tincushganta y waquincunapitapis “mas jutsayuq” cashganta (1 Cor. 15:9; 1 Tim. 1:15).

7. ¿Imapitataj seguro caycashwan arrepenticuptinchi?

⁷ Taytalanchi Jehovaga aunimanchi perdunamänanchipaj arrepenticuptinchi (Sal. 86:5). Chauraga lapan shongunchiwan arrepenticushgana carga, yarpaylapis ama yarpashwannachu “¿Jehová perdunamashgachuraj?” nir (Col. 2:13).

8, 9. ¿Imaraj yanapämäshun mana gonganapaj lapan rurashganchita Jehová valurashganta?

⁸ Lapanchimi munanchi noganchipita más ali cajta Jehovata gonapaj. Pero waquincunaga imaycata ruraptinpis, capaz öraga yarpapäcunman Jehová paywan cushishga mana caycashganta. Amanda jutiyoj cristiana cayno nin: “Imaypis yarpä Jehovata sirvishgächo mastaraj ruranäpaj, alapa calpachacunä o imaycataraj ruranä, chaymi yarpashgäpitapis mastaraj rurä. Pero munashgäno rurayta mana puediptëga, Jehová nogawan mana cushishga caycashganta yarpä”.

⁹ ¿Imaraj yanapämäshun mana gonganapaj lapan rurashganchicunata Jehová valurashganta? Ama gongashunchu Diosninchi ali shongu, tantiacoj cashganta y payga puedishganchilata ruranapaj mañamanchi. Chaymi achcata o ichiclata voluntäpita rurarga, payga cushicunmi. Lapan calpanwan unay Jehovata sirvej runacunaman yarpäshun. Pabluga achca watacunapa mana yamacaypa may chaypa Diospita yachachicurgan y congregaciuncunatapis camacächergan. Pero carcelchona caycaptin chaycunata rurayta mana puedirgannachu. Chaura, ¿nishwanchuraj Jehová paywan cushishga manana caycashganta? Manami. Pabluga puedishganlata ruraycargan y Jehovaga lapan rurashgancunata bendecirgan (Hech. 28:30, 31). Noganchipis öraga lapan yarpashganchita rurayta puedishunchu, pero Jehovaga ricaycanmi ali shongulanchiwan rurashganchita. Canan ricärishun imanotaj Jehová musyachimanchi noganchiwan cushishga caycashganta.

 IMANOTAJ JEHOVÁ MUSYACHIMANCHI NOGANCHIWAN CUSHISHGA CAYCASHGANTA

10. ¿Imanotaj Jehová musyachimanchi noganchiwan cushishga caycashganta? (Juan 16:27).

¹⁰ Palabranta gomashcanchi. Jehovaga Palabrancho nimanchi sirvejnincunata cuyashganta y ali ricashgantapis. Bibliacho wilacun ishcay cuticunacho Jehová ‘cuyay Wamrä’ Jesusta nishganta y paypita cushishga caycashgantapis (Mat. 3:17; 17:5). ¿Gampis munanquimanchuraj Jehová nishunayquipaj gampita cushishga caycashganta? Pay canan cielupita mana parlapämaptinchipis, Palabranwan parlapämanchi. Bibliacho leiptinchi Jesús discipuluncunata cuyacuywan parlashgantaga, quiquin Jehová parlapaycämashganchitano ricacushwan (leiriy Juan 16:27). Jesusga Taytanno cuyacojmi. Bibliacho wilacun discipuluncuna juchasapa captinpis Jesús cuyashgantami, chayga ricächimanchi chayno Jehovapis noganchita cuyamashganchita (Juan 15:9, 15).

11. ¿Imanirtaj pruebacunapa pasarga yarpashwanchu Jehová noganchiwan cushishga mana caycashganta? (Santiago 1:12).

¹¹ Noganchipaj imaycata ruran. Jehovaga yanapämänanchita munan, chaymi necesitashganchicunata camaripämanchi. Pero öraga Job sasacunapa pasashganno, noganchipis chaycunapa pasanapaj jaguimanchi (Job 1:8-11). Pruebacunapa pasarga ama yarpashwanchu Jehová noganchiwan cushishga mana caycashganta, sinoga calpachacushwanmi payta amatar cuyashganchita ricächicunapaj y payman yäracushganchitapis (leiriy Santiago 1:12). Sasacunapa pasashganchi hora ricashun Jehová yanapämashganchita aguantanapaj y alapa cuyamashganchitapis.

12. ¿Imataj yachacunchi Dimitri cristianuta pasashganpita?

¹² Asia naciunpita Dimitri jutiyoj cristianuta ima pasashganta ricärishun. Payga trabajuyniynaj quedacurgan. Achca quillacuna ashiycaptinpis manami tarirganchu, chaura calpachacurgan más horacuna predicananpaj Jehovaman yäracushganta ricächicunanpaj. Quillacuna pasariptinpis jinala aruyniynaj caycargan. Nircur gueshyarpis galaycurgan y cämalacho jitaraycargan. Chaycunapa pasar yarparganshi mana ali tayta mana ali maja cashganta, y Jehovapis paywan cushishga  manana caycashganta. Pero warmi wamranshi juc papelcho imprimirgan Isaías 30:15 nishganta, chaychoga nin: “Lakishqa kawapäkunaykipa trukanqa noqaman yärakamay. Tsayno yärakamaptikiqa ali kawapäkunaykipaqmi yanapashayki”. Nircur papäninta papelta goycur cayno nergan: “Papá, laquishga caycashgayqui hora cay textuman yarparay”. Dimitri cristianuga cuentata gocurgan familianpaj micuynin, ropanpis y maycho tiyananpäpis caycashgantaraj. Cayno nin: “Pacienciawan shuyarar Diosman yäracunä cargan”. Gampis chaycunapa pasaycaptiquega seguro caycay Jehová gampaj yarpachacushganta y yanapäshunayquipäpis.

13. ¿Imano mastaj Jehová musyachimanchi noganchiwan cushishga caycashganta?

¹³ Hermanunchicunawanpis yanapämanchi. Jehovaga sirvejnincunapita välicun laquicushganchi horacho shacyächimänanchipaj. Chaytami pasargan Asiapita juc cristianata. Payga aruyniynaj quedacurgan y gueshyarpis galaycurgan. Nircur runanpis jatun juchata rurashganpita manana anciano cargannachu. Chay sasacunapa pasashgan hora payga nergan: “Manami tantiächu imanir chaycuna nogata pasaycämashganta. Yarpargä capaz ima juchatapis rurashgäta y Jehová nogawan cushishga manana caycashganta”. Chaura Jehovatashi ruwacurgan musyachinanpaj jinala cuyaycashganta y Jehovaga mañacuyninta contestargan. ¿Imano? Payga nin: “Ancianucuna nogawan parlamurgan y tantiachimargan Jehová jinala cuyaycämashganta”. Tiempuwanshi yapay Jehovata ruwacurgan yanapacuyninta ricänanpaj. Payga nin: “Chay junajlacho congregaciuncho achca hermanucunapita juc cuyaylapaj cartata chasquirgä. Chayta  leirga, Jehová mañacuynëta contestaycämashgantano ricacurgä”. Chauraga Jehová noganchiwan cushishga caycashganta musyachimanchi öraga hermanunchicuna cuyacuywan parlapämaptinchi o shacyächimaptinchipis (Sal. 10:17).

14. ¿Imanotaj hermanunchicunapita Jehová välicun noganchiwan cushishga caycashganta musyachimänanchipaj?

¹⁴ Jehová noganchiwan cushishga caycar, öraga hermanunchicunapita välicunmi consejamänanchipaj. Punta caj cristianucuna cawashgan wichan apóstol Pabluta acrargan 14 cartacunacho shumaj consejucunata escribinanpaj waquin cristianucunapaj. ¿Imanirtaj Jehová Pabluta acrargan chay consejucunata escribinanpaj? Payga cuyacojmi, “kuyashqan tsurinta papänin corrigishqannömi TAYTA DIOSPIS kuyashqan kaqtaqa corrigin” (Prov. 3:11, 12). Chauraga pipis Bibliawan consejamaptinchega ama yarpashwanchu Jehová noganchiwan cushishga manana caycashganta, sinoga cuyamashpanchimi payga corrigimanchi (Heb. 12:6). Ricashun imano mastataj Jehová musyachimanchi noganchiwan cushishga caycashganta.

IMACUNACHOTAJ MÁS RICANCHI JEHOVÁ NOGANCHIWAN CUSHISHGA CAYCASHGANTA

15. ¿Pïcunatataj Jehová espíritu santunta goycun, y imapitataj seguro caycashwan?

¹⁵ Jehovaga espíritu santunta goycun cuyashgan cajta (Mat. 12:18). Chaymi tapucunanchi: “¿Cawaynëcho ricacämunchuraj Dios munashganno runa cashgäta?”. Tantiarinapaj, ¿cananchu más paciente canqui Jehovata manaraj reguishgayquipita? Cawayniquicho cuentata gocuptiqui espíritu santo yanapäshushgayquita ali cawanayquipaj, seguro caycay Jehová gamwan cushishga caycashganta (“ Diospa espiritun yanapämanchi...” nej recuadruta ricay).

16. 1 Tesalonicenses 2:4 nishganno, ¿pïcunatataj Jehová acrargan ali wilacuycunata apananpaj? ¿Y chayta musyar imanotaj ricacunqui?

¹⁶ Jehovaga ali nawilanwan ricajcunata acran ali wilacuycunata apananpaj (leiriy 1 Tesalonicenses 2:4). Ricärishun Jocelyn jutiyoj cristiana wilacushganta. Juc junajshi pasaypa laquishga o calpaynaj warämurgan. Payga nin: “Pasaypa calpaynaj ricacur, imatapis rurayta munargächu. Pero precursora caycar, chay junaj predicanämi cargan. Chaura Jehovata mañacurcur predicaj  yargurgä”. Chay junajshi, Mary jutiyoj warmita tarirgan y payga Bibliapita yachacuyta munargan. Tiempo pasariptinna, chay warmiga Jocelyn cristianata wilapargan chay tuta tarishgancho puncunta manaraj tacaptin Jehovata mañacuycashganta yanapänanpaj. ¿Imataj chaypita Jocelyn yachacurgan? Payga nin: “Jehová cayno nimashgantano ricacurgä: ‘Gampitami cushishga caycä’” nir. Chauraga lapan runacuna ali mana chasquimaptinchipis seguro caycashwan Jehová noganchiwan cushishga caycashganta, payga ricaycan imano calpachacunchi waquincunata yachachicunapaj.

17. ¿Imataj yachacunqui Vicky rurashganpita? (Salmo 5:12).

¹⁷ Jehová Wamranta cachamurgan ricaynincho ali caycajcunapa juchancunata perdunananpaj (1 Tim. 2:5, 6). Pero öraga Jesús wanushganman yäracurpis y bautizashgana caycarpis sasami canman creinapaj Jehová noganchiwan cushishga caycashganta. Chayno captenga shongunchi ima nimashganchita cäsupashwanchu, sino Jehová ima nishganman yäracushun. Payga nimanchi Jesús wanushganman yäracojcunaga alita ruraj runa cashganta y aunimanchi bendicimänanchipäpis (leiriy Salmo 5:12; Rom. 3:26). Vicky jutiyoj cristianaga alapa yarpachacurganshi Jesús wanushganman. Puntalacho Jehová payta cuyaycashganta creinanpaj sasa captinpis, nircur cayno nergan: “Jehová achca watacunapami nogawan pacienciacoj cargan [...]. Pero nogaga yarpaycargä nogatano warmita quevä cuyamashganta y Wamran wanushganpis manami aypashganta juchäcuna perdunashga cananpaj. Pero manami chaynochu cashga”. Noganchipis Vicky rurashganno Jesús wanushganman yarpachacurga, cuentata gocushun Jehová cuyamashganchita y noganchiwan cushishga caycashgantapis.

18. ¿Imapitataj seguro caycashwan Jehovata cuyaycarga?

¹⁸ Cay yachachicuycho yachacushganchicunata mana gongarpis, capaz öraga imalapitapis guelanäcurishwan y “Jehová nogawan cushishga caycanchuraj” nir tapucushwan. Chayno captenga yarparay ricaynincho ali caycajcunata Jehová cuyashgantami (Sant. 1:12). Chaymi jinala Jehovaman guelicuy y cuentatapis gocuy imano Jehová ricächishunqui gamwan cushishga caycashganta. Ama gongaychu Diosga “manami noqantsipita karuchötsu kaykan” (Hech. 17:27).