47 CAJ YACHACUY
Imapis Jehovapita raquichimänanchipaj permitishunchu
“Qamlamanmi yärakamü, TAYTA DIOS” (SAL. 31:14, MYL).
122 CAJ CANCIÓN ¡Guepaman mana cutiypa Diosta sirviycäshun!
IMAPITA YACHACUNAPAJ a
1. ¿Imanotaj musyanchi Jehová cercalanchicho cayta munashganta?
PAYMAN guelicunapämi Jehovaga nimanchi (Sant. 4:8). Payga munan Diosninchi, Taytanchi y amigunchi cananpaj. Mañacuyninchita contestamanchi y problemapa pasaycaptinchega yanapämanchimi. Jinamanpis marcanwanmi yachachimanchi y cuidamanchi. Chauraga, ¿imatataj rurashwan paypa cercalancho caycänapaj?
2. ¿Imacunata rurartaj Jehovaman guelicushun?
2 Jehovaman guelicushun payta mañacuptinchi, Palabranta leiptinchi y leishganchiman yarpachacuptinchi. Chayga yanapämäshun payta masraj cuyanapaj y agradecido canapäpis. Lapan shongunchiwanmi payta alabayta y cäsucuyta munashun (Apoc. 4:11). Cada cadala masraj reguiycuptinchi payman y marcanmanpis masrämi yäracushun.
3. 1) ¿Imanotaj Diabluga Jehovapita raquichimänanchita munan? 2) ¿Imatataj rurashwan Jehovata y marcantapis mana cachaycunapaj? (Salmo 31:13, 14).
3 Diablumi ichanga Jehovapita raquichimayta munan, masraj problemacunapa pasaptinchi. ¿Imanotaj chayta ruran? Jehovaman y marcanman yäracuycashganchita ichiclapa ichiclapa ushacächiyta munan. Ichanga ichipashwanmi. Aumi, fenilanchi gaga japuy captin y lapan shongunchiwan yäracuptinchega Jehovata y marcantapis manami cachaycushunchu (leiriy Salmo 31:13, 14).
4. ¿Imatataj cay yachachicuycho ricärishun?
4 Cay yachachicuycho ricärishun quimsa problemacunapa pasaptinchi, ¿imanotaj chaycunapita Diablo provechacun Jehovaman y marcanman mana yäracunanchipäna? ¿Imanotaj chay problemacunaga Diosninchipita raquichimashwan? Y ¿imatataj rurashwan Satanasta ichipänapaj?
PROBLEMACUNAPA PASAPTINCHI
5. ¿Imanotaj problemacunaga Jehovaman y marcanman yäracuycashganchita ushacächinman?
5 Öraga familianchi noganchiwan rabiacunman o aruyninchita ograycushwan. ¿Imanotaj chay problemacunaga Jehovapa marcanman yäracuycashganchita ushacächinman y paypitapis raquicächimashwan? Ima problemapis achca tiempuna caycaptin mana ushacänanpänachi yarpashwan y laquicushwanpis. Satanasga chaycunapita provechacun Jehová mana cuyamashganchita yarpänanpaj. ‘¿Jehovata sirvishgäraycur y marcancho caycashgäraycurchuraj nacaycä?’ nir tapucunapämi Satanás munan. Egiptucho caycaj israelitacuna waquincunaga chaynomi tapucärergan. Galananchoga yarpapäcurgan Moisestawan Aaronta Jehová acrashganta paycunata librananpaj (Éx. 4:29-31). Ichanga faraón paycunata masraj nacachiptin, Moisestawan Aaronta israelitacunaga culpargan, y nipäcurgan: “Gamcunami juchayoj canqui faraón capatasnincunawan fiyupa ñacachimänanpaj. Nogacunata wañuchimänanpaj cuchilluta aptapajnöpis gamcunami achäquita ashipashcanqui” (Éx. 5:19-21). ¡Chayga laquicuypämi cargan! Achca tiempupana nacaycaptiquega, ¿imatataj ruranquiman jinala Jehovaman y marcanmanpis yäracuycänayquipaj?
6. ¿Imataj Habacuc rurashganpita yachacunchi? (Habacuc 3:17-19).
6 Shonguyquicho lapan caycajcunata Jehovata wilapay y payman yäracuy. Profeta Habacuc imayca nacaycunapami pasargan. Juc cutichoshi Jehová payta gongaycushganta yarpargan. Chaymi shonguncho lapan caycajta Jehovata wilapargan. Cayno nergan: “TAYTA DIOS, ¿imaycamaraj gayacaycämushaj yanapämänayquipaj? [...] ¿Imanirtaj ricachimanqui fiyupa llaquicuycunatawan mana alli ruraycunata?” (Hab. 1:2, 3). Lapan shongunwan mañacamushgantaga Jehová wiyarganmi (Hab. 2:2, 3). Jehová marcanta salvashganman yarpachacuptinmi yapay cushishga ricacurgan. Jehová payta cuyashganta y ima problemacunapa pasaptinpis yanapänanpaj cashganta masraj yäracurgan (leiriy Habacuc 3:17-19). ¿Imataj yachacunchi? Problemacunapa pasaycaptiquega Jehovata mañacuy, shonguyquicho caycajta lapanta wilapay y yanapäshunayquipaj yäracuy. Seguro caycanquimanmi aguantanayquipaj Jehová calpanta goshunayquipaj. Y yanapaycäshushgayquita ricarga payman masrämi yäracunqui.
7. ¿Imataj juc familian Shirley panita nergan, y imataj yanapargan Jehovaman yäracuycarla caycänanpaj?
7 Jehovapaj ruraycashgayquita puntaman churay. Papúa Nueva Guinea naciuncho caycaj Shirley jutiyoj juc pani chayta rurargan. b Familianga wacchami cargan, y öraga guellaynin aypajchu micuynincunata rantinanpaj. Jehovaman mana yäracunanpäna juc familianmi nergan: “Gamga ninqui Diospa santo espiritun yanapaycäshushgayquita. Pero ¿maytaj? Jinalami waccha carcaycanqui. Yangalami predicar purinqui”. Chayga juc cutichoshi yarpachacächergan payta y familianta Jehová gongaycushganta. Pay wilacun: “Jinan horami Jehovata mañacurgä, y shongücho lapan caycajcunata wilapargä. Y jinalami Bibliata y publicaciuncunatapis leiycargä, predicaciunman yarguycargä y reuniuncunamanpis aywaycargä”. Chauraga Shirley cuentata gocurgan paycunata Jehová cuidaycashganta, micuynincunata mana pishiycächishganta y cushi cushila carcaycashgantapis. Payga nin: “Mañacuynëta Jehová contestaycämashganta ricargä” (1 Tim. 6:6-8). Jehovapaj ruranayquipaj cajcunata jinala ruraycaptiquega paypita ni imapis raquichishunquipächu.
PUSHACOJ HERMANUCUNATA MANA ALIPA TRATAPTIN
8. ¿Imataj Jehovapa marcancho pushacoj hermanucunata pasanman?
8 Jehovapa marcancho pushacoj hermanucunapita radiupa, televisiunpa o internetpapis chiquicojcunaga lulacur mana cajcunatami churapäcun (Sal. 31:13). Juc ishcay hermanucuna mana ali rurashganpita tumpar wichgarächishga cargan. Apostulcuna cawashgan wichan chaynomi pasacurgan. Juc cuticho apóstol Pabluta tumpar wichgarächirgan. Chay wichan cristianucuna, ¿imataj rurargan?
9. ¿Imatataj juc ishcay cristianucuna rurargan apóstol Pablo wichgarashga captin?
9 Roma marcacho apóstol Pablo wichgarashga caycaptin waquin cristianucunaga payta cachaycur aywacärerganmi (2 Tim. 1:8, 15). ¿Pabluta tumpashganpita pengacurchuraj aywacärergan? (2 Tim. 2:8, 9). ¿O manchacurganchuraj paycunata gaticachashga cananpaj? Imano captinpis Pabluga alapachi laquicurgan. Imaycacunatami aguantargan y cawaynintapis peligruman churargan paycunaraycur (Hech. 20:18-21; 2 Cor. 1:8). Pablo yanapacuyta necesitaycashgan hora mana yanapacoj cristianucunanoga imaypis ama cashunchu. ¿Imatataj yarpashwan pushacoj hermanucuna gaticachashga captin?
10. ¿Imataj yarpashwan pushacoj hermanucuna gaticachashga captin, y imanir?
10 Yarpay imanirtaj gaticachashga canchi y pitaj guepancho caycan. 2 Timoteo 3:12 textucho nin: “Tsaynölami Jesucristo munashqanno kawaq kaqtaqa pitapis chikir nakatsipäkunqa”. Chaymi manchacushwanchu pushacoj hermanucunata Satanás gaticachaptin. Payga munan pushacoj hermanucuna Jehovata cachaycunanpaj y noganchipis manchacunapaj (1 Ped. 5:8).
Pablo carcelaraycaptin Onesíforo valurcharcur yanapaycurgan. Canan wichanpis hermanunchicunaga cristiano masincuna carcelarashga captin yanapacärinmi. (11 y 12 parrafucunata ricay).
11. ¿Imataj yachacunchi Onesíforo rurashganpita? (2 Timoteo 1:16-18).
11 Lapan puedishgayquimanno pushacoj hermanucunata yanapay (leiriy 2 Timoteo 1:16-18). Unaycho Pablo wichgarashga caycaptin, Onesíforo jutiyoj cristiano yanapargan. Paypita Pablo nergan: “Prësu caycashäpita manami pengacushachu”. Chaypa trucanga, Pabluta imaycanopapis ashirgan y tariycurna necesitaycashgancho yanapargan. ¡Cawaynintapis peligruman churargan! ¿Imataj yachacunchi? Manchacuptinchipis gaticachashga hermanunchicunata yanaparcunapaj michamänanchipäga ama permitishunchu. Calpachacushun imaycanopapis paycunapa favornincho parlanapaj y yanaparcunapäpis (Prov. 17:17). Paycunaga cuyanapaj y yanapanapämi caycan.
12. ¿Imataj yachacunchi Rusiacho caycaj hermanunchicunapita?
12 Yarpachacuy Rusiacho caycaj hermanunchicuna imata rurapäcushganman cristiano masincuna carcelarashga captin. Juc ishcaycuna juzgashga capäcunanpaj apacäriptin waquincunaga shacyächinanpaj chayman aywapäcun. ¿Imataj yachacunchi? Pushacoj hermanunchicunata tumpaptin, carcelman wichgananpaj apacäriptin y gaticachaptinpis ama manchacushunchu. Paycunapaj mañacuy, familiancunata cuidapäcuy y ima necesitaycashgancunata macyarcuy (Hech. 12:5; 2 Cor. 1:10, 11).
NOGANCHIPITA BURLACARIPTIN
13. ¿Imanotaj waquincuna burlacäriptin Jehovaman y marcanman yäracuycashganchita ushacächinman?
13 Jehová munashganno cawacuptinchi y predicaptinchi öraga mana testigo caj familianchi, aroj masinchi o escuelacho estudiaj masinchi noganchicunapita burlacärinmanmi (1 Ped. 4:4). Öraga nimashwanmi: “Runano alimi canqui, religiunniquiwanmi ichanga mana acuerduchochu caycä”. Juc ishcaycuna congregaciunpita gargushga cajcunata mana parlapaptinchi jamurpamanchi y cayno nimanchi: “¿Gamcunaga ‘runacunata cuyä’ nir manami parlapanquichu?”. Chaycunata wiyar dudachimashwanmi, caynopis tapucächimashwanmi: “¿Jehovaga mana puedishgäta ruranapächu niman? Y marcanga, ¿imatapis michacoj marcachuraj?”. Gam chayno yarpachacuptiquega, ¿imataraj ruranquiman Jehovapita y marcanpita mana raquicänayquipaj?
Jobga creirganchu amigun tucojcuna lulacur parlashgancunata. Jehovata mana cachaycunanpämi decidido caycargan. (14 caj parrafuta ricay).
14. ¿Imatataj rurashwan Jehová munashganno cawacuptinchi waquincuna burlacäriptin? (Salmo 119:50-52).
14 Jehovapa mandamientuncunata cäsucunayquipaj listo caycay. Waquincuna burlacäriptinpis Jobga Jehovapa mandamientuncunatami cäsucurgan. Juc amigun tucoj Jobta nergan Diosta imapis mana gocushganta mandamientuncunata cäsucuptin o mana cäsucuptinpis (Job 4:17, 18; 22:3). Job ichanga nishgancunata mana creirganchu. Musyarganmi Jehovapa mandamientuncuna lapanpis ali caycashganta, chaymi cäsucunanpaj listo caycargan. Jehová munashganno cawacunanpaj waquincuna michäcunanpaj manami permitirganchu (Job 27:5, 6). ¿Imataj yachacunchi? Waquincuna burlacäriptinpis Jehovapa mandamientuncunataga jinala cäsucuy. Cäsucushgayquiraycur imano yanapäshushgayquiman yarpay. ¿Manachu cutin cutin yanapäshushgayquita ricashcanqui? Cay mandamientucunata shumaj tantiachicoj marcata yanapacunayquipaj listo caycay. Chaynopa runacuna pasaypa burlacäriptinpis Jehovapitaga manami imaypis raquicächishunquichu (leiriy Salmo 119:50-52).
15. ¿Imanirtaj Brizit aguantanan cargan familiancuna burlacäriptin?
15 India naciunpita Brizit jutiyoj panipita parlarcushun. Testigo captinmi familiancuna burlacäriptin aguantanan cargan. 1997 watacho bautizacurgan pero runanga mana Testiguchu cargan y walca tiempula pasariptin aruyniynaj quedacurgan. Chaymi runan nergan warmi wamrancunawan Taytanpa wasinman aywacärinanpaj, chayga caycargan juc marcachomi. Brizitga manami chay problemacunalapachu pasargan. Runan jinala aruyniynaj captinmi quiquinla lapan tiempunwan arunan cargan familianta manteninanpaj. Jina reuniuncunaman aywananpaj congregaciunga 350 kilómetros carucho caycargan. Laquinaypäga runanpa familiancuna contranman sharcurgan Jehovapa testigun captin. Chayga pasaypa mana alimanmi ticrargan, chaymi Brizit familianwan yapay juc marcaman aywacärinan cargan. Chaypitana runanmi ilajpita wanucuycurgan. Nircur 12 watayoj warmi wamranpis cáncer gueshyawan wanurgan. Manami chaylachu, Brizitpa familianna chay lapan desgraciacuna pasashganta ‘gammi culpayoj canqui’ nergan. ‘Jehovapa testigun mana captiquega chay lapancuna manami pasanmanchu cargan’ jinapis nergan. Pay ichanga Jehovapita y marcanpitapis manami raquicarganchu.
16. ¿Ima bendiciuncunataj Brizit pani chasquergan Jehovata y marcanga mana cachaycushganpita?
16 Brizit congregaciunninpita carucho caycaptinmi, congregaciuncunata watucaj waugui animargan tiyashgan sitiulacho predicananpaj y wasincho reuniuncunata rurananpaj. Naupataga alapa sasa cashgantami yarpargan. Chayno captinpis wauguita cäsucurgan, yachachicoj yargoj, wasincho reuniuncunata ruraj y Diosta aduranapaj horacho wamrancunawan shuntacärej Diospita shumaj yachacunanpaj. Chayta rurashganpitami achcaj runacunawan Bibliapita yachacuyta galaycurgan y casi lapan estudiantincunapis bautizacärergan. 2005 watacho precursora regularno yanapacurgan. Jehovata y marcanta pushajcunata cäsucushganraycurmi imayca bendiciuncunata chasquergan. Warmi wamrancunapis Jehovata mana jaguiypa sirvircaycan, cananga ishcay congregaciuncunana cargan. Brizit paniga agradecicuyculanmi pruebacunata y familian burlacärishgantapis aguantananpaj Jehová yanapashganta.
JEHOVATA Y MARCANTAPIS CACHAYCUSHUNCHU
17. ¿Imata ruranapätaj listo caycashwan?
17 Satanasga munan problemacunapa pasaptinchi ‘Jehová cachaycamashga’ nir yarpänapaj, y marcanta yanapaptinchega ‘más sasacunaparaj pasashun’ nirpis yarpänapaj munan. Pushacoj hermanucuna tumpashga y carcelarashga capäcuptin manchacunapäpis munanmi. Jinamanpis waquincuna noganchipita burlacäriptin Jehovaman y marcanmanpis mana yäracunapäna munan. Noganchimi ichanga musyanchinami ima trampacunata churashganta y chaycunaman mana ishquinapaj imaycanopäpis calpachacunchi (2 Cor. 2:11). Luta yachachicuynincunataga wiyaylapis wiyashunchu, chaypa trucanga Jehovata y marcanta imaypis cachaycushunchu. Jehovaga manami imaypis jaguimäshunchu (Sal. 28:7). Chauraga ni ima ni pipis Jehovapita raquichimänanchipäga permitishunchu (Rom. 8:35-39).
18. ¿Imataj gatejnin yachachicuycho yachacushun?
18 Cay yachachicuycho yachacushganchi Diosta mana reguejcuna nacachimaptinchi Jehovaman y marcanman imano yäracuycarla caycänapaj. Ichanga jinan congregaciunchopis problemacunaga yurircamunmanmi. Chayno captenga, ¿imatataj rurashwan? Chaytaga gatejnin yachachicuychonami yachacushun.
118 CAJ CANCIÓN Yaracuynïta miraycachiy
a Cay ushanan junajcunacho aguantanapaj y cäsucunapäga, Jehovaman y marcanmanpis yäracuycarla caycänanchi. Diabluga imaycacunatami ruran mana yäracunapäna. Cay yachachicuychomi ricärishun problemacunapa pasaptinchi imacunata rurashganta; y noganchega, ¿imatataj rurashwan munashganta mana ruranapaj?
b Waquin juticuna trucachishga caycan.