1. ¿Imata ruranapaj Jehová nimanchi? (Fotucunatapis ricay).

 PIPIS shogamänanchita o pushamänanchita munarga, ¿pitataj mañacunchi? Noganchega musyanchimi chaytaga Jehovata mañacunapaj. Quiquinmi chayta ruranapaj mañamanchi. Payga cada cadala paywan parlanapaj munan, chaymi Palabrancho cayno nimanchi: “Imay hörapis manakäriy” (1 Tes. 5:17). Jehovataga mana manchacuypa parlapashwanmi y lapan cawayninchicho pushamänanchipaj mañacushwan (Prov. 3:5, 6). Pay alapa ali captin, imay horapis ayca cutipis mañacunapaj munan.

2. ¿Imatataj cay yachacuycho ricärishun?

² Jehovata mañacushganchega jatun regalo japuymi. Ichanga öraga imayca ruraycunawan caycar sasami canman payta mañacunapaj. Öraga capaz yarpanchipis mañacuyninchita shumajyächinapaj caycashgantaraj. Chaypäga Bibliacho caycaj consejucuna yanapaycalämäshunmi. Cay yachacuycho ricärishun imano tiempunchita jorgushwan mañacunapaj Jesús rurashganno. Jina ricashun pichga yanapacuycunata imanomi mañacuyninchicunata shumajyächinapaj.

3. ¿Imataj Jesusga musyargan?

³ Jesusga musyarganmi mañacuyninchicuna alapa ali cashganta Jehovapaj. Cieluchoraj caycaptin payga ricargan imano Taytan sirvejnincuna mañacushgancunata contestashganta. Jesusga Taytanpa laduncho caycargan Anapa,  Davidpa, Eliaspa y waquin sirvejnincunapa mañacushgancunata contestaptin (1 Sam. 1:10, 11, 20; 1 Rey. 19:4-6; Sal. 32:5). Chaychi discipuluncunata Jesús nergan mana manchacuypa imaypis mañacärinanpaj (Mat. 7:7-11).

4. ¿Imatataj Jesús imaypis rurargan?

⁴ Jesusga manami shimilapitachu discipuluncunata nergan mañacunanpaj. Paypis Taytanpita runacunata yachachir imaypis mañacoj. Achca runa gatirpaptinpis o imayca ruraynincunawan caycaptinpis tiempunta camacächergan mañacunanpaj (Mar. 6:31, 45, 46). Öraga chaca chacala sharcoj Papäninwan parlananpaj (Mar. 1:35). Juc cutichomi waraytaraj mañacurgan discipuluncunata acrananpaj (Luc. 6:12, 13). Manaraj wanur chacaychopis Jehovata cutin cutinmi mañacurgan, payga musyarganmi ichiclacho rurananpaj caycashganga alapa sasa cananpaj cashganta (Mat. 26:39, 42, 44).

5. Jesús rurashganno, ¿imataj rurashwan imaypis mañacunapaj?

⁵ Jesús rurashganga yachachimanchi imayca ruraycunawan caycarpis tiempunchita jorgushwan Jehovata mañacunapaj. Jesús rurashganno camacächishwan imay y ayca cuti mañacunapaj, chaypäga capaz tuta tutala sharcushwan y manaraj mañacur punurpis aywashwanchu. Chaynopa valuranchi Jehovawan parlanapaj camacächishganta. Panilanchi Lynne alapa agradecida caycan Jehovata mañacur paywan parlaycashganta yachacushganpita. Payga wilacun: “Imay horapis mañacuptë Jehová wiyaycamashganta musyarga, Payta rasunpa amigütano ricayta galaycurgä y ‘mañacushgäcunata masraj shumajyächishaj’ nirgäpis”. Noganchipis chaynochi ricacushcanchi. Cananga ricaycushun pichga yanapacuycunata mañacuyninchicunata shumajyächinapaj.

6. Apocalipsis 4:10, 11 nishganga, ¿imataj tantiachimanchi?

⁶ Jehovata alabashwan. Juc visiuncho apóstol Juan ricargan 24 ancianucuna cielucho Jehovata aduraycashganta. Paycunaga Diosta alabapäcuycargan y reconöcirgan paylami munayniyoj cashganta ‘alabashga, respetashga y adurashga’ cananpaj  (leiriy Apocalipsis 4:10, 11). Angelcunapis Jehovata cuyar respetapäcun y alabapäcun. Cielucho caycashpan paycunaga Jehovata shumaj reguipäcun. Lapan rurashgancunata ricaycur musyapäcun Jehová imano cashganta, chaymi lapancuna paylata alabapäcun (Job 38:4-7).

7. ¿Imanopataj mañacuyninchicho Jehovata alabanchi?

⁷ Noganchipis mañacuyninchicho Jehovata alabashwanmi. Chaytaga ruranchi paypita imata gustamashganchita y imanir respetashganchitapis niptinchi. Bibliata leir y leishganchiman yarpachacurga shumaj tantiarcushwan imata Jehovapita gustamashganchita (Job 37:23; Rom. 11:33). Nircur mañacushganchicho Jehovata wilapashwan imano cashganman yarpachacushganchipita. Jina Jehovataga alabashwanmi quiquinchita y lapan hermanunchicunatapis yanapämashganchipita. Payga imaypis noganchipaj yarpachacun y chapämanchipis (1 Sam. 1:27; 2:1, 2).

8. Jehovata mañacurga, ¿imacunapitataj agradecicushwan? (1 Tesalonicenses 5:18).

⁸ Jehovata agradecicushun. Imaycacuna caycan Jehovata agradecicunapaj (leiriy 1 Tesalonicenses 5:18). Lapan alicunata charashganchicunapita agradecicushun, Paylapitami ima bendiciuncunapis shamun (Sant. 1:17). Chaymi, ¿manachuraj graciaslä nishwan cay cawaycashganchi Pacha cuyaylapaj captin? Jina cawayta goycalämashganchipita, familianchipita, amigunchicunapita y shamoj tiempucho imata chasquinapaj cajpitapis agradecicushwan. Aumi, mana uticaypa graciaslä nishwan, payraycurmi familian rurinchopis caycanchi.

9. ¿Imanirtaj öraga sasa ticracurin agradecido runa canapaj?

⁹ ¿Imanirtaj jucninchi jucninchipis agradecido runa cashwan? Öraga sasa ticracurinman agradecido runa canapaj. ¿Imanir? Cay munducho runacunaga pasaypa desagradecido capäcun, munashgancunalaman yarparmi mana yachanchu ‘gracias’ niylatapis. Noganchipis chay runacunano carga munashganchicunalatachi Diosta ruwacuycashwan. Pero chayno mana cananpäga, noganchicuna waran waranmi Jehovata agradecicushwan lapan goycalämashganchicunapita, chaynopa agradecicoj runa cashun (Luc. 6:45).

10. ¿Imatataj juc cristiana rurargan agradecida cashpan? (Fotutapis ricay).

¹⁰ Agradecido runa carga yanapämäshunmi sasacunapa pasaptinchi. Mä parlarcushun Kyung-sook paninchipita, paypitaga La Atalaya 15 de enero, 2015 revistanchi wilacamurgan. Paytash doctorcuna nipäcurgan pulmonnincho cáncer gueshya caycashganta. Paymi cayta wilacun: “Chay gueshyawan caycashgäta musyarga pasaypa laquicuypämi nogapaj cargan. ‘¿Imapänataj cawashaj’ nirmi manchacurgä”. Payshi manaraj  punucur wasin jananman wicharcur chay junaj ima pasashganpita pichga cosascunapita Jehovata agradecicoj. Chayno rurarshi Jehovata mastaraj cuyaj. Imayca laquesacunapa pasashganchomi payga ricargan Jehová yanapacoj Dios cashganta, jina cuentata gocurgan caway vidachoga manami problemacunalachu caycan, bendiciuncunami ichanga masraj caycan. Kyung-sook cristiana pasashganno, noganchipis mana gongashwanchu Jehovata agradecicunapaj. Payga yanapämäshunmi imayca pruebacunata aguantanapaj y mana yarpachacuycarla cawanapaj.

11. ¿Imanirtaj aliraj cargan Jesuspa discipuluncuna valurcharcärinanpaj?

¹¹ Ali valurcharcur predicanapaj Jehovata ruwacushun. Cielupa cuticunanpäna caycarmi Jesusga gatejnincunata yarpächergan ali wilacuyta apapäcunanpaj “Jerusalencho, Judea probinsyacho, Samaria probinsyacho, may-chay nasyunchöpis” (Hech. 1:8; Luc. 24:46-48). Chay wichancunalachomi pushacoj religiosucunaga Pedrutawan Juanta carcelmanpis y autoridäcunapa naupanmanpis apapäcurgan. Wanuchinanpaj juraparmi mandapäcurgan manana yachachicärinanpaj (Hech. 4:18, 21). ¿Imatataj cay ishcay apostulcuna rurapäcurgan? 

12. ¿Imatataj discipulucuna rurapäcurgan Hechos 4:29, 31 texto nishganno?

¹² Chiquejnincuna wanuchinanpaj juraycaptinpis Pedruwan Juanga caytami nipäcurgan: “Shumaq tantiyakäriy, taytakuna. ¿Aliku kanman Tayta Diosta cäsukunäpa trukan qamkunata cäsukäriptï? Rikashqäta y mayashqätaqa manami upälakärïmantsu” (Hech. 4:19, 20). Pushacoj religiosucuna cacharcäriptinshi cay ishcay apostulcunaga waquin discipulucunawan juntacärergan. Nircurga lapancunana Jehovata ruwacärergan voluntäninta rurapäcunanpaj. Cayno nir: “Kanan yanapaykalämay wilakuynikita mana mantsakuypa wilakärinäpaq”. Chayno mañacärishgantaga Jehová contestarganmi (leiriy Hechos 4:29, 31).

13. ¿Imatataj yachacunchi Jin-hyuk hermanulanchipita?

¹³ Imaylapis autoridäcuna predicanapaj michämaptinchega unay discipulucunaman yarpashwan. Chaytami Jin-hyuk hermanunchi rurargan, paytaga Diosta sirvishganraycurmi carcelcho wichgargan. Chaycho caycaptinshi payta nergan waquin presucunata atiendinanpaj. Ichanga pitapis Bibliapita parlapänanpäga michärerganshi. Pero payga Jehovata ruwacurgan valurta gonanpaj pilawanpis tincuptin imanolapapis Bibliapita parlapänanpaj (Hech. 5:29). Quiquinmi cayno wilacun: “Jehovaga mañacushgäta wiyaycalämarganmi, valurtapis yachaytapis goycalämarganmi. Chaynopami achca carcelarashga caycajcunawan cuartunpa punculancho pichga minutulacho Bibliapita yachachir galaycurgä. Chacaypapis cartacunata ruraj cä waraynin junaj mayganlatapis macyarcunäpaj”. Jin-hyuk hermanulanchi rurashgannomi, noganchipis Jehovata ruwacushwan valurtapis yachaytapis goycalämänanchipaj, Diosninchega yanapaycalämäshunmi paypita yachachicur siguinanchipaj.

14. ¿Imataj yanapämäshun problemacunapa pasarpis laquishgala mana caycänapaj? (Salmo 37:3, 5).

¹⁴ Jehová Diosta mañacushun ima problemacunapa pasarpis laquishgala mana ricacunapaj. Mayraj canan hora  mayganchilapis alapa laquishga caycanchi castanchi wanushganraycur, chiquishga marcacho tiyashganchiraycur o ima gueshyaraycurlapis. Pandemiaraycurpis guerracunaraycurpis masrächi nacashganchipis. Chaymi Jehovataga shongunchita mashtapäshun. Payga cuyapäcoj Taytalanchimi. Yanapämänanchipäga listumi caycanga (leiriy Salmo 37:3, 5).

15. ¿Imanotaj mañacushganchega yanapämanchi imayca sasacunapa pasarpis? Juc cristiana pasashganpita wilacaramuy.

¹⁵ Waran waran mañacushganchimi yanapämäshun imayca nacaycunata aguantanapaj (Rom. 12:12). Jehovaga musyanmi ima nacaycunapa pasashganchita, ‘ausiliuta mañacuptinchega’ wiyamanchimi (Sal. 145:18, 19). Mä parlarcushun 29 watayoj precursora yanapacoj Kristie paninchipita. Ilajpitami saludnin laquicuypa ticrarergan. Chayraycurga alapa laquesalawan cawar galaycurgan. Mana chaylachu, tiempuwanpis mamäninta fiyu gueshya chariycurgan. Kristie cayno wilacun: “Waran waranmi shongüta mashtapar Jehovata ruwacurgä calpalanta goycalämänanpaj. Jinamanpis reuniunnëcunamanga mana fallargächu, Bibliapitapis yachacuycarlami caycargä”. Caytapis ninmi: “Nacaycar wagaycar cashgä horacunachopis Jehová yanapämashgami. Payga ladulächomi imaypis caycashga. Aliyarcunäpaj tiempuraj pasashga captinpis, waran waranmi jaucala ricacurgä”. Ama gongashunchu “Tayta Dios munangannuy cawagcunataga nacaypita pay jorguyta musyanmi” (2 Ped. 2:9).

16. ¿Imanirtaj Jehovata ruwacushwan mana ali ruraycunaman mana ishquinapaj?

¹⁶ Mana ali ruraycunapita libracunapaj Jehovata mañacushun. Juchasapa cashganchiraycurmi, imaycataraj rurananchi alicunalata ruranapaj. Satanaspis más pruebacunataraj churapämanchi juchacunaman ishquinapaj. Jucnin caj caycan cushicunapaj  yargamoj ganra ruraycuna. Chaypita mana cuidacurga yarpayninchipis ganratacäcunga y Jehovapa ricayninpäpis mana ali caycäshun (Mar. 7:21-23; Sant. 1:14, 15).

17. Mañacushgana caycarpis, ¿ima mastataj rurashwan? (Fotucunatapis ricay).

¹⁷ Ima tentaciuncunatapis quiquinchicunalaga manami venciyta puedishunchu, Jehovatarämi mañacunanchi. Juc cuti Jehovata mañacushgancho Jesús cayno nergan: “Jucha rurayman Satanás chayachimänanpitapis chapaycallämay ari” (Mat. 6:13). Jehová yanapämänanchipäga ruwacunanchimi. Mañacushgana carpis manami chaylachu. Jucninchi jucninchimi calpachacunanchi ima jucha ruraymanpis mana ishquinapaj. Ima tentaciunlapis captenga jucla witicurishwan (Sal. 97:10). Umalanchi ali yarpayniyojla cananpäga Bibliapitami shumaj yachacunanchi, reuniunman aywananchi y Diospita yachachicojpis yargushwanmi. Ima pruebacunapapis pasarga Jehová jaguirimäshunchu, payga calpalanta gomänanchipaj aunicush (1 Cor. 10:12, 13).

18. ¿Imatataj jucninchi jucninchipis rurananchi?

¹⁸ Cay ushanan tiempucho riccha ricchala caycänapäga mana gongaylapa cada cadalami Diosta mañacunanchi. Jehovaga munan shongunchita mashtapänapaj (Sal. 62:8). Chaypäga tiempunchitami ali camacächinanchi ‘alabado cayculay Tayta Dios’ nir agradecicunapaj. Mañacuy ali valurcharcur predicanayquipaj, ima problemacuna captinpis alapa laquicuycarla mana caycänayquipaj, ima tentaciuncuna captinpis aguantanayquipaj. Diosninchita cushi cushila mañacunayquipäga imapis michäshunquimanchu. Y ¿imanotaj musyanchi lapan mañacushganchita Dios wiyashganta? Chaypitaga gatejnin cajchona yachacushun.