1. ‘Cayta rurashaj’ niycarpis, ¿öraga imataj lapanchita pasamanchi?

 ÖRAGA nishwanmi ‘cayta wacta rurashaj’, pero hora chayamuptenga sasa ticracurin cumplinapaj. b Philip hermanunchega nirganshi ‘cananga shongüta mashtapayparaj masraj Diosta ruwacushaj’ nir, pero nircurga tiempuntaga mana shumaj camacächirganchu chayta rurananpaj. Erika paninchipis nirganshi ‘cananga predicanäpaj reuniunman tuta tutala chayashaj’ nir. Chayno nishga captinpis junagäpacojshi. Tomáš hermanunchipis Bibliata lapanta leinanpaj munargan. Ichanga cayno nin: “Bibliäta leirga uticashganomi ricacoj cä. Quimsa cutimi galaycunanpita leinäpaj calpachacurgä, pero Levítico librulamanmi chayargä”.

2. Diosta mastaraj sirvinapaj calpachacushganchi sasano ticracurishga captinpis, ¿imanirtaj guelanäcurishwanchu?

² Diosta sirvir mastaraj ruranayquipaj sasano ticracuriptinpis ama guelanäcuriychu. Alirämi calpachacunanchi Diospa naupancho imaycata ruranapaj. ‘Puedishänachu’ ninayquipaj trucanga aliraj calpachacuy, chaychomi ricacämunga Jehovata amatar cuyashgayqui. Lapan calpachacushgayquita Jehová ricaycanmi y puedishganchilata ruranapaj payga shuyaran (Sal. 103:14; Miq. 6:8). Chaymi jucninchi jucninchi yarpachacunanchi Diosta sirvir imata ruranapaj puedishganchi cajlaman. Chayman mayna yarpachacushga carga, ¿imataraj ruranquiman? Cananmi chaypita yachacushun.

3. ¿Imanirtaj imatapis ganaswanraj rurashwan?

³ Diosta sirvir mastaraj ruranapäga ganasniyojmi cananchi. Ganasninchi captenga Diosta sirvinanchipaj alapa calpachacushunmi. Ganasninchega barcucuna ali avanzananpaj ali pücaj vientunomi. Wayrapis pücaycarla caycaptenga barcucunaga chayangami aywashgan sitiuman. Chay japuylami pasacun Diosta sirvishganchichopis, ganasninchi captenga Jehovata sirvinapaj ima aunicushganchicunataga cumplishunmi. David hermanupita parlarcushun, payga El Salvador naciunpitami. Cayno nin: “Ganas ganasla y cushi cushila imapäpis listo caycarga masraj calpachacunchi Diosta sirvinapaj, ima aunicushganchitapis cumplinapaj”. Chauraga noganchipis paynola canapäga, ¿imatataj rurashwan?

4. ¿Imatataj Jehovata mañacushwan? (Filipenses 2:13, dibujutapis ricay).

⁴ Jehovata ruwacuy imatapis ganas ganasla ruranayquipaj. Espiritunwanmi Jehovaga yanapayculäshunqui ima aunicushgayquitapis cumplinayquipaj (leiriy Filipenses 2:13). Öraga nishwanchi ‘Dios mandaycämaptenga rurashächi’ nir; ichanga shongupitaga chayta ruraycanchichu. Chaypami pasargan Uganda naciunpita Norina paninchi. Payga Bibliapita yachachiyta munargan waquincunata pero malagana ricacoj, ‘nogaga ali yachachicoj warmi cächu’ nir. ¿Imataj payta yanapargan? Cayno wilacun: “Waran waranmi Jehovata ruwacurgä pilatapis Bibliapita yachachinäpaj ganasnë cananpaj. Quiquëpis calpachacurgä más shumajraj Bibliapita tantiachicunäpaj. Quillacuna pasarcuptenga cushi cushila ganaswanna caycargä. Chay wataga ishcay runacunata Bibliapita yachachiyta galaycurgä”.

5. ¿Imamantaj yarpachacushwan Diosta más ganas ganasla sirvinapaj?

⁵ Gamraycur Jehová ima rurashgancunaman yarpachacuy (Sal. 143:5). Apóstol Pabluga yarpachacurganmi Jehovapita lapan chasquishgancunaman, y chayshi yanapargan ganas ganasla y cushi cushila payta sirvinanpaj (1 Cor. 15:9, 10; 1 Tim. 1:12-14). Pablunola noganchipis Jehová imano yanapämashganchicunaman yarpachacurga yanapämäshunmi masraj Payta sirvinapaj (Sal. 116:12). Ricärishun imataj yanapargan Honduras naciunpita juc hermanata precursora regularno yanapacunanpaj. Paymi nin: “Jehová amatar cuyaycalämashganmanmi yarpachacurgä. Payga marcanmanmi pushamashga y cananga cuidaycämanmi. Chay lapanman yarparga masraj Tayta Jehovata cuyayculä, precursora regularman ticranäpäpis yanapaycalämashga”.

6. ¿Imataj más yanapämäshun ganas ganasla caycänapaj?

⁶ Calpachacushgayquiraycur imata tarinayquipaj cajman yarpachacuy. Erika paninchipita yapay parlarcushun. ¿Imataj  yanapargan horalancho predicaciunman chayananpaj? Paymi nin: “Predicaciunman tardiraj chayaptinchega, hermanucunawan saludanacuylatapis ni parlapacuylatapis puedinchinachu. Ichanga tempranula chayarga puedinchimi imano yachachicunapaj concejucunata wiyaylatapis”. Panilanchi Erika yarpachacurganmi predicaciunman tempranula chayashganraycur imano yanapänanpaj cajta. ¿Imata ruraptiquitaj gamtapis yanapäshunqui? Puntalapitana Bibliata imano leinayquipaj y Diostapis imano mañacunayquipaj calpachacushga carga, yarpachacuy chay lapanta ruraptiquega Jehovawan imano más amiguraj canayquipaj (Sal. 145:18, 19). Ali cristiano cayta munarga yarpachacuy imanotaj cayga yanapäshunquiman piwanpis ali goyäcunayquipaj (Col. 3:14). ¿Ima mastataj ruranquiman? Alichi canman imaraycur imatapis rurashgayquita anotacurcuptiqui, y chay anotacushgayquitaga gongaycuychu. Galanancho parlashganchi Tomáš wauguinchipis caytami nin: “Imatapis imaraycur rurashgäta yarpachacuptëga yanapämangami ima pasaptinpis cumplinäpaj”.

7. ¿Ima mastataj rurapäcurgan Juliuwan warmin Diosta masraj sirvinanpaj?

⁷ Shacyächicoj hermanucunawan juntacay (Prov. 13:20). Juliuwan warminga juc marcacho yanapacuytash munapäcurgan. Ima yanapashganpita cayno nin: “Juc marcapa Diospita yachachicoj aywacärinäpaj ali amigucunawan parlapacärergä. Paycunaga mayna chayno Diospita yachachicur caycargan, y concejuncunaga alimi cargan nogacunapaj. Jina cay shacyächicoj amigucunaga tapupäcamajmi ‘imaytaj viajapäcunqui’, ‘imataj pishiycan’ nir”.

8. ¿Imaraj pasanman ‘ganasnë captinraj cayta wacta rurashaj’ niptinchega? (Dibujutapis ricay).

⁸ Öraga ganasninchega imalapäpis canchu, chauraga ¿Diosta mastaraj sirvinapaj manana calpachacushunnachu? Manami. Barcupitawan wayrapita yapay parlarcushun. Ilajpita wayra ilacäcuptenga, ¿barcucunaga ichirashgalachuraj cacunga? ¿Imapis cuyuchinganachu? Manami, barcucunapäga motornin caycanmi, y chaywanga chayanmanchi maypa aywashganmanpis. Chay japuyla öraga calpalanchipis o ganasninchipis ichanga mana cangachu, pero chayga mana ninanchu Diosta mastaraj sirvinapaj manana calpachacunapaj. Imanomi barcucunata manejajcuna wayra mana captinpis imaycacunataraj rurapäcun barcuncuna avanzananpaj, chaynolami noganchicunapis Diospaj mastaraj ruranapäga maypitapis calpata ashinchi. Imacuna más yanapämänanchipaj cajta manaraj parlarga juc tapucuytaraj contestarcushun.

9. ¿‘Ganasnë mana canchu’ nirlachuraj Diosta sirviycashganchicho mastaraj rurashunnachu?

⁹ Jehovaga munan shongupita y cushishga paylata sirvinanchitami (Sal. 100:2; 2 Cor.  9:7). Chauraga, ¿imanirtaj Diosta mastaraj sirvinapaj calpachacushwan shongulanchicho ganasninchilapis mana captenga? Chaypaj parlar apóstol Pablo cayno nergan: “Cuerpöta duminanäpaj sumaj yachacächë” (1 Cor. 9:25-27). Cay textucho cuentata gocunchi Pabluga alapa calpachacurgan Jehovata sirvir mastaraj rurananpaj ganasnin cananpaj. Chayno calpachacushgantaga ali nawilanwanmi Jehová ricargan, y bendiciunnintapis goycurganmi (2 Tim. 4:7, 8).

10. Ganasninchi ushacashgano caycaptinpis, ¿imanoraj ricacushwan Diosta mastaraj sirvinapaj calpachacuptinchi?

¹⁰ Taytalanchi Jehovapis cushicunmi payta mastaraj sirvinapaj calpachacuptinchi, öraga ganasninchi walcala captinpis. Öraga ima rurashganchicunapis munashganchino camacanchu, pero payta amatar cuyarmi rurayculanchi. Pabluta bendicishgannolami noganchicunatapis bendeciycalämäshun (Sal. 126:5). Bendecimashganchita ricarga ganasninchipis yapay mirar galaycun. Polonia naciunpita Lucyna pani cayno nin: “Öraga utishga cashgäraycur predicaciunlamanpis yarguyta munächu; pero predicaciunpita wasëman cushishgala cutimushgäman yarparga yanapaycalämanmi yargunäpaj”. ¿Imataraj rurashun ganasninchi ushacashgano captin? Chaypita yachacushun.

11. ¿Imanotaj Jehová yanapämanchi ali controlacoj runa canapaj?

¹¹ Jehovata mañacuy ali controlacoj runa canayquipaj. Controlacoj runaga yarpashgantapis rurashgantapis controlanmi. Controlacoj runa carga manami yanapämanchichu mana ali cajcunalata mana ruranapaj, jina yanapämanchimi cushi cushila y ganas ganasla ali cajcunata ruranapäpis. Diospa espiritunta mañacuptinchimi ali controlacoj runaman ticrashun (Luc. 11:13; Gál. 5:22, 23). Galanancho parlashganchi David hermanunchega calpachacuytash munargan Bibliapita más shumajraj yachacunanpaj. Diosta mañacushganga yanaparganshi. Paymi nin: “Ali controlacoj runa canäpaj Jehovata mañacurgä. Payga yanapämarganmi. Cananga Bibliapitaga manami janan janalanga liyëchu”.

12. ¿Imanotaj yanapämanchi Eclesiastés 11:4 Diosninchipaj mastaraj ruranapaj aunicushganchita cumplinapaj?

¹² Imacunapis aliman ticranantaraj shuyaranquimanchu. Cay mana ali munducho cawaycarga manachi shuyaycäshunchu imacunapis munashganchino ali camacänantaraj. Diosninchita sirvir mastaraj ruranapäga ima pasaptinpis calpachacuycashwanmi (leiriy Eclesiastés 11:4). Dayniel jutiyoj hermanunchi cayno nin: “Cay munduchoga lapanpis ali camacashgalataga tarishunchu. Maquinchichomi caycan imatapis ali camacächinapaj”. Uganda naciunpita Paul jutiyoj hermanunchipis wilacamun imanirmi Diosninchipaj jucla arur galaycushwan, imacunapa pasarpis Diosninchipaj mastaraj ruranapaj camäpacurga payga bendeciycalämanchimi (Mal. 3:10).

13. ¿Imanirtaj ali caycan imacunatapis walca walcalapita galaycuptinchi?

¹³ Walca walcalapita galaycuy. Öraga pipis ninman “lapan aunicushgäcunaman yarpachacurga sasanomi cumplinapaj, ‘imayraj cumplishaj’ nirmi desanimacö”. Cay tapucuy ali caycan yarpachacunayquipaj: ¿Imataraj ruranquiman ali cristianuman ticrayta munarga?, ali canman imalachopis mejoranayquipaj calpachacuptiqui. Bibliatapis leiyta y yachacuyta mastaraj munaptiquega, alichi canman walca walcalapita galaycuptiqui. Näga parlashganchi Tomáš wauguinchipäga sasami cargan juc watalacho Biblia leiyta ushananpaj. Paymi nin: “Juc watalacho Biblia leiyta ushanäpäga sasami cargan nogapaj.  Chaymi yapay galaycunäpaj nergä, pero cananga ali yarpachacurcur walca walcalana leir. Chayno rurashgäga cushicuypämi cargan, y ganasnëpis miraycurgan”. Cushi cushila leishganraycur, Tomáš wauguilanchega tiempuwanga lapan Bibliata leirshi ushargan. c

14. ¿Imacunataj öraga pasamashwan?

¹⁴ Cayta gongashwanchu: imata ruranapaj ganasninchipis calpanchipis caycaptenga öraga yarpashganchinoga camacangachu. ¿Manachu ilajpita imacunapis pasamanchi y imata ruranapaj aunicushganchitapis cumplinchinachu? Aumi, chaynomi öraga (Ecl. 9:11). Jinamanpis ¿manachu problemacuna cashganraycur öraga calpaynaj caycar laquishgala ricacunchi? Aumi (Prov. 24:10). Y juchasapa cashganchiraycur Diosta sirviycashganchicho pantarpis pantarishunchi (Rom. 7:23). Y mana chaylachu, öraga pasaypa uticashgami ricacunchi (Mat. 26:43). ¿Chaycunapa pasarga imaraj yanapaycalämäshun?

15. ¿Imanirtaj sasacunapa pasaptinchipis guelanäcurishwanchu? (Salmo 145:14).

¹⁵ Ichic pantashganchilapitaga ama nishunchu ‘puedënachu’. Bibliaga wilacunmi imayca problemacunapa pasanapaj, ichanga clarumi wilacun Jehovapa calpalanwanga imaycatapis vencircur voluntäninta ruranapaj (leiriy Salmo 145:14). Näga parlashganchi Philip hermanunchipis cayno nin: “Nogaläga manami yarparaycächu imacunacho pantashgaläman. Nogaläga yarparaycä alicunalata rurashgäman y Diosta sirvinäpaj decidido caycashgäman”. David hermanunchipis cayno nin: “Imay junajlapis sasacunapa pasaptëga chaychomi ricacämun Jehovata amatar cuyashgäta”. Cay hermanucunanola noganchicunapis imayca problemacunapa pasarga y guepaman mana cuticurga, chaycho ricacämunga Jehovata amatar cuyashganchita.  Mayraj Taytalanchi Jehová cushicun payta mastaraj sirvinapaj calpachacuptinchi.

16. ¿Imanirtaj öraga ali canga puedishganchilata ruranapaj yarpachacuptinchi?

¹⁶ Imacunapapis pasashgayquipitaga yachacunquimanmi. Alichi canman cay tapucuyta ruracuptiqui: “¿Imataraj ruräman imacunapis guepaman mana cutichimänanpaj?” (Prov. 27:12). Öraga Diosta sirvir mastaraj ruranayquipaj ima metamanpis chayanquichu. Pero Diospa marcancho jucnopapis yanapacunayquipäga caycanrämi. Waquincunaga metancunaman yarpachacur nipäcunmi ‘caytaga puedishajmi, caytaga manami’, chayga alapa alimi. d Jehovaga manami nimäshunchu payta sirvir mana puedishganchi cajta ruranapaj (2 Cor. 8:12).

17. ¿Imanirtaj gongashwanchu Diosta sirvir canancama rurashganchicunata?

¹⁷ Yarpaycuy Diosta sirvir canancama rurashgayquicunata. Diospa Palabran nin: “Imano ñacarpis payman yäracushayquitaga Tayta Diosninchi manami gongangachu” (Heb. 6:10). Gampis ama gongaycuychu. Canancamaga maynachi bautizacushcanqui, maynachi Diospita yachachicuycanqui. Jehovapa amigunman ticranayquipäpis calpachacuycanqui. Diosta mastaraj sirvinayquipaj canancama calpachacushgayquega, yanapäshunquimi canan wichanpis Diosta sirvishgayquicho masraj calpachacunayquipaj (Filip. 3:16).

18. ¿Imatataj gonganquimanchu Jehovata sirvir mastaraj rurashgayquicunacho? (Dibujutapis ricay).

¹⁸ Jehovaga yanapäshunquimi payta masraj sirvinayquipaj calpachacuptiqui; ‘unaycho imata ruranäpaj aunicushgäta cumplishcämi’ ninquiraj. Imanomi barcucunata manejajcuna cushishgala ricacun aywashgan sitiuman ali calpachacur chayaptin, chaynolami gampis ricacunqui. Jina barcucunata manejajcunaga imaycacunata ricachacur cushi cushilami viajapäcun. Chaynolami gampis Diosta sirvir calpachacushgayquiraycur waran waran cushishgala caycanquiman (2 Cor. 4:7). Chayno captenga achca bendiciuncunatami Jehová tarichishunqui (Gál. 6:9).