1, 2. 1) ¿Imatataj cay yachachicuycho ricärishun? 2) ¿Imataj ricächicun Jehová yanapämänanchipaj munaycashganta?

 JEHOVAGA yanapämanchi problemacunata aguantanapaj y cushishgala sirviycänapaj. Cay yachachicuychomi ricärishun imanotaj Jehová yanapämanchi y imatataj rurashwan yanapacuyninta shumaj provechanapaj. ¿Pero rasunpachu Jehová yanapämänanchipaj munan? Chaytami puntata yachacushun.

² Chaypäga apóstol Pablo Hebreo cristianucunata cartacamushgancho ricärishun. Pay escribergan: “Tayta Diosga yanapaycämanmi. Chaymi imatapis mana manchacöchu. ¿Imataräshi ruramanman runa-masëga?” (Heb. 13:6). Cay versiculucho “yanapaycämanmi” palabrataga, Bibliapita waquin diccionariucunaga tantiachicun “yanapaycamay” pipis mañacuptin juc runa yanapänanpaj waracayla aywaycashganno. Yarpachacushun pipis pasaypa nacaycajta Jehová yanapänanpaj waracaylapa aywaycashgan cajman. Cayga tantiachimanchi Jehová yanapämänanchipaj puedishganta y yanapämänanchipaj shongupita munaycashgantapis. Jehová yanapaycämaptinchega cushi cushilami pruebacunata aguantashun.

3. ¿Imanotaj Jehová yanapämanchi cushishgala aguantanapaj?

³ ¿Imanotaj Jehová yanapämanchi cushi cushila aguantanapaj? Caytaga musyashun Isaías libruchomi. Profeta Isaías achca profeciacuna escribishganga canan wichan Jehovapa sirvejnincunapäpis caycanmi. Jinamanpis Isaiasga tantiacaj palabracunawanmi Jehová imano cashganta  wilacurgan. Tantiarinapaj 30 caj capituluchoga shumaj tantiachicuycunawan Jehová marcanta imano yanapashganta tantiachicun. Chaycho nin: 1) mañacushganchitaga Jehová wiyamanchi y contestamanchimi, 2) pushamanchi y 3) bendecimäshun canan wichan y shamoj tiempuchopis. Chaycunata jucnin jucninta tantiarcushun.

4. 1) ¿Imataj Jehová nergan Isaías cawashgan wichan judiucunapita, y imapa pasananpätaj permitergan? 2) ¿Imataj wilargan cäsucoj judiucunata? (Isaías 30:18, 19).

⁴ Isaías librupita 30 caj capítulo galananchoga, Jehová judiucunapita nergan “mana wiyacoj wamräcuna [...] jananman-jananman juchata rurarcaycan”. Caytapis nergan: “Cay nasyun runacunaga mana wiyacoj llullami. TAYTA DIOS yachachishantapis manami wiyayta munanchu” (Is. 30:1, 9). Mana wiyacushganpita Isaiasga wilacurgan chay judiucuna pasaypa nacananpaj Jehová permitinanpaj (Is. 30:5, 17; Jer. 25:8-11). Chaynomi pasargan, babiloniucunami paycunata apacärergan. Ichanga cäsucoj judiucunaga juc ishcaycunami cargan, paycunapämi Isaiasga ali wilacuyta wilacurgan: imaylapis paycunata Jehová yanapänanpaj (leiriy Isaías 30:18, 19). Chaynomi cargan babiloniucunapitami Jehová librargan, ichanga manami raslachu cargan. “TAYTA DIOSGA shuyaraycäshunquimi gamcunata cuyapäshunayquipaj” Biblia niptenga, tantiachicun Babilonia marcapita judiucuna aywacärinanpäga juc tiempuraj pasanan cargan. Jehová permitergan 70 watacunaraj pasananpaj waquin judiucuna Jerusalenman cutipäcunanpaj (Is. 10:21; Jer. 29:10). Juc marcacho caycar laquicuypita wagapäcushganpita, marcanchona caycarga cushicuypitanami wagapäcurgan.

5. ¿Imataj aunimanchi Isaías 30:19 texto?

⁵ Canan wichanpis alapami shacyächimanchi cay palabracuna: “Gaparaypa mañacuptiqui Tayta Diosga wiyashushpayqui cuyapäshunquipämi” (Is. 30:19). Isaiasga wilacurgan mañacushganchita Jehová wiyamänanchipaj y juclami contestamäshun. Caytapis nergan: “Payga wiyarcushan öra jucllami yanapäshunquipaj”. Cay shacyächicoj palabracunaga yarpächimanchi, Jehová yanapämänanchipaj listo caycashganta y yanapämänanchipaj shongupita munashgantapis. ¿Chayta yarparaycarga manachu cushi cushila aguantanapaj yanapämanchi?

6. ¿Imanotaj Isaías tantiachimanchi jucninchi jucninchita Jehová wiyamashganchita?

⁶ Jinapis cay versiculuga tantiachimanchi mañacuptinchi Jehová jucninchi jucninchita wiyamashganchita. ¿Imanirtaj chayta ninchi? Isaías librupita 30 caj capítulo galananchoga, Jehová “lapan marcanta” parlapar “gamcuna” nin. Ichanga 19 caj versiculuchoga jucninlata parlapaycajno “gam” nin, chayga ninan Jehová sirvejnincunata jucnin jucninta wiyashganta. Isaías nin: “Manami waganquipänachu”, “wiyashushpayqui cuyapäshunquipämi”, “jucllami yanapäshunquipaj”. Jehová cuyacoj Tayta captinmi maygan wamranlapis laquishga caycaptenga manami nirinchu: “Wauguiquino aguantanquiman”. Chaypa trucan jucninchi jucninchipämi yarpachacun y mañacushganchitaga quiquinmi wiyaycun (Sal. 116:1; Is. 57:15).

7. ¿Imanotaj Isaiaswan Jesús tantiachimanchi alapa ali cashganta cutin cutin mañacuptinchi?

⁷ Imalapitapis yarpachacushganchipita Diosta mañacuptinchi chay problemata  aguantanapäga puntata calpantachi gomanchi. Munashganchino chay prueba jucla mana ilacaptenga, cutin cutinrächi mañacunanchi calpata gomänanchipaj. Quiquinmi chayta ruranapaj nimanchi. Chaytami tantiachimanchi Isaías wilacushgan cayno nir “jamaycunanta ama dëjaychu” (Is. 62:7). ¿Chayga ima ninantaj? Cutin cutinmi mañacushwan, Jehová jamananta mana dejaycashganchino. Cayga yarpächimanchi imano mañacunapaj Jesús yachachicushganpita Lucas 11:8-10, 13 textucunacho. Tincuchicuycunawanmi yachachicurgan ‘yaparir-yaparir fastidiar’ mañacunapaj, y santo espiritunta mañacunapäpis. Jina, Jehovata ruwacushwan ali cajcunata acranapaj.

8. ¿Imanotaj cumplicurgan Isaías 30:20, 21 textucuna nishgan?

⁸ (Leiriy Isaías 30:20, 21). Babilonio soldaducunaga juc watapitapis masrämi Jerusalenta corralargan. Chay wichan judiucuna alapa nacapäcushganga may chaycho yacu y tanta cashgannomi cargan. Ichanga 20 y 21 versiculucuna nishganno paycuna arrepenticur ali cajcunata ruraptenga Jehová perdunaycunanpämi aunicurgan. Isaías judiucunata nergan ‘Jehovami Pushashojniqui’, y aunipargan Jehová paycunata yachachinanpaj, pay munashganno adurapäcunanpaj. Chayga cumplicurgan judiucuna Babiloniapita yargupäcuptinmi. Paycunapaj Pushacojnin cashganta Jehová ricächicurgan, chaynopa judiucunaga yapay Jehová munashganno adurapäcurgan. Cananpis Jehovami pushamanchi, chayga alapami cushichimanchi.

9. ¿Imanotaj canan wichan Jehová pushamanchi?

⁹ Jehová yachachimaptinchega alapa alimi. Cay versiculuchoga, Isaías wilacun Jehová yachaycächishgan estudiantincunano cashganchita. Puntataga Isaías nin: ‘Pushashojniquita [...] ñawiquiwanmi ricanquipaj’. Chaywanga tantiachicun pushacoj caj, estudianticunapa naupancho ichiraycashganta. Canan wichan, ¿imanotaj Jehová yachachimanchi? Marcanwanmi. Alapa agradecicunchi ali claro yachaycächimashganchipita reuniuncunawan, asambleacunawan, publicaciuncunawan, videucunawan y tucuynopapis. Chaynopami sasacunapa pasaptinchi cushishga aguantanapaj yanapämanchi.

10. ¿Imanotaj Diospa vozninta guepanchicho wiyanchi?

¹⁰ Jina Isaías wilamanchi Jehová caynopis  yachachimashganchita, cayno niptin: ‘Rinriquiwanmi wiyanqui guepayquipa gayacamojta’. Cananga Isaías tantiachimanchi Jehová juc pushacojno estudiantincunapa guepanchona caycar maypa aywananpaj pushaycashganta. ¿Imanotaj canan wichan Diospa vozninta guepanchicho wiyanchi? Bibliata leirmi. Chaychomi unayna Diospa wilacuyninta escribishga cargan. Chaymi leiptinchega guepanchipa Jehovapa vozninta wiyaycashganchino caycan, unayna escribishga captin (Is. 51:4).

11. ¿Imatataj rurashwan cushi cushila aguantanapaj, y imanir?

¹¹ ¿Imatataj rurashwan Jehová yachaycächimashganchita marcanwan y Palabranwan lapanta cäsucunapaj? Isaiasga caycunata wilacamurgan, puntataga: “Caypami näniga”, nircur caytapis nergan: “Cay alli nänipa aywayga” (Is. 30:21). Chauraga maygan nänipa aywanapaj musyaycarga chay nänipami aywashwan. Agradecicunchimi Jehová marcalanwan Palabranta ali claro tantiachimashganchipita, cuentata gocunapaj Jehová ima munashganta ruranapaj. Chaycunatami rurananchi Jehovata sirvir cushi cushila aguantanapaj, chaynoparämi pay bendecimäshun.

12. ¿Imanotaj marcanta Jehová bendecirgan Isaías 30:23-26 textucuna nishganno?

¹² (Leiriy Isaías 30:23-26). ¿Imanotaj cay profeciaga unaycho cumplicurgan? Judiucuna jäpano Babiloniacho caycashganpita, Israel marcanmanna cutipäcamuptin achca bendiciuncunata chasquipäcurgan. Jehová achca micuycunatami camaripargan, y cada cadala Jehová munashganno adurapäcunanpaj calpachacäriptin masraj yäracärinanpaj tucuy yanapacuycunata chasquipäcurgan. Chay wichan Diospa marcanga unaypitapis más bendiciuncunatami chasquipäcurgan. 26 caj versículo nishganno Jehovaga yachachicuynincunata masraj achicyächirgan (Is. 60:2). Chayno bendiciptinmi, Jehovapa marcanga calpayoj ricacur cushi cushila sirviycargan. Aumi shonguncunaga alimi caycargan (Is. 65:14).

13. ¿Imanotaj canan wichan Jehová munashganno adurapäcunapaj profecía cumplicurgan?

¹³ ¿Canan wichanpis Jehová munashganno adurapäcunapaj profeciaga cumplicurganchu? Aumi. 1919 watapita chaychica runacunami Jatuncaray Babiloniapita o tucuy mana ali religiuncunapita libracärergan. Chay lapancunatami pushapäcurgan  unaycho Aunishgan Pachapitapis más cuyaylapaj marcaman (Is. 51:3; 66:8). ¿Imataj chay cuyaylapaj marca?

14. ¿Imataj cuyaylapaj marca, y canan wichan pïcunataj chaycho cawacärin? (Notatapis ricäriy).

¹⁴ Cielupaj acrashgacunaga 1919 watapitami chay cuyaylapaj marcacho carcaycan. b Tiempo pasashganmanno cay Pachacho imaycamapis cawapäcunanpaj chaychica runacunami cuyaylapaj marcamanmi yaycupäcushga, y chaychica bendiciuncunata chasquipäcurgan, paycunapitami Biblia nin ‘waquin uyshacuna’ (Juan 10:16; Is. 25:6; 65:13).

15. ¿Maychotaj cuyaylapaj marca caycan?

¹⁵ ¿Maychotaj cuyaylapaj marca caycan? Jehovapa sirvejnincuna entero Pachacho carcaycaptinmi, cuyaylapaj marcaga may chaychopis caycanmi. Chauraga, maycho tiyaycarpis cuyaylapaj marcanman yaycushwanmi, Jehová munashganno payta aduranapaj lapan shongunchiwan calpachacuptinchi.

16. ¿Imataj rurashwan cuyaylapaj marcacho jaucala caycänapaj?

¹⁶ Cuyaylapaj marcacho jaucala goyaycänapäga lapan Pachacho congregaciuncunata juc familiano caycashganchita valurananchi. Chaypäga hermanunchi pantashganlamanga yarparaycashwanchu, sinoga alita rurashgancunamanmi yarparaycashwan (Juan 17:20, 21). Chayta ruranapaj, ¿imanirtaj calpachacushwan? Cayman yarpachacushun. Juc montichoga tucuy yoracunami can. Chaynolami cuyaylapaj marcachopis tucuy runacunami can, yoracuna japuy (Is. 44:4; 61:3). Cercalanchicho caycaj yora wicsu ima caycaptin chaylata ricaräcuptinchega lapan monti cuyaylapaj caycashganta manami ricashunchu. Chaynolami quiquinchi o hermanunchi pantarcuptin chaylaman yarparäcuptinchega, manami cuentata gocushunchu lapan Pachacho chay marca cuyaylapaj y juc shongula cashganta.

17. ¿Imatataj jucninchi jucninchi rurashwan congregaciuncho juc yarpayla caycänapaj?

 ¹⁷ Imaypis juc shongula caycänapaj, ¿imataj jucninchi jucninchi rurashwan? Waquincunawan jaucala goyäcunapaj calpachacunanchi (Mat. 5:9; Rom. 12:18). Hermanunchicunawan imaypis alila apanacärinapaj imaycanopapis calpachacuptinchega, chay cuyaylapaj marca más shumajraj caycänanpaj yanapacuycäshun. Yarpaycänanchi cuyaylapaj marcacho caycajcunataga lapancunata Jehová pushamushganta (Juan 6:44). Mayraj Jehová cushicun hermanunchicunawan jaucala y juc yarpayla caycänapaj calpachacuycashganchita ricamaptinchi, paypäga lapanpis alapa valuryojmi caycanchi (Is. 26:3; Ageo 2:7).

18. ¿Imacunachotaj cada cadala yarpachacushwan, y imanir?

¹⁸ ¿Imatataj rurashwan Jehovapa bendiciunnincunata shumaj provechanapaj? Aliraj yarpachacushwan Bibliapita y publicaciuncunapita yachacushganchiman. Ali yachacuptinchi y yachacushganchiman yarpachacuptinchega más ali cristianuman ticrashun, chaynopa congregaciuncho aylunchiwan cuyanacushganchino hermanunchicunawanpis cuyanacushun (Rom. 12:10). Canan Jehová bendeciycämashganchiman yarpachacuptinchega Jehovamanmi masraj guelicushun. Y shamoj tiempucho imano bendecimänanchipaj yarpachacuptinchipis Jehovalata imaypis sirviycänapaj munaycäshunmi. Cay lapancunami yanapämäshun Jehovata cushishgala sirviycänapaj.

19. 1) ¿Imataj Jehová mana permitingachu Isaías 30:18 texto nishganno? 2) ¿Imataj yanapämäshun cushi cushila aguantanapaj?

¹⁹ Cay munducho mana ali cajcuna ushacächishga captin Jehovami favorninchicho sharcunga (Is. 30:18). Imaypis alilata ruraj Dios captinmi Satanaspa munduntaga tiempunchomi ushacächinga, manami permitingachu más tiempuraj caycänanpaj (Is. 25:9). Jehovawan noganchi pacienciacur shuyaraycanchi chay junaj chayananpaj. Chaycama imaycanopapis calpachacushun jinala mañacuycänapaj, Diospa Palabranpita yachacur practicaman churanapaj y bendiciuncunaman yarpachacunapapis. Chay lapancunata rurarga, Jehovata sirvir cushi cushila aguantanapämi yanapämäshun.