1, 2. ¿Imanirtaj Apocalipsis librupita yachacushwan?

 ¿IMAYLAPIS ricashcanquichu juc runapa fotuncunata? Chayno captenga ricashcanquichi mana reguishgayqui runacuna chaycho caycashganta. Ichanga jucnin caj fotutaga shumaj ricapanquish. ¿Imanir? Chaycho gam yuriptiqui. Chaura shumaj ricapaycur gamshi yarpachacunqui imay y maycho chay foto tomaycashganta. Jina chay fotucho pïcuna caycashgantash yarpayta munanqui. Chay fotuga alapash cushichishunqui.

² Apocalipsis librupis chay foto japuymi caycan. ¿Imanir? Ishcaylata ricärishun. Juc caj, chaycho escribiraycajcunaga noganchipämi caycan. Chaymi galaycunancho nin: “Kay libruchömi qelqaraykan Jesucristuta Tayta Dios revelashqan. [...] Tsayno revelarmi sirviqninkunata imapis pasananpaqna kaqkunata tantiyatsirqan” (Apoc. 1:1). Chauraga cay librucho escribiraycajcunaga noganchicunapämi caycan, Jehovapa sirvejnincunapaj. Imanomi juc fotucho yurinchi, chaynolami noganchipis jucninchi jucninchi yanapacuycanchi cay librucho caycaj profeciacuna cumplicänanpaj.

3, 4. Apocalipsis librucho escribiraycajcunaga, ¿imaytaj cumplicänanpaj caycan y imataj rurashwan yanapämänanchipaj?

³ Ishcay caj, Apocalipsis librucho escribiraycajcunaga ushanan junajcunacho cumplicänanpämi caycan. Chaymi cay libruta apóstol Juan escribiycaptin nergan espiritupa yanapacuyninwanmi Señorpa junajnin wichancho ricacushganta (Apoc. 1:10). Cay librutaga Juan escribergan 96 wata wichan. Y chaypäga Señorpa junajnin manami galaycurganrächu, achca watacunarämi pishiycargan (Mat. 25:14, 19; Luc.  19:12). Pero Bibliapa profeciancunaga tantiachimanchi Señorpa junajninga 1914 watacho galaycushga. Chayga cargan Jesús cielucho Reyman ticraptin y mandacur galaycuptin. Chay wichanpita pacha Apocalipsis wilacushgan profeciacuna cumplir galaycushga Jehovapa marcanpaj. Chaura noganchega cawaycanchi Señorpa junajnin wichancho.

⁴ Chaymi Apocalipsis 1:3 textucho caycaj consejutaga jucninchi jucninchimi cäsucunanchi, chaychoga nin: “Kushishqami kanqa kay qelqaraykaqkunata liyiqkuna y liyipashqanta mayar cäsukuqkunaqa. Kay qelqaraykaqkunaqa cumplikänanpaqnami kaykan”. Aumi, cay librucho guelgaraycajcunata leishwan, shumaj tantiarcushwan y cäsucushwanmi. Chauraga, ¿maygantaj cäsucunapaj caycan?

5. ¿Imataj Apocalipsis wilacun Jehovata imano aduranapaj cashganpita?

⁵ Apocalipsis librupa galanan caj capítulo wilacun Jesús altanto caycashganta congregaciuncuna imano caycashganta (Apoc. 1:12-16, 20; 2:1). Chaytaga tantiarcunchi Asia Menorpita ganchis congregaciuncunata wilacuycunata apachicamushganchomi. Chay wilacuycunachoga Jesús unay cristianucunata consejaycorgan imano Diosta adurananpaj, chaynopa Jehová aduraciunninta chasquinanpaj. Chay consejucunami canan wichan noganchitapis yanapämanchi. ¿Imataj caypita yachacunchi? Pushacojninchi Jesusga musyanmi imano Diospa ricaynincho caycanchi. Payga pushamanchi, chapämanchi y lapan rurayninchicunata ricaycan. Jina musyanmi imata ruranapaj Jehová ali nawilanwan ricamänanchipaj. Mä ricärishun ima consejucunata Jesús goycurgan unay cristianucunata y imanirtaj noganchipis cäsucunanchi.

6. 1) Apocalipsis 2:3, 4 wilacushganno, ¿imataj pasaycargan Éfeso cristianucunata? 2) ¿Imataj chaypita yachacunchi?

⁶ (Leiriy Apocalipsis 2:3, 4). Naupata Jehovata cuyashganchino jinala cuyaycäshun. Éfeso cristianucunaga tucuy pruebacunapa pasarpis aguantarcaycargan y Jehovata mana yamacaypa sirvircaycargan. Ichanga galanancho Jehovata cuyashganno manami cuyaycargannachu. Chaymi Jesusga nergan calpachacärinanpaj yapay unayno Jehovata cuyananpaj. Canan wichanpis manami mala gana imatapis aguantashwanchu, sinoga Jehovata cuyashpanchi chayta rurashwan. Jehovaga manami ricanchu rurayninchicunalata, sinoga imataj caycan shongunchicho. Payga shuyaran agradecido cashpanchi y shongupitami aduranapaj (Prov. 16:2; Mar. 12:29, 30).

7. 1) Apocalipsis 3:1-3 nishganno, ¿imataj pasaycargan Sardis cristianucunata? 2) ¿Imataj noganchi rurashwan?

⁷ (Leiriy Apocalipsis 3:1-3). Riccha ricchala y camaricushgala caycäshun. Sardis congregaciunpita hermanucunaga unaycho ganas ganaslawan Jehovata sirvishga carpis cananga manami shumaj calpachacuycargannachu, guelanäcuycarganmi. Chaymi Jesús consejaycorgan ricchacärinanpaj. ¿Imataj caypita yachacunchi? Musyanchimi Jehovaga mana gongaycunchu payraycur lapan rurashganchicunata (Heb. 6:10). Cayga manami ninanchu ‘unaycho cayta wacta rurargä Jehovata sirvinäpaj, cananga jamashänami’ ninapaj. Canan wichan unayno rurayta mana puedirpis jinala calpachacushun “mana yamacaypa” Jehovata sirvir caycänapaj. Jina riccha ricchala y camaricushgala caycashwan cay mundo ushanancama (1 Cor. 15:58; Mat. 24:13; Mar. 13:33).

8. ¿Imataj yachacunchi Laodicea cristianucunata Jesús nishganpita? (Apocalipsis 3:15-17).

 ⁸ (Leiriy Apocalipsis 3:15-17). Cushi cushila y shongupitami Jehovata adurashwan. Laodicea congregaciuncho caycaj cristianucunaga Jehovata sirvishgancho “gasajno ni acajno” caycargan. Chaymi Jesús paycunata nergan Diospa ricaynincho “cuyapaypaj waccha, pobri, gapra, garapächulla” caycashganta. Chauraga calpachacärinan cargan Jehovata cushi cushila sirvipäcunanpaj (Apoc. 3:19). ¿Imataj caypita yachacunchi? Unayno cushi cushila Jehovata manana sirvirga, shumaj yarpachacunanchi Jehová lapan goycalämashganchicunaman imaypis shongupita agradecido caycänapaj (Apoc. 3:18). Diosta sirvinapäga imaycacunataraj charanapaj yarpachacushwanchu. Chaypa trucanga Diospa voluntäninta ruranapaj imapitapis más puntaman churanapaj calpachacunanchi.

9. Pérgamo y Tiatira cristianucunata Jesús consejashganpitaga, ¿imataj yachacunchi?

⁹ Apostatacunapa yachachicuynincunata ama chasquishwanchu. Pérgamo congregaciuncho cristianucuna juc yarpayla mana caycashganta ricar, Jesusga waquincunata anyapargan lutancunata mana yachachicunanpaj (Apoc. 2:14-16). Tiatira congregaciuncho caycajcunata ichanga felicitaycurganmi luta yachachicuycunata mana chasquishganpita y rasunpa cajta cuyananpaj shacyächergan (Apoc. 2:24-26). Chauraga yäracuynin walcayashga cajcuna y luta yachachicuycunata chasquishganta cajcunaga arrepenticärinan cargan. Caypitaga yachacunchi, noganchipis chiquishwanmi Jehovapa contrancho caycaj yachachicuycunata. Apostatacunaga ‘runacuna ricanallanpämi Tayta Diosninchïman yäracoj-tucun’, ichanga imano cawashganga “Diosninchi munashannöchu” caycan (2 Tim. 3:5). Diospa Palabranta shumaj yachacuptinchega jucla cuentata gocushun maygan yachachicuycunataj luta cashganta chiquinapaj (2 Tim. 3:14-17; Jud. 3, 4).

10. ¿Ima mastataj yachacunchi Pérgamo y Tiatira cristianucunata Jesús anyapashganpita?

¹⁰ Ganra ruraycunata o fornicación juchata chiquishwan. Pérgamo y Tiatira congregaciuncunacho waquin cristianucunaga fornicación juchata rurarcaycargan, chaymi Jesús paycunata anyapargan (Apoc. 2:14, 20). ¿Imataj caypita yachacunchi? Pipis achca watapana Testigo caycar y congregaciuncho  tucuynopa yanapacuycarpis, fornicación juchata ruraycaptenga Jehovaga aduraciunninta manami chasquinchu y congregaciunpitapis gargushga canmanmi (1 Sam. 15:22; 1 Ped. 2:16). Cay munducho runacuna Diospa leynincunata mana cajman churaptinpis, Jehovaga shuyaran sirvejnincuna leynincunata cäsucärinanpaj (Efes. 6:11-13).

11. ¿Imatataj canancama yachacushcanchi? (“ Noganchicunapaj yachachicuycuna” recuadruta ricäriy).

¹¹ Canancama yachacushcanchi Jehová aduraciunninchita chasquimänanchipäga seguro caycashwan pay munashganno aduraycashganchita. Y imalachopis Diosta mana cäsucuycaptinchega jucla cambiucunata rurashwan y calpachacushun corregicunapaj (Apoc. 2:5, 16; 3:3, 16). Ricärishun ima mastataj Jesús waquin congregaciuncunata nergan y imataj chaycunapita yachacunchi.

12. ¿Imataj yachacunchi Esmirna y Filadelfia cristianucunata Jesús nishganpita? (Apocalipsis 2:10).

¹² Ricärishun imataj Jesús nergan Esmirna y Filadelfia congregaciuncho caycajcunata. Chay cristianucunata Jesusga nergan nacayta mana manchacunanpaj, y yäracuycarla caycashganpita Jehová bendicinanpaj cajta (leiriy Apocalipsis 2:10; 3:10). Caypitaga yachacunchi noganchipis Jehovata sirvishganchiraycur imaylapis gaticachashga o chiquishga cashunmi. Chauraga cananlapitana yarpachacushwan mana manchacunapaj y yäracuycarla caycänapaj (Mat. 24:9, 13; 2 Cor. 12:10). ¿Imanirtaj chayta gongashwanchu?

13, 14. Satanás cielupita gargamushga cashganpita, ¿imataj pasargan Diospa sirvejnincunata?

¹³ Apocalipsis libruga wilacun canan wichan Diospa sirvejnincunaga chiquishga cananpaj. 12 caj capituluchoga nin: “Janaj pachachöna guërra gallaycuran”, chayga cargan Diospa Gobiernun mandacur galaycuptin. Chaychoga Miguel, juc parlacuychoga Jesucristo rey captinna, angelnincunawan peliargan Satanaswan y demoniuncunawanpis (Apoc. 12:7, 8). Y Satanasta lapan gatirajnincunatawan cielupita gargamurgan cay Pachaman, chaypita pacha runacunata pasaypa nacaycächin (Apoc. 12:9, 12). Y ¿ima nishwantaj Diospa sirvejnincunapita?

¹⁴ Apocalipsis wilacun ima mastataj Satanás ruraycan. Cieluman cutinanpaj mana camäpacur pasaypa rabiashga caycan y cielupaj acrashga cajcunata alapami chiquin. Paycunaga cay Pachacho Diospa Gobiernunta yanapacurcaycan y “Jesucristo wilakushqanta chaskikur Tayta Diospa mandamientunkunata cumpliq runakunami” carcaycan (Apoc.  12:17; 2 Cor. 5:20; Efes. 6:19, 20). ¿Imanotaj cay profeciaga cumplicorgan?

15. ¿Pïcunataj caycan ‘ishcay wilacojcuna’ Apocalipsis 11 caj capítulo wilacushganno, y imataj paycunata pasargan?

¹⁵ Satanasga camacächergan Diospa chiquejnincuna predicaciunta pushaj cielupaj acrashga hermanucunata atacananpaj. Chay hermanucunaga achca carguyojmi cargan. Apocalipsis libruga paycunata tincuchin ‘ishcay wilacojcuna’ * wanuchishga cashganta (Apoc. 11:3, 7-11). 1918 watacho pusaj hermanucunata tumpar carcelcho wichgarachergan achca tiempo caycänanpaj. Chiquicojcunaga yarpapäcurganchi predicación mana cananpäna.

16. ¿Imataj pasargan 1919 watacho, y chaypita pacha imataj Satanás ruraycan?

¹⁶ Apocalipsis 11 caj capituluchoga nin chay ‘ishcay wilacojcuna’ yapay cawarimunanpaj ichic tiempo pasariptin. Cayga cumplicorgan carcelarashga pusaj hermanucuna carcelpita yargupäcamuptin 1919 wata marzo quillacho, paycunaga walca tiempulacho carcelarashga carcaycargan. Tiempuwanga contrancho lapan tumpashgancunata anulargan. Chay hermanucunaga carcelpita yargurlami Diospita yachachicur jucla galaycärergan. Pero Satanasga jinalami chiquir, “mayutanöraq yakuta” ajtumushganno imaycacunata rurar galaycorgan Diospa sirvejnincuna chiquishga o gaticachashga cananpaj (Apoc. 12:15). Chaymi calpachacunanchi imatapis aguantanapaj y Jehovaman yäracuycarla caycänapaj (Apoc. 13:10).

17. ¿Ima yanapacuytataj Jehovapa sirvejnincunaga chasquergan?

¹⁷ Apocalipsis 12 caj capitulucho wilacun Diospa sirvejnincuna yanapacuyta chasquinanpaj, Bibliaga nin “patsapa shimin kichakar tsay yakuta ultakurpurqan” (Apoc. 12:16). Y chaynomi cashga. Cay Pachacho waquin ali shonguyoj autoridäcunaga Diospa marcanta yanapargan chiquishga mana cananpaj. Jehovapa sirvejnincunaga may chaychopis achca juiciucunata ganargan Jehovata libre sirvinanpaj. Chaymi hermanunchicunaga imaycanopapis calpachacärergan Diospa voluntäninta rurapäcunanpaj y chasquishgan ruraytapis cumplipäcunanpaj (1 Cor. 16:9). ¿Ima ruraypitataj parlaycanchi?

18. ¿Ima ruraytataj lapanchi chasquishcanchi cay ushanan junajcunacho?

 ¹⁸ Jesusga nergan discipuluncuna Diospa Gobiernunpita ali wilacuycunata may chaychopis wilacärinanpaj cay mundo manaraj ushacaptin (Mat. 24:14). Y cay lapanchoga angelcunami yanapacuycan. Chaymi Bibliaga nin juc ángel ali wilacuyta apamun “intëru nasyun runacunapaj, may trïbu runacunapäpis, ima casta rimayta rimaj runacunapäpis, may marca runacunapäpis” (Apoc. 14:6).

19. ¿Jehovata cuyajcunaga ima wilacuy mastataj wilacärinman?

¹⁹ Diospa sirvejnincunaga manami ali wilacuycunalatachu runacunata wilacärinman, sinoga Apocalipsis 8 a 10 wilacushgan angelcunatapis yanapacärinman. Chay angelcunaga wilacärin Diosta mana cäsucojcunata ima pasananpaj. Chaymi Jehovapa testiguncunaga mayna wilacuycanchi Satanaspa maquincho caycaj munduta y runacunatapis ima pasananpaj; chay wilacuycunaga “nina tallusha runtu tamya” japuymi caycan (Apoc. 8:7, 13). Runacunaga musyapäcunman ichiclanami pishin cay mundo ushacänanpaj. Chaynoparaj cambiucunata rurapäcunga Jehovapa rabianan junajpita salvacärinanpaj (Sof. 2:2, 3). Pero cay wilacuycunataga manami lapan runacuna shumaj chasquinchu, chaymi valiente cananchi wilacärinapaj. Y jatun nacay wichanchoga más peor-rämi canga, Jehovata mana cäsucojcunata ima pasananpaj wilacushun (Apoc. 16:21).

20. ¿Imatataj yachacushun gatejnin ishcay yachachicuycunacho?

²⁰ Alapa alimi caycan cay escribiraycajcunata mayar cäsucärinapaj. ¿Imanir? Noganchi ricaycanchi Apocalipsis nishganta imano cumplicuycashganta (Apoc. 1:3). Pero ¿imaraj yanapämäshun gaticachashga captinchi jinala aguantaycänapaj y mana manchacuypa cay wilacuycunata wilacunapaj? Ishcaymi caycan calpata tarinanchipaj: juc, Apocalipsis libruga wilacun imataj pasananpaj Diospa chiquejnincunata; ishcay, Jehovaman yäracuycarla captinchega shamoj tiempucho bendiciuncunatami chasquishun. Chaycunatami yachacushun gatejnin ishcay yachachicuycunacho.