1, 2. ¿Öraga ima nacaycunapataj pasashwan?

APÓSTOL Pabluga Timoteuta y waquin cristianucunatapis nergan, mana uticaypa Diospita yachachicur carcaycänanpaj (2 Tim. 4:5). Noganchipis calpachacunchimi chayta ruranapaj, pero öraga sasami ticracurinman. Achca cristianucunaga valurchacärinrämi Diospita yachachicoj yargunanpaj (2 Tim. 4:2). Waquin naciuncunachoga autoridäcuna piñacärin y michäcärinmi hermanunchicuna Diospita yachachicäriptin, carcelmanpis apapäcunmanmi Diosta sirvipäcushganraycur.

² May chaycho caycaj Jehovapa testiguncunaga imayca nacaycunapa pasapäcun, ichanga caycunaraycurga shonguncunapis laquicunmanmi. Achca hermanunchicuna walcalata tarirpis goyay goyay familianraycur arupäcun, semana ushaypäga calpanpis ichanga mana cannachu yachachicoj yargunanpaj. Waquincunana gueshyaycashganraycur, camacho jitarashganraycur, edayashgana cashganraycur walca horacunala Diospita yachachicärin; waquinpis yarpachacärin ‘rurashgäcunataga piraj ali caycan ninman’ nir. Juc naciunpita Mary * jutiyoj pani cayno nin: “Waran waran yarpachacö ‘pipis cuyamanchuraj o manachuraj, rurashgäcuna alichuraj o manachuraj’ nir. Caycunaman yarpachacushgämi alapa uticächiman, yachachicoj yargunäpäpis calpä cannachu”.

3. ¿Imacunapitataj canan yachacurishun?

³ Canan hora imacunapa pasarpis, imacunawan nacaycarpis, Jehovata sirvinapäga calpachacuycäshunmi, payga yanapaycamäshunmi imaycatapis aguantanapaj. Yachacurcushun Pabluta y Timoteuta Jehová imano yanapashganta, nircurpis noganchita imano yanapämashganchita yachacurishun.

4. ¿Imacunapataj Pablo pasargan?

⁴ Pabluga imaycacunapami pasargan. Paytaga magapäcurgan, sagmapäcurgan y carcelmanpis apapäcurgan, chay horaga pipis yanapänantachi munargan (2 Cor. 11:23-25). Quiquinpis wilacurganmi shongulancho imacunawan luchaycashganta (Rom. 7:18, 19, 24). Nircurpis nacaycashgan hora Jehovata ruwacurgan cuerpuncho casha caycajtano jorgurinanpaj (2 Cor. 12:7, 8).

5. Nacaycunapa pasashga carpis, ¿imacunatataj Pablo rurargan?

⁵ Pabluga Jehovapa calpanwanmi may chaycho yachachicurgan imayca nacaycunapa pasarpis. Ima rurashgancunata juc ishcaylata ricarishun. Romacho wasinlacho presuraycaptinpis Diospa ali wilacuyninpita mana manchacuypa parlargan; chaychoga caycarganchi audoridäcuna y pushacoj judiucunapis (Hech. 28:17; Filip. 4:21, 22). Guardiacunatapis y watucaj shamojcunatapis predicapajmi Pabluga (Hech. 28:30, 31; Filip. 1:13). Pablupis chay wichancunacho waquin cartacunata escribirgan, mayraj chay cartacuna chay wichan cristianucunata yanapargan, canan wichanpis yanapämanchimi. Pablo imayca rurashganta ricarchi, Roma cristianucunaga “mana mantsakuypa” Diospa ali wilacuyninta musyachicärirgan (Filip. 1:14). Mana alicunapa pasarga mastarächi Pablo ruranman cargan, chayno captinpis payga nergan nacashganraycur más runacunaraj Diospa ali wilacuyninta chasquicushganta (Filip. 1:12).

6. 2 Corintios 12:9, 10 texto nishganno, ¿imataj Pabluta yanapargan Diospa ali wilacuyninpita yachachicunanpaj?

⁶ Pabluga musyarganmi imayca ruracänanpäga Diospa calpanwanraj ruracänanpaj cajta, chaymi nergan Diospa poderninga ricacan “nakar kalpaynaq” caycashganchi hora (leiriy 2 Corintios 12:9, 10). Chauras carcelarashga captinpis, chiquicoj runacuna rurincho cawarpis, imaycacunawan nacarpis Pablutaga Diospa santo espiritunmi yanapargan ali wilacuyta may chaypa apaycänanpaj.

7. ¿Ima nacaycunapataj Timoteo pasargan?

⁷ Timoteupis mana uticaypa ali wilacuypita yachachicunanpäga Diospa calpanwanrämi rurargan. Pabluwan yanaganacurmi caru marcacunapa yachachicoj aywaj, öraga japalanna aywaj waquin congregaciuncunata  watucananpaj (1 Cor. 4:17). Ichanga Timoteuga yarpachacurgan jatun cargucunata chasquishganpita, chaychi Pablo cayno nergan: “Manaräpis mayur runa caycar ¿imanöpataj Timoteo yachachimäshun? nir runacuna niptinpis ama cäsupaychu” (1 Tim. 4:12). Chay wichanpaj parlarmi Biblia wilacun pacha nanaywan Timoteo jinala gueshyaycashganta (1 Tim. 5:23). Imano captinpis Timoteo musyarganmi Diospa santo espiritunwan ali wilacuypita yachachicuycarla caycänanpaj y hermanuncunatapis yanapaycänanpaj (2 Tim. 1:7).

8. ¿Imata ruraptinchitaj Jehová calpanta goycalämäshun?

⁸ Canan wichanpis “Tayta Diospa poderninwanmi” imapis ruracänanpaj camacanga (2 Cor. 4:7). Ricarishun canan imanotaj Jehová calpanta goycalämanchi mañacuptinchi, Bibliata leiptinchi, cristiano masinchicunawan caycaptinchi y ali wilacuypita yachachicuptinchi.

9. ¿Imanotaj yanapacun mana gongaypa Diosta mañacuptinchi?

⁹ Mañacushun. Efesios 6:18 textucho Pablo nergan: “Mana gongaypa mañacuy”. Chayta rurashpanchega Bolivia naciuncho cawaj Jonnie cristianutanomi Jehovaga calpanta goycalämäshun, payga imayca laquesacunapämi pasargan. Taytancunatapis warmintapis gueshya charicuycurgan. Sasashi cargan quimsanta täpananpäga. Tiempuwan mamänin wanucurgan. Taytanwan warmin gueshyapita cachacänanpäga achca tiempuräshi pasargan. Jonnie wawgui cayno wilacun: “Yarpachacuycashgä hora ima laquichimashganta Jehovata shumaj parlapashgämi nogataga yanapämashga”. Jehovapa calpanwanmi lapanta aguantargan. Chay naciunlapita ancianuno yanapacoj Ronald wawguinchipa mamänin cáncer gueshyawan wanucurgan, cayno nin: “Mañacuriptëga Jehovata shongüta mashtapä, paylami musyan shongulä imano caycashganta”. Öraga laquicuycarla cashganchi hora Jehovata ruwacuriptinchi ima niylatapis camäpacushwanchu, chayno captinpis ama gongashunchu Jehovaga munanmi juc ishcay palabralatapis wilapänanchita (Rom. 8:26, 27).

10. ¿Imanirtaj yapay yapayraj yarpachacurcur Bibliataga leishwan Hebreos 4:12 wilacushganno?

¹⁰ Bibliata leishun. Pablunopis Bibliata leirga calpata tarishun y shacya shacyala cawashun (Rom. 15:4). Jehovaga tantiarcachimashwanmi Bibliata leiptinchega, chayga yanapämashwanmi cawayninchicho ali cajcunalata ruranapaj (leiriy Hebreos 4:12). Naga parlashganchi Ronald wawgui cayno nin: “Manaraj punur Bibliäta leinäpaj yachacashcä, chaypitaga cushicömi. Cutin cutinmi yarpachacö Jehová imano cashganman y siervuncunawan imano cuyacoj cashganmanpis, cayta ruraptëmi calpata yapay tariycö”.

11. ¿Imanotaj Diospa Palabran juc viuda cristianata yanapargan?

¹¹ Bibliata leishganchimi yanapämäshun imacunapa pasashganchita shumaj tantiarcunapaj. Juc viuda cristianapa parlarcushun. Paytaga juc anciano nergan Job libruta leinanpaj, leiptinnash Job imano yarpashganpita piñacurgan, “mana alicunata yarpachacuycanqui Job” nirganshi. Nircurna cuentata gocurgan paypis Job yarpachacuycashgannola yarpachacushganta. Leishganga quiquilanman mana yarparäcunanpaj yanapargan y Jehová awnicushgancunaman yarpar calpatapis tarirgan.

12. ¿Imanotaj hermanunchicunawan calpalanta Jehovaga goycalämanchi?

 ¹² Hermanunchicunalawan cacushun. Jehovaga calpalantami gomanchi hermanunchicunawan juntacarga. Juc cartanchomi Pablo nergan hermanucunawan ricanacuyta y shacyächinacuyta munashganta (Rom. 1:11, 12). Galanancho parlashganchi Mary paninchiga pasaypash cushicun cristiano masincunawan juntacarga. “Hermanucunaga alapami yanapämashga laquicuynëcunacho, lapanpa guepanchoga Jehovami caycashga. Cuyapaylapa parlapäcamashganga shacyächimarganmi; waquincunapis cuyaylapa palabracunata guelgapämargan. Cuyacoj nanacunawan parlashgäpis yanapämarganmi, paycunapis noga pasashgäpa pasapäcurgan. Ancianucunapis ricächimargan congregaciunchoga lapanpis cuyapäcamashganta”.

13. ¿Imanotaj reuniunchoga jucninchi jucninchi shacyächinacushwan?

¹³ Reuniuncho caycarga jucninchi jucninchimi shacyächinacunchi. Chaychoga shacyächinacur ‘cuyashga wawguilä panilä, graciaslä lapanpita’ nishwanmi. Juc cutichomi Peter jutiyoj anciano juc panita cayno nergan (paypa runanga manash Testiguchu): “Imanomi cushicurcunchi wamrayquicunawan lapayquita caycho ricarga, comentariuyquicunapis shacyächicunmi”. Chayta wiyarga paninchega wagarirganräshi y cayno nergan: “Nimashgayquiwanga shongulä cushicurcunna”.

14. ¿Imanotaj yanapämanchi Diospita yachachicuycarla caycaptinchi?

¹⁴ Diospita yachachicuycäshun. Runacuna chasquicuptinpis o mana chasquicuptinpis ali wilacuypita yachachicurga shacyächicunmi (Prov. 11:25). Chaypita Stacy pani wilacaramun: congregaciunpita juc familian gargushga captenga, payga pasaypashi laquicurgan y chaylaman yarparäcurshi caycargan. Ima yanapänanpäga Diospita yachachicurshi galaycurgan, watucashgan runacunamanna más yarpachacurgan. Paymi cayno nin: “Jehovaga alapami yanapämashga, chay wichancunalachomi juc estudiantita tarirergä, payga juclami Diosta cuyar galaycurgan y chayga cushichimarganmi. Predicaptërämi cushi cushila cawacö”.

15. ¿Mary nishganpita imata yachacunchi?

¹⁵ Ichanga Diospita yachachicunapaj sasa ticracurinman, pero Jehovaga cushicungami ganas ganasla walcalatapis rurarga. Naga parlashganchi Mary paninchish, juc idiomata parlaj congregaciunpana aywacur, mana alapa aruycashganno ricacurgan, paymi cayno nin: “Galananlachoga ichiclatami parlapacurej cä, pitapis juc tratadulatami macyarcoj cä”. Yarpachacojshi ‘mushoj rimayta shumaj mana parlarga ¿imata caycho ruraycä?’ nir. Nircur cuentata gocurgan quiquin Jehová pushaycashganta y imachopis yanapänanpaj cajta. Payga caytapis ninmi: “Bibliaga caycan pipis shumaj tantiarcunanpämi, y pipis ali cawacunanpäga Bibliapa rasunpa caj yachachicuyninpitami canga”.

16. ¿Imanotaj calpata taripäcunga wasinlacho wichgapacushga caycajcuna?

¹⁶ Wasinchilacho wichgapacushga caycarpis, Jehovaga musyanmi imanopäpis paypita yachachicuyta munashganchita. Gueshyaycashganchiraycur maylachopis caycarga, alimi canga chaycho arojcunata Bibliapita parlapaptinchi. Unayno canan wichan alapa mana yanapacushganchiman yarpachacurga laquicuymanpis chayashwanmi. Ali canga canan wichan Jehová imano yanapämashganchiman yarpachacurga, chayno captenga calpatami tarishun cushi cushila imaycatapis aguantanapaj.

17. Eclesiastés 11:6 texto wilacushganno, ¿imanirtaj mana uticaypa Diospita yachachicuycarla caycashwan?

 ¹⁷ Ali wilacuypita yachachicushganchega murupacushganchi japuymi, manami musyanchichu maycho jegamunanpaj cajta (leiriy Eclesiastés 11:6). 80 watayoj Barbara panipita parlarcushun, payga telefunulapa y cartalapash predican. Juc cutichoshi apachicurgan 2014 marzo quillapita Atalaya revistatapis, chaycho yurimoj cay yachachicuy “¿Qué ha hecho Dios por usted?” nej. Apachicushganga juc matrimoniupa maquinmanshi chayargan, paycunaga unaypis Jehovapa testigunshi capäcurgan. Cutin cutinshi chay revistata leipäcurgan. Runa cajga ‘quiquin Jehovami caycho parlapaycämanchi’ nirganräshi. Reuniunman aywarpis galaycärirgan. 27 wata pasarcuptin yapay Jehovapa testigunman ticrapäcurgan. Chayta musyarerga imano cushishgaraj panilanchi Barbara caycargan. ¡Lapanpis cartacushganlapita!

18. ¿Imatataj rurashwan Jehová calpalanta goycalämänanchipaj?

¹⁸ Ricashganchinopis imaycacunata rurarmi Jehovaga calpalanta goycalämanchi. Chauras mana gongaypa payta mañacuycäshun, Bibliata leiycäshun, hermanunchicunawan caycäshun y ali wilacuypita yachachicuycäshun. Chaycunata rurashpanchega Taytalanchitami niycäshun ‘gamlami calpata gomar shacyächimanqui’ nir. Rasunmi cayno Palabran niptenga: “Runakunatami rikaykan lapan shonqunwan payman yärakuqkunata yanapananpaq” (2 Crón. 16:9).