1, 2. 1) ¿Imatataj juc yachaj runa nergan? 2) ¿Imatataj canan yachacurishun?

CANAN wichan runacunaga Jesusman yaracushganta nipäcun, ichanga pay yachachicushganta chasquicärinchu (2 Tim. 4:3, 4). Juc yachaj runa cayno nergan: “Jesusnocush canan wichan juc runa canman y Jesús rurashgannola lapanta ruranman [...], ¿canan wichan runacunaga wasguiripäcunmanchuraj unay runacunano? [...] Awmi, chaynola rurapäcunman”.

² Jesús shamushgan wichanga Diospita yachachicur payga caycargan, y achca milagrucunata rurashganta maychicaj runacuna ricarpis payman yaracärirganchu. Imanir chayno cashganta yachacushcanchinami, cananpis maslata yachacurishun. Canan wichanpis runacunaga chasquimanchichu, ¿imaraj yanapämäshun guepaman mana cutinapaj? Yachacurishun.

3. ¿Imanirtaj waquincunaga Jesusta wasguipar galaycärirgan?

³ Pachacho caycarga lapancunawanmi Jesús juntacaj. Ricucunawanpis wacchacunawanpis micupacurejmi. Runacuna quiquinpura mana ali nawiwan ricanacäriptinpis Jesusga paycunata cuyaparganmi. Chayta ricar imarchi ali tucojcunaga Jesusta wasguipar galaycärirgan. Jesuspa gatejnincunatapis cayno tapupäcurgan: “¿Imanirtaq qamkuna impuestu cobraqkunawan y jutsasapa runakunawan mikupäkunki y upupäkunki?”, Jesusna cayno nergan: “Sänu kaqkunaqa manami jampikuqta munantsu, sinöqa qeshyaqkunalami. Noqa manami  jutsaynaq runakunamantsu shamushqä, sinöqa jutsankunata kacharinanpaq jutsasapa runakunamanmi” (Luc. 5:29-32).

4. ¿Imatataj judiucuna musyapäcunmanna cargan Isaías nishgannopis?

⁴ ¿Imatataj Biblia wilacun? Isaías profetaga mayna wilacurgan Jesusta runacuna mana chasquicunanpaj. Cayno nergan: “Runakuna payta manakaqman churarmi mana chaskikärirqantsu [...]. Pipis manami rikaytapis munarqantsu. Chikishpanmi pipis payta mana cäsurqantsu” (Is. 53:3). Isaías nishgannopis Jesustaga ‘pipis manashi ricaytapis’ munanmanchu cargan, chay wichan judiucunaga maynachi musyapäcunman cargan runacuna Jesusta mana chasquicärinanpaj.

5. ¿Imanotaj waquin runacuna ricämanchi?

⁵ ¿Chaynolachu canan wichanpis? Awmi. Pushacoj religiosucunaga ricucunalawan y yachaj runacunalawanmi juntacärin, mana ali cawacuynincunapitaga imatapis nipäcunchu. Chay pushacoj religiosucunaga chiquipämashpanchimi imatapis mana yachaj runacunatano ricämanchi, chayno carpis ali shongulanchiwan ali yarpayninchilawanmi Jehovata aduranchi. Apóstol Pablupis mayna wilacurgan mana cajman churashga cajcunata Dios acrananpaj (1 Cor. 1:26-29). Taytalanchi Jehovapäga lapanchimi ali ricashga caycanchi.

6. ¿Imatataj Jesús nergan Mateo 11:25, 26 textucho, y imanotaj pay rurashgannola rurashwan?

⁶ ¿Imaraj yanapämäshun guepaman mana cutinapaj? (Leiriy Mateo 11:25, 26). Cay mundo runacunaga imatapis nipäcunmanmi, ama casupaychu. Imaypis yarpay Jehovaga ali shongu cajcunalata acran munayninta rurananpaj (Sal. 138:6). Unaypitana imaycacuna Jehovaraycur ruracaycämun, chaychoga yanapacurcaycan ñanpu shongu cajcunalami, chaymanpis yarpachacushun.

7. ¿Imanirtaj fariseucunata ‘ishcay cara’ Jesús nergan, y imatataj paycuna rurapäcurgan?

⁷ Jesusga mana manchacurmi pïcuna lutanpa yachachicuycashganta nergan. Fariseucunata nergan ‘ishcay cara’ cashganta, paycunashi taytancunata yanapänanpaj trucan maquincunata maylacur cacärej (Mat. 15:1-11). Chay lapanta gatejnincunapis ricarganchi, chaychi cayno tapupäcurgan: “¿Tantiyankiku tsayno niptiki fariseukuna rabyakärishqanta?”. Jesusna paycunata cayno nergan: “Jana patsacho kaykaq Taytä mana plantashqan yöra karmi paykunaqa chakrapita lukirishqa kanqa. Paykunata ama cäsupaytsu. Paykunaqa qaprapura pushanakuqnömi karkaykan. Qaprapura pushanakurqa ishkanmi pözuman jeqanqa” (Mat. 15:12-14). Pushacoj religiosucunapa shonguncuna rabianaylapita tinpuptinpis Jesusga rasunpa cajta parlar caycargan.

8. ¿Imanotaj Jesús musyachicurgan Taytan luta caj yachachicuyta mana chasquishganta?

⁸ Jesusga maygan lutan caj yachachicuycashgantapis nerganmi. Diosninchega manami chasquinchu lapan creenciacunata, chaymi Jesús nergan maychicaj runacuna wanuyman apacoj anchu caj caminupa aywarcaycan, quichqui caminupana aywarcaycan walcajcunala, mana ushacaj cawayta ashejcuna (Mat. 7:13, 14). Waquincunaga yangalashi ‘Diosta sirviycä’ ninman cargan, chaymi Jesús cayno nergan: “Cuydacuy-llapa ‘Tayta Diospa willacojninmi cä’ nir shamoj llutan yachachicojcunapita. Chay runacunaga atojno fiyu caycarpis manshu uyshanömi chayapäshunquipaj. Llutan yachachicoj cashanta musyanquipaj imanöpis cawashanta ricarmi” (Mat. 7:15-20).

9. ¿Imacunapitataj mana manchacuypa pitapis Jesús wilapaj?

 ⁹ ¿Imatataj Biblia wilacun? Bibliacho juc profeciami wilacurgan Taytanpa wasinta Jesús respetachinanpaj (Sal. 69:9; Juan 2:14-17). Chaymi Jesús maygan luta yachachicuycuna cashganta mana manchacuypa pitapis wilapargan. Fariseucuna nipäcoj pipa almanpis puriycashganta, Jesús ichanga yachachicurgan wanushgacuna punuraycajnola caycashganta (Juan 11:11). Saduceucunana wanushgacuna mana cawarimunanpaj cajta yachachicärej, pero Jesusga amigun Lazarutami sharcarachimurgan (Juan 11:43, 44; Hech. 23:8). Fariseucunaga yachachicärej pitapis Dios destinashgana canganta pero Jesusga manami chaytachu nergan, payga nergan quiquinchipitami caycan Diosta sirvinapaj o manapis (Mat. 11:28).

10. ¿Imapita yachachicushganchiraycurtaj waquincunaga noganchipita witicärin?

¹⁰ ¿Chaynolachu canan wichanpis? Awmi. Canan runacunaga noganchicunapita witicärin luta yachachicuycunawan pantashga caycashganta wilacuptinchi. Pushacoj religiosucunaga runacuna maquinpita mana aywacärinanpaj infiernupita luta yachachicuycunawan manchachin. Diosninchega cuyacojmi, pitapis infiernucho castigangachu, caypitaga pï mayta shumaj wilacunchi. Luta religiuncunaga yachachicärin pipa almanpis may chaycho puriycashganta, chaymi wanushgacuna cawarimunanpaj cajman creipäcunnachu. Chayno rurapäcushgan mana rasun captinmi Bibliapita shumaj yachachicunchi. Waquin religiuncunaga jinalami yachachicurcaycan pitapis Dios destinashganta, noganchicuna ichanga yachachicunchi imatapis ruranapäga quiquinchipita cashganta, Diosta sirvinapäpis quiquinchipita cashganta. Chayno yachachicushganchipitami pushacoj religiosucunaga alapa rabiacärin.

11. Juan 8:45-47 textucho Jesús wilacushganno, ¿imata rurananchitataj Jehová shuyaraycan?

¹¹ ¿Imaraj yanapämäshun guepaman mana cutinapaj? Biblia yachachicushganta shongunchita quichaparga Diosninchi nishgantaga  chasquicushunmi (leiriy Juan 8:45-47). Rasunpa caj caminulapa aywaycäshun, lulacoj Diablunoga ama cashunchu (Juan 8:44). Taytalanchi Jehovaga munan Jesuspa yupilanpa aywananchita, chaymi cayno nimanchi: “Lutankunata ruranaykipaqqa ama yarpaylapis yarpaytsu. Tsaypa trukanqa alilata rurar kawapäkuy” (Rom. 12:9; Heb. 1:9).

12. ¿Imanirtaj judiucuna yaracärirgannachu Jesús imano wanushganta ricar?

¹² ¿Imaraycur mastaj unay judiucuna guepaman cutipäcurgan? Apóstol Pablo nergan: “Noganchicunaga guerucho wanushga Cristupitami yachachicunchi, chayno wanushganpita judiucuna yaracärinnachu” (1 Cor. 1:23, TNM). ¿Imanirtaj mana yaracur guepaman cutipäcurgan? Paycunaga nipäcoj guerucho warcuypa wanojcunaga, suwacoj maldicionado cajcunala cashganta, paycunash mana shuyarpaycarganchu Dios mandamushgan Jesús chayno wanunanta (Deut. 21:22, 23).

13. ¿Imatataj rurapäcurgan chiquicoj judiucuna?

¹³ Chiquicoj judiucunaga ichiclapis yarpachacärirganchu Jesús juchaynaj cashganta y runacuna lutanpa tunparcaycashgantapis. Jesusga maygan leytapis lapanta cumplirgan, juzgajnincuna ichanga shiminman chayashgalanta parlar lutanpa juzgapäcurgan (Luc. 22:54; Juan 18:24). Autoridäcunaga ima pruebalatapis mana ashir “Jesústa wanutsiyta munar testïgukunata ashipäkurqan lulakur [...] contran parlapäkunanpaq”. Testigucuna wilacushganno mana ruracaptenga sacerdoticunaga Jesusta lutanpa parlachiyta munapäcurgan, chaylapita juzgapäcunanpaj (Mat. 26:59; Mar. 14:55-64). Nircurpis cay autoridäcunaga achca guellayta pagapäcurgan soldaducunata, ‘Jesuspa ayanta suwaypa apacärish’ nipäcunanpaj, chaypäga Jesús mayna cawarimushgana cargan (Mat. 28:11-15).

14. ¿Imatataj Biblia wilacurgan Jesús wanunanpaj cajpita?

¹⁴ ¿Imatataj Biblia wilacun? Achca judiucunapäga Jesús manami wanunmanchu cargan,  pero profeciaga mayna wilacurgan pay wanunanpaj cajta, ‘rasunpa payga aypalla runacunapa juchantami apargan. Juchayojcunapäpis ruwacur mañacushga’ (Is. 53:12). Chauras chayno Diospa Palabran niycaptenga, judiucunaga manachi lutanta imatapis rurapäcunmanchu cargan.

15. ¿Jehovapa testiguncunawan imacuna pasashganraycurtaj waquincuna Diosman yaracärinnachu?

¹⁵ ¿Chaynolachu canan wichanpis? Awmi. Jesustanomi Jehovapa testiguncunataga manacajlapita juzgapäcushga. Jucnin cajga caycan Estados Unidos naciuncho pasashganmi. 1930 wata wichanmi autoridäcunapa nawpanman hermanunchicuna aywapäcush, chaycho paycuna parlapäcush Diosta sirvishganchita imapis mana michäcunanpaj. Waquin juezcunaga mana pengacuypa contranchicho imatapis rurapäcoj. Quebec (Canadá) marcachona catolicocuna gobiernuwan juntacarcur predicaciunninchita michäcärirgan. Diospa Gobiernunpita yachachicushganraycurla waquin hermanunchicunatapis carcilman apapäcushga. Alemania naciunchopis achca mozucuna yaracuynincunaraycur wanupäcurgan y cay último watacunachona Rusia naciuncho Bibliapita yachachicushganraycurla autoridäcuna hermanunchicunata juzgarcaycan y carcilmanpis aparcaycan. Chay autoridäcuna piñacärin Jehová jutipita, y Traducción del Nuevo Mundo de las Santas Escrituras pasaypa mana ali cashganta nipäcun.

16. 1 Juan 4:1 texto wilacushganno, ¿imanirtaj casupashwanchu pipis contranchicho lulacuycaptenga?

¹⁶ ¿Imaraj yanapämäshun guepaman mana cutinapaj? Lapantaraj musyapacaramuy. Jircacho caycarmi Jesús nergan, “lulakur imaykatapis” gatejnincunata jitapänanpaj (Mat. 5:11). Pï lulacojpa guepanchoga Diablumi caycan, paymi juchayoj caycan runacuna washanchita parlapäcunanpaj (Apoc. 12:9, 10). Pipis ashlimashganchitaga ama casupäshunchu. Yaracuyninchitaga manami imapis ushacächinmanchu (leiriy 1 Juan 4:1).

17. ¿Imacunataraj runacuna yarpargan Jesús wanunanpäna caycar imacuna pasashganta ricar?

¹⁷ Wanunanpaj chacaymi jucnin caj apostulnin traiciunarirgan, jucnin cajna quimsa cuti niegarirgan, nircurna waquincuna japalanta jaguiriycur gueshpir aywacärirgan (Mat. 26:14-16, 47, 56, 75). Caycuna pasananpäga Jesús mayna musyaycargan (Juan 6:64; 13:21, 26, 38; 16:32). Ichanga cayta ricar waquincunapis nirganchi ‘chayno quiquin apostulnincuna ruraptenga, ¿imapätaj Jesuspa gatejninman ticrashaj?’ nir.

18. ¿Ima profeciacunata ushayninman chayash Jesús wanunanpäna caycar?

¹⁸ ¿Imatataj Biblia wilacun? Jesús shamunanpaj achca watacuna pishiycaptinmi Jehovaga mayna Palabrancho wilacurgan quimsa chunca (30) guellaywan Jesús traiciunashga cananpaj (Zac. 11:12, 13). ¿Piraj canman chay traiciunacojga? Guepalanta purej jucnin cajmi (Sal. 41:9). Zacarías profetapis cayno nergan: “Uyshëruta wañuycachiy. Chaura uyshacunaga machiypa-machirmi aywaconga” (Zac. 13:7). Ali shongu runacunaga manami Jesusta wasguipäcurganchu, chaypa trucanga profecía nishganno imapis ruracashganta ricarga yaracuynincunaga masraj miraycurgan.

19. ¿Imatataj noganchicunaga musyanchi?

¹⁹ ¿Chaynolachu canan wichanpis? Awmi. Waquin Jehovapa testiguncunaga guepamanmi cutipäcush, y mana chaylachu, piñacurmi contranchicho churacar imaycata rurarcaycan;  paycunaga internetpapis televisiunpapis o imaycanopapis lulacurmi pasaypa mana alicunata noganchipita parlapäcun. Bibliaga wilacurgannami chayno runacuna cananpaj, paycunataga ama casupäshunchu y Diosninchilata sirvir cacuycäshun (Mat. 24:24; 2 Ped. 2:18-22).

20. ¿Imacunata rurartaj casupanchichu piñacur contranchicho ticrajcunata? (2 Timoteo 4:4, 5).

²⁰ ¿Imaraj yanapämäshun guepaman mana cutinapaj? Yaracuyninchita miraycächishun Bibliata cada cadala leir, Diosman cutin cutin mañacur y mandamashganchita cushi cushila rurar (leiriy 2 Timoteo 4:4, 5). Caycuna lapanta ruraptinchega manami imapis guepaman cutichimäshunchu (Is. 28:16). Jehovata cuyarga, Palabranta cuyarga, cristiano masinchicunawan juc shongula carga, piñacur contranchicho ticrajcunataga manami casupäshunchu.

21. Yachachicushganchita mana chasquicäriptinpis, ¿imatataj imaypis ruraycashwan?

²¹ Jesús cay Pachacho cawashgan wichanga waquincunaga wasguirmi juc ladupa aywacärirgan, waquincuna ichanga ali shongulanwan chasquicärirgan; jucnin caj cargan Sanedrincho juc autoridad, achca sacerdoticunapis chasquicärirganmi (Hech. 6:7; Mat. 27:57-60; Mar. 15:43). Chaynolami canan wichanpis aypala runacuna Jesusta gatinanpaj y Diosta sirvinanpaj shacaycämun, chaytaga rurapäcun Biblia nishganta chasquicur y chayta cuyashpanmi. Bibliami cayno nin: “Leynikikunata kuyaqkunaqa kushishqami kawapäkun. Paykunataqa manami pipis jutsaman tunitsintsu” (Sal. 119:165).