1. ¿Imanirtaj Jehovapa yachayninta ashishwan? (Proverbios 4:7).

 ¿IMAYLAPIS yarpachacushcanquichu ali cajta acranayquipaj? Chayno captenga Jehovata mañacushcanquichi yachayta goycushunayquipaj (Sant. 1:5). Rey Salomón cayno escribergan: ‘Imatapis cachaycur primëruga yachaytaraj umayquiman sumaj churay tantiyaj canayquipaj’ (leiriy Proverbios 4:7). Caywanga pay parlaycargan Jehovapa yachayninta ashinapaj (Prov. 2:6). Chauraga Jehová gomashcanchi yachayga, ¿yanapämanchichuraj problemacunata alchanapaj? Aumi. Chaypitami canan parlarcushun.

2. ¿Imataj yanapämäshun yachaj runa canapaj?

² Ishcay runacuna yachaj cashganpita yachacushun, chayga yanapämäshun noganchipis yachaj runacuna canapaj. Puntataga Salomonpitami parlarcushun. Bibliaga nin: “Tayta Diosmi Salomónta yachayta qorqan shumaq tantiyakuq kananpaq” (1 Rey. 4:29). Nircur Jesuspitapis yachacushun, payno yachaj runaga cay Pachacho manami pipis carganchu (Mat. 12:42). Paypita parlarmi Bibliaga cayno nergan: “TAYTA DIOSPA Espïritunmi paycho kanqa. Tsaymi tantiyaq y yachaq kanqa” (Is. 11:2).

3. ¿Imacunapitataj canan parlarcushun?

³ Jehovami Salomontawan Jesusta yachayta goycurgan, chaymi paycunaga ali consejucunatami tantiachicurgan cawayninchicho yanapämänanchipaj. Cay yachachicuycho  quimsalata ricärishun: imanotaj guellaytawan aruyta ricashwan y quiquinchipis imano ricacunapaj.

4. ¿Ima nishwantaj Salomonpita y Jesuspita?

⁴ Salomonga rico y imaycayoj runa cargan (1 Rey. 10:7, 14, 15). Jesusmi ichanga walcalawan cawargan y wasinpis manami carganchu (Mat. 8:20). Chayno captinpis paycuna yachaj runacuna cashpanmi charashgancunalawan contentacorgan y ‘más guellaywanraj ali cawacushaj’ nipäcurganchu.

5. ¿Imataj nergan Salomón guellaypita?

⁵ Salomonga nergan guellayga tucuynopa yanapämashganchita (Ecl. 7:12). ¿Imano? Yanapämanchi micunanchipaj, visticunanchipaj y ima gustucunapäpis. Pero, rico runa caycaptinpis Salomonga cuentata gocurgan guellaylata ashinapaj mana ali caycashganta. Chaymi cayta escribergan: “Qellayyuq y qoriyuq kashqanpitapis mas alimi kaykan pïmaypitapis ali rikashqa kashqantsi” (Prov. 22:1). Jina tantiacurgan guellaylata cuyajcunaga charashgancunalawan manami contentacunchu (Ecl. 5:10, 12). Y caytapis nergan: “Ima riquëzapis ushakaqlami kaykan. Anka pärir aywakuqnömi riquëzaykipis ushakäkunqa” (Prov. 23:4, 5).

6. ¿Imataj nergan Jesús imaycayoj caypita? (Mateo 6:31-33).

⁶ Jesusga manami nirganchu ‘imaycayoj captëraj ali cawacushaj’, payga imalatapis micur y upur cushicoj (Luc. 19:2, 6, 7). Juc cuticho yacutami más alin caj vinuman ticrachergan, chay cargan punta caj milagrun (Juan 2:10, 11). Jina wanushgan junajchopis chaniyoj tunicata jaticushga caycargan (Juan 19:23, 24). Ichanga payga yarpachacojchu imaycayojraj cananpaj. Discipuluncunata nergan: “Pipis mana ishcay patrunta sirbinmanchu. [...] Chaynömi ima-aycanpäpis yarpararga Tayta Diosta sirbiyta mana camäpacunchu” (Mat. 6:24). Jesusga yachachicorgan Diospa Gobiernunta puntaman churaptinchega, Jehová lapan  necesitashganchicunata camaripämäshunmi (leiriy Mateo 6:31-33).

7. ¿Ima bendiciuncunatataj juc waugui chasquergan Diospa cajta puntaman churashganpita?

⁷ Achca hermanucuna wilacamun Jehovapa consejuncuna guellay asuntupita imano yanapashgantami. Ricärishun imata wilacamun Daniel jutiyoj japalan wauguinchi. Payga nin: “Mozuyarcuycaptë imapitapis más puntataga Jehovata sirviyta munargä”. Daniel charashgancunalawan cawacushganraycur tiempunta y ima yachashgantapis camacächergan hermanucunata yanapänanpaj y Betelchopis sirvinanpaj. Caytapis wilacun: “Manami imaypis laquicurgächu acrashgäpita. Munashgäta ruranäpaj cajman yarpachacorga, achca guellaytachi ganäman cargan. Pero manami tarëmanchu cargan canan reguishgä ali amigucunata. Jehovapa cajcho yanapacushgäpita cushicuyga manami tarëmanchu cargan guellaylata ashiptëga. Jehová tucuynopa bendicimashganwan manami ayca guellaypis tincunchu”. Chauraga guellaylata ashinapaj trucan Diospa cajta puntaman churaptinchega alimi caycanga.

8. ¿Imanotaj Salomonga aruyta ricaj? (Eclesiastés 5:18, 19).

⁸ Salomonga nergan arushganchipita cushicuyga “Tayta Diospa bendicionnin kaykan” (leiriy Eclesiastés 5:18, 19). Jina escribergan: “Arukuq runapaqa imaykanpis kanmi” (Prov. 14:23). Salomonga ali arucoj runa cargan. Payga wasicunata, huertacunata, estanquicunata y ciudäcunatapis rurachergan, jina uva plantacunatapis plantachergan (1 Rey. 9:19; Ecl. 2:4-6). Y chay lapanta rurananpäga Salomón alapachi arurgan. Payga ali ricacushga chay lapanta rurashganpita, pero musyarganmi rasunpa cushicuyga manami chaycunalawan caycashganta. Chaypitapis Jehovapaj imaycatami rurargan. Tantiarinapaj, Jehovata aduranapaj templuta sharcachishga cananpaj ricargan, chay aruytaga ganchis watacunacho ushargan (1 Rey. 6:38; 9:1). Salomón cawaynincho imaycacunata rurashga carpis, payga cuentata gocurgan Jehovata sirvishganchi o payraycur arushganchi imapitapis más ali cashganta. Chaymi cayno nergan: ‘Tayta Diosta rispitar mandamintuncunata cumpliy’ (Ecl. 12:13).

9. ¿Imataj Jesús rurashga arucuycarla mana caycänanpaj?

⁹ Jesusga ali arucoj runami cargan. Payga mozulapitami yachacushga carpintero cananpaj (Mar. 6:3). Familian achca captinmi paycunata imalawanpis yanapargan, chaura taytancunaga agradecicojchi. Jesús juchaynaj runa car lapan rurashgancunaga ali cargan, chauraga pï may runacuna payta ashejchi wasinpaj o arunanpaj imalantapis rurapänanpaj. Jesusga cushishgachi arucoj, chayno captinpis payga Diospa cajta más puntaman churaj (Juan 7:15). Y Diospita lapan tiempunwan yachachicuyta galaycuptin cayno nergan: “Micunallayquipäga ama yarpachacuychu. Chaypa ruquenga yarpachacuy imaycamapis cawanayquipaj caj micuyta tarinayquipaj” (Juan 6:27). Y jircachopis yachachicuptin nergan: “Riquësacunata shuntayllapaj yarpachacunayquipa ruquenga ruray syëlucho Tayta Diospita allita chasquinayquipaj” (Mat. 6:20).

10. ¿Imaraj pasanman ali arucoj captinchega?

¹⁰ Jehová Palabranwanmi yanapämanchi aruyta imano ricänapaj. Chaycho nimanchi ali arucoj canapaj y shumaj arunapäpis (Efes. 4:28). Patronninchicunapis cuentata gocärin ali arucoj y honrado runacuna cashganchita, y öraga ‘ali aruycanqui’ nimanchipis. Chauraga  patronninchi Testigucunapita ali yarpänanpaj munar öraga más tiemputaraj arur galaycushwanchi. Pero chayta ruraptinchega familianchiwan Diospita yachacunapaj, predicanapaj y reuniuncunapäpis tiempunchi canganachu. Chayno captenga, ¿imataraj rurashwan arucuycarla mana caycänapaj?

11. ¿Imataj yachacorgan William juc ancianupita?

¹¹ Juc cristiano William jutiyoj mozo yachacorgan imano aruyta ricänanpaj. Payshi congregaciuncho yanapacoj ancianuno wauguipaj arurgan. Y paypita parlarmi William cayno wilacun: “Payga manami aruylacho jatiräcunchu. Imaypis calpachacun shumaj arunanpaj y clientincunapis cushishga caycänanpaj aruyninpita. Pero junaj usharcuptinna lapan aruynincuna cashgalancho jaguiriycun, familianwan y religiunnincho caycänanpaj. Paytaga imaypis cushishga cashganta ricä”. *

12. ¿Imano runataj Salomón cargan mandacur galaycushgancho, y tiempuwan imataj pasargan?

¹² Salomón Jehovata sirvishgan wichan manami ali tucoj runachu cargan. Chaymi juc cuticho mozularaj caycaptin cuentata gocurgan imatapis quiquilan rurananpaj mana puedishganta, sinoga Jehovata ashergan pushananpaj (1 Rey. 3:7-9). Y mandacur galaycuptin payga musyargannami shumaj mana cuidacuptenga orgulloso runaman ticracurinmanmi. Chaymi escribergan: “Alli-tucojcunaga ushapacangami. Jucta manacajman churajcunaga mana allimanmi chayanga” (Prov. 16:18). Pero tiempuwanga lapan nishgancunata quiquinmi gongaycorgan y chayga laquicuypämi cargan. Chauraga orgulloso runaman ticracurergan y Diospa leynincunatapis mana cäsucur galaycorgan. Israelitacunata goshgan Leychoga reycunapaj niycargan: “Mandaj rayga ama achca warmiyoj cangachu. Achca warmiyoj carga Tayta Diostapis  gongaycunmanmi” (Deut. 17:17). Salomón chay leyta mana cäsucur 700 warmicunata ashicorgan y 300 concubinacunatapis, y ¡casi lapan warmicunaga juc dioscunatami adurapäcoj! (1 Rey. 11:1-3). Payga yarparganchi imapis mana pasananpaj, imano captinpis tiempuwanga Salomón Jehovapita raquicar mana alicunamanmi chayashga (1 Rey. 11:9-13).

13. ¿Imataj yachacunchi Jesús ñanpu shongu runa cashganpita?

¹³ Jesusga imaypis ñanpu shongu runa cargan, manami ‘waquincunapita más ali cä’ nerganchu. Cay Pachaman manaraj shamurmi cielucho Taytan Jehovawan imaycacunata rurargan. Colosenses 1:16 nin: “Paywanmi Tayta Diosga camaran llapan ima-aycatapis syëlucho cajcunata cay pachacho cajcunata”. Y bautizacushgan junajcho Jesusga yarpargan Taytanwan cielucho lapan rurashganta (Mat. 3:16; Juan 17:5). Pero chaycunata yarpar manami orgulloso runamanchu ticracurergan. Manami imaypis ali tucojchu y waquincunatapis ñanpu shongulanwan ricaj. Discipuluncunatapis nergan cay Pachaman “manami sirvishqa kananpaqtsu shamushqa, sinöqa sirvinanpaq y runakuna rayku wanur atskaqta salvananpaqmi” (Mat. 20:28). Payga musyarganmi imatapis rurananpäga manami quiquinpitachu cashganta (Juan 5:19). ¡Jesusga pasaypa ñanpu shongu runa cargan! ¿Manachu paypita yachacuyta munanchi?

14. ¿Jesús nishganga imanotaj yanapämanchi ali ricacunapaj?

¹⁴ Jesusga discipuluncunata yachachicorgan mana ali tucärinanpaj ni mana valejno mana ricacunanpaj. Chaymi juc cuticho paycunata nergan: “Aqtsaykipis paypaqqa yupashqalami kaykan” (Mat. 10:30). Cay palabracunaga shacyächimanchimi masraj mana valejno ricacuptinchi. Cayga yarpächimanchi Taytalanchi Jehová noganchipaj yarpachacushganta y paypa ricaynincho alapa valoryoj cashganchita. Aumi, Jehovaga acramashcanchi payta sirvinapaj y mushoj Pachacho  cawanapäpis munan. Chauraga pitaj canchi pay dispunishganta ‘mana mana’ ninapaj.

15. 1) La Atalaya revista wilacushganno, ¿imanotaj ricacunanchi? 2) 24 caj paginacho fotucunata ricashganchino, ¿imaraj pasanman quiquilanchiman yarpachacuptinchega?

¹⁵ Guepa watacunacho, La Atalaya revista shumaj tantiachicamorgan imano quiquinchita ricacunapaj. Chaycho nergan: “Ama imaypis pasaypa ali tucushwanchu ni mana valejnopis ricacushwanchu. Chaypa trucanga shumaj yarpachacushwan imano cashganchino ricacunapaj, y chaypäga cuentaman churashwan imacunata rurayta puedishganchita y imacunata rurayta mana puedishganchitapis. Y caypita parlarmi juc cristiana nergan: ‘Manami pasaypa fiyu warmichu cä, ni juchaynaj warmipis cächu. Alicunatami rurä pero öraga pantarcöpis waquin runacunano’”. * Chauraga quiquinchi imano cashganchita ricacuptinchega, ¿manachu yanapämanchi?

16. ¿Imanirtaj Jehovaga ali consejucunata goycalämanchi?

¹⁶ Jehová amatar cuyamashpanchi y cushishga cawananchipaj munarmi Palabrancho shumaj consejucunata goycalämanchi (Is. 48:17, 18). Chauraga rasunpa cushishga cawacuyta munarga imapitapis más puntata acranapäga Jehovata sirvinapämi caycan. Chayta rurarga cushi cushilami cawacushun. Y manami waquin runacunano guellayraycur, aruyraycur o quiquilanman yarpachacushganraycur problemacunaman jaticäshunchu. Chauraga imaypis yachaj y tantiacoj runano cashwan, y ¡Jehovapa shongunta cushichishun! (Prov. 23:15).