1. ¿Ima nintaj Biblia mana ushacaj cuyanacuypita?

 RASUNPA imano cuyanacunapaj cajpita parlarmi Biblia cayno nin: “Kuyanakuyqa Tayta Diospita shamuq nina karmi imaypis mana upintsu. Kuyanakuytaqa manami ni lamarpis ni mayupis upitsiyta kamäpakuntsu” (Cant. 8:6, 7). Biblia nishganga cuyaylapaj, ¿au? Casado vidacho ishcancuna cuyanacärishganga ushacäcunmanchu ni imapis ushacächinmanchu.

2. ¿Imataraj casaracushga cajcuna rurapäcunman cuyanacärishgancuna ‘mana upicäcoj nina’ japuy cananpaj?

² Casaracushga cajcunaga calpachacärinmanmi cuyanacuycarla carcaycänanpaj. Rataycaj tulpapita parlarcushun. Mana upicäcunanpäga, cutin cutin pücaparmi yantata tuquipanchi. Chaynolami casado vidachopis ishcancuna imaycata rurapäcunman cuyanacärishgan mana ushacäcunanpaj. Chayno captinpis pilapis ninmanchi ‘guellayta tarinapaj sasaraj captin, gueshyapis captenga, o wamräcunata ashmanäpaj sasa captenga unayno cuyanacärinäpäga sasami ticracurin’. Casado captiquega, ¿imataraj ruranquiman cuyacuyniqui ‘mana upicäcoj nina’ japuy cananpaj? Cananmi yachacushun casado vidayquicho ima yanapäshunayquipaj, quimsalata ricärishun. b

3. ¿Imanirtaj matrimoniucunaga Jehovata cuyapäcuptinraj paycunapis cuyanacuycarla carcaycanga? (Eclesiastés 4:12, fotutapis ricay).

³ Cuyanacuy imaypis mana upicäcunanpäga, olgu cajpis warmi cajpis calpachacärinmanmi Jehovapa ali amigun capäcunanpaj. Chayno captenga Biblia nishgannola cawar consejuncunata ganas ganasla cäsucärenga. Ima problemacunapa pasarpis cuyanacärishganga shumaj rataycaj nina japuymi caycanga (leiriy Eclesiastés 4:12). Taytalanchi Jehovaga amatar cuyacojmi, pacienciacojmi y perdunacojmi. Amiguncunapis paynola cananpämi waran waran calpachacärin (Efes. 4:32–5:1). Chayno Diosninchi cashgannola matrimoniucuna calpachacäriptenga, masrämi cuyanacärenga. Achca watapana casada caycaj Lena jutiyoj cristiana cayno nin: “¡Runalä Diosta cuyaptenga, nogapäga más facilmi payta cuyanäpaj y respetanäpaj!”.

4. ¿Imanirtaj Jehovaga Josewan Mariata acrargan Jesuspa taytancuna cananpaj?

⁴ Josewan Mariapita Biblia wilacushganta ricärishun. Paycunatami Jehová acrargan Jesuspa taytancuna capäcunanpaj. Paycunata acrargan cuyashgan amiguncuna captinmi, Jehovaga maynachi musyargan Josewan María cawaynincunacho payta sirvir puntaman churananpaj. ¿Casaracushgacuna imatataj yachacärinman Josewan Mariapita?

5. ¿Imatataj rurapäcunman runa cajcuna José rurashgannola?

⁵ Josega ali runa cargan, Jehovapa consejuncunata ali shongulanwan chasquicojmi. Juc cuticho imata rurananpaj quimsa cuti Jehová nergan y Josega jucla cäsucurgan (Mat. 1:20, 24; 2:13-15, 19-21). Jehovata cäsucushganraycurmi Josega warmin Mariata ali cuidargan. Chaychari Mariaga runanta masraj respetargan y cuyarganpis. Casado olgu captiquega, Josenomi ruranquiman, Bibliacho ashinquiman consejucunata familiayquita cuidanayquipaj. Diospa consejuncunata cäsucushgayquega ricacämungami y chayga mayraj yanapäshunqui warmiyquitapis masraj cuyanayquipaj. c Ali calpachacuptiquega imapis raquichishunquichu majayquipita. 20 watacunanona casada caycaj Vanuatu marcapita juc cristiana cayno nin: “Imata decidinanpäpis Jehovapa consejuncunataraj runalä ashiptenga masraj respetaycö. Alapa yarpachacönachu, ima decidishgancunamanpis yäracöna”.

6. ¿Imatataj Mariapita yachacärinman casada warmicuna?

⁶ Mariaga manami Joseraycurchu Jehovata cuyaj. Quiquinmi calpachacurgan Diospa Palabranta leir Jehovata adurananpaj (Lucas 1:46). Shongulancho ali yarpachacoj  warmi cargan (Luc. 2:19, 51). Chayno Diosta cuyashganraycurmi runanpäpis ali warmi cargan. Canan wichan cristianacunapis calpachacärinmi Marianola cananpaj. Émiko jutiyoj cristianapitami parlarcushun. Paymi cayno nin: “Solteraraj caycaptëga, maquïchomi caycargan Jehová Dioswan amistänëta sinchiyächinäpaj. Pero casacurishpäga, runäpa maquinchona caycargan Diosninchita imano adurananchipaj. Cuentata gocurgä yäracuynëpis paypa maquincho caycashganta. Chauraga yarpachacunäpaj caycargan Dioswan amistänëta quiquë sinchiyächinäpaj. Aumi, cananga tiempöta ali camacarcachir japalä caycashpä Jehovata mañacö, Palabranta estudiä y leishgämanpis aliraj yarpachacö” (Gál. 6:5). Warmicuna chaynola gamcunapis rurapäcuptiquega, runayquicunaga cuyaparmi ‘alitami ruraycanqui warmilä’ nishunqui (Prov. 31:30).

7. ¿Imataj casaducuna yachacärinman Josewan Mariapita?

⁷ Josewan Mariaga ali yanapänacurmi cawapäcoj Diosta sirvipäcunanpaj. Chayta imapis michänanta permitipäcurganchu (Luc. 2:22-24, 41; 4:16). Wamrancuna yurir galaycäriptinpis, jinala calpachacärergan imacunapis Jehovapita mana raquichinanpaj. ¡Canan wichan matrimoniucunaga imaycata yachacunanpaj caycan Josepitawan Mariapita! Wamrayoj captiquega, öraga sasarächi caycan reuniuncunaman aywanayquipaj, o familiayquiwan juntacur Diosta adurapäcunayquipaj. Jinamanpis wasicho imaycata ruranapaj caycaptenga, sasarächi caycan ishcalayquicuna juntacaycur Diospita yachacärinayquipaj. Ichanga cayta gongapäcuychu: ishcayqui Jehovata cuyapäcunayquipaj calpachacäriptiquega, gamcunapis masrämi cuyanacärinqui. Diosta adurashganchimi imapitapis más puntacho caycan.

8. Casado vidacho ima problemalapis captenga, ¿imanotaj Diosta adurapäcunanpaj juntacashganga yanapacunman?

⁸ ¿Imataraj ruranquiman matrimoniuyquicho problemacuna yurir galaycuptenga? Capaz ganasniquilapis cannachu familiayquiwan juntacarcur Diosta adurapäcunayquipaj. Chayno captenga alichi canman imalapitapis cushi cushila parlapacäriptiqui. Diospita yachacuytaga imaypis jaguipäcunquimanchu. Ima problemacunapis manami raquichimashwanchu Taytalanchi Jehovapita.

9. ¿Imanirtaj casaducunaga ishcancunapaj tiemputa camacächinman?

⁹ Casaducunaga jinalami cuyanacur cawacärenga cushi cushila parlapacäriptin y maypapis ishcancuna puripäcuptin. Chaynorämi más reguinacärenga y jucnin jucnincuna ima yarpashgantapis musyapäcunga (Gén. 2:24). Lilia y Ruslán matrimoniupita parlarcushun, casacärishganpitaga 15 watacunanonash pasargan. Lilia cayno nin: “Cuentata gocärergä wasichopis trabajuchopis imaycata ruranapaj cashganta, maypitaraj tiemputa jorgushwan ishcaläcuna canapaj. Tiempuwanpis wamräcuna yurergan. Yarpachacunapaj caycargan tiempöcunata imano camacächinapaj. Chayta mana rurarga raquinacuymanpis chayapäcömanchi”.

10. ¿Imanotaj casaducunata yanapanman Efesios 5:15, 16 textucuna?

¹⁰ Casado vidachoga alichi canman warmipis olgupis camacächinanpaj ishcalancuna carcaycänanpaj, manami nipäcunmanlachu ‘imayraj majaläwan yargöman, imayraj maylapapis  aywapäcöman’ nir (leiriy Efesios 5:15, 16). Nigeria naciunpita Uzondu hermano cayno nin: “Imaycapäpis tiempöta camacächiptëga, warmëwan caycänäpäpis yarpachacömi. Imaraj canman warmiläpaj tiempöta mana camacächiptëga” (Filip. 1:10). Anastasia panilanchipis tiempuntaga alish camacächin, payga Moldaviacho congregaciunta watucamoj wauguipa warminmi. Paymi cayno nin: “Runalä congregaciunta atiendiycashgancama noga ruranäpaj cajtaga jucla ruraycö. Chaynorämi tiempöcuna aypan juntula carcaycänäpaj”. Y imaycata rurarpis ishcalayquicuna carcaycänayquipaj tiempuyqui mana aypaptenga, ¿imataraj rurapäcunquiman?

11. ¿Imatataj ishcancuna Aquilawan Priscila junto rurapäcoj?

¹¹ Casaducunaga imayca yachacärinanpaj caycan Áquila y Priscila matrimoniupita. Paycunaga apostulcuna cawashgan wichan Diosta sirvipäcurgan (Rom. 16:3, 4). Paycunapaj Biblia alapa mana parlaptinpis, arurpis ishcancunash arupäcoj, predicapäcoj, waquincunatapis yanapacärej (Hech. 18:2, 3, 24-26). Bibliachopis ishcancuna juntula caycashganpitami wilacun.

12. ¿Imatataj casaducuna rurapäcunman imalachopis más tiempo pasapäcunanpaj? (Fotutapis ricay).

¹² Casaracushga cajcunaga, ¿Áquila y Priscila imano cawapäcushganno cawacuyta puedipäcunmanchuraj? Aumi. Imatapis raquinacushgano rurapäcunanpaj trucanga imalapis caycangachi ishcancunaraj rurapäcunanpaj. ¿Manachuraj gamcunapis Áquila y Priscila rurashganno ishcayquicuna yargur Diospita yachachicärinquiman? ¿Manachuraj wasichopis ima trabajulapis captenga ishcayquicuna arupäcunquiman? (Ecl. 4:9). Ali parlapacur jucniqui jucniqui yanapänacurga casado vidayquega alimi ricacunga. Robertwan Linda matrimoniuga 50 watacunanona casado caycan. Paymi nin: “Rasun cajchoga imaycacuna captenga tiempunchega ganamanchimi. Pero warmiläwan platucunata maylapacäriptë o jardinchopis ishcäcuna arupäcuptë cushishgalami ricacö. Imalachopis ishcäcunarämi arupäcuptëga, masraj cuyanacärë”.

13. Casaducuna juntula caycarpis, ¿ima mastataj rurapäcunman?

¹³ Cayta gongashwanchu: maygan matrimonio junto caycarpis öraga raquicashganomi carcaycanman. Brasilpita juc cristiana nin: “Öraga yarpashwanmi majanchiwan juc wasiyojla carga maynami junto caycanchi. Pero cuentata gocurgä runaläwan junto caycarpis tiempöta raquëmanmi payta atiendinäpaj”. Brunowan warmin Tays rurapäcushganga alapa alimi caycan. ¿Imataj rurapäcun? Bruno cayno nin: “Cushi cushila parlapacärinapaj caycarga telefunücunataga jucladumanmi churaripäcö”.

14. ¿Imataraj ruranman casado vidacho mayganpis ‘nogaga japalä imatapis rurayta munä’ niptenga?

 ¹⁴ Waquin casaducunaga ninmanchi ‘nogaga japalä imatapis rurayta yachacashcä’, chayraycur waquincunaga junto puriylatapis munapäcunmanchu. Jina öraga imalapitapis piñachinacärinmanchi. ¿Gampis chaypa pasaptiquega imataraj ruranquiman? Näga parlashganchi tulpapita yapay parlarcushun. Rataycachiptinchega chaylarämi rupar galaycun, pero shanshapis miraycunanpäga y puca puca cashgancama rupananpäga cutin cutinrämi yantata tuquipanchi. Chaynolami casado vidachopis olgu cajpis warmi cajpis calpachacärinman tiempuncunata ali camacächir cushi cushila imatapis rurapäcunanpaj (Sant. 3:18). Chayno captenga cuyanacärishganga manami ushacäcungachu, manami upicäcungachu.

15. ¿Casado vidachoga respeturachuraj canman, imanir?

¹⁵ Casado vidachoga respeto captinrämi imapis ali camacanga. Respetuga wayra japuymi, tulpapis ali ratananpäga wayrapitarämi canga o ali pücapaptinchiraj. Aumi, respeto mana captenga, matrimoniuchoga cuyanacuy ushacäcunmanmi. Ichanga majayojcuna respetanacäriptenga alapa cuyanacuycarlami cawacärenga. Manami pipis shimilapitaga ninmanchu ‘nogaga respetuosumi cä’ nir. Quiquin majanchimi ninman ‘majaläga respetaycalämanmi’ nir. 25 watacunanona casado caycaj matrimoniupita warmi caj cayno nin: “Runaläwanga respetanacärëmi, maycho caycarpis cuyanacärëmi. Imapis parlanapaj captenga parlapacunchimi, manami imatapis pacanchichu”. Casado vidacho mayganpis ‘majaläga respetamanmi’ ninanpäga, ¿imataraj ruranquiman? Mä parlarcushun Abrahanwan Sarapita.

16. ¿Imatataj runa cajcuna yachacärinman Abrahanpita? (1 Pedro 3:7, fotutapis ricay).

¹⁶ Abrahanga warmin Sarata respetarganmi, ima wilapashgantapis wiyajmi. Juc cuticho piñacurganpischu, Sarami alapa yarpachacuycunawan caycar imaycata Abrahanta nergan, jina imano ricacushgantapis payta culpargan. Abrahanga reguirganmi warminta, Saraga payta yanapajmi, respetuosa warmi cargan. Abrahanga masraj yarpachacurgan ima problematapis imano alchananpaj (Gén. 16:5, 6). ¿Imatataj yachacunchi? Musyanchimi familiachoga runa cajmi autoridäyoj caycan (1 Cor. 11:3). Pero warminta amatar cuyashpanmi japalanla imatapis decidinanpaj camäpacunchu (1 Cor. 13:4, 5). Utishga cashganraycur o imalapitapis yarpachacushganraycur warmiquega imalatapis öraga nircushunquichi. ¿Chauraga juclachuraj rabiacunqui o cuyaparchuraj pacienciawan wiyapanqui? (Leiriy 1 Pedro 3:7). Angelawan  Dimitri matrimoniuga 30 watacunanona casado caycan. Runan imano respetashganpita Angela cayno nin: “Runalä Dimitriga pacienciawan ima parlashgätapis wiyarcaman, öraga imatapis ofendiyparaj parlaycömi, pero payga manami piñacunchu”.

17. ¿Imatataj warmi cajcuna yachacärinman Sarapita? (1 Pedro 3:5, 6).

¹⁷ Sarapis runan Abrahán ima decidishgantapis respetarganmi (Gén. 12:5). Juc cuticho Abrahanga jäpa runacunata imalatapis garaycunanpaj wasinman yaycacamunanpaj nergan. Ichanga Sarawanga parlarganchu, jina mandargan tantacunata rurananpaj, payga chay hora ocupadash caycargan (Gén. 18:6). Saraga jinan hora ali shongulanwan runanta cäsucurgan. Warmicuna, Saranola runayquicunata cushi cushila yanapacäriptiquega alapa alimi canga. Chaypitami canga casado vidayquipis ali cananpaj (leiriy 1 Pedro 3:5, 6). Näga parlashganchi Dimitri hermanunchi warmin imano respetashganpita cayno nin: “Musyämi imata decidiptëpis warmiläga mana piñacuylapa ‘chayno cayculächun’ nimanmi. Imata decidishgäraycur pantarcuptëpis payga manami culpamar pengachimanchu. ¡Warmilä Angela chayno cashganpitaga agradecicömi!”. ¡Pitapis masraj cuyanchi respetuoso captinmi!

18. ¿Imanotaj casaducuna cawacärenga imaypis cuyanacuycarla carcaycaptenga?

¹⁸ Satanasga imaycatami canan wichan ruran majayoj cajcuna manana cuyanacärinanpaj. Payga musyanmi manana cuyanacäriptenga Jehovapitapis raquicärinanpaj cajta. Rasunpa cuyanacuy captenga, imapis ushacächengachu. Majayojcuna cuyanacärishganga mana upicäcoj nina japuy canman Cantar de los Cantares libro nishganno. Casado vidayquichoga Jehovami puntacho caycanman, juntula capäcunayquipaj tiempuyquicunata ali camacächiy y pacienciacoj car jucniqui jucniqui respetanacäriy. Chayno rurapäcuptiquega Jehová Diosninchimi alabashga cayculanga, paypitami shamun rasunpa cuyacuyga. Jina cuyanacärishgayquega imaypis mana upicäcoj shansha japuymi cayculanga.