1. ¿Imaraj pasanman waquincunata cushi cushila Bibliapita parlapaycashganchi hora?

RASUNPA cajta tarishgayqui junajga, ¿imanotaj caycashcanqui? ‘¡Shumajmi!, lapanpis tantiacanmi’ nirchi caycargayqui. Jina yarpashcanquichi waquincunapis jucla yachacärinanpaj y yachacushgancunaraycur ali cawayta taripäcunanpaj (Sal. 119:105). Castayquitapis, amiguyquicunatapis parlaparchi cushishga galaycurgayqui, pero waquincuna yachachicushgayquita mana chasquicuptenga alapachi laquicushcanqui chay hora.

2, 3. ¿Imacunatataj runacunaga Jesuspita y wilacamushganpita yarpapäcoj?

² Laquicuypaj captinpis, runacunaga yachaycächishganchita wasguipämäshunmi. Jesusga Papäninpa jutincho achca milagrucunatami rurargan, chayno captinpis runacunaga manami chasquicurganchu. Juc cutichomi runacunapa nawpancho Lazaruta cawariycachimurgan, pero pushacoj religiosucuna manami creipäcurganchu quiquin Dios Jesusta mandamushganta. Imaraj cargan, cay pushacojcunaga wanuchiytaraj munargan Jesustawan Lazaruta (Juan 11:47, 48, 53; 12:9-11).

³ Jesusga musyargannami Dios acrashgantano runacuna payta mana chasquinanpaj (Juan 5:39-44). Bautizacoj Juanpa discipuluncunatapis cayno nergan: “Cushishgami canga nogata mana wasguimaj cäga” (Mat. 11:2, 3, 6, TNM). ¿Imanirtaj achca runacuna Jesusta wasguipaycarla carcaycargan?

4. ¿Imapitataj canan yachacurishun?

⁴ Canan y jucaj yachachicuychomi yachacushun imanirmi unay wichan runacuna Jesusta wasguipashganta. Jinamanpis ricaycäshun imanir canan wichan runacunapis Diospita  wilapashganchita mana chasquicushganta. Nircurpis yachacurcushun Jesusman yaracunapaj y guepaman imaypis mana cutinapaj.

5. ¿Imanirtaj runacunaga creipäcurganchu Tayta Diosninchi Jesusta mandamushganta?

⁵ Jesús maycho yurishganta musyarirlami achca runacuna paypita witicurgan. Ali yachachicoj cashganta y milagrucunata rurashgantaga ricapäcurganmi, chayno carpis paycunaga nipäcoj ‘cayga juc carpinterupa churinlami’. Jesusga cargan ichic marca Nazaretpita, chayraycurlapis runacunaga jamurparganshi. Natanael runapis Jesuspa gatejninman manaraj ticrar cayno nergan: “¿Ima allillapis Nazaretpita yuriycamunmanchuraj?” (Juan 1:46). Chaynoga nergan Jesús yurishgan marca ichicla cashganraycurchi. Chayno mana carga, Natanaelga ichanga yarpaycargan Miqueas 5:2 textuman, chaychoga wilacuycargan Belén marcacho Jesús yurinanpaj, mana Nazaret marcachoga.

6. ¿Imatataj rurapäcunman cargan Jesusta wasguejcuna?

⁶ ¿Imatataj Biblia wilacun? Maynami profeta Isaiasga wilacurgan Jesús imano shamunanpaj chiquejnincuna mana yarpachacärinanpaj (Is. 53:8). Paycunaga manami profeciacunata shumaj tantiaparganchu, chaymi musyapäcurganchu Belén marcacho Jesús yurimunanpaj cajta y rey Davidpa miraynin cashgantapis (Luc. 2:4-7). Miqueas 5:2 wilacushganga rasunpami cargan, chaychomi Jesús yurirgan. Awmi, profeciacunata shumaj mana yachacushga carmi, jucnopa tantiar galaycärirgan, chaylacho yaracuynincunapis ushacärirgan.

7. ¿Imanirtaj canan wichan runacunapis wasguipämanchi?

⁷ ¿Chaynolachu canan wichanpis? Awmi, chaynolami. Jehovapa testiguncunaga charashganchilawan walca walcalawan cawacunchi. Waquincunaga ricämanchi ‘mana shumaj estudiashga’ cajcunatano (Hech. 4:13). Jina nipäcun Bibliapita yachachicunapäga reguishga universidäcunamanraj aywanapaj. Waquinna nipäcun Estados Unidos naciunpita religiunninchi cashganta; chayga manami rasunchu, Jehovapa testiguncunaga may chay naciuncunacho y marcacunacho caycanchi. Y tapucärinpis Jesusman creishganchita o mana creishganchita. “Supaypa wawan”, “pacapaylapa imatapis rurajcuna” nir waquincuna noganchipita nipäcun. Paycunata casucojcunaga mananami shumaj ricämanchinachu, yachachishganchita wasguirmi galaycärin.

8. Hechos 17:11 wilacushganno, ¿imatataj rurashwan rasunpa caj cristianucuna pïcuna cashganta musyanapaj?

⁸ ¿Imaraj yanapämäshun guepaman mana cutinapaj? Lapantaraj shumaj ricapacaramur-raj yachacushwan. Chaytami rurargan Jesusta gatej Lucaspis; Jesuspita wilacushganchoga “shumaq tapupakuykur lapanta” guelgargan. Chayno rurarga pipis yaracunmanchi cargan escribishganman (Luc. 1:1-4). Berea marcacho tiyaj judiucunapis chaynolami rurapäcurgan. Jesuspita yachacärinanpäga Tayta Dios escribichimushganwanraj tincuchergan rasunpa cashganta musyapäcunanpaj (leiriy Hechos 17:11). Chaynolami gampis lapantaraj tantiapaycur ricanquiman Jehovapa testiguncuna Biblia nishgannola yachachicushganta o mana. Jinamanpis ali canga canan wichan Jehovapa testiguncuna imano camacashga caycashganta yachacuptiquega. Chayno shumaj tapupacuycur tapupacuycur lapanta musyarirga, lutanta parlajcunata mana casupaycäshunchu.

9. ‘Señaltaraj ricächimay’ nir runacuna mañacamushganta Jesús mana ruraptenga, ¿imataj pasargan?

⁹ Runacunaga Jesús ali yachachicunanlatachu munargan; chauras ¿imatarätaj munapäcurgan?, señaltaraj, milagrucunataraj ricayta munapäcurgan creipäcunanpaj (Mat. 16:1). Daniel 7:13, 14 textuman yarpar imarchi milagrucunata rurananpaj mañacärirgan. Taytanchi Jehovaga musyargannami chay profecía manaraj cumplicänanpaj. Jesús yachachicushganta casucärirga alichi canman cargan, musyapäcunman cargan Diosninchi payta mandamushganta. Paycuna mañacaramushganta Jesús mana ruraptenga wasguipar galaycärirgan (Mat. 16:4).

10. ¿Imanotaj Jesús cawargan Isaías puntalapitana wilacushganno?

¹⁰ ¿Imatataj Biblia wilacun? Jesuspaj parlarmi Isaías cayno wilacurgan: “Payqa manami pitapis olqüpanqatsu ni qayapanqatsu. Cällikunachöpis manami olquraykar purinqatsu” (Is. 42:1, 2). Jesús imatapis ruraptenga manami pipis alabananta shuyararganchu. Jatun templucunatapis sharcachir cacurganchu, imatapis jaticunanpäpis chaniyojtarächu manami ashirgan y pipis saludananpäpis nawpanman umpupaylapa shamunanpaj manami nirganchu. Juzgaycashgan junajpis Herodespa nawpancho milagruta rurarinman cargan pero chaytapis manami rurarganchu (Luc. 23:8-11). Imapitapis masga Jesusga Taytanpita yachachicuytami munargan, öra öralami milagrucunataga rurarirgan. Yachachicushganpaj parlarmi cayno nergan: “Chaypämi shamushcä” (Mar. 1:38).

11. ¿Imatataj noganchicunapita runacuna yarpapäcun?

¹¹ ¿Chaynolachu canan wichanpis? Awmi. Achca runacuna almiracärin jatun iglesiacuna imaycancunayoj captin, pushacoj religiosucunapis carguncunapita alitucärin, imayca fiestacunatapis rurapäcun. Rurashgancunaga manami Biblia nishgannochu caycan, chaymi paycunaman aywaj runacunaga imalatapis yachacärinchu Bibliapita; noganchicunawan juntacojcuna ichanga Jehovapita y Palabranpita shumaj yachacärin. Maycho  juntacashganchega manami imaycacunayojrächu caycan, masga calpachacunchi limpiula cananpaj y cushi cushila chaycho Diosta aduranapaj. Carguyoj hermanunchicunaga alitucushpan manami alajashgarächu purin. Imata yachachicurpis imano Diosta sirvinapäpis Biblialapitami caycan. Chayno captinpis runacunaga manami ganas ganasla chasquimanchichu, imano yachachicushganchita y imano cashganchita ricarmi noganchicunawan juntacayta mana munapäcunnachu.

12. Ali yaracoj runa canapäga, ¿imatataj rurashun Hebreos 11:1, 6 texto nishganno?

¹² ¿Imaraj yanapämäshun guepaman mana cutinapaj? Roma cristianucunata cartacurmi Pablo cayta nergan: “Chaymi willacuyta wiyar-raj pipis yäracun. Chay willacuyga caycan Jesucristo willacushancunami” (Rom. 10:17). Diospa Palabranlami yanapämäshun ali yaracoj runa canapaj, chayno cashpanga marcacunapa costumbrincunaman aywashunchu waquincuna ‘acu, acu’ niycämaptinchipis. Yaracuyninchega manami raquicanmanchu rasunpa caj yachachicuycunapita, chaymi Bibliapis cayno nin: “Mana yäracorga manami imaypis Tayta Dios munashannöchu cawashun” (leiriy Hebreos 11:1, 6). Chauras yaracushganchita musyachicunapäga, manachi Diosta señaltaraj mañacuycäshunchu. Bibliapita shumaj yachacuptinchega yaracuyninchega ali jawish tushano caycanga y manana panta panta puriycäshunchu.

13. ¿Imanirtaj runacunaga Jesuspita witicärirgan?

¹³ Bautizacoj Juanpa discipuluncunaga tapuparganshi Jesuspa gatejnincunata ‘¿imanirtaj gamcunaga ayunapäcunquichu?’ nir. Quiquin Jesusmi mandacurgan mana ayunananpaj (Mat. 9:14-17). Chayno Jesús nishganpita y waquin costumbricunata mana rurashganpitapis fariseucunaga y waquincunapis alapami piñacärirgan. ¿Manachu piñacärirgan sábado junaj juc runata jampishganta ricar?, awmi (Mar. 3:1-6; Juan 9:16). Tagay runacunaga ishcay cara carmi ratulapaj Diospa Leyninman yarpachacoj, nircurga  quiquincuna templo rurincho negocio ruracänanta camacächej. Chayta ricarga Jesusga manami upälacurganchu (Mat. 21:12, 13, 15). Juc cutichomi Nazaret marcapa sinagogancho Jesús yachachicuycargan y parlamurgan chaycho runacunapa mana casucoj unay castancunapita, chayta wiyaycurshi pasaypa rabiacärirgan (Luc. 4:16, 25-30). Runacuna munashganta Jesús mana ruraptinmi, paycunaga wacpa caypa aywacärirgan (Mat. 11:16-19).

14. ¿Imanirtaj Jesusga ichiclapis chasquicurganchu runacunapa costumbrincunata?

¹⁴ ¿Imatataj Biblia wilacun? Isaías profetawanmi Jehová cayta wilacurgan: “Cay runacunaga shimillanwanmi sirbiman. Janan shongullami alabaman. Shongunchöga juctami yarparcaycan. Nogata aduraycämashanga caycan runacuna yarpaynillanpita nishancunallami” (Is. 29:13). Runacunapa mana ali costumbrincunapita Jesús parlarga Taytan Jehovatami casucuycargan. Imano captinpis runacunaga quiquin Jehovata y churin Jesustami chasquicärirganchu, paycunaga costumbrincunalatami ruracärej. ¡Chucru shongu runacuna!

15. ¿Imanirtaj runacunaga noganchicunawan alapa piñacärin?

¹⁵ ¿Chaynolachu canan wichanpis? Awmi, canan wichanpis maychicaj runacuna piñacärin Navidad y cumpleaños nishganta mana ruraptinchi. Mana chaylachu, achca costumbrincunapis caycanmi naciunnincunaraycur, pipis wanushganraycur, lapanpis manami Biblia nishgannochu caycan. Ichanga cay runacuna nipäcunman ‘Diosga ali nawilanwanmi ricaycan rurashgäta’, pero Taytanchi Jehovaga manami chasquingachu munashgalanta rurapäcuptenga, Jehovaga chasquinga Palabranta casucojcunalatami (Mar. 7:7-9).

16. ¿Imatataj rurashwan y imatataj mana rurashwanchu? (Salmo 119:97, 113, 163-165)

¹⁶ ¿Imaraj yanapämäshun guepaman mana cutinapaj? Jehovalatami casucushwan y Palabran Bibliatami cuyashwan (leiriy Salmo 119:97, 113, 163-165). Chayno captenga imayca rurashganchiwanmi Diosta cushichiycäshun. Manachi imaypis mana ali costumbricunataga ruraycashwanchu, Jehovata cuyarga pay nimashganchilata ruraycäshun.

17. ¿Jesús imata rurananpätaj achca runacuna shuyarcaycargan?

¹⁷ Jesús shamushgan wichanga runacunaga jucla juc gobierno yaycamunanta munarcaycargan, quiquin Jesús Roma gobiernupita libranantapis munarcaycarganmi; chaychi Jesús rey cananpaj munapäcurgan, Jesusga jinan hora ‘mana’ nergan (Juan 6:14, 15).Waquincunapis nergan ‘ichanga Jesusga Roma gobiernuwan peliachimäshun, cargunchitapis ograycushun imachi’ nir. Cay lapanman yarparchi achca judiucunaga Jesuspita witicärirgan.

18. ¿Ima profeciacunatataj casupajchu judiucuna?

¹⁸ ¿Imatataj Biblia wilacun? Diospa Palabranga mayna wilacurgan guerracho Jesús ganananpaj, pero chaypäga juchanchiraycur wanunanrämi cargan (Is. 53:9, 12). ¿Imanirtaj waquincunaga chay profeciacunata shumaj tantiarganchu? Paycunash mana casupajchu problemacuna alchacananpaj mana parlaj profeciacunata (Juan 6:26, 27).

19. ¿Imanirtaj canan wichan achca runacuna noganchicunapita witicärin?

¹⁹ ¿Chaynolachu canan wichanpis? Awmi, runacunapa gobiernunta mana yanaparga achcajcunami noganchipita witicärin. Juc gobiernupa jitananchita munapäcun.  Chayta rurarga Jehová mañamashganchitami wasguipaycashwan (1 Sam. 8:4-7). Jina cay mundo runacunapis nipäcamashwanmi lapan wacchacunata yanapänapaj, hospitalcunata y escuelacunata sharcachinapäpis. Chaycunata mana ruraptinchega Diospita yachachicushganchita chasquicuyta munapäcunnachu, cay munduta jucnopa yanapänanchita shuyarpaycan.

20. ¿Imata rurananchipätaj niycan Mateo 7:21-23 texto?

²⁰ ¿Imaraj yanapämäshun guepaman mana cutinapaj? (Leiriy Mateo 7:21-23). Ama gongashunchu Jesusga ali wilacuyta apanapämi mandamashcanchi (Mat. 28:19, 20). Cay munduchoga runacunapa gobiernunlapita runacuna parlan, pajta pantarachishunquiman. Jehovapa testiguncunaga yarpachacunchimi runacuna imaycacunapa pasaycashgancunapaj, chaymi Diospa Gobiernunlapita paycunata parlapanchi, imano nacaycashgancunata Taytalanchi Jehová ushacächinanpaj.

21. ¿Imatataj lapanchi rurashwan?

²¹ Caycamaga yachacushcanchi imanirtaj unay wichan Jesusta wasguipäcurgan y canan wichanpis imanirtaj runacuna noganchipita witicärin. Gatejnin yachachicuychopis imanir más cashganta chusco masta yachacurishun. Chauras lapanchicunami calpachacunanchi yaracuyninchi ali cananpaj, chayno guepaman imapis mana cutichimänanchipaj.