1. ¿Ima tapucuytataj öraga ruracushwan?

LUTA religiuncuna ushacänanpäna caycan, Gog de Magog nishganpis atacamäshunmi y Armagedón guerrapis galaycamungami, chaycunaman yarparga ¿manchacunquichu? Jina ‘chay wichanga canannola yaracuycäshächuraj’ ¿ninquichu? Chayno captenga alapami yanapäshunqui cananpaj acracamushgan textucho Jesús ima wilacamushgan. Paymi gatejnincunata nergan: “Ama lakikäriytsu. […] Yärakärimuy” (Juan 14:1). Canancush yaracuyninchita winachiycanchi chayga alimi caycan yaracuycarla caycänapaj.

2. ¿Imanotaj yaracuyninchita aliyarcachishwan y canan imatataj yachacushun?

² ¿Imacunata rurartaj yaracuycanchi canan wichan pruebacunata vencinapaj?, chayman yarpachacushganchimi yanapämäshun shamoj tiempuchopis yaracuycarla caycänapaj. Aumi, yarpachacushwanmi ‘imanotaj yaracuynëta aliyarcachëman’ nir. Pruebacunata venciptinchirämi yaracuyninchipis jatunyarcunga y chaynolami caycanga shamoj tiempucho imacunapis pasaptin. Imacunataj cargan Jesuspa gatejnincuna masraj yaracärinanpaj, chuscu caycan canan yachacunapaj. ¿Paycuna pasashgannola noganchicunapis pasashwanchuraj?, chaytapis yachacushunmi; cay lapanmi yanapämäshun shamoj tiempupaj.

3. Mateo 6:30, 33 wilacushganno, ¿imatataj Jesús nergan yaracuypaj parlar?

³ Musyanchimi familiacho runa cajcunaga yarpachacärinmi  warminpaj, wamrancunapaj, ropapaj, micuypaj y maycho tiyananpäpis. Trabajunta ograshganraycurpis nacarcaycanmi achca hermanucuna. Waquincunana chasquicärishgachu Diospa ricayninpaj mana ali caycaj trabajucunata. Caycunapa pasarga ali canga yaracuycarla caycaptinchi y Taytalanchi Dioslaman shuyaraptinchi. Chaypämi Jesús parlamurgan Sermón del Monte nishgancho yachachicuptin (leiriy Mateo 6:30, 33). Jehová jaguirimänanchipaj yarpaylapis mana yarparga paypa voluntänintami ruracuycäshun. Imano cawacunapaj Jehovapa maquinta ricarga payman masraj guelicushun, yaracuyninchipis masraj winamunga.

4, 5. ¿Imacunata rurartaj cawananpaj ima necesitaycashgancunata juc familia taripäcurgan?

⁴ Venezuela naciuncho cawaj Castro familiapita parlarcushun. Cawaynincunachoga Jehovapa maquintami paycuna ricapäcurgan. Chacrancunachoshi arupacoj cawapäcunanpaj imalantapis rantipacamunanpaj. Pero juc cutichoshi chacranpita gargupäcurgan. Tayta caj Miguel jutiyoj cayno wilacun: “Cananga prestamashganchi ichic chacralachomi micunapaj arunchi. Pacha waraptinlami Tayta Jehovata ruwacö chay junajpaj tantäcunata goycalämänanchipaj”. Cay familiaga imaycatarächi ruran cawananpäga, ichanga Jehová yanapänanpäga alapami yaracärin. Paycunataga imapis manash michäcunchu reuniunchopis predicaciunchopis carcaycänanpaj. Diospaj cajcunataga más puntaman churapäcun, chaynami Diosninchega cuyacoj Tayta cashpan paycunata ricaycan.

⁵ Chaycunapa pasashgan wichanga warminwan Miguelga mana gongapäcushgachu familianta Jehová imano yanapashganta. Öraga quiquin Jehovami hermanucunawan yanapargan, imalanpis pishiptin y trabajunta Miguel ashiptinpis. Chay naciuncho sucursalga camacächishgash hermanucuna viviriscunata aypunanpaj, Castro familiamanpis chayachipäcushgash. Ricaycanchimi paycunataga Jehová yanapaycanlami. Mayraj cay familiapa yaracuynincuna winarcushga. Imacuna pasashganpa parlarmi mayor warmi wamran Yoselin jutiyoj cayno wilacun: “Pasashgäcunachoga ricargämi Jehová nogacunawan caycashganta, payga nogapäga caycan mana jaguicoj amigö japuymi”. Caytapis ninmi: “Familiäwan ima aycata pasashgäcunaga yanapämäshunmi shamoj tiempuchopis yaracuycarla carcaycänapaj”.

6. Guellayraycur cawayniqui sasa tricracurishga captenga, ¿imanotaj yaracuyniquita sinchiyarcachinquiman?

⁶ Laquicuypämi guellayta tarinapaj sasa captenga, ¿gampis chaypacu pasaycanqui? Chayno captinpis cawayniqui sasa ticracuriptinpis yaracuyniqui aliyarcunanpäga calpachacuy. Jehovata mañacuy, y Mateo  6:25-34 textucunacho Jesús ima nishganmanpis yarpachacuy. Jina yarpachacuy picunataj Jehovata mana uticaypa sirvircaycan y imanotaj Diosninchega paycunata yanapaycan (1 Cor. 15:58). Chayta rurarmi tantiarcunqui gamtapis Jehová yanapäshunayquipaj. Payga musyanmi imano y imay hora yanapäshunayquipaj. Aumi, imano yanapäshushgayquita ricarga yaracuyniquega sinchiyarcungami y shamoj tiempucho ima pasananpaj cajtaga manami manchacunquichu (Hab. 3:17, 18).

7. Mateo 8:23-26 textucuna nishganno, ¿ima pasaptintaj Jesuspa gatejnincuna yaracunman cargan?

⁷ Juc cuticho gatejnincunawan lamarpa barcuwan aywarcaycaptinmi viento alapa pücamur galacaycamurgan. Chaychomi Jesús gatejnincunata yanapargan masraj yaracärinanpaj (leiriy Mateo 8:23-26). Chay vientuwanga barcuga talpucänanpänashi caycargan pero Jesusga punuräcuycarganshi. Discipuluncunaga manchacushpanshi ‘¡sharcuy, sharcuy!’ nir pay cajman aywargan. Riccharcamurna Jesús cayno nergan: “Janan shonqula yärakuq runakuna, ¿imanirtaj mantsakärinqui?”. Gatejnincunaga maynachi musyapäcunman cargan paycunata Jehová yanapänanpaj. ¿Imatataj yachacunchi? Mana ishquej gaga japuy yaracuyninchi captenga imaycatapis aguantashunmi.

8, 9. ¿Imapataj Anel paninchi pasargan, y yaracoj cashganga imanotaj yanapargan?

⁸ Puerto Rico naciunpita Anel panipita parlarcushun, payga pruebacunapa pasarpis yaracoj warmish cargan. 2017 watachoshi naciunnincho huracán María cashganraycur wasin talmacäcurgan y trabajuntapis ogrargan. Paymi nin: “Laquicuypaj tiempo cargan, alapami manchacurgä. Jehovataga cutin cutinmi ruwacurgä, chaynopa laquishgala mana ricacunäpaj”.

⁹ Chay pruebacunapa pasar Aneltaga yanaparganshi casucoj cashgan. Paymi cayno nin: “Diospa marcan mandacamushgan wilacuycunata casucashgämi yanapämargan alapa manchacur mana caycänapaj. Bibliawan shacyachimashgancunapa y jucnopapis yanapämashgancunapa guepanchomi Taytalä Jehová caycargan”. Caytapis ninmi: “Shuyarashgäpitapis mastami Tayta Jehová goycalämashga yaracuynëpis más sinchi caycan”.

10. ¿Imataraj ruranquiman ima desgracialapapis pasaycarga?

¹⁰ Canan wichanga ilajpitami ima desgraciapis cay munducho pasaycan. Gampis ichanga chayraycur nacaycanqui o gueshyaraycurpis laquicuycarla caycanqui. Imano captinpis, imacunapa pasarpis Jehová Diosmanga confiacuycarla caycanquiman.  Shonguyquita mashtapay y lapanta wilapay. Ayca cutiraj Jehovaga yanapäshushcanqui guepa watacunacho, chayman yarpachacurpis más yaracoj runaman ticranqui (Sal. 77:11, 12). Yarpaylapis ama yarpaychu ‘Diosga nogapaj yarpachacunchu’ nir.

11. ¿Imanirtaj casucoj cashwan pushacoj hermanunchicunata?

¹¹ ¿Ima mastaj yanapäshunqui pruebacunata aguantanayquipaj?; casucoj cashganchimi, Anel pani nishgannopis. Confiacunapäga caycan carguyoj hermanucunami, paycunatami quiquin Jehová y Jesuspis churashga. Öraga nishwan ‘shumaj tantiacanchu mandamashganchicunaga’ nir. Pero Jehovaga casucojcunatami bendecinga. Palabranpis wilacunmi casucoj carga hasta wanuypitapis libracunapaj (Éx. 14:1-4; 2 Crón. 20:17). Achcajmi Diospa sirvejnincunaga casucoj capäcushga, chayman yarpachacurga yanapämäshun Diospa marcancho casucoj canapaj canan y shamoj tiempuchopis (Heb. 13:17). Chayno carga ima pasananpaj cajcunataga manami manchacushunchu (Prov. 3:25).

12. Lucas 18:1-8 textucuna wilacushganno, ¿imanirtaj nishwan injusticiacunata aguantanapaj yaracoj cashganchipitaraj cashganta?

¹² Jesusga musyarganmi gatejnincuna waquincunapa culpanraycur nacananpaj cajta. Chaycunapa pasar ima yanapänanpämi Lucas librucho wilacurgan. Chaychomi parlamurgan juc viudapaj y Diosta mana manchacoj juezpaj, cay viudash payta ruwacurgan justiciata rurapänanpaj. Payga yarparganshi cutin cutin ruwacuptin chay juez yanapänanpaj, y yanaparganmi. ¿Imataj yachacunchi? Jehovaga ali cajlata ruraj Diosmi. Chaymi Jesús nergan: “¿Manatsuraq Tayta Diospis akrashqankunata yanapanqa paqasta junaqta manakurkaykaptinqa?” (leiriy Lucas 18:1-8). Caytapis nergan: “Tsayno kaptinpis Runapa Tsurin kay patsaman kutimur ¿tarinqatsuraq pilapis Tayta Diosman yärakuykaqta?”. Waquincunapa culpanraycur nacaycarga pacienciacoj cananchi y mana yamacaypami chay viudano yaracuycarla caycashwan. Chayno captenga cushi cushilami shuyaraycäshun Jehová yanapämänanchipaj. Jina mañacuytaga gongashwanchu. Öraga ima mañacushganchicunapis juclami ricacämun.

13. ¿Imanotaj juc familiata yanapargan warmi wamran mañacamuptin?

¹³ Vero cristianapita parlarcushun, payga mana Testigo runanwan y 15 watayoj warmi wamranwan República Democrática del Congo nishgancho cawan. Juc cuticho guerra wichanmi quimsancuna gueshpiypa marcanpita aywacärergan. Gueshpircaycashganchoshi chaychicaj soldaducuna yuricarcamur wanuchiytaraj munapäcurgan. Vero  cristianaga wagarshi galacuycurgan, shacyachinanpäga warmi wamranshi sinchipa Jehovata mañacurergan ‘¡Jehová, Jehová!’ cutin cutin nir. Chaynash juc carguyoj soldado cayno nergan: “Jipash, ¿pitaj chayno mañacamunayquipaj yachachishushcanqui?”. Cay jipashna nergan: “Mamänëmi, Mateo 6:9-13 textucuna wilacushganno”. Nircur chay soldado nergan: “Ama manchacäriychu, caylapa aywacäriy, Jehová Diosniquiga chapäshunquimi” nir.

14. ¿Öraga juclachuraj ima mañacushganchicunapis ruracämunga, y imataj yanapämäshun aguantanapaj?

¹⁴ ¿Imataj yachacunchi? Diosta mañacushganchitaga öraga juclami chasquirishun. Y chayno mana captenga viuda warmipaj Jesús parlashganman yarpachacur cutin cutin Diosta ruwacuycäshunla, Jehovaga manami jaguishunquichu; espíritu santunpäpis mañacuy (Filip. 4:13). Nacashgayquitaga gongaycunquinami shamoj tiempucho achca bendiciuncunata chasquir. Ima pruebacunatapis Jehovapa calpanwan aguantarga mana manchacuypami ima pasacunantapis shuyaraycanqui (1 Ped. 1:6, 7).

15. Mateo 17:19, 20 wilacushganno, ¿ima rurananpätaj camäpacurganchu Jesuspa gatejnincuna?

¹⁵ Jesusmi gatejnincunata nergan yaracäriptinraj imatapis vencinanpaj (leiriy Mateo 17:19, 20). Achca cuti demoniucunata gargupäcushga captinpis juc cutichoga manash puedipäcurgannachu. ¿Pero imanirtaj? Jesusmi nergan más yaracoj captinraj chayta rurapäcunanpaj, yaracoj car-raj jatun jircacunatapis cuyuchinanpaj cajta. Canan wichan imacunapis sasa ticracuriptenga öraga valurcharcunapärämi canman.

16. Alapa laquesacunapa pasarpis, ¿imanotaj Geydi cristianata yanapargan yaracoj cashgan?

¹⁶ Guatemala naciuncho cawaj Geydi cristianapita parlarcushun. Juc cuticho congregaciunpita cutipäcamuycaptinmi Edi jutiyoj runanta wanuchipäcurgan. Paymi wilacun alapa yaracushganraycur imano valurcharcushganta, cayno nin: “Mañacuriptë Jehovata lapanta wilapä, chayraj laquësäcunapis aywacun. Payga chapaycalämanmi familiäwan y congregaciuncho hermanucunawanpis. Jehovata mana yamacaypa sirvishgäpis yanapämanmi yarpachacuycarla mana caycänäpaj. Laquesacunapa pasashgäcunami yanapäman, shamoj tiempucho ima pruebacunapapis pasar valurcharcunäpaj, Jehovawan Jesusga y marcanga yanapämangami”.

17. ¿Imataraj rurashwan vencinapaj cajcuna jatun jircano captin?

¹⁷ ¿Familiayquicho maygan castayquilapis wanushgachu? Chayno captenga Bibliacho leipacaramuy unay wichan waquincuna wanushga carpis imano cawarimushganta. ¿O maygan castayquipis congregaciunpita gargushgacu cashga? Chayno captinpis  laquicuychu, Diosga musyanmi imanir pitapis congregaciunpita gargunapaj. Chauraga imacunapapis pasarga chaychomi ricacämunga yaracoj cashganchi. Jehovata mañacurir shonguyquitapis mashtapay. Hermanucunapis yanapäshunayquipämi caycan (Prov. 18:1). Wagarpis, nacarpis Jehovata sirvinayquipaj calpachacuy (Sal. 126:5, 6). Alimi canga reuniunchopis predicaciunchopis caycaptiqui, Bibliayquita leishgayquipis. Jehová lapan aunicushgancunamanpis yarpachacuy. Canan hora Jehová yanapäshushgayquiman yarpachacurpis yaracoj cashgayquiga masraj ricacämunga.

18. Masraj yaracunayquipaj pishiycäshuptiquega, ¿imataraj ruranquiman?

¹⁸ Ima pruebacunapapis pasar ichanga cuentata gocushcanqui masraj yaracunayquipaj pishiycäshushgayquita. Pero calpachacuy yaracushgayqui mana ishquej gaga japuy cananpaj. Y apostulcuna mañacushganno gampis cayno mañacuy: “Yanapaykalämay mas yärakärinäpaq” (Luc. 17:5). Canan parlashganchi yaracoj hermanunchicunapitapis mayraj yachacunayquipaj caycan. Miguelwan warmin Yurai rurashganno gampis waran waran yarpachacuy Jehová yanapäshushgayqui cajman. Vero cristianapa warmi wamran rurashganno y Anel rurashgannopis Jehovata mañacuy imayca laquesacunapa pasarpis. Y Geydi cristianawan pasashgannopis; familiayquipis hermanucunapis yanapäshunquimi, guepanchomi Tayta Jehová caycan. Canan wichan ima pruebacunapa pasarpis gamwan Taytalanchi Jehová caycashganta ricarga, yanapäshunquimi shamoj tiempucho imacunapa pasarpis yaracunayquipaj.

19. ¿Imapitataj Jesús seguro caycargan, y gampis imanotaj paynola seguro caycanquiman?

¹⁹ Jesusga wilacurganmi gatejnincuna imacunacho masraj yaracunanpaj, pero musyarganmi shamoj watacunacho ima pruebacunapa pasarpis Papänin yanapänanpaj (Juan 14:1; 16:33). Jina musyarganmi nacanapaj tiempo chayamuptin maychicaj gatejnincuna yaracushganraycur aguantananpaj (Apoc. 7:9, 14). ¿Yaracushgayquiraycur gampis chay tiempucho aguantanquichuraj? Jehová cuyacoj captin yanapäshuptiquimi imacunatapis aguantanqui, canan ichanga alapa calpachacuy masraj yaracunayquipaj (Heb. 10:39).