Chaycunapa pasashgämi yanapämargan Camacoj Diosta ashir galaycunäpaj. Chay chacay ima pasashganpita nircur wilacaramushaj. Cananga wamralaraj cashgäpita Diosta imano ashinäpaj cajpita wilacaramushaj.

1937 watami Francia naciunpa norte caj laduncho Guesnain marcacho yurirgä. Taytämi carboncunata jorgunapaj minacho aroj, paynola nogapis ali aroj canäpaj yachachimaj. Ali cajlata imaypis ruranapäpis yachachimajmi. Taytäga reuniuncunata rurar y huelgacunata rurarpis minacho aroj masincunatami yanapacoj. Y piñacojmi sacerdoticuna rurashganta ricar, paycunaga guellayta mañacärej y micuynintapis quitapajmi minerucunata. Chayraycurmi taytäga tincuylatapis munarganchu paycunawan, maygan religiunpitapis ni Diospitapis parlapämargannachu.

Winaycashgämänomi nogapis masraj mana alicunata chiquirgä. ‘¿Imanir-raj caychoga juc naciunpita shamojcunata chiquipäcun?’ nirmi tapucoj cä. Juc naciunpita cacuptinpis noga  ichanga waquin wamracunawan pelotata jaytar puclapacärej cä. Mamänëga cargan Polonia naciunpitami. Ima casta carpis munargämi lapancunawan ali goyäcuyta.

1957 watachomi soldadunö tropacunacho caycänäpaj gayachimargan, chaymi Argelia marcapa jircancunacho caycargä. “¡Dioslä, yanapaycalämay!” nir ruwacushgälachomi yurircamurgan juc chucaro burro, cushicurgä juc soldado mana cashganpita. Cay lapan pasashgäcunami caycunaman yarpachacächimargan: ¿pïraycurtaj cawaycanchi?, ¿cuyamanchichuraj Dios o manachuraj?, ¿jauca jaucala imaylapis cawashunchuraj?

Tiempuwanga wasëmanmi cutircurgä y chaycho reguinacurgä juc Jehovapa testigunwan. Payga macyaycamargan francés rimaycho juc Bibliata. Argelia marcapa cutiycur-rämi leiyta galaycurgä. Chaycho taririrgä Apocalipsis 21:3, 4 textuta: “¡Kananqa runakunawan juntumi Tayta Dios tanqa! [...] Paykunata shoqashpanmi weqinkunatapis pitsapanqa. Wanuypis, waqaypis, lakikuypis y nakaykunapis manami kanqanatsu”. * Cayno wilacuytaga chaylarämi leiycargä, chaymi tapucurgä rasunpa cashganta o mana. Chay wichanpäga Diospita y Bibliapita ichiclatapis musyargärächu.

1959 watachomi soldaduno cashgäpita witicurgä y chay wichanlacho François jutiyoj hermanuta reguirirgä, paymi Bibliapa rasunpa caj yachachicuyninpita parlapämargan, chayraj musyargä Diospa jutin Jehová cashganta (Sal. 83:18). Yachacurgäpis lapan mana alicunata imano Tayta Jehová ushacächinanpaj, imano cay Pacha Paraisuman ticrananpaj y imano Apocalipsis 21:3, 4 texto cumplicänanpäpis.

Lapan yachacushgäcunaga shongücamami chayaycurgan. Sacerdoticunawanga piñashgalami caycargä, mana rasunpa cajta Bibliapita yachachicushganpitaga denunciaytaraj munargä. Taytäno imachi yarpachacuycargä, chaychi imatapis jucla jucnopa rurariyta munaycargä.

François wawguilä y waquin Testigucunapis yanapämarganmi piñashgala mana caycänäpaj ni pitapis mana juzganäpaj; cristianuno cawacurga shongunchipis yarpayninchipis caycanman Diospa Gobiernunpita waquincunata wilanapämi. Jesusmi chayta rurargan y mandamashcanchi chayta ruranapaj (Mat. 24:14; Luc. 4:43). Jina yachacurgä waquincunata respetuwan y mana piñacuylapa parlapänäpaj. Bibliapis nin: “Tayta Dios munashanta rurananpaj acrashan runaga piwanpis mana rimanacoj canman” (2 Tim. 2:24).

Dios munashganno cawarnami bautizacurgä juc asambleacho, chayga cargan 1959 watacho. Chay asambleachomi reguinacurgä Angèle jutiyoj jipashwan, payga cuyaylapaj warmi cargan. Congregaciunninmanpis aywajmi cä watucänäpaj, y casacärirgä 1960 watacho. Canancamapis payga ali warmilämi, Jehová goycalämashgan warmi (Prov. 19:14).

Diosta cuyaj achca hermanucunapitami alicunata yachacushcä. Dios munashganta ruranapäga ñanpu shongumi cananchi y Proverbios 15:22 Biblia cayno nishgantami casucunanchi: “Achcaj tantiyachejcuna captinmi ichanga yarpashancunapis alli llojshin”.

Chayno Biblia nishganga 1964 watapita masraj yanapämargan. Chay watachomi congregaciuncunata watucar galaycurgä. Jucnin jucnin congregaciuncunaman aywarga shacyächinanchimi hermanunchicunata pero nogaga 27 watayojlarämi caycargä, imalachopis yapay yapaymi pantarej cä. Chaymi ali cargan waquin tantiaj hermanucunapa consejuncunata chasquicurga, yanapämarganmi.

Yarpämi París marcacho watucaycaptë ima pasashganta, chaychomi juc wawgui nimargan ratula ishcänë parlapacurinapaj. Chaynami noga nergä “alimi canga”.

Chay wawgui nimargan: “Louis, maygan wasimanpis ¿imapätaj juc doctor aywanman?

Nogana nergä: “Gueshyaycajcunata watucar ari”.

“Alimi” nimargan. Nircurpis cayno nergan: “Ricaycashcä, gamga espiritual cajcho ali caycaj hermanucunalawanmi juntacanqui. Congregaciunninchichoga waquincuna chaylaraj bautizacärish, waquincunapis laquezawan carcaycan. Paycunatapis watucar imalatapis micupacurirga cushicarcäringami”.

Chayno nimashganga ¡alapa alimi cargan! Payga Jehovapa uyshancunatami cuyaj. Imatapis mana niylapa jinan hora nimashganta rurargä. Jehovatami agradecicö chayno hermanucuna cashganpita.

1969 y 1973 watacunachomi ishcay jatun asambleacuna ruracargan Colombes (París) marcacho, chaychomi nipäcamargan Departamento de Alimentos nishgancho yanapacunäpaj. 1973 caj asambleachomi pichga junajcunapaj, 60.000 runacunapano micuynincuna ruracargan. ‘Lapanpaj ruracangachuraj o manachuraj’ nirpis yarpachacurgäraj. Chaycho yapay yarpachacurgä Proverbios 15:22 textuman y ashirgä waquincuna yanapämänanpaj. Micuy imano ruracänanpäga musyapäcurganmi,  paycuna cargan aychawan arojcuna, chacracho arojcuna, yanucuyta yachajcuna y rantipacuyta yachajcunapis. Lapancunawan maqui maqui arurmi lapanpis shumaj yargurgan.

Jina1973 wata invitapäcamargan Francia Betelcho sirvipäcunäpaj. Yanapacurgä Camerún marcacho hermanunchicunaman publicaciuncunata apachicur, chaycho autoridäcunaga 1970 watapita 1993 watacama michäcärirgan hermanunchicuna Diosta jaucala aduracunanta. Caycuna sasa captinmi laquishgano ricacurgä, chayno ricämarmi juc carguyoj hermano cayno nimargan: “Camerún marcacho hermanunchicunaga mayraj ruwacuycan imalapis maquinman chayananpaj, espiritual micuyninta goycushun”. Y chaytami rurashcanchi.

Achca cutipami Camerún marcapa laduncho caycaj marcacunapa viajargä, chaycho ancianucunawan juntacänäpaj. Cay ali tantiaj ancianucunaga shumajmi yanapacurgan publicaciunninchi imano Camerún marcaman chayananpaj. Jehovaga calpantami goycalämashcanchi imapis mana michämänanchipaj. 20 watacunapanomi Cameruncho hermanunchicunaga Wilacamoj y Nuestro Servicio del Reino nishgan publicaciuncunata lapanta chasquipäcurgan.

Angèle warmiläwan reguinacushgä wichanpitami ricargä imano Diosta cuyashganta, ishcäcuna cawayta galaycurna masraj ricargä. Yarpämi casaracushgä junaj Diosta ruwacuycunäpaj nimashganta, imano Paylata lapan tiempunchiwan sirvipäcunäpaj. Jehovaga wiyaycalämashcanchimi.

Warmiläga shumajmi yanapämashga Jehovaman masraj yaracunäpaj. Yarpämi 1973 watacho Betelman aywanapaj invitación chayaramuptenga mana munaycajno caycargä, nogaga congregaciuncunata watucarmi cacuyta munargä.  Chaycho warmë Angèle yarpächimargan maychopis Jehovata sirvinapaj awnicushganchita y maycho arunapaj nimashganchita casucunapaj (Heb. 13:17). Imataraj nïman, warmiläga rasuntami niycargan. Betelpaga juclami aywacurganchi. Cutin cutinmi ricashcä imapäpis warmilä ali tantiaj cashganta, chayno cashganmi yanapäcamashcanchi ali cajta rurar más cushi cushila cawananchipaj.

Ishcäcuna edayashgana canan caycarpis, Angèle warmëga unaynolami ali shongulanwan yanapaycäman. Canan wichanga Diospita yachacunapaj achca escuelacuna inglés rimaycho camacan. Chaymi ishcäcuna calpachacärirgä inglés rimaynëcunacho, chaynopa chay escuelacunaman aywanapaj. Inglés idiomata parlaj congregaciunmanpis aywapäcurgämi, chay wichanpaj edanëcunaga 75 watapanano aywaycargan. Francia naciuncho Comité de Sucursal nishganchomi yanapacö, chaymi ichic sasano cargan juc idiomata yachacunäpaj. Pero yanapanacärirgämi warmiläwan. Cananga 80 watapanona ishcäcuna aywaycä, chayno captinpis inglés y francés idiomacunachomi reuniunnëcunapaj preparacärë. Reuniuncuna ruracänanpaj y Diospita yachachicärinäpäga jinalami yanapacuycanchi. Jehovaga bendiciunnintami churaycushga inglés idiomata yachacunapaj calpachacushgäcunacho.

2017 watacho ima pasashganta mana gongaycöchu. Sucursalcunata ricajcunapa y warmincunapa escuelanman aywanapämi invitapäcamargan, cayga ruracan Patterson (Nueva York) marcachomi.

Awmi, Jehovalami Yachachicojninchi caycan (Is. 30:20). Chaymi lapanchicuna Paypita may chaycho shumaj yachacuycanchi (Deut. 4:5-8). Taytalanchi Jehovapita y pogushga hermanunchicunapita ali consejucunata chasquicojcunaga alimi cawacärin y Diostapis mana cachaypami sirvipäcun. Chaypaj parlarmi Proverbios 9:9 cayno nin: “Yachaj runaga yachachiptiqui masmi yachaj ricaconga. Alli runacunata yachachiptiqui masmi yachacongapaj”.

Öra öraga umäman chayamun 1957 watacho Argelia marcapa jircancunacho ima pasashgancuna. Chay horaga yarpaylapis yarpargächu cayno ali cawayta tarinäpaj cajta. ‘¡Graciaslä!’ nëmi waquincunata. Piraj gomashwan cayno ali cawacuyta, Jehovalami goycalämanchi. Cananpis munarcaycämi Taytalanchi Jehovapita y cuyacoj hermanunchicunapitapis masraj yachacuyta.