1, 2. ¿Imanirtaj jucninchi jucninchi pasaypa cuyapäcoj cashwan?

¿IMANIRTAJ jucninchi jucninchi pasaypa cuyapäcoj cashwan? Chayno runa canapaj Biblia parlaptinmi, cayno nin: “Imaypis ama qonqankitsu kuyakuq kayta y rasun kaqlata rimayta [...] tsaynöpami Tayta Diospis y runakunapis ali rikashunkipaq”; “kuyapäkuq runaqa kikinpis kushishqami kawan”, caytapis ninmi, “shumaq tantiyakuq y kuyakuq runaqa ali kawaytami tarinqa” (Prov. 3:3, 4; 11:17; 21:21).

² Chauraga cay proverbiucuna nishgannopis, quimsa caycan imanir cuyapäcoj canapaj: juc, chayno runa captinchega Diosga ali nawilanwanmi ricaycalämäshun; ishcay, quiquinchipis alimi cawacushun, waquincunawanpis alimi goyäcushun; quimsa, shamoj tiempucho imayca bendiciuncunata tarishun, mana wanuypana cawacushun. Mana gongaypa cayno Jehová mandacushganta casucushun: “Pï-maypäpis alli cay. Jucniqui-jucniquipis cuyapänacuy” (Zac. 7:9).

3. ¿Ima tapucuycunapitataj canan yachacushun?

³ Canan yachacunapaj caycan chuscu tapucuycuna: ¿picunawantaj pasaypa cuyapäcoj cashwan?, ¿imatataj yachacunchi Rut librucho pasaypa cuyapäcoj canapaj?, ¿imanotaj canan wichanpis chayno cuyapäcoj runaman ticrashwan? y ¿imanotaj ricacushun nircur?

4. ¿Imata rurartaj calpachacunchi Jehovanola pasaypa cuyapäcoj canapaj? (Marcos 10:29, 30).

⁴ Guepa caj yachachicuycho ricashganchinopis, Jehová cuyashgan sirvejnincunalatami pasaypa cuyapan, paycunawanga  cuyacoj cashgan ushacanchu (Dan. 9:4). Efesios 5:1 texto ima nishgantaga yarparaycashwanmi, cayno nin: “Tayta Diospa cuyay wamrancuna caycarga pay rurangannuy rurapäcuy”. Chaymi hermanunchicunata alapa cuyanapaj waran waran calpachacunchi (leiriy Marcos 10:29, 30).

5, 6. ¿Pipis mana jaguicoj captinlachu pasaypa cuyapäcoj cashganta nishwan?

⁵ Pasaypa cuyapäcoj imano canapaj shumaj yachacurga, hermanunchicunataga masrämi cuyapäshun. Mä canan ricärishun imanotaj tantiaycanchi pasaypa cuyapäcoj nishganchita y pitapis mana jaguinapaj runacuna nishganta.

 ⁶ ¿Pipitataj nishwan mana jaguicoj runa cashganta?, ichanga payga canman patronninlapa aroj juc runa. Cayno runacunaga patronninta mana reguiycarpis chay trabajuncho arucuycarlami caycan. Manachi nishwanchu cuyapäcoj cashganraycur chaycho arushganta, sinoga imalanpäpis guellayta tarinanraycurla. Tiempuwanga quiquinpitanachi canga patronninpa maquincho arucuycarla cananpaj o manapis.

7, 8. 1) ¿Imanirtaj pipis pasaypa cuyapäcoj runaman ticranman? 2) ¿Imanirtaj Rut librupita waquin waquilanta yachacushun?

⁷  Naga parlashganchi arucoj runapa nirgunchi mana jaguicoj cashganta pero pasaypa cuyapäcoj cashgantaga mana. Pero ima nishwantaj unay Diosta sirvejcunapita, ¿imanirtaj pasaypa cuyapäcoj capäcurgan? Paycunaga ñanpu shongu carmi chayno runa capäcurgan. Davidpita parlarcushun. Amigun Jonatantaga pasaypami cuyapargan, taytan Saúl gaticachar wanuchiyta munaptinpis. Tiempuwanpis cuyacoj cashganga manami ushacarganchu, chaymi Jonatán amigunpa Mefibóset jutiyoj churintapis cuyapaycarganla (1 Sam. 20:9, 14, 15; 2 Sam. 4:4; 8:15; 9:1, 6, 7).

⁸ Imaycata yachacunapämi caycan cuyapäcoj canapaj cajpita. Mä yachacushun Rut librupita waquin waquilanta ricaycur. ¿Imatataj cuyapäcoj canapaj yachacunchi chay librucho yurimoj Diosta sirvejcunapita? ¿Hermanunchicunawanpis imanotaj pasaypa cuyapäcoj cashwan? *

9. ¿Imanirtaj Noemí yarpachacurgan quiquin Diosninchi paypa contrancho caycashganta?

⁹ Rut libruga Noemipita, Rutpita y Boazpita wilacamun. Boazga Diosta cuyaj runa cargan y Noemipa runanpa familianshi cargan. Israel marcacho alapa muchuy cashganraycurmi Noemiga runanwan y ishcay wamrancunawan Moab marcapa aywacärergan. Chaychoshi runan wanurgan, wamrancunapis casaracärergan pero nircurpis wanupäcurgan (Rut 1:3-5; 2:1). Mayraj Noemiga laquicurgan chaycunapa pasarga, shongunpis nanaycushgaräshi y yarparganshi quiquin Jehová contrancho caycashganta. Chaymi laquicushpan cayno nergan: “Nogataga TAYTA DIOS fiyupa llaquicuymanmi churamasha [...]. Munayniyoj Tayta Dios fiyupa llaquicuyman churamasha”. Nircurpis nergan: “TAYTA DIOSMI chayno camacächisha” (Rut 1:13, 20, 21).

10. ¿Imatataj Jehová rurargan quejacuypano Noemí parlaptinpis?

¹⁰ ¿Imatataj rurargan Taytalanchi Jehová  quejacuypano Noemí parlaptinpis? Manami cachaycurganchu, imapa pasaycashganta ricarga laquiparganmi. Jehová musyanmi yachaj runapis nacashganraycur ‘mana tantiyaj upa runanö’ ticracurishganta (Ecl. 7:7). Chaura Noemiga aliraj yarpachacunan cargan paywan Jehová caycashganta. ¿Imatataj Diosninchi rurargan yanapänanpaj? (1 Sam. 2:8). Rutwanmi yanapargan alapa cuyashga ricacunanpaj. Aumi, Rutga cuyapaylapami yanapargan, amatar cuyaptenga Noemiga aliyarcurganmi. ¿Imatataj yachacunchi Rut rurashganpita?

11. ¿Imanirtaj achca hermanulanchicuna laquishga caycajcunata yanapänanpaj calpachacun?

¹¹ Pasaypa cuyapäcoj carga yanapäshunmi laquishga caycajcunata. Imanomi Rutga Noemita cuyapar yanapargan chaynolami canan wichanpis achca cuyacoj hermanucuna laquishgala caycajcunata mana cachaycunchu. Amatar cuyacoj cashganraycur ‘caychomi caycä yanapänäpaj’ nipäcun (Prov. 12:25; 24:10). Pablo wilacamushganta rurarcaycan, cayno nergan: “Llaquisha caycajcunata shacyächiy cushicunanpaj y imachöpis yanapaypaj captenga yanapaycuy. Chayno pï-maypäpis pasinsayqui cachun ari” (1 Tes. 5:14).

12. ¿Imata rurartaj ali canga laquishgala caycajcunata yanapänapaj?

¹² Öraga alapa ali canga laquishgala caycajcunata ‘wilapämay, gamtaga cuyämi’ niptinchi. Chayno yanapänapaj calpachacushganchicunataga Jehová valuranmi (Sal. 41:1). Proverbios 19:17 texto cayno nin: “Pobrita yanapäga TAYTA DIOSTAMI ristaycan. Chayno yanapashanpitaga quiquin Tayta Diosmi cutichenga”.

13. ¿Imatataj Rutga rurargan y imanotaj chaychoga cuyapäcoj cashgan ricacämurgan? (Garancho caycaj dibujuta ricay).

¹³ Pasaypa cuyapäcoj imano canapaj maslata tantiarcushun, chaypäga ricärishun Noemita ima pasashganta runanpis y wamrancunapis wanuptin. Noemiga marcan Israelta cuticamurgan “runacunata cuyapar TAYTA DIOS micuyta wayuchishanta” mayar (Rut 1:6). Ishcay lumchuynincunawanpis aywacurcaycarganshi payga, pero viajichona caycar Noemiga paycunata nergan Moab marcapa cuticärinanpaj. Nircur ima pasashganpita Biblia cayno wilacun: “Orfaqa suedranta mutsarkushpan wayinpa kutikurqan. Rutmi itsanqa suedranta kacharqantsu” (Rut 1:7-14). Noemí nishgannolami Orpaga marcanta cuticurgan. Pero Rutga amatar cuyacoj cashpan yarpaylapis yarparganchu suedran Noemita jaguirinanpaj; cuyapäcoj warmi cargan (Rut 1:16, 17). Manami pipis niptinlachu Noemiwan quedacurgan ali shongu pasaypa cuyapäcoj captinmi  chayta rurargan. ¿Imatataj yachacunchi caypita?

14. 1) ¿Imatataj cuyapäcoj car achca hermanucuna rurapäcun? 2) Hebreos 13:16 wilacushganno, ¿imatataj ruranchi waquincunaraycur y imanotaj Diosninchi chayta rican?

¹⁴ Pasaypa cuyapäcoj carga mastarämi waquincunapaj ruranchi. Unay wichannola Jehovapa testiguncunaga amatar cuyapäcoj waquincunawan canchi, mana reguishganchi cajcunawanpis. Maygan marcachopis desgracia pasashga captenga mayna tapucuycanchi imano yanapacunapaj cajta. Congregaciuncho guellaynin ushacashganraycur pilapis nacaycaptinpis yanapaycunchimi. Unay Macedonia cristianucunanomi walcala gonapaj cajpitapis mastaraj goycunchi (2 Cor. 8:3). Aumi, chay cristianucunanolami yanapacoj canapaj calpachacunchi. Hermanunchicunaraycurga imaycatapis rurashwanmi. Mayraj Taytalanchi Jehovaga cushicun waquincunawan pasaypa cuyapäcoj captinchi (leiriy Hebreos 13:16).

15, 16. ‘Cuticuy cuticuy’ suedran niycaptinpis, ¿imatataj rurargan Rut?

¹⁵ Rutpitawan Noemipita parlarga imayca yachacunapaj caycan. Mä juc ishcaylata ricärishun.

¹⁶ Ama guepaman cutishunchu. Nishganchinopis Rutga suedranta yanagänanpämi nergan, pero payga cuticuy cuticuy nergan. ¿Y Rutga jinan horachuraj cuticurgan?, manami. Biblia cayno wilacun: “Rut cuticuyta mana munaptin Noemïga mana rimaparannachu” (Rut 1:15-18).

17. Pipis yanapänanchita mana munaptenga, ¿chauraga paycunapaj yarpachacushunnachu?

¹⁷ Imata yachacunchi: Laquishgala caycajcunata yanapänapäga pacienciacojrämi cananchi, calpachacunanchirämi. Ichanga maygan panilapis ninman ‘pipis yanapämänanta munächu’ nir. * Chayno captinpis pasaypa cuyapäcoj carga laquishgala caycaj paninchitaga manami jaguiycushunchu (Gál. 6:2). Y tiempuwanga ‘yanapaycalämay’ hasta nimashwanmi.

18. ¿Imaraj Rut-taga laquichergan?

¹⁸ Ima nimaptinchipis juclaga laquishga ricacushunchu. Belén marcaman Noemiwan Rut chayaycurna, unay vecinancunata Noemí cayno nergan: “Caypita aywacuptëga ima-aycäpis achcami caran. Cananga jinayllanami cutimushcä” (Rut 1:21). ¿Imanoraj ricacurgan Rut, suedran chayno parlashganta wiyar? Rutga imaycata suedranraycur rurargan, wagaptinpis paywan wagargan, shacyächergan y chacaycho junajcho viajicho yanagargan. ¿Imanir-raj Noemiga nergan ‘jinayllanami cutimushcä’ nir? Ladunpitaga Rut manami raquicarganchu, ¿manachuraj Noemiga valurarcunman cargan? Chayno parlashganga ichanga Rut-taga wagachirganrächi. Imano captinpis Noemipa ladunlachomi siguergan.

19. ¿Imaraj yanapämäshun laquishgala caycajcunapa ladunpita mana aywacunapaj?

¹⁹ Imata yachacunchi: Laquishgala caycaj paninchita yanapaycarga öraga parlashganwan shongunchita nanachimashwanmi. Chauraga, ¿yanapäshunnachu?, manami. Cuyaparmi ladunpitaga aywacushunchu y  Jehovata mañacurmi yanapämäshun imano shacyächinapaj (Prov. 17:17).

20. ¿Imataj Rut-ta yanapargan valurcharcunanpaj?

²⁰ Shacyächinapaj captenga pilatapis shacyachishun. Rutga pasaypa cuyapäcojmi cargan Noemiwan, pero cananga pilapis shacyachinanpämi caycargan; Jehovaga musyarganmi chayta. Chaymi Boazta yanapargan cayno palabracunata wilacunanpaj: “Chaypita Tayta Dios yanapaycushunqui ari. Yäracushayquipita, allita rurashayquipita Israelpa TAYTA DIOSNIN imachöpis yanapaycushunqui”. Cay palabracunaga alapachi cushichergan Rut-ta, chaymi quiquinpis cayno nergan: “Cuyapäcoj runami canqui. Grasyas tayta, piyunniqui mana caycaptëpis alli ricamashayquipita” (Rut 2:12, 13). Boazpa cuyaylapaj palabrancunawanga Rutga valurcharcurganmi, guepaman mana cutinanpaj.

21. Isaías 32:1, 2 wilacushganno, ¿imatataj cuyacoj cashpan ancianucuna rurapäcunga?

²¹ Imataj yachacunchi: Waquincunawan amatar cuyapäcoj caycarpis, öraga quiquinchipis pilapis shacyachimänanchitami munanchi. Noemiwan pasaypa cuyapäcoj cashganraycurmi Boazga ‘alita rurashcanqui’ Rut-ta nergan. Chaynolami canan wichanpis congregaciuncho ancianucunaga ‘alitami rurashcanqui’ nipäcun shacyachicoj hermanucunata. Chayno captenga cay shacyachicoj hermanucunaga masraj valurcharcur waquincunata yanapanga (leiriy Isaías 32:1, 2).

22, 23. ¿Imanotaj tiempuwanga Noemí ricacurgan, y imaraycurtaj chayga cargan? (Salmo 136:23, 26).

²² Tiempo pasarcuptenga masrämi Boazga Rut-tawan Noemita yanapargan micuyninpis  mana pishinanpaj (Rut 2:14-18). Chayno yanapacoj runa cashganpita caynomi Noemí nergan: “TAYTA DIOSNINCHI yanapaycuchun. Payga noganchïtapis cuyapämanchïmi” (Rut 2:20a). Cananga Noemí más cushi cushilami caycan. Unaycho nergan: “Tayta Dios llaquicuyman churamasha”. Pero cananga nin: Jehovaga “noganchïtapis cuyapämanchïmi” nir. ¿Imanirtaj cananga chayno cushi cushila caycan?

²³ Noemiga ricarganmi Taytalanchi Jehová imano yanapaycashganta. Marcanpa cuticamushganchoga Rutwanmi Jehovaga cuyapäcoj cashganta ricächergan (Rut 1:16). Jina Jehová alapa cuyapäcoj cashgantapis ricargan Boaz yanapacoj cashganchomi. Aumi, payga cay ishcay warmicunatami alapa yanapargan * (Rut 2:19, 20). Noemiga caynochi yarpachacoj: “Tantiäna. Jehovaga imaypis cacharimashgachu. Waran waranmi nogawan caycashga” nir (leiriy Salmo 136:23, 26). Cushi cushila cashpan ‘graciaslä’ nirganchi Boaztawan Rut-ta alapa yanapashganpita. Quimsancunami alapa cushicärergan Jehovapa maquinta lapancho ricar.

24. ¿Imanirtaj cuyapaycashwanla hermanunchicunata?

²⁴ ¿Imatataj yachacushcanchi pasaypa cuyapäcoj imano canapaj Rut librucho? Pasaypa cuyapäcoj captinchirämi laquishgala caycaj hermanucunata yanapänapaj calpachacushun. Paycunaraycurga imaycatapis rurashwanmi. Ancianucunaga ‘alitami ruraycanqui’ nipäcunmanmi shacyachicoj hermanucunata. Amatar cushicunchi laquishgala caycaj hermanunchicuna Jehovata cushi cushila yapay sirvir galaycäriptin (Hech. 20:35). Ama gongashunchu, piwanpis pasaypa cuyapäcojga canchi Jehová rurashgannola rurayta munarmi, payga “pasaypa kuyakuqmi” (Éx. 34:6; Sal. 33:22).