1. ¿Ima rurananchitataj Jehová munan?

CUYAPÄCOJ cashganchipitami Jehovaga alapa cushicun (Os. 6:6). Y munaycanmi piwanpis cuyapäcoj car noganchipis cushicunanchita. Miqueas profetawanmi mandacurgan cuyapäcoj cashganchita mana jaguirinapaj (Miq. 6:8). Cayta maslata tantiarcushun, mä imanoshi rasunpaga waquincunawan cuyapäcoj canchi.

2. ¿Imapätaj parlaycanchi ‘cuyapäcoj cashganchi mana ushacänanpaj’ nerga?

² ¿Imapätaj parlaycanchi cuyapäcoj cashganchi mana ushacänanpaj nerga? La Biblia. Traducción del Nuevo Mundo nishgancho caycan glosario nishgan, chaycho nin: “Parlaycanchi ali shongulanchiwan mana jaguinacuypa cuyanacunanchipaj. Quiquin Diosmi naupataga cuyapäcoj cashganta runacunata ricächin; runacunapura caycarpis ricacämunmi”. Jehová cashgannoga manami pipis canchu, cuyapäcoj cashganga manami imaypis ushacangachu. Cananmi yachacushun imanotaj Jehová cuyapäcoj cashganta ricaycachilämanchi, jucächona yachacushun imanotaj paynola cashwan runacunapura caycar.

3. ¿Imacunatataj Jehová nergan Moisesta?

³ Egipto naciunpita israelitacunata jorgaramushganlachomi, Jehovaga jutinpita y imano cashganpita Moisesta parlapargan. Cayno nergan: “¡Yahweh! ¡Yahweh! [Jehová]. Kuyapäkuq  y perdonakuq Diosmi kä. Imapitapis juklaqa mana rabyakuqmi kä. Pasaypa kuyakuqmi kä. Promitishqätaqa imaypis cumplïmi. Waranqanpa waranqanpa tsaytsika runakuna kaptinpis kuyapämi. Mana cäsukamar jutsata ruraptinpis perdonämi” (Éx. 34:6, 7). Cayno cuyapaypa parlapashganchomi ricacämun Jehovaga rasunpa cuyapäcoj cashganta. Chaypita maslata parlarishun.

4, 5. 1) ¿Imataj quiquinpita Jehová nergan? 2) ¿Imacunapitataj yachacushun?

⁴ Jehovaga manami nirganlachu cuyapäcoj cashganta, sinoga “pasaypa kuyakuqmi kä” nerganmi; y caypitaga juc textucunachopis Biblia parlanmi (Núm. 14:18; Neh. 9:17; Sal. 86:15; 103:8; Joel 2:13; Jon. 4:2). Y Jehovalapämi parlaycan, manami runacunapächu. “Pasaypa kuyakuqmi kä” nishganga quiquinpaj y noganchipäpis alapa alimi, ¿au? * Chaychi rey Davidga cayno nergan: “TAYTA DIOS, kuyakuq kashqaykiqa jana patsayaqmi chayan. [...] Kuyakuynikiqa pasaypa kushikuypaqmi kaykan. Älayki rurinmanmi runakuna amparakun” (Sal. 36:5, 7). ¿Davidnocu agradecicunchi Dios pasaypa cuyapämashganchipita?

⁵ Pasaypa cuyapäcoj ima nishganta tantiarcushun cay tapucuycunapita yachacuptinchi: ¿picunatataj Jehová pasaypa cuyapan? y ¿imanotaj ricacunchi Jehová cuyapämaptinchi?

6. ¿Picunatataj Jehová pasaypa cuyapan?

⁶ ¿Picunatataj Jehová pasaypa cuyapan? Bibliaga wilacun caycunatapis cuyashganchita: ‘tantiacuyta’, ‘corrijishga’ cayta, ‘upyalata y perfumilata’, yachaj cayta; y maspis canmanmi (Prov. 12:1; 21:17; 29:3). Runacunalawanmi cuyapäcoj canchi ichanga ima charashganchicunawanga mana. ¿Chauraga niycanchi lapan runacunawan pasaypa cuyapäcoj Jehová cashganta? Manami, ali shongulanwan payta sirvejcunalawanmi cuyapäcoj caycan. Paycunapämi yarparaycan ali cawayta gonanpaj, imaypis mana cachaycunanpaj cajta.

7. ¿Imanotaj lapan runacunata cuyacoj cashganta Jehová ricächishga?

⁷ Cuyacoj cashgantaga lapan runacunatami Jehová ricächishga. Jesusmi cayno nergan Nicodemo jutiyoj runata: “Tayta Diosga runacunata fiyupa cuyarmi japallan cuyay wamranta cachamuran Payman pipis yäracoj cäga mana wañunanpaj chaypa ruquenga  imaycamapis cawananpaj” (Juan 3:1, 16; Mat. 5:44, 45).

8, 9. 1) ¿Imanirtaj sirvejnincunata Jehová pasaypa cuyapan? 2) ¿Imacunataj canan yachacushun?

⁸ Nishganchinami, Jehovaga pasaypa cuyapäcoj caycan ali shongulanwan payta sirvejcunalawanmi. Chaypämi parlapäcurgan Davidwan profeta Danielpis. David cayno nergan: “Qamman yärakamuqkunata kuyapaykulay”. “Payta mantsakuqkunataqa imaypis kuyanmi”. Danielnami nergan: “Tayta Dios, lapanpaq munayniyuq y mantsakuypaqmi kanki. Kuyashushpayki mandamientuykikunata cumpliqkunapaqqa [...] rurashqaykita imaypis cumplinkimi” (Sal. 36:10; 103:17; Dan. 9:4). Aumi, Jehovaga pasaypa cuyapan payman yaracamojcunata, payta manchapajcunata, cuyapajcunata y mandamientuncunata casucojcunata. Lapan Testiguncunatami amatar cuyapan.

⁹ Jehovata manaraj sirviptinchimi cuyamashganchitaga mayna musyashcanchi (Sal. 104:14). Jina Payta sirvir galaycuptinchimi, pasaypa cuyapämashganchita ricanchi. Aumi, sirvejnincunataga Jehová cayta nergan: “Qamtaqa imaypis kuyapäshaykimi” (Is. 54:10). Quiquin Davidpis chayno cashganta ricarganmi, chaymi nergan: “TAYTA DIOSQA munashqanno kawaq runakunatami kuyan” (Sal. 4:3). Jehová cuyapämashganchita ricar, ¿imatataj rurashwan? Juc salmista nergan: “Pipis tantiyakuq karqa tsaykunata tantiyakutsun. Tsaynöpami cuentata qokunqa TAYTA DIOS kuyakuq kashqanta” (Sal. 107:43). Chauraga, Jehová pasaypa cuyapämashganchi imano yanapämashganchita quimsata ricärishun.

10. Diosninchi cuyapäcoj cashgan mana ushacashganta musyar, ¿imanotaj yanapämanchi? (Salmo 31:7).

¹⁰ Diosninchi pasaypa cuyapäcoj cashganga manami ushacanchu. Salmo 136 textuchomi, pasaypa cuyapämashganchita 26 cuti wilacun. Galanancho nin: “Alilata ruraq kashqanpita TAYTA DIOSTA agradëcikäriy. Kuyapäkuyninqa manami imaypis ushakantsu” (Sal. 136:1). Jina ishcay cajpita 26-cama  cutin cutin nin: “Kuyapäkuyninqa manami imaypis ushakantsu”. Cay salmuta leishpanchi alapami cushicunchi cadala tucuynopa Jehová pasaypa cuyapämashganchita. “Kuyapäkuyninqa manami imaypis ushakantsu” nishganga convencimanchi sirvejnincunata Dios cuyashganga imaypis ushacangachu. ¡Alapa cushichimanchi sirvejnincunata Jehová mana jaguiycushganta musyar! Mayganpis sasacunapa pasapäcuptenga manami cachaycalämanchichu. Imanotaj yanapämanchi: Jehová ladunchicho caycashganta musyarga cushichimanchi y calpata tarichimanchi problemacunata captinpis paypa nänilanpa aywaycänapaj (leiriy Salmo 31:7).

11. Salmo 86:5 wilacushganno, ¿imaraycurtaj Jehovaga perdunamanchi?

¹¹ Diosninchi pasaypa cuyapäcoj cashganraycurmi perdunamanchi. Pitapis arrepenticushganta ricar y ali cajtana rurashganta ricarga Tayta Diosninchega cuyapäcoj cashganraycurmi perdunaycun. Jehovapaj parlarmi juc salmucho David cayno nergan: “Manami castigamanchïchu juchata rurashanchïmannöga, mana allita rurashanchïmannöpis” (Sal. 103:8-11). Davidga musyarganmi pipis mana alicunata rurashganraycur öraga laquicuycarla yarpachacuycarla cawashganta. Chayno captinpis yachacurganmi Jehovaga ‘imapitapis perdunacoj’ Dios cashganta. Jina mañacamushganchomi tantiachicurgan imaraycur Diosninchi perdunacoj cashganta (leiriy Salmo 86:5). Aumi, Jehovaga perdunacoj caycan payta ashej ali shongu runacunawanmi, chaytaga ruran pasaypa cuyapäcoj cashganraycurmi.

12, 13. ¿Imaraj yanapämäshun unay juchata rurashganchipita ‘Dios perdunamanchu’ niycarga?

¹² Ima juchacunatapis rurashga carga alimi caycan ‘imanirtaj cayta rurashcä, shonguläpis nanaycäman’ nerga; cayga yanapämäshun arrepenticunapaj y ali cajtana rurar galaycunapaj. Pero waquin Diosta sirvejcunaga laquicuycarlami capäcushga unay juchacunata rurashganraycur. Öraga yarpachacärin ‘may jinanpa arrepenticuptëpis juchäcunataga Dios perdunamangachu’ nir. Canan hora gampis chaypa pasaycarga ama gongaychu  Jehovaga cuyapäcoj cashganraycur perdunashunayquita munaycan.

¹³ Imanotaj yanapämanchi: Juchayoj runacuna carpis Jehovataga cushi cushila y mana yarpachacuycarla sirvishwan. ¿Imanir? Biblia cayno wilacun: “Diospa wamran Jesús yawarninta jichashanwanmi llapan juchanchïpita perdunamanchi” (1 Juan 1:7). ‘Waran waran imalachopis pantaycä’ nerga, ama gongaychu, arrepenticuptiquega Jehová perdunashunquimi. Cuyapäcoj Dios cashganpaj parlar y perdunacoj cashganpaj parlarmi David cayno nergan: “Kay patsapita jana patsayaq altu kashqannömi payta mantsakuqkunapaqqa kuyakuynin jatun kaykan. Patsapa juk kuchunpita jukaq kuchunyaq jitariqnömi jutsa rurashqantsitapis karuman jitarishqa” (Sal. 103:11, 12). Ricaycanchimi Taytalanchi Jehovaga waran waranmi perdunaycalämäshun (Is. 55:7).

14. ¿Ima nirgantaj David Jehová pasaypa cuyapäcoj car chapämashganchi cajpita?

¹⁴ Jehová alapa cuyapäcoj cashganmi yanapämanchi paypita imaypis mana raquicänapaj. Juc cuti mañacamushganchomi Jehovata David cayno nergan: “Gammi canqui pacacunä, mana allicunapitapis chapämajnëga. Salbamashayquipitami cushicur alabansacunatapis cantashaj”. Nircurpis cayno nergan: “Yäracojcunataga paymi fiyupa cuyashpan yanapanga” (Sal. 32:7, 10). Unay tiempo marcacunapäga jatuncaray pergancunami cargan, chayga chapajmi waquin chiquicoj marcacunapita. Chaynolami canan wichanpis espiritual cajcho ali caycänapäga perga japuymi caycan Jehová alapa cuyapäcoj cashgan. Pasaypa cuyapäcoj captinmi maquilancho cawananchita munan (Jer. 31:3).

15. ¿Imanirtaj ninchi pasaypa cuyapäcoj Jehová cashganga chapämänanchipaj pacacuna sitiuno cashganta?

¹⁵ Davidga caytapis nerganmi imano Jehová chapämashganchipita parlar: “Gammi canqui chapämaj pacacunä. ¡Gammi canqui cuyamaj Diosnë!”. Caytapis nergan: “Paymi cuyaman, chapäman. Paymi mas altunnin pacacunä, imapitapis jorgamaj. Paymi chapacuna escüdö” (Sal. 59:17; 144:2). ¿Imanirtaj David nergan Jehová alapa cuyapäcoj cashganta y chapämänanchipaj pacacuna sitiuno cashgantapis? Chaytaga nergan may chay sitiucunacho caycarpis paypita mana raquicarga y amigun caycarga imaypis chapämänanchipaj. Salmo 91 caj capitulupis chaylapämi parlan. Cayno nin: “TAYTA DIOSTA mañacurmi nishaj: ‘Tayta Dios, gammi pacacunä canqui. Gammi callpayojyächimanqui’” (Sal. 91:1-3, 9, 14). Biblia wilacun Moisespis chaynola Diosta mañacushganta (Sal. 90:1). Wanunanpaj ichiclana pishiycaptinmi cayno cuyaylapa escribergan: “Tayta Diosmi imaykapitapis tsapäshunki. Makinchömi imaypis tsararäshunki” (Deut. 33:27). ¿Imatataj Jehovapita yachacunchi ‘maquinwan imaypis tsararäshunki’ Biblia parlarga?

16. ¿Ima ishcay bendiciuncunata chasquinapätaj caycan? (Salmo 136:23).

¹⁶ Jehová chapämänanchipaj pacacuna sitiuno captenga segurunami cawacunchi. Chayno captinpis öraga yarpachacurchi laquicuycäshunraj. Chaypa pasarga, ¿imataraj noganchiraycur Jehová ruranga? (Leiriy Salmo 136:23). Cuyapämashpanchimi alina ricacunapaj maquilanwan jogarcalämäshun (Sal. 28:9; 94:18). Imanotaj yanapämanchi: Diosninchi yanapämänanchipaj seguro caycashganchimi yarpächimanchi cay ishcay bendiciuncunaman: juc, may chaycho caycarpis pacacunapaj sitiuga cangami, payga  Jehovami; ishcay, Taytalanchega jucninchi jucninchipaj yarpachacunmi.

17. ¿Imataj caycan alapa yaracunapaj? (Salmo 33: 18-22).

¹⁷ Yachacushganchinopis, ima pruebacunapa pasarpis Jehovaga yanapämäshunmi valurcharcur paylata sirvinapaj (2 Cor. 4:7-9). Profeta Jeremías cayno nergan: “TAYTA DIOS cuyacoj cashanga manami imaypis ushacanchu. Cuyapäcoj cayninpis manami ushacanchu” (Lam. 3:22). Jehová pasaypa cuyapäcoj cashganga alapa yaracunapaj caycan, chaymi salmuta escribejpis nergan: “TAYTA DIOSMI payta mantsakuqkunata imaykapitapis tsapan. Kuyakuq kashpanmi payman yärakuqkunata yanapan” (leiriy Salmo 33:18-22).

18, 19. 1) ¿Imatataj yarparaycashwan? 2) ¿Imapitataj gatejnin caj yachachicuycho yachacurishun?

¹⁸ Chauraga, ¿imatataj mana gongashwanchu? Jehovata sirvir manaraj galaycurpis, waquin runacunatanopis, payga mayna cuyaycalämashcanchina. Ichanga adurayta galaycushganchichona pasaypa cuyapäcoj cashganta ricaycachilämanchi. Y juc cuyacoj taytanopis malgayninlacho chararämanchi. Paylaman guelicunapäpis yanapämäshunmi y noganchiraycur ima rurayta munashgantapis rurangami. Ali goyananchitami munan (Sal. 46:1, 2, 7). Aumi, ima problemacunapa pasarpis, Jehovaga calpantami gomäshun paylata sirvinanchipaj.

¹⁹ Ricashcanchina imanotaj Jehovaga sirvejnincunawan pasaypa cuyapäcoj cashganta. Jina payga munaycanmi jucninchi jucninchipis cuyapänacunanchita. Caycajtaga gatejnin cajchona yachacushun.