VIDANPITA WILACUY
“Jehovapa más aruyta munargä”
YUNCA rurincho Grambori marcapa cercalancho chaycho tiyaj waquin runacunapitami despedipäcuycargä, chayga cargan Surinam naciuncho. Botiman wichaycur Tapanahoni mayupami aywacärergä. Nircurna bumburuyparaj aywaycaj mayupa aywarcaycaptë botipa motornin rumiwan tacacargan. Jinan hora naupa caj botipa talpucaptin talpucärergä. Shongüpis yargucuycurganrämi. Congregaciunta watucojno achca watapana mayupa viajaycaptëpis nadaytaga yachargächu.
Manaraj wilayta usharir puntata wilapäshayqui imataj shacyächimargan lapan tiempuwan Jehovata sirvinäpaj.
1942 watachomi yurishcä, cuyaylapaj Curazao islacho. Taytäga Surinam naciunchomi yurirgan, nircur Curazao islaman aywargan arunanpaj. Ishcay watacuna manaraj yuriptë, taytä bautizacurgan. Chay islacho punta caj bautizacamojcunapitami cargan. a Cada semanami pichga wamrancunawan Bibliapita yachacoj, ichanga shumaj yachacärejcächu. 14 watayoj caycaptë, taytä decidirgan Surinam naciunman cutinapaj edayashga awilata cuidanapaj.
ALI AMIGUCUNAMI YANAPAMAN
Surinamchoga, lapan shongunwan Jehovata sirvej jovincunawanmi amigo cargä. Paycunaga precursor regularnomi yanapacärej. Imano predicapäcushganpitami cushishgala parlapacärej. Reuniuncuna usharcuptinna Bibliapita parlapacärej cä, öraga goylarcunata ricar. Amigöcunami yanapämashga cuentata gocunäpaj Jehovata sirviyta munaycashgäta. 16 watayojmi bautizacurgä, y 18 watayojna caycaptë precursor regularno yanapacur galaycurgä.
ALAPA ALI CAJCUNATAMI YACHACÖ
Paramaribo marcacho precursor captë.
Precursorno yanapacur alapa ali cajcunata yachacushgämi yanapämargan lapan tiempüwan Jehovata sirvir cawacunäpaj. Yachacurgä hermanucuna masraj yanapacunanpaj yachachiyga alapa ali cashganta. Precursor captëmi, Willem van Seijl jutiyoj misionero shumaj yanapämargan. b Paywanmi yachacurgä congregaciuncho ima ruraycunachopis shumaj yanapacunapaj. Chay wichanga ni ichiclapis yarpargächu yachachimashganga alapa yanapämänanpaj. Juc wata pasarcuptinna precursor especialno yanapacunäpaj nipäcamargan y yuncacho caycaj grupucunata yanapacunäpaj nipäcamargan. ¡Alapami agradecicö tiempulancho hermanucuna yachachipäcamashganta! Chaypitami nogapis calpachacö tiempöta raquinäpaj y hermanucunata yachachinäpaj.
Ishcay caj yachacushgaga caycan, walcalawan y ordenado cawacurga alapa ali cashganta. Quillacuna galanancho, yanagamaj precursor especialwan parlapacärej cä semanacunacho ima necesitaycashganchita rantinapaj. Nircur jucninchimi marcaman caruta viajaj necesitaycashganchicunata ranticamunapaj. Guellayninchita y viveresninchita shumaj utilizananchi cargan, quillaparaj aypananpaj. Yuncacho caycar ushapacur imarga, manachi pipis yanapamashwanchu. Mozo cashgäpita walcalawan y ordenado cawacunapaj yachacushgämi yanapämargan Jehovata sirviycarla caycänäpaj.
Quimsa caj yachacushgaga caycan, runacuna parlashgan rimaycho Bibliapita yachachicunäpaj. Holandés, inglés, papiamento y surinamés rimaycunata parlarmi winashcä. Yuncacho ichanga cuentata gocurgä runacuna shumaj wiyacärishganta, parlashgan rimaycho Bibliapita yachachiptinchi. Nogapäga juc ishcay rimaycuna parlanäpaj sasami cargan. Jucmi cargan saramacano rimaymi. Ichanga calpachacushgaga alipami cargan. Chayta rurarmi watacuna pasashganmanno achca runacunata yachachinäpaj yanapämargan.
Parlayta yachacuycaptëmi achca cuti pantargä, chaypitaga pengacurgämi. Juc cuticho Bibliata estudiaj juc warmi, pacha nanaywan caycaptinmi, saramacano rimaycho tapupargä ‘¿imanotaj caycanqui?’ nir. Rasunpaga ‘¿chichucu caycanqui?’ nirmi tapupaycargä. Nishgaga chay warmita rabiachirganmi. Chayno pantarcuptëpis, imaypis calpachacoj cä runacuna parlashgan rimayta yachacunäpaj.
MASRAJ YANAPACUNÄPAJ AUNICÖ
1970 watacho congregaciuncunata watucamojno yanapacunäpaj nipäcamargan. Chay watami yuncacho caycaj caru grupucunacho yachachicunä cargan dibujucunawan cay tituluyoj discursuwan “Visitando la central mundial de los testigos de Jehová”. Caycunaman chayanapäga, waquin hermanucunawan guerupita rurashga botiwanmi aywacärej cä. Y apacärej cä juc motorta, juc bidon gasolinata, queroseniwan funciunaj lamparacunata y juc maquinata dibujucunata ricachicunapaj. Marcaman chayaycurna, chay lapancunata umalicurcur carucho caycaj grupucunaman apacärej cä. Chay yachachicuycunata runacuna alapa agradecicärishganpita masraj yarpapäcö. Cushishgami caycargä Jehovata y marcanta reguinanpaj runacunata yachachishgäpita. Caycunata ruranapaj fácil mana captinpis, alapami cushicö runacuna Jehovaman guelicamushganta ricar.
WASCAPIS QUIMSAMAN JUCLACHACASHGA
Setiembre 1971 wata noga Ethelwan casaracärë.
Musyargämi japala caycar Jehovapaj masraj ruranäpaj, chayno captinpis casaracuyta munargä. Jehovata ruwacurgä ali warmita gomänanpaj, yuncacho yanagamänanpaj y chaycho juntula sirvinäpaj sasa captinpis. Juc wata pasaptin Ethel jutiyoj paniwan reguinacurgä, payga precursora especialno yanapacoj lapan shongunwan sasa captinpis. Ethelga wamralapita apóstol Pablo ima rurashganpitami yachacurgan, chaymi may chaychopis Pabluno yachachicuyta munargan. 1971 wata setiembre quillacho casaracärergä y congregaciunta watucamojno juntula sirvircaycä.
Ethel familianwan walcalawanmi cawacärishga, chaymi yuncacho rasla yachacargan. Tantiarinapaj, más rurincho caycaj yuncaman aywanapaj alistacuycaptë, walca cosascunalatami apacärej cä. Mayulachomi ropacunata tajshapäcojmi cä y armacärej cä. Hermanucuna garamashgancunatami micupäcoj cä, iguanapita, pirañapita o maygan uywa charishganpita rurashga captinpis. Platocuna mana captenga, platanocunapa hojancunachomi micupäcoj cä. Jehovata sirvishpanchi nogawan Ethel chaycunata rurashgämi yanapäcamargan quimsa wascacuna juclachacashgano casado vidanchicho ali caycänapaj (Ecl. 4:12). ¡Chayno cawashgaga ni imawanpis trucachipäcushächu!
Galanancho wilacushgaga caru grupucunaman aywashgäpita cutipäcamuptëmi pasargan. Bunruruypa mayu aywaycajpa boti aywaycaptin talpucargan, ichanga juclami yapay yargurgan. Y mana hundicänapaj chalecucunawanmi carcaycargä y botipitapis manami ishquirganchichu. Ichanga yacu juntami caycargan. Chaymi mircata apapäcuycashgä tapercunapita yacuman jitarir, chaycunawanmi yacuta jorgupäcurgä.
Ima micunapaj mana captinmi, viajaycashganchimanno pescaduta charinapaj camäpacurgä. Ichanga ni juctapis charirganchichu. Chaymi Jehovata ruwacärergä chay junajpaj micuyta tarinapaj. Mañacurir ushapäcuptëmi juc waugui ansueluta jitargan y juc pescaduta charirgan, nircur pichganchi sacsashganchiyaj micunapaj aypargan.
RUNA, TAYTA Y CONGREGACIUNCUNATA WATUCOJ
Pichga watacunana congregaciuncunata watucojno yanapacurcaycaptë, nogawan Ethel ali bendiciunta chasquipäcurgä: chayga cargan wamrayoj canapaj. Nogaga cushishgami caycargä, ichanga “jinalachuraj lapan tiempüwan Jehovata sirvinäpaj puedishaj” nir yarpachacur galaycurgä. Nogawan Ethel lapan shongücunawanmi munarcaycargä jinala lapan tiempuwan Jehovata sirvinapaj. 1976 watacho guechpa caj wamranchi Ethniël yurirgan, nircur ishcay watacuna maslata pasarcuptin Giovanni wamranchina yurirgan.
1983 wata, juc bautizmo captin Tapanahoni mayucho, Godo Holupa cercalancho, Surinam naciuncho.
Surinam naciuncho watucamoj hermanucuna walcala captinmi, sucursalga nipäcamargan jinala yanapacur caycänäpaj. Wamracuna pishilaraj caycaptin walca congregaciuncunayoj circuitucunatami watucaj cä. Chaynopa ishcay quillacuna congregaciuncunata watucoj cä y ishcay quillana jinan congregaciunnëcho precursorno yanapacoj cä. Wasinchipa cercalancho caycaj congregaciuncunata watucamuptë Ethelwan wamracunapis yanagamajmi. Yuncacho caycaj grupucunata watucanäpaj captin o asambleacunata ruranäpaj captenga japalämi aywaj cä.
Congregaciuncunata watucamuptë botiwanmi viajaj cä, carucho caycaj congregaciuncunata watucamunäpaj.
Lapan responsabilidadnëcunata shumaj atiendinäpäga tiempötami shumaj camacächina cargan. Imaycanopapis calpachacojcämi cada semana familiäwan Diospita yachacunäpaj. Yuncacho caycaj grupucunata watucaycaptëga warmilämi wamracunawan Bibliapita yachacoj. Camacaptenga calpachacärejcämi lapäcuna juntula imalatapis ruranapaj. Jinamanpis wasinchipa cercalancho puclanapaj y pasianapaj aywacärej cä. Ali yachachicunäpaj cada cadalami pulan pagascama preparacoj cä. Ethelga ali aroj warmimi cargan Proverbios 31:15 nishganno. Tuta tutalami sharcoj cada junajpaj textuta leinapaj, desayunuta upunapaj wamräcuna escuelaman manaraj aywacuptin. Alapami agradecicö ali aroj warmiläta, responsabilidadnëcunata atiendinäpaj imaypis yanapamashganpita.
Wamräcuna Jehovata y predicaciunta cuyananpaj yachachinäpaj ishcäcunami calpachacärej cä. Lapan tiempunwan Jehovata sirvipäcunapämi munapäcurgä, ichanga noganchi niptilanchilachu sinoga quiquincuna munapäcuptinmi. Imaypis wamräcunata parlapacärej cä lapan tiempücunawan Jehovata sirvishpanchi bendiciuncunata chasquishganchipita. Jina sasacunapa pasashganchitapis wilacärejcämi, pero masga Jehová imano yanapamashganchipitami. Jinamanpis calpachacärejcämi wamräcuna Jehovata puntaman churaj hermanucunawan tiemputa pasananpaj.
Necesitaycashganchicunataga Jehová pishëchimarganchichu. Jina tayta cashpä imaypis calpachacurgä familiäta manteninäpaj. Yuncacho caycar precursor especialno yanapacur yachacushcä imapis mana pishimänanpaj guellayta aypachinäpaj. Ichanga alapa calpachacäriptëpis öraga guellayninchi manami aypajchu. Chay horami ricargä Jehová imanolapapis yanapamashganchita. Tantiarinapaj, 1990 watacuna quinray Surinamcho guerra civilmi cargan. Öraga necesitaycashganchicunata tarinapaj sasami cargan. Chayno captinpis Jehovami cuidaycämarganchi (Mat. 6:32).
PASASHGÄCUNAMAN YARPACHACÖ
Ichojpita alawga cajman, Ethel warmëwan.
Ethniël guechpa caj wamrä, Natalie warminwan.
Giovanni wamrä, Christal warminwan.
Jehovaga manami imaypis jaguipäcamashgachu y cushishgala cawapäcunapämi yanapäcamargan. Wamräcunaga Jehovapa ali bendiciuncunami caycan. Jehovata cuyapäcunanpaj yachachicunapäga alapa alimi cargan. Alapami cushicärë lapan tiempuncunawan Jehovata sirvinanpaj decidipäcushganpita. Ethniël y Giovanni escuelas teocráticas nishganmanmi aywapäcurgan, cananga warmincunawanmi Surinam sucursalcho sirvipäcun.
Ethelwan nogaga auquisna capäcö, ichanga precursor especialno Jehovata sirviycarla carcaycä. Aumi, ruranapäga imaycacunami caycan, chaymi nadayta yachacunäpäga tiempö canrächu. Manami imapitapis arrepenticöchu. Pasamashgancunaman yarparaptëga cuentata gocö mozo cashgäpita lapan tiempüwan Jehovata sirvinäpaj acrashgaga imapitapis más ali cashganta.
b Willem van Seijl vidanpita wilacuyga caycan “La realidad ha superado mis expectativas”, tarinqui ¡Despertad! del 8 de octubre de 1999.