1. ¿Imatataj jucninchi jucninchi acrananchi?

 CANAN wichan lapanchi acrananchi Jehovapa Gobiernuntachush yanapacuyta munanchi o Diospa chiquejnin Satanaspa maquinchochush cayta munanchi. Caychoga manami nishwanchu ‘maygantapis manami acrashächu’, acrashganchipitami canga imaycamapis cawanapaj o manapis (Mat. 25:31-33, 46). Chauraga “fiyupa ñacaycunacho” wichan Jehovalaman yäracuycarla caycajcunaga señalashgami canga salvacärinanpaj (Apoc. 7:14; Ezeq. 9:4, 6). Ichanga manchariypaj uywapa señalninta charajcunaga ushacächishga canga (Apoc. 14:9-11).

2. 1) ¿Imata ruranapätaj Hebreos 10:35-39 textucuna nimanchi? 2) ¿Imanotaj yanapämanchi Apocalipsis libro wilacushganga?

² (Leiriy Hebreos 10:35-39). Gam Diosta sirvinayquipaj y Gobiernunta yanapänayquipaj mayna acrashgayqui captiquega, ali cajtami acrashcanqui y waquincunapis chayta rurananpaj munanquichi. Chauraga Apocalipsis wilacushganga yanaparcushunquimi. Cay libruga wilacun Jehovapa contrancho caycajcunata ima pasananpaj. Jina payman yäracojcuna ima bendiciuncunata chasquinanpaj cajtapis wilacun. Chaymi canan yachacushganchega yanapämäshun Jehovata cushi cushila sirvir caycänapaj. Jina caywanga waquincunatapis yanaparcushun Jehovata sirvinanpaj y guepaman mana cutinanpaj.

3. ¿Ima tapucuycunapitataj canan yachacushun?

³ Cay yachachicuychoga cay tapucuycunapitami yachacushun: ¿ima bendiciuncunataj chasquenga Diospa Gobiernunta yanapacojcuna?, y ¿imataj pasanga Apocalipsis libro wilacushgan manchariypaj puca uywata yanapacojcunata?

4. ¿Pïcunatataj apóstol Juan ricargan cielucho Jesuswan carcaycajta?

⁴ Apóstol Juanga juc visiuncho ricargan ishcay grupo runacuna Diospa Gobiernunta yanapacuycashganta y imaycamapis cawayta lapan bendiciuncunawan chasquishganta. Punta caj grupuchoga 144.000 runacuna caycan (Apoc. 7:4). Paycunaga cay Pachapita acrashga cargan cieluman aywananpaj, chaycho Diospa Gobiernuncho Jesuswan mandacamunanpaj. Aumi, Jesusga paycunawan cay Pachata gobernapäcamunga (Apoc. 5:9, 10; 14:3, 4). Juanga ricargan paycuna Sion lomacho Jesuswan ichiraycajta (Apoc. 14:1).

5. ¿Imataj pasanga cay Pachachoraj caycaj ungido cristianucunata?

⁵ Cieluman aywananpaj 144.000 cajcunataga Jehová acrayta galaycorgan apostolcuna cawashgan wichanpita canancama (Luc. 12:32; Rom. 8:17). Jina Juanga visiuncho ricargan cay ushanan junajcunacho cieluman aywananpaj cajcunapita walcajla cay Pachacho caycashganta. Fiyupa nacay manaraj galaycuptin paycunaga Jehovapa sellun o aprobaciunninta chasquenga cieluman aywananpaj (Apoc. 7:2, 3; 12:17). Chauraga fiyupa nacay wichancho Armagedón manaraj galaycuptin paycunaga cieluman aywacunga waquin cielupaj acrashga cajcunawan shuntacänanpaj. Chaynopa 144.000 cajcuna Jesuswan Diospa Gobiernuncho mandacamunga (Mat. 24:31; Apoc. 5:9, 10).

6, 7. 1) ¿Pïcunatataj nircur Juan ricargan, y imataj paycunapita musyanchi? 2) ¿Imanirtaj cielupaj acrashga cajcuna y cay Pachacho cawananpaj cajcunaga yarpachacunman Apocalipsis 7 caj capítulo wilacushganman?

⁶ Punta caj grupo runacunata ricaycurna Juanga nircur “yupaytapis mana atipaypaq”chaychicaj runacunata ricargan (Apoc. 7:9, 10). ¿Pïcunataj paycuna carcaycan? Juc ángel Juanta cayno nin: “Cashni uysha yawarninta mashtar wañushanpitami perdunashana carcaycan. Chaymi röpancunapis yuraj caycan” (Apoc. 7:14). Paycunaga fiyupa nacayta cawaycar pasarcur cay Pachacho cawapäcunga y imayca bendiciuncunatami chasquicärenga (Sal. 37:9-11, 27-29; Prov. 2:21, 22; Apoc. 7:16, 17).

⁷ Chauraga cieluman aywanapaj o cay Pachacho cawanapaj shuyaraycarpis, yarpachacunanchi Apocalipsis 7 caj capítulo wilacushganman y chay wichancho caycashganchita ricacunanchi. ¿Imanir? ¡Chay wichanga mana gongaypämi canga Jehovapa ishcay grupo sirvejnincunapaj! Lapanchimi amatar cushicushun Jehovapa Gobiernunta yanapacushganchipita. ¿Ima mastataj Apocalipsis wilacun fiyupa nacaypita? (Mat. 24:21).

8. ¿Imanotaj fiyupa nacay galayconga, y imatataj chay wichan runacuna ruranga?

⁸ Guepa yachachicuycho ricashganchino cay munducho caycaj gobiernucunaga Jatuncaray Babiloniata atacanga, juc parlacuychoga, lapan luta religiuncunata ushacächenga (Apoc. 17:16, 17). Chayta ricarmi musyashun jatun nacay galaycushganta. Chauraga ¿runacuna Jehovata aduraytachuraj munanga? Manami. Apocalipsis 6 caj capituluga wilacun chay wichan Jehovata mana adurajcunaga gobiernucunaman amparacunga y jatun negocianticunaman guelicamunga. Bibliaga chaypita parlarmi paycunata tincuchin jircacuna japuy cashganta. Chay runacuna Diospa Gobiernunta yanapacuyta mana munaptinmi, Jehová paycunata chiquejnincunatano ricanga (Luc. 11:23; Apoc. 6:15-17).

9. ¿Imatataj Diospa sirvejnincunaga rurarcaycanga fiyupa nacay wichan, y nircur imataj pasanga?

 ⁹ Pero Diospa sirvejnincunaga manami waquin runacunanochu carcaycanga. Fiyupa nacay captinpis paycunalami cay Pachacho Jehovata sirvircaycanga y runacunapa ni maygan gobiernuncunatapis yanapacungachu (Apoc. 13:14-17). Y Diospa contrancho cajcunaga chayta cuentata gocärenga y fiyupa rabiacärenga. Chauraga achca naciuncuna wilanacärenga Diospa marcanta entero Pachacho atacananpaj. Chaypita parlarmi Bibliaga nin Gog de Magog Diospa marcanta atacananpaj y ushacächiyta munanga (Ezeq. 38:14-16).

10. Apocalipsis 19:19-21 textucuna nishganno, ¿imataraj Jehová ruranga chiquejnincuna marcanta ushacächiyta munaptin?

¹⁰ ¿Imataraj Jehová ruranga chiquejnincuna marcanta ushacächiyta munaptin? Palabranchomi cayno nin: “Fiyupami rabyacurcushäpaj” (Ezeq. 38:18, 21-23). Imano cananpaj Apocalipsis 19 caj capituluchomi wilamanchi. Jehová churin Jesustami mandamunga marcanta chapänanpaj y chiquejnincunata ushacächinanpaj. Chaypäga Jesús manami japalanchu caycanga, angelcuna y 144.000 cajcunapis yanapanga (Apoc. 17:14; 19:11-15). Chay guerracho ushajpaj ushacanga Diospa contrancho caycajcuna, cayga ninanmi runacuna, gobiernucuna y luta religiuncunapis (leiriy Apocalipsis 19:19-21).

11. Diospa chiquejnincuna manana captenga, ¿imataj cielucho pasanga?

¹¹ Jehová chiquejnincunata ushajpaj ushacächiptenga cay Pachacho cawananpaj caj cristianucunaga mayraj cushicärenga. Y, cielucho caycajcunapis alapami cushicärenga Jatuncaray Babilonia manana captin. Pero masrämi cushicärinanpaj canga. ¿Imanir? (Apoc. 19:1-3). Apocalipsis libro wilacun “Cashni uysha casarananpaj caj fista” cananpaj (Apoc. 19:6-9).

12. ¿Imaytaj ruracanga Cashni uysha casarananpaj caj fiestaga? (Apocalipsis 21:1, 2).

¹² Armagedón manaraj galaycuptin, 144.000 cajcunapita cielucho lapancuna mayna caycaptinpis, Cashni uysha casaracunanpaj caj fiestaga manami ruracangarächu (leiriy Apocalipsis 21:1, 2). Chayga ruracanga Armagedón guerra pasariptinrämi, Diospa lapan chiquejnincuna ushacächishga captin (Sal. 45:3, 4, 13-17).

13. ¿Imanotaj 144.000 cajcuna Cashni uyshawan casaracunga?

¹³ ¿Imanotaj 144.000 cajcuna Cashni uyshawan casaracunga? Imanomi pipis casaracuptin ishcan juclachacan, chaynolami Jesuspis novianwan o 144.000 cajcunawan shuntacanga junto caycänanpaj. Chauraga chaypitami pacha Jesusga 144.000 cajcunawan cay Pachata 1.000 watacunapa gobernapäcamunga (Apoc. 20:6).

14, 15. ¿Apocalipsis 21 caj capituluchoga 144.000 cajcunataga imawantaj tincuchin? (Garancho caycaj dibujuta ricäriy).

¹⁴ Apocalipsis 21 caj capitulucho 144.000 cajcunata tincuchin cuyaylapaj “mushoj Jerusalén” ciudäwan (Apoc. 21:2, 9). Chay ciudäga caycargan “chunca ishcay rumicuna janancho”, y “cada rumicunachomi juc-cama Jesucristupa chunca ishcay apostolnincunapa jutin isquirbiraycaran”. Y chayta ricaycur Juanga alapa almiracurganchi. ¿Imanir? Payga ricargan juc rumicho jutin escribiraycajta. ¡Juanga alapachi cushicuycorgan! (Apoc. 21:10-14; Efes. 2:20).

 ¹⁵ Cay mushoj ciudäwanga manami maygan ciudäcunapis tincunchu. Jatun caj callinmi goripita caycan, 12 puncuncunaga 12 perlaspitami rurashga caycan, murallanpis y cimientuncunapis cuyaylapaj rumicunawanmi camaraycan y ciudäpaga altunpis, anchunpis y largunpis igualami caycan (Apoc. 21:15-21). Pero Juanga nin: “Chay siudächöga Templuta manami ricarächu. Templu cananpa ruquenga munayniyoj Tayta Dios y Cashni uyshami Templu caycaran. Chay siudäta quiquin Tayta Dios y Cashni uysha achicyapaptinmi intipis ni quillapis mana canganachu” (Apoc. 21:22, 23). Chauraga Mushoj Jerusalén o ungiducunaga Jehovapa tronunpa naupancho caycanga (Heb. 7:27; Apoc. 22:3, 4). Chaymi Apocalipsis nin Jehovawan Jesusga chay ciudäpa templun cananpaj.

16. Diospa Gobiernun Waranga Watacunapa Gobernaptin, ¿ima bendiciuncunataj runacuna chasquenga?

¹⁶ Chay ciudäman ungiducuna yarpapäcuptenga alapami cushicärin. Y cay Pachacho cawananpaj cajcunapis chay ciudämanga yarpachacushwanmi. ¿Imanir? Diospa Gobiernun Waranga Watacunapa Gobernaptin, Mushoj Jerusalenga cay Pachaman imayca bendiciuncunatami chayachimunga. Juanga visiuncho ricargan chay bendiciuncunaga ‘imaycamapis cawachicoj chuya mayuno’ cashganta, “cuchuncunachömi imaycamapis cawachicoj yöracuna” caycashganta y “öjancunanami llapan nasyun runacunapaj jampi” cashganta (Apoc. 22:1, 2). Chauraga mushoj Pachacho cawajcunami chay bendiciuncunata chasquenga y cäsucoj cajcunaga ichiclapa ichiclapa juchaynaj runaman ticranga. Chay wichanga gueshyapis laquicuypis nanächicuypis manami canganachu (Apoc. 21:3-5).

17. Diospa Gobiernun Waranga Watacunapa Gobernaptin, ¿pïcunatataj bendiciuncunata chasquenga? (Apocalipsis 20:11-13).

¹⁷ ¿Pïcunataj chay bendiciuncunata chasquenga? Punta cajga canga Armagedunta cawaycar pasajcuna y mushoj Pachacho yurimoj wamracunapis. Pero manami paycunalachu. Apocalipsis 20 caj capituluchoga nin wanushgacuna cawarimunanpaj (leiriy Apocalipsis 20:11-13). ¿Pïcunataj Jehová cawarachimunga cay Pachacho? “Allita rurajta y mana allita rurar cajtapis”, alita ruraj niptenga parlaycan Diosman yäracoj unay wanushga runacunapaj, y mana alita ruraj niptenga Diosta  manaraj reguir wanushgacunapaj (Hech. 24:15; Juan 5:28, 29). Cayga manami ninanchu lapan runacuna cawarimunanpaj Diospa Gobiernuncho Waranga Watacunapa Gobernamuptin; Jehovata sirviyta mana munajcunaga mana cawarimunganachu. Paycunaga mayna wilapashgana cargan Paraisucho cawananpaj, ichanga manami munarganchu (Mat. 25:46; 2 Tes. 1:9; Apoc. 17:8; 20:15).

18. ¿Imanotaj runacuna cangapaj 1.000 watacuna ushacaptin?

¹⁸ Pachacho cawajcuna 1.000 watacuna ushacaptenga, juchaynaj runacunanami cangapaj. Adán juchata rurashganraycur manami pipis nacanganachu (Rom. 5:12). Aumi, Adanpa culpanraycur manami pipis juchayoj canganachu. Chauraga 1.000 watacuna ushacaptin Pachacho lapan cawajcunaga canga juchaynaj runacuna cashganpitami (Apoc. 20:5).

19. ¿Imanirtaj Satanasga yapay juchaynaj runacunata pruebacunata churanga?

¹⁹ Musyanchimi Jesusga juchaynaj runa cashganta y Satanás imayca pruebacunata churaptinpis Jehovalaman yäracushganta. Pero Satanás 1.000 watacuna wichgarashga caycashganpita, yapay librina caycar juchaynaj runacunata imayca pruebacunata churapaptenga, ¿Jesús rurashgannochuraj Jehovalaman yäracushun? Chayga quiquinchicunapitanami canga (Apoc. 20:7). Chauraga ushanan caj pruebacho Jehovalata cäsucojcunaga mana ushacaj cawayta y imayca bendiciuncunatapis chasquenga (Rom. 8:21). Pero Jehovapa contrancho churacajcunaga Diabluwan demoniucuna ushacächishga cashganno, paycunapis ushacächishga cangapaj (Apoc. 20:8-10).

20. Apocalipsis librupa profeciancunapita yachacurga, ¿ima ninquitaj?

²⁰ Apocalipsis libro wilacushganpita yachacurga, ¿imanotaj ricacunqui? ¿Chaycho caycaj profeciacuna imano cumplicuycashganta ricarga cushicunquichu? ¿Cay yachachicuycunaga yanapäshushcanquichu waquincunatapis yanapänayquipaj Diosninchita adurananpaj? (Apoc. 22:17). Ichiclacho imacuna pasananpaj cajta musyarga alapa cushishgachi caycanchi, y apóstol Juan nishgannopis niyta munanchi: “Amén. ¡Shamuyna, Señor Jesús!” nir (Apoc. 22:20, Biblia Ambo Pasco).