1, 2. 1) ¿Imanirtaj chaylaraj casaracushga cajcuna Jehová Dioslaman yaracärinman? (Salmo 37:3, 4). 2) ¿Imapitataj canan yachacurishun?

¿CHAYLARÄCHU casaracushcanqui o casaracunayquipänachu caycanqui? Chayno captenga mayraj munaycanqui majayquiwan cushi cushila cawacuyta. Ichanga problemacunaga cangapämi; pero ¿imataj yanapacunga?: pipis chaylaraj casaracur galaycunancho ali cajta rurananpaj acrashganmi. Aumi, imata murushganchitami tiempuwanga cosechanqui. Jehová Dioslaman yaracäriptiquega y paypa ricayninpa ali cajcunata acraptiquega mana raquicaypami majayquiwan cawapäcunqui. Pero Jehová mandashushgayquita mana chasquicurga casado vidayquiga sasami ticracurenga (leiriy Salmo 37:3, 4).

² Cay yachachicuycho chaylaraj casaracushga cajcunalapaj parlarpis ali wilacuynincunaga lapan matrimoniucunapämi caycan. Yachacunapaj canga unay Diosta sirvej olgucunapita y warmicunapita y imatataj paycunapita yachacunchi. Canan wichan waquin matrimoniucunapita imata yachacunapaj cajpitapis parlashunmi.

3, 4. ¿Imanirtaj chaylaraj casaracushga cajcunapa cawaynin sasa ticracurinman?

³ Waquin marcacunachoga chaylaraj casaracushga cajcunapaj nipäcun waquincunanola cawacärinanpaj. Öraga  taytan cajcuna o familiancunapis nipäcun ‘wamrayojrämi canayqui’ nir. O amiguncunapis nipäcunman rantishgan wasi shumaj camaränanpäga imaycacunataraj rantinanpaj.

⁴ Caychomi ali canga shumaj yarpachacurcur ali cajta acrapäcunayquipaj, pajta sinoga jagatucunquimanpis. Jina achca guellayta jagatucurga ishcayquirächi arupäcunqui paganayquipaj. Tiempuyquicunapis canganachu Bibliata estudiapäcunayquipaj, juntacarcur Diosta adurapäcunayquipaj y predicaciunmanpis yargupäcunayquipaj. O guellayta taripäcunayquiraycur o trabajuyquiraycurpis öraga reuniunchopis capäcunquinachu. Chaycunapa pasarga manachi cushi cushilaga Jehovata sirvipäcunquinachu.

5. ¿Gamga, imatataj yachacushcanqui Juanpitawan Anapita?

⁵ Musyanchimi imaycacunata charanalapaj calpachacurga manami cushi cushilaga goyachimäshunchu. Juanpitawan Anapita parlarcushun. * Chaylaraj casaracurirshi ishcancuna goyaylata waran waran arur galaycärergan, chayno ‘ali cawacushun’ nir. ¿Y cushi cushilacho cawapäcurgan? Juan cayno wilacun: “Imaycacunata ashishgäcunaga juntami caycargan, pero Jehovata imano sirvinapaj yarpaynëcunachoga imalapis carganchu. Rasunpami, cawaynëcunaga sasami ticracurergan”. Gampis maynachi cuentata gocushcanqui, imaycata charanapaj arucuycarla caycarga cushishgalaga mana ricacushganchita. Imano captinpis, waquincuna imanir ali cawacushganta ricarga shacyachishunquimi. Naupataga ricaycushun runa cajcuna, Jehosafat reypita imata yachacärishganta.

6. Proverbios 3:5, 6 textucuna wilacushgannola, ¿imatataj Jehosafat rurargan chiquicojcuna atacananpaj caycaptin?

⁶ Majayoj cajcuna ¿laquishgachu ‘imanoparaj familiäta pushäman’ nir canan carcaycanqui? Chayno captenga Jehosafat imata rurashganmi yanapäshunqui. Rey captinmi gobernashgan naciuncho runacunata ricananpaj calpachacurgan. Aumi, marcanta täpananpäga imaycata rurargan, pergacunawanpis murallaycachergan y 1.160.000 soldaducunapitapis mastashi may chaypita shuntamurgan, mandatunchu caycananpaj (2 Crón. 17:12-19). Y chayga alimi cargan, porque tiempuwanga chiquicoj marcacuna Ammón, Moab y Seír; contrancho peliananpaj sharcupäcurgan (2 Crón. 20:1, 2). ¿Imatataj rurargan Jehosafat familianraycur y gobernaycashgan marcacho lapan runacunaraycur? Valurcharcunanpämi Jehovata ashergan, payga rurargan Proverbios 3:5, 6 (leiriy) textucuna nishgannola.  Imano mañacamushganga 2 Crónicas 20:5-12 textucunachomi caycan, chaychomi ricacämun imano Taytalanchi Diosman yaracushganta. ¿Wiyarganchu Jehová mañacamushganta?

7. ¿Imatataj Jehová wilachicurgan y ima mastataj rurargan Jehosafat mañacamushganta wiyar?

⁷ Jahaziel jutiyoj profetanwanmi Jehová wilachicurgan imano Jehosafat-ta yanapänanpaj. Cayno nergan: “Gamcunaga chayllacho shuyaray mana yarpachacuypa. Chaychömi musyanquipaj noga TAYTA DIOS imano salbashätapis” (2 Crón. 20:13-17). Chayta wiyarga ichanga pilapis nergan ‘¿imanirtaj chayta ruranapaj mandaycämanchi?’ nir. Pero chay mandatupa guepanchoga quiquin Jehovami caycargan, paymi mandacaycämurgan. Jehosafatga Jehovaman yaracushpanmi casucurgan. Peliananpaj aywarcaycaptinna, Jehosafatga manami lapan soldaduncunapa naupancho churarganchu calpasapa cajcunata, sinoga cantaraycarla aywaj levita runacunata. Nircurga Jehová aunicushgannola may chaypita shamoj chiquejcunataga ushacäracherganmi (2 Crón. 20:18-23).

8. ¿Imatataj runa cajcuna yachacärinman Jehosafat reypita?

⁸ Majayoj runacuna, ¿imatataj yachacärinqui Jehosafat rurashganpita? Gamcunapa maquiyquichomi caycan familiayquita imano pushanayquipaj, yanapänayquipaj y täpanayquipäpis. Problemacuna yurimuptenga ama ninquimanchu ‘nogalami cayta wacta rurar alcharcushaj’ nir. Calpayniquicunalamanga ama yaracärinquimanchu. Jehová Diostaga puncuyquita wichgacuycurpis mañacärinquimanmi, warmiquiwan ishcayquipis ruwacuyparaj Diosta mañacäriy. Jehová pushashunayquipäga Palabranmi yanapäshunqui, jina yargamoj publicaciuncunapis; lapan yachacushgayquinola cawarga alimi canga. Öraga waquincuna nipäshunquiman ‘¿imanirtaj Bibliataga casupanqui, upa o imataj canqui?’ nir. Paycunaga nipäcun familianchita rasunpa cuidanapäga, guellaypitaraj y imaycacunata ashishganchipitaraj cashganta. Pero gamcunaga imaypis yarpapäcuy Jehosafat rurashganman, payga Jehovaman yaracushpanmi casucurgan. Taytalanchi Jehovapis paytaga manami jaguirirganchu y gamcunatapis manami jaguiripäcushunquichu (Sal. 37:28; Heb. 13:5). Casaracushga runapaj y warmipäna canan parlarcushun. ¿Imatataj rurapäcunman cushi cushila cawapäcunanpaj?

9. ¿Ima nishwantaj Isaiaspitawan warminpita?

⁹ Warminwan Isaías profetaga Jehová Dioslata sirvinanpaj calpachacärergan. Payga profeta cargan y Biblia nishgannopis warminga ichanga “profetïsa” cargan (Is. 8:1-4). Ishcancunapäga Jehovata sirvipäcushganmi imapitapis más ali cargan. Aumi, canan wichan casaracushga cajcunaga, imayca yachacunapaj caycan Isaiaspitawan warminpita.

10. Diosta sirvishgancho masraj calpachacärinanpäga, ¿imanirtaj matrimoniucunaga Bibliapa profeciancunata estudiapäcunman?

¹⁰ Chauraga ali canga casaracushga cajcuna, Isaiasnola y warminnola Jehová Dioslata sirvinanpaj calpachacäriptenga. Ishcayquicunapa yaracuyniqui gaga japuy cananpäga, alichi canman Bibliapa profeciancunapita y imano cumplicaycashganpita  yachacäriptiquega (Tito 1:2). * Nircurpis alichi canman canan wichanpaj, Biblia wilacushgancho imano yanapacärinayquipaj yarpachacäriptiqui. Jesusga nergan ushacay tiempo manaraj chayamuptin, may chayman Diospa ali wilacuyninta chayachinapaj (Mat. 24:14). Maygan matrimoniulapis ali claro profeciacuna cumplicaycashganta ricaptenga, masrämi calpachacärenga Jehová Dioslata sirvinanpaj.

11. ¿Imachotaj yanapacärergan Aquilawan Priscila, y imanir?

¹¹ Chaylaraj casaracushga jovincunapäga, ali caycan Priscilawan Aquilapita yachacunanpaj. Judeapita caycarpis paycunaga Roma marcachöshi cawapäcurgan. Jesuspa ali wilacuyninpita yachacurishganlapitashi cristianuman tricrapäcurgan, chaychoga cushi cushilachi cawarcaycargan. ¿Imataj pasargan nircur?, Claudio jutiyoj emperadormi mandacurgan Romapita judiucunata gargunanpaj. Maycho tashganta jaguirirshi aywacärergan, juc sitiutana cawananpaj ashir y chaycho carpacunata ranticushgan negociunta camacächinanpaj. Chaura paycunaga, ¿unayno Diosta sirvipäcurgannachu?, manami. Corinto marcaman chayaycurga, yanapacärirganshi congregaciuncho y apóstol Pabluwanpis shacyachirganshi hermanucunata. Tiempuwanga juc marcacunapana aywacärergan jinala Diospita yachachicur carcaycänanpaj (Hech. 18:18-21; Rom. 16:3-5). Chayno caycho waccho Diospita yachachicurga ¡mayraj cushicarcärergan!

12. ¿Imanirtaj ali caycan casaracushga cajcuna Diospa marcancho imano yanapacärinanpaj yarpachacäriptin?

¹² Canan wichan casaracushga cajcunapis calpachacärinmi Diospa voluntäninta rurapäcunanpaj Aquilawan Priscilano, y ali canga noviularaj caycar chaypita parlapacäriptin. Ichanga nipäcunman ‘¿imanotaj Diosta sirvishun, imanotaj tiempunchita camacächishun?’ nir. Chayno captenga ricapäcungami Diospa espiritun imano  pushaycashganta (Ecl. 4:9, 12). Ruselpita y Elizabetpita parlarcushun. Rusel cayno nin: “Noviularaj caycarmi parlapacärergä Diospa marcancho imacunata rurar yanapacärinäpaj”. Warminpis cayno nin: “Y chaypitaga parlapacärej cä tiempuwan Diosta sirvipäcushgächo imacunapis mana michämänanchipaj”. Nircur tiempuncunaga camacarganshi Micronesia sitiucunacho Diospita yachachicur yanapacärinanpaj.

13. Salmo 28:7 wilacushganno, ¿imanoraj caycäshun Jehovaman yaracushpanchega?

¹³ Ruselwan Elizabet rurashgannolami achca casaracushga cajcuna, tiempunta camacächishga charashganlawan cawar cushi cushila Diospita yachachicunanpaj. Paycunacush aunicushgannola calpachacärin Diospa marcancho yanapacunanpaj, chauraga achca bendiciuncunata chasquipäcunga. Diosninchipa maquintami waran waran ricanga, yaracuynincunapis miraycunga y rasunpa cushi cushila cawapäcunga (leiriy Salmo 28:7).

14. ¿Imanirtaj nishwan Pedruwan warminga Mateo 6:25, 31-34 textucunacho nishganman yaracärishganta?

¹⁴ Casaracushga cajcunapäpis ali caycan apóstol Pedrupita y warminpitapis yachacärinanpaj. Pedruga Jesusta reguishganpita juc watamanna chayaycar shumaj yarpachacurgan imata rurananpaj. Paytami Jesús nergan gatimay, pero Pedruga familianmanchi yarpachacurgan imano yanapänanpaj, payga pescaj runalami cargan (Luc. 5:1-11). Chauraga ¿imataj rurargan?, Jesuspa guepanta aywacurgan, chayga alimi cargan. ¡Warminpis cushicurganchi Jesusta yanagänanpaj niptenga! Bibliapis wilacunmi tiempuwanga Pedruwan ishcan viajashganta (1 Cor. 9:5). Ali warmi cashganraycurshi Pedrupis autoridäwan consejapargan warmi cajcunatapis runa cajcunatapis (1 Ped. 3:1-7). Ali matrimonio cargan y nipäcurganchi ‘Jehovapa cajta puntaman churarga Payga manami imaypis cacharimäshunchu’ nir (leiriy Mateo 6:25, 31-34).

15. ¿Imatataj yachacurishcanqui Tiagupitawan Esterpita?

¹⁵ Y gamcuna achca watapana casaracushga caycarga, ¿imanotaj Diosta sirvir maslata rurapäcunayquipaj calpachacärinquiman? Yanapäshunayquipaj ali canga waquin matrimoniucunapitapis yachacäriptiqui. Chaycunata leinayquipaj tarinqui “Se ofrecieron de buena gana para servir” nishgan wilacuycunacho. Tiago warminwan Esther, Brasil naciunpita chayta rurapäcurgan. Chay leishgayqui yachachicuycunami yanapäshunqui may chayman aywar Diospita yachachicur yanapacärinayquipaj. Tiago cayno nin: “Leipäcushgäcunachomi ricapäcurgä canan wichan sirvejnincunata Jehová imano yanapashganta, chaycunami nogacunatapis yarpachacächimargan Jehová chapämänanchipaj”. Tiempuwanga Tiaguwan Esterga Paraguay naciunpa aywacärergan, portugués rimaycho yanapacärinanpaj; 2014 watash galaycärergan. Ester cayno wilacun: “Shacyachimänanchipaj Efesios 3:20 texto caycan. Chay textuga alapami yanapämashcanchi Jehovata sirvipäcushgäcunacho”. Chay textuga parlaycan mañacushganchipitapis yarpashganchipitapis mastaraj Jehová gomänanchipaj,  chayno cashgantaga imaypis ricashcanchimi.

16. Diosta maslata sirvipäcushganraycur, ¿picunatataj yanapaycalämay nipäcunman jovinlaraj caycar casaracushga cajcuna?

¹⁶ Mozularaj caycar casaracurishgayqui captenga, imayca caycan Jehovaman yaracoj matrimoniucunapita yachacärinayquipaj. Waquin matrimoniucunaga lapan tiempunwan achca watapana Jehovata sirvircaycan. Alichi canman, “Diosta maslata sirviyta munarcaycä” paycunata nipäcuptiquega. Chayta rurarga Jehovaman yaracäriycanqui (Prov. 22:17, 19). Ancianucunapis yanapäshunquimi Diosta sirvir maslata rurapäcunayquipaj.

17. Juanwan Ana, ¿imacunapataj pasapäcurgan, y imataj yachacunchi paycunapita?

¹⁷ Öraga Jehovata más sirvinapaj calpachacuycarpis yarpashganchinochu pasan. Yapay parlarcushun Juanpita y warmin Anapita. Quimsa watacuna casaracushgana caycar, wasinta cachaycur Finlandia naciunman sucursalta sharcaycächishgancho yanapacunanpaj aywacärergan. Pero sojta quillacunala yanapacunanpaj paycunata nipäcuptin, galanancho alapa laquicärergan. Ichanga ichic tiempulacho árabe rimayta yachacärinanpaj invitaciunta chasquipäcurgan. Y cananga juc naciuncho árabe rimayta parlajcunata yachachicur cushi cushila yanapacurcaycan. Chaycunata yarpar Ana nin: “Alapami manchacächicun yachacashgana caycashgayquipita juc marcacunaman aywar más yanapacunayquipaj, Jehovaman lapancho yaracunayquipaj. Pero quiquëmi ricashcä Jehová imaypis yanapämashganchita. Chaycunapa pasarmi cananga Jehovaman más yaracö”. Yachacushganchino, Jehová imaypis bendicimäshunmi payman lapan shongunchiwan yaracuptinchi.

18. ¿Imatataj casaracushga cajcuna rurapäcunman Jehová Dioslaman yaracur cawapäcunanpaj?

¹⁸ Casaracur cawacunapäga Jehovapa regalunmi, chaymi majayoj carga cushi cushila goyacushwan (Prov. 5:18; Mat. 19:5, 6). Chaylaraj casaracushga carga, ¿tiempuyquicunata camacächiycanquichu Jehovata más sirvinayquipaj? ¿Calpachacäriycanquichu juc regalutano matrimoniuta Jehová goshushgayquipita agradecicärinayquipaj? Diosnichita mañacäriy, Palabrancho consejucunata ashipäcuy y yachacushgayquinola cawapäcuy. Ama gongapäcuychu, imaycata rurar Jehová Dioslata sirvipäcuptiquega cushi cushila goyacärinqui.