1. ¿Imataj Jehová amigun Abrahanta yachachergan?

 JUC cuticho Abrahán Jehovawan parlashgantaga manachi gongarganchu. Jehová juc angelwan Abrahanta musyachergan Sodoma y Gomorra marcacunata ushacächinanpaj. Abrahán Diosman alapa yäracurpis, shumaj manami tantiarganchu Jehová imata rurananpaj cajta, chaymi tapurgan cayno nir: “¿Jutsasapa runakunata ushakätsirqa ¿jutsaynaq kaqkunatapis ushakätsinkitsuraq? […] Lapan runakunapa jueznin kaykarqa jutsaynaq [o alita ruraj] runakunatapis ¿ushakätsinkimantsuraq?”. Jehovaga cuyacuywanmi amigun Abrahanta yachachergan alita ruraj runacunata manami imaypis ushacächinanpaj. ¡Chayta musyarga noganchitapis cushichimanchi! (Gén. 18:23-33).

2. ¿Imanirtaj seguro caycanchi Jehová pitapis juzgaptin cuyapäcoj cashganta y manami imaypis pantanchu?

² ¿Imanirtaj seguro caycanchi Jehová pitapis juzgaptin cuyapäcoj cashganta y manami imaypis pantanchu? Payga ricanmi pipis shonguncho imano cashganta (1 Sam. 16:7). Aumi, ‘cada ununchi’ shongunchicho ima yarpashganchitapis musyanmi (1 Rey. 8:39; 1 Crón. 28:9). Jehovaga alapa yachajmi, chaymi öraga pitapis imano juzgashgantaga manami shumaj tantiayta puedinchichu. Pablupis Jehovapita parlar, cayno nergan: “¡Pay yarpashqankunata y rurashqankunata manami pipis tantiyayta kamäpakuntsu!” (Rom. 11:33).

3, 4. ¿Imataj öraga tapucunchi? ¿Imataj cay yachachicuycho ricashun? (Juan 5:28, 29).

³ Noganchipis capaz öraga Abrahanno imatapis shumaj mana tantiar cayno tapucunchi: “Sodoma y Gomorra marcacunacho Jehová ushacächishgan runacunaga, ¿imaylapis  cawarimungachuraj? ¿Diosga yarpaycanchuraj paycunata cawarachimunanpaj mana ali rurajcuna cawarimushgan wichan?” (Hech. 24:15).

⁴ Cananga maslata ricärishun imata musyanchina wanushgacuna cawarimunanpaj cajpita. Chaylaraj guepa watacunacho tantiashcanchi pïcuna cawaypaj cawarimunga y pïcuna juzgashga cananpaj cawarimunga (leiriy Juan 5:28, 29). a Chaymi cay yachachicuycho y gatejnin cajchopis caycunata maslata tantiarcushun y ricashunpis ima cambiucuna cashganta. Puntataga ricashun imata mana musyanchichu Jehová imano juzgananpaj cajta, nircur ricashun imata musyanchi Jehová rurananpaj cajtapis.

IMATA MANA MUSYANCHICHU

5. ¿Imataj unaycho publicaciunninchicuna nergan Sodoma y Gomorra marcacunacho runacuna wanushganpita?

⁵ ¿Imataj pasanga Sodoma y Gomorra marcacunacho Jehová ushacächishgan mana ali runacunata? Unaycho nishcanchi chay runacuna mana cawarimunanpaj. Ichanga chay asuntupita shumaj yachacur y mañacurir ali tantiaj y yäracuypaj esclavuga cuentata gocurgan mana seguro cashganchita chay runacuna sharcamunanpaj o manapis. Ricashun imanir chayta ninchi.

6. ¿Maygan wilacuycuna can Jehová mana alita ruraj runacunata ushacächishganta? ¿Imapitataj seguro manami caycanchichu?

⁶ Bibliachoga achca wilacuycuna can Jehová mana ali runacunata ushacächishganta. Diluvio o locu tamya wichancho casi lapan runacuna Pachapita wanupäcurgan, Noé y familiancunala salvacärergan. Tiempuwanna Jehová israelitacunata nergan pay Aunishgan Naciuncho caycaj ganchis marcacunata ushacächinanpaj. Y juc cutichona juc ángel 185.000 asirio soldaducunata wanuchergan (Gén. 7:23; Deut. 7:1-3; Is. 37:36, 37). Chaycunapita parlar, Bibliaga manami imatapis nimanchichu seguro caycänapaj Jehová chay runacunata ushajpaj ushacächishganta y manana cawarimunanpaj cajta. Chaymi canan chayta maslata tantiarcushun.

7. ¿Imataj mana musyanchichu Diluvio wichanpita y Canaán marcacho wanushga runacunapita? (Ricay caycaj dibujuta).

⁷ Lapan mana ali runacunata Jehová ushacächishga captinpis, shumäga manami musyanchichu pay cada unuta imano ricashganta. Bibliaga manami wilacunchu chay runacuna Jehovapita ichiclatapis yachacushganta ni arrepenticushgantapis. Diluvio wichanpita parlar, Bibliaga nin Noé Dios munashganno cawashganta y ali cajta rurananpaj wilacoj cashgantapis (2 Ped. 2:5). Pero manami ninchu arcata sharcaycachir ocupado caycar, Pachacho caycaj lapan runacunata Diospita yachachishganta. Jina musyanchichu Canaán marcacho caycaj fiyu runacuna Jehovapita yachacuyta munashganta o arrepenticushgantapis.

8. ¿Imataj manami musyanchichu Sodoma y Gomorra marcacunacho wanushga runacunapita?

⁸ Y, ¿ima nishwantaj Sodoma y Gomorra marcacunacho wanushga runacunapita? Musyanchimi Sodoma marcacho Lot jutiyoj runa cawashganta, payga ali runami cargan. Ichanga manami musyanchichu chaycho cawaj lapan runacunata Diospita yachachishganta. Paycunaga pasaypa fiyu runacunami cargan, pero ¿musyarganchuraj ima ali cashganta y ima mana ali cashgantapis? Manachi, Bibliaga  wilacun Sodomapita achca runacuna Lot pachächishgan runacunata charipacuyta o violayta munashganta. Chay runacunacho achca jovincuna carganmi, paycunaga manachi musyarganchu imata ruraycashganta (Gén. 19:4; 2 Ped. 2:7). Chaura, Jehová alapa cuyapäcoj captin, ¿nishwanchuraj chay runacunapita mayganlatapis manana cawarachimunanpaj? Jehová Abrahanwan parlar nergan chay marcacho ni chuncalapis ali runacuna mana cashganta (Gén. 18:32). Chaymi paycunata ushacächir, Jehová alitami ruraycargan. Chauraga, ¿seguruchu caycanchi mana alita ruraj runacuna cawarimushgan wichancho ni mayganlapis mana cawarimunanpaj? Manami musyanchichu.

9. ¿Imataj musyanchichu Salomonpita?

⁹ Jina Bibliaga wilacun alita ruraj runacuna mana alita rurajcunaman ticrashganta, jucmi cargan Salomón. Payga Jehovata ali reguirgan y musyarganmi imano adurananpaj, achca bendiciuncunatapis chasquirgan. Tiempuwan ichanga luta dioscunata o idulucunata adurar galaycurgan. Chayta ricar Jehová alapa rabiacurgan, y Salomonpa culpanraycu marca masincuna achca watacunapami alapa nacapäcurgan. Pero Bibliaga nin pay “wanuykuptinmi pampapäkurqan taytan Davidpa Markanman” (1 Rey. 11:5-9, 43; 2 Rey. 23:13). Chaura, ¿chayga ninanchuraj cawarimunanpaj cajta? Bibliaga chaypita manami wilamanchichu. Waquincuna capaz Romanos 6:7 nishganta cuentaman churar yarpapäcunman cawarimunanpaj, chaycho nin pipis wanuptin juchanpita perdunashgana cashganta. Pero chay textuga manami tantiachimanchichu lapancuna derechuyoj cashganta cawarimunanpaj. Sinoga Jehová cuyacoj cashpanmi cawarachimunga payta imaycamapis lapan shongunwan sirviyta munajcunalatami (Job 14:13, 14; Juan 6:44). Y, ¿Salomonta cawarachimungachuraj? Chaytaga Jehovalami musyan, noganchega manami musyanchichu. Ichanga musyanchimi Jehová imaypis alicunata rurananpaj cajta.

IMATA MUSYANCHI

10. ¿Imanotaj Jehová ricacun mana ali runacunata ushacächiptin? (Ezequiel 33:11, fotutapis ricay).

¹⁰ (Leiriy Ezequiel 33:11). Jehová wilamanchi imano ricacushganta o sienticushganta pitapis juzgaptin. Apóstol Pedro Jehovapita iscribishganga tincunmi profeta Ezequiel nishganwan, caynomi nergan: “Payqa manami munantsu pipis jutsacho wanunanta” (2 Ped. 3:9). Y chayta musyarga cushicunchi. Jehová Diosga pipis mana merecicuptenga, ushajpaj manami ushacächengachu. Payga alapa cuyapäcojmi, chaymi seguro caycanchi imaypis alita rurananpaj.

11. ¿Pïcunataj mana cawarimungachu, y imanotaj chayta musyanchi?

¹¹ ¿Pïcunataj mana cawarimungachu? Bibliaga waquincunalapita parlapämanchi. b Jesusga nergan Judas Iscariote mana cawarimunanpaj (Mar. 14:21; ricay Juan 17:12 textutapis). Judas musyarganmi imata ruraycashganta Jehovapa y Jesuspa contrancho churacaptin (ricay Marcos 3:29 textuta). Jesús nerganpis contranman churacaj waquin pushacoj religiusucuna mana cawarimunanpaj cajta (Mat. 23:33; ricay Juan 19:11 textutapis). Apóstol Pabluna nergan Diospita lutan yachachicojcuna o apóstata nishgancuna mana arrepenticuptin mana cawarimunanpaj (Heb. 6:4-8; 10:29).

12. ¿Imanirtaj ninchi Jehová cuyapäcoj cashganta? Juc ejempluta wilacamuy.

 ¹² Caycama ricashganchi Jehová alapa cuyapäcoj cashganta y “manami munantsu pipis jutsacho wanunanta”. Ricashun imano chayga ricacämurgan waquincuna jatun juchata ruraptin. Rey David juc runapa warminwan cacurgan y runanta wanuchinanpaj mandargan, pero arrepenticuptin Jehová cuyapäcoj car juchanta perdunaycurgan (2 Sam. 12:1-13). Rey Manasespis melanaypaj ruraycunata rurar Jehovata rabiachergan. Pasaypa jatun juchacunata rurarpis lapan shongupita arrepenticuptin Jehová cuyapäcoj car perdunargan (2 Crón. 33:9-16). Cay ejemplucuna yarpächimanchi pipis shongupita arrepenticuptin Jehová cuyapäcoj car perdunaycunmi. Chaymi Davidta y Manasestapis cawarachimunga, paycunaga lapan mana alicunata rurashganpita arrepenticurgan.

13. 1) ¿Imanotaj Jehová cuyapäcoj cargan Nínive runacunawan? 2) ¿Imataj tiempuwan Jesús nergan Nínive runacunapita?

¹³ Nínive runacunawanpis Jehová cuyapäcoj cargan. Jonasta nergan: “Jutsankuna aläpanami kaykan”. Pero chay runacuna juchancunapita arrepenticäriptinmi Jehová perdunaycurgan. Jonasmi ichanga mana alapa cuyapäcojchu cargan, chaymi pasaypa rabiacuptin Diosga payta yarpächergan cayno nir: “Paykunaqa manami musyapäkuntsu ali y mana ali kashqantapis” (Jon. 1:1, 2; 3:10; 4:9-11). Tiempuwanna Jesuspis Nínive runacuna arrepenticushganpita parlar, ricächicurgan Jehová alita ruraj y cuyapäcoj cashganta. Chaymi nergan ‘juiciu junaq Nínive runakuna’ sharcamunanpaj (Mat. 12:41).

14. Juicio junaj mana alita rurajcuna cawarimuptin, ¿imatataj pasanga Nínive runacunawan?

¹⁴ ‘Juiciu junaq Nínive runakuna’ cawarimunga Jesús nerga, ¿imapitataj parlaycargan? Payga parlamurgan shamoj tiempucho waquincuna cawarimunga juzgashga cananpaj (Juan 5:29). Chaywanga parlaycargan Waranga Watacuna mandaycashgancho “ali runakunatapis y mana ali runakunatapis Tayta Dios kawaritsimunanpaq” cashganta (Hech. 24:15). Mana alita rurajcunaga juzgashga cananpaj cawarimunga. ¿Imanotaj chayga canga? Jehová y Jesuspis altanto caycanga paycuna cäsucoj o mana cäsucoj  cashganta y yachacushgancunano ruraycashganta o manapis. Juc ninivita runa cawarircamur Jehovata adurayta mana munaptenga wanungami (Is. 65:20). Pero, Jehovata sirviyta munaptenga, imaycamapis cawayta puedingami (Dan. 12:2).

15. 1) ¿Imanirtaj mana ninchichu Sodoma y Gomorra runacunapita pipis mana cawarimunanpaj? 2) ¿Imanotaj tantianchi Judas 7 nishganta? (“ ¿Imapitataj Judas parlaycargan?” recuadruta ricay).

¹⁵ Jesusmi nergan payta mana chasquicojcunaga ‘Sodoma y Gomorra runakunata castigashqanpitapis mas peormi juiciu junaqcho’ castigashga cananpaj (Mat. 10:14, 15; 11:23, 24; Luc. 10:12). ¿Chaywanga imatataj niycargan? Jesusga parlaycargan chay runacunata rasunpa ima pasananpaj cajta. Nínive runacunapitapis chaynomi parlargan. ‘Juicio junajpita’ parlar, payga parlaycarganchi Nínive runacuna imano juzgashga cananpaj cajpita. Nínive runacuna, Sodoma y Gomorra runacunapis mana alicunatami rurapäcurgan. Ichanga Nínive runacunaga Diospita wiyar arrepenticärirganmi. Y Jesús nergan mana alita rurajcuna cawarimunga juzgashga cananpaj (Juan 5:29). Chaywanga tantiachimanchi Sodoma y Gomorra runacunapita capaz waquincuna cawarimunanpaj. Chayno captenga, paycunata Jehovapita y Jesuspitapis yachachicunapaj caycanga.

16. ¿Imatataj Jehová cuentaman churanga pitapis cawarachimunanpaj? (Jeremías 17:10).

¹⁶ (Leiriy Jeremías 17:10). Cay texto nishganno, musyanchimi Jehová imano cashganta. Payga ricanmi shongunchita y musyanmi ima yarpashganchitapis. Chaymi pitapis cawarachimunanpäga canga imano “kawashqanman tupu”. Jehová Diosga mana cäsucojcunata ushacächenga, pero ali shonguyojcunawanga cuyapäcoj canga. Chaura, Biblia claro mana wilacuptin pïcuna mana cawarimunanpaj, pitapis seguro nishwanchu pïcuna cawarimunanpaj o manapis.

“LAPAN RUNAKUNAPA JUEZNIN” IMAYPIS ALICUNATA RURANGA

17. ¿Imatataj pasanga lapan wanushgacunata?

¹⁷ Adán y Eva mana cäsucur Jehovapa contranman churacashganpita, aypala runacuna wanupäcurgan. Cananpis chaychicaj runacuna wanurcaycan (1 Cor. 15:26). ¿Imataj pasanga chay lapan runacunawan?  144.000 runacuna Diosta mana cachaypa sirvishganpita cawarimunga cielucho imaycamapis cawapäcunanpaj (Apoc. 14:1). Pero aypala Diosta cuyaj runacunaga cawarimunga alita rurajcuna cawarimushgan wichancho. Jesús Waranga Watacuna mandaycashgancho cäsucoj captin y ushanan pruebatapis pasaptenga, cuyaylapaj Pachacho imaycamapis cawapäcunga (Dan. 12:13; Heb. 12:1). Jina chay wichanlacho mana alita rurajcuna y Diosta mana reguejcunapis cawarimunga. Chaura tiempo canga paycuna Diospita yachacur vidanta cambiananpaj y Jehovalata sirvinanpaj (Luc. 23:42, 43). Pero waquincunaga pasaypa mana alicunata rurashganpita y Diospa contranman churacashganpita, Jehová paycunata cawarachimungachu (Luc. 12:4, 5).

18, 19. 1) ¿Imanirtaj Jehovaman yäracunchi wanushgacunata ali juzgananpaj? (Isaías 55:8, 9). 2) ¿Imataj ricashun gatejnin yachachicuycho?

¹⁸ Segurumi caycanchi Jehová runacunata juzgaptin imaypis alicunata rurananpaj cajta. Abrahanno noganchipis musyanchi “lapan runakunapa jueznin” juchaynaj, alapa cuyapäcoj y yachajpis cashganta. Jehovaga Wamranta autoridä goshga juzgananpaj y yachacherganpis imano rurananpaj (Juan 5:22). Jehovawan Jesusga ricanmi runacunapa shongun imano cashganta (Mat. 9:4). Chaymi seguro caycanchi ali juzgananpaj.

¹⁹ Imaypis yäracushun Jehová alicunata rurashganta. Payga yachanmi imano pitapis juzgananpaj (leiriy Isaías 55:8, 9). Musyanchimi Diospa munaynincho cashganchita, chaymi yäracunchi Jehovawan Jesús imaypis ali juzgananpaj cajta. Jina musyanchipis Reyninchi Jesús juchaynaj car alicunata rurananpaj y Taytanno cuyapäcoj cananpaj (Is. 11:3, 4). Gatejnin yachachicuycho ricashun jatun nacay wichancho Jehovawan Jesús runacunata imano juzgananpaj imata mana musyashganchita y imata musyashganchitapis.