1, 2. ¿Öraga imacunatataj tapucushwan?

 ¿IMAYLAPIS nishcanquichu ‘Jehová wiyanchuraj mañacushgäta’ nir? Öraga lapanchicunami chayno tapucunchi achca problemacunapa pasarga. Canan hora imayca nacaycunapa pasaycaptiquega sasanochi caycan cuentata gocunayquipaj mañacushgayquita Jehová contestashganta.

² Cuyashgan siervuncuna mañacushgantaga Jehová wiyanmi, chaypitami canan yachacushun (1 Juan 5:15). Jina yachacushunpis imanirtaj öraga mañacushganchicuna Jehová mana wiyashganno canman, yachacunapäpis canga imacunata rurartaj Jehová wiyaycalämanchi.

3. ¿Imanirtaj Jehová munan payta mañacunanchita?

³ Bibliata leirga yachacunchimi Jehová amatar cuyaycalämashganchita (Ageo 2:7; 1 Juan 4:10). Chauraga cuyapämashpanchimi payga munan imacunapa pasarpis mañacunanchita (1 Ped. 5:6, 7). Mana raquicäcunapämi yanapämänanchipaj listo caycan, munaycanmi imaycatapis aguantananchita.

4. ¿Imanotaj musyashwan cuyashgan siervuncuna mañacuptin Jehová wiyashganta? (Dibujutapis ricay).

⁴ Bibliata leirga ricanchimi imanotaj Jehová unay sirvejnincuna mañacuptin pay contestargan. Jucnin caj cargan rey David. Payga imayca nacaycunapa pasargan, pero cutin cutinmi shongunta mashtapar Jehovata ruwacurgan yanapänanpaj.  Juc cuticho cayno mañacurgan: “TAYTA DIOS, mañacaycämushäta wiyaycamay. Ruwacaycämushäta wiyaycuy ari. Yanapaycamay ari. Gamga allimi canqui. Aunishayquitaga cumlinquimi” (Sal. 143:1). Chayno mañacushgantaga Jehová wiyarganmi (1 Sam. 19:10, 18-20; 2 Sam. 5:17-25). Chaypitaga caytanami alapa yäracur nergan: “TAYTA DIOSGA llapan shongunpa mañacojcunata yanapanmi”. Ali yäracur David chayno nishgantaga noganchipis nishwanmi (Sal. 145:18).

5. ¿Sirvejnincuna lapan mañacushgantachu Jehová goycun? Pablupita parlacaramuy. (Dibujutapis ricay).

⁵ Öraga lapan mañacushganchita munashganchino Jehová contestaycalämäshunchu. Juc cuticho apóstol Pablo quimsa cuti Diosta ruwacurgan nacaycashganpita librananpaj. Cuerpunchoshi casha caycajno ‘fiyupa nacaycargan’. ¿Wiyarganchu Jehová chayno Pablo mañacushganta? Aumi, ichanga chay nacaypita librananpa trucanga, calpatami gorgan aguantananpaj (2 Cor. 12:7-10).

6. ¿Imanirtaj öraga mañacushganchita Jehová mana wiyashganno canman?

⁶ Mayraj noganchipis cutin cutin Diosta mañacunchi. Pero Taytalanchi Jehovami musyan imano yanapaycalämänanchipaj. Payga “mañacushanchïpitapis, yarpashanchïpitapis masta yanapämanchi” (Efes. 3:20). Chauraga yäracuycäshunla, payga imay horapis imanopapis contestamäshunmi.

7. Diospa voluntäninman yarpar, ¿öraga imanonataj mañacushwan? Martin hermanupita parlacaramuy.

⁷ Diospa voluntänin ima cashganta masraj yachacurga tantiashunmi imata mañacunapäpis. Martin Poetzinger hermanupita parlarcushun. Casaracushganpita ichic tiempulachomi preso apapäcurgan. Wichgashgana caycarshi payga warminta laquipar Diosta ruwacurgan wasinman cutinanpaj y predicarpis siguinanpaj. Pero semanacuna pasaptinpis wichgashgalash caycargan. Chaypitanash hermanulanchega caynona Diosta ruwacurgan: “Yanapaycalämay, imata ruranätataj munayculanqui”. Nircurpis yarpachacurganshi paynola preso caycaj waquin hermanucunapaj. Paycunapis warmincunawan ni wamrancunawan junto caycarganchu. Chaymi hermanulanchi Martin Poetzinger caytana Jehovata mañacurgan: “Canan musyäna imata ruranäpaj. Yanapaycalämay hermanuläcunata shacyächinäpaj”. Y rasunpash  chayta rurargan isgun watacuna carcelarashga cashgancama.

8. ¿Imamantaj yarpachacunanchiraj Diosta mañacurga?

⁸ Ama gongashwanchu, lapan aunicushgantaga cumplirmi Jehová galaycungana. Ushacächinanpäna caycan lapan nacachimashganchicunata, cay Pachacho imayca desgraciacunata, jina wanuytapis. Gobiernunwanmi lapanta ruranga (Dan. 2:44; Apoc. 21:3, 4). Canan wichan ichanga cay munduga Diablupa maquinchoraj caycan (Juan 12:31; Apoc. 12:9). b Diablo gobernaycamuptin lapan nacaycunata Jehová ushacächiptenga, pipis ninmanchi ‘Diablo gobernamuptinpis alimi cawacuycanchi’ nir. Chauraga cay munducho ali cawayta Jehová apamunanpaj shuyaraycaptinpis, payga mayna yanapaycämanchi. ¿Imanotaj chayta ruraycämun? Ricaycushun.

9. ¿Imatataj Jehová goycalämanchi ali decidinapaj? María hermanapita parlacaramuy.

⁹ Yachaj canapaj yanapämanchi. Diosninchi Jehová yachayta gomaptinchiraj ali cajcunata acrashun. Y caway vidanchichoga imaycapäpis yachaj runami cayta munanchi, masraj pipis yarpaycaptin casaracunanpaj o mana (Sant. 1:5). Ricarcushun paninchi María c imapa pasashganta. Payga cushi cushilash precursora regularno Jehovata sirviycargan, chaycho juc hermanuwan reguinacurgan. Paymi wilacun: “Tiempuwanga ali amiguna car ishcäcuna cacuytana munapäcurgä. Chauraga imata ruranäpaj shumaj yarpachacurgä. Chaymi Jehovata shongüta mashtapargä yanapämänanpaj. Ima captinpis quiquëpa maquïchomi caycargan imata decidinäpaj”. Paninchi María cuentata gocurgan yachayta goycur Jehová yanapashganta. Payga publicaciunninchicunata leishganchomi ima ashiycashgantapis tarergan. Mamäninpis ali consejucunatash gorgan ali tantiarcur piwanpis cacunanpaj o mana. Chaypitaga yachaywan Mariaga decidirgan imata rurananpaj cajta.

10. Filipenses 4:13 texto nishganno, ¿imanotaj sirvejnincunata Jehová yanapan? Benjamin hermanupita parlacaramuy. (Fotutapis ricay).

¹⁰ Diosga calpantapis goycalämanchimi. Musyanchimi unay tiempucho apóstol Pabluta Jehová yanapashganta, chaynolami noganchitapis imaycata aguantanapaj calpanwan yanapämäshun (leiriy Filipenses 4:13). Benjamin hermanunchipita parlarcushun. Jovinlaraj cashgan wichanpitami marcanpita gueshpiypa aywacurgan y familianwan achca watacunapa África naciuncho  imayca nacaycunapa pasargan. Paymi nin: “Jehovatami mañacurgä ali cajlata ruranäpaj calpanta goycalämänanpaj. Payga mañacushgätaga wiyarganmi, chaypitaga jaucala ricacurgä y valurcharcurgä predicanäpaj y publicaciuncunata leinäpäpis”. Caytapis ninmi: “Waquin Testigucuna imacunapa pasashganta y paycunata imano Jehová yanapashganta leishgäpis yanapämarganmi”.

11, 12. Mañacushganchita wiyamänanchipaj, ¿imanotaj hermanunchicunawan Jehová yanapaycalämanchi? (Fotutapis ricay).

¹¹ Hermanunchicunawanpis yanapämanchimi. Wanunanpäna caycaptinmi Jesusga ruwacuyparaj Taytanta mañacurgan. Aumi, ruwacurganmi Diospa contrancho lutanta parlaj runacuna nishganpita librananpaj. Pero jinan hora chaypita Jehová libraycunanpaj trucanga juc angeltami mandargan shacyächinanpaj (Luc. 22:42, 43). Chaynolami canan wichanpis Diosninchega maygan hermanulawanpis yanapämanchi, paycunaga mayna gayaycämanchi o imanolapapis watucaycämanchina. Jucninchi jucninchi shacyächinacurmi ‘ali shimilapa’ cushi cushila parlapacushwan (Prov. 12:25).

¹² Paninchi Míriam imapa pasashganpitapis parlarcushun. Runan wanushganpita juc ishcay semanacuna pasarcuptenga wasinchomi japalan alapa laquishga caycargan. Laquesalawan caycashgan öraga wagaycarlash cacurgan. Paymi nin: “Calpaläpis carganchu pilatapis gayacunäpaj, chaymi Jehovata mañacurgä. Chay hora wagapayparaj mañacuycaptëmi juc anciano gayacamargan. Payga ali amigulämi cargan”. Aumi, cay ancianuga warminwan ishcanshi Miriamta shacyächergan, y Miriamga segura caycan lapanpa guepancho quiquin Jehová caycashganta.

13. ¿Imanotaj unaypis cananpis Jehovaga sirvejnincunapa mañacuynincunata contestamun payta mana sirvejcunawanpis?

¹³ Diosta mana sirvejcunawanpis yanapämanchimi (Prov. 21:1). Öraga jäpa runacunatapis Jehová shongunta yataycunmanmi yanapaycalämänanchipaj. Chayta pasargan Artajerjes reywan, payga Nehemiasta  permisuta gorgan Jerusalenpa murallancunata yapay sharcachinanpaj (Neh. 2:3-6). Chaynolami canan wichanpis mana Testigo cajcunapis imalachopis yanapämanchimi, Jehovami caycashga paycunapa guepancho.

14. ¿Imataj yachacunchi Soo Hing pani imapa pasashganpita? (Fotutapis ricay).

¹⁴ Soo Hing paninchipis ricarganmi Jehová imano juc doctorwan yanapashganta. Paypa wamranga uma nanay gueshyawanmi nacan y chayraycurshi juc cutichopis fiyupa tuniycurgan. Chayshi Soo Hing paninchi y runanpis trabajunta jaguiripäcurgan wamranta cuidapäcunanpaj. Y chayraycur guellayninpis ushacargan. Soo Hing paninchega alapa laquicuymanshi chayargan y calpalanpis cargannachu. Chauraga shongunta mashtaparmi Jehovata mañacurgan yanapänanpaj. Chaypitanash wamranta atiendej doctorga imayca necesitashgancunacho yanapacur galaycurgan, gobiernumanpis aywargan yanapänanpaj y wasitapis más baratula pagananpaj tarichergan. Chay lapanman yarparmi Soo Hing panilanchi cayno nin: “Lapan alicuna pasapäcamashganpa guepanchoga quiquin Jehovami caycashga. Payga mañacushganchicunata wiyaycalämanchimi” (Sal. 65:2).

15. ¿Imatataj juc cristiana rurargan mañacushgancunata Jehová contestaycashganta cuentata gocunanpaj?

¹⁵ Mañacushganchita Jehová contestamunanpäga manami jatun milagrutarächu rurapämäshun. Ichanga imano yanapaycalämashganchega paypita mana raquicäcunapämi canga. Chaymi aliraj cuentata gocunanchi imano contestaycämanchi. Yoko paninchega mañacushganta Jehová mana contestashgantash yarpaycargan. Chaypitanash payga nergan ‘mä guelgaycushaj Jehovata lapan mañacushgäta’ nir. Tiempuwanga leiparganshi lapan guelgashgancunata, y cuentata gocurgan Jehovaga casi lapan mañacushganta contestashganta, ‘mañacushgätaga gongashgäna cargan’ chayno jina nirganrächi. Chaynola noganchipis aliraj yarpachacunanchi mañacushganchicunata imano Jehová contestaycashganta (Sal. 66:19, 20).

16. ¿Yäracoj cashganchi imanotaj yanapämanchi mañacushganchicho? (Hebreos 11:6).

¹⁶ Jehovata mañacunapäga manami yäracunalanchichu,  sinoga imano contestaycalämashganchitapis chasquicushwanmi (leiriy Hebreos 11:6). Mike y Chrissy matrimoniupita parlarcushun, paycunaga Betelcho sirviytash munapäcurgan. Mike cayno nin: “Achca cutimi solicitudnëcunata apachicärergä y cutin cutinmi Jehovata ruwacärergä chaypaj, pero manami invitapäcamarganchu”. Imano captinpis cay matrimoniuga Jehovamanshi yäracärergan, ‘Paymi musyan maycho sirvinanchipäpis’ nir. Imaycata Jehovaraycur rurapäcurgan, precursor regularno y saloncunata sharcachiychopis yanapacärergan. Cananga congregaciuncunata watucojno yanapacurcaycan. Mike cayno nin: “Öraga Jehová lapan mañacushganchitapis goycalämashcanchichu, pero contestaycalämashganchimi ima mañacushganchita y mana yarpashganchipitapis masraj cashga”.

17, 18. ¿Imapitataj seguro caycashwan Salmo 86:6, 7 textucuna wilacushganno?

¹⁷ (Leiriy Salmo 86:6, 7). Davidga segurumi caycargan ima mañacushgantapis Jehová contestashganta. Chaynolami noganchitapis Jehová contestaycalämäshun. Guepa parrafucunacho yachacushcanchimi sirvejnincunata imano Jehová calpanta y yachayninta goycun. Jina yachacushcanchimi hermanunchicunawanpis y hasta jäpa runacunawanpis Jehová yanapaycalämanchi imaycacunata aguantanapaj.

¹⁸ Öraga ima mañacushganchitapis munashganchino Jehová goycamäshunchu, pero ama gongashunchu, payga contestaycalämäshunmi. Payga musyanmi ima necesitashganchita y tiempulanchomi goycalämäshun. Ali yäracur mañacuycäshunla, Jehovaga canan wichanpis shamoj tiempuchopis cuidaycalämäshunmi, “kuyaparmi lapan kawaqkunapaqpis” bendiciunninta churamunga (Sal. 145:16).