ESTER librucho achca cutimi Mardoqueupita parlan. Jäpa judío runami cargan y Persia palaciucho arurgan, 500 watacuna galaycunancho Jesús manaraj shamuptin, ‘rey Asuero mandacamushgan wichan’ (canan wichan chay reypaj Jerjes I cashganta nipäcun). Rey wanuchishga mana cananpämi Mardoqueuga wilacurgan. Reyga pasaypa agradecicushpan, respetashga cananpaj lapan runacuna musyapäcunanpaj mandargan. Nircur, judiucunapa chiquejnin Hamán wanuchishga captin, reyga primer ministro cananpaj Mardoqueuta churargan. Chaymi, Mardoqueuga juc leyta camacächergan Persia naciuncho tiyaj lapan judiucuna ushacächishga mana cananpaj (Est. 1:1; 2:5, 21-23; 8:1, 2; 9:16).

Canan wichan 1900 watacuna galanancho, waquin yachajcuna nipäcurgan Ester libro cuentula cashganta y Mardoqueupis mana cawashganta. Ichanga 1941 watacho, arqueologucuna juc pruebata tarirgan Mardoqueupita Biblia wilacushgan rasunpa cashganta tantiachicunanpaj. ¿Imaraj chayga?

Persia rimaycho juc textuta taripäcurgan y chaycho wilacuycan Marduka jutiyoj runapita (españolcho Mardoqueo) Susa marcacho Administradorno arurgan, o contador imachi cargan. Chayta taripäcushganpita Arthur Ungnad, chay marcapita unaycho imano cashganpita estudiaj nergan: “Bibliapita juc cajga, chay textulami Mardoqueupita parlaycan”.

Arthur Ungnad chayta nishganpitaga persa rimaycho chaychica textucunatami traducishga cargan. Jucmi cargan Persépolis marcapa pergancuna cuchuncho guelgashgacunata taripäcushganmi. Chaycunaga caycan Jerjes I gobernashgan wichanpitami. Elamita rimaychomi caycan, y chay textucunapitami waquin juticunaga Ester libruchomi yurimun. a

Guelgashgacuna Persépolis marcapita Marduka runapämi parlan, payga Jerjes I palaciunchomi secretariuno aroj, Susa marcacho. Jucnin cajga Marduka traductor cashgantami nin. Cayga tincun Biblia nishganwan Mardoqueo runapita. Payga rey Asuerupa (Jerjes I) palaciunchomi aroj, jina ishcay rimaycunatami parlaj y reypa palaciunpa puncuncho imaypis jamacoj (Est. 2:19, 21; 3:3). Chay puncuga jatun wasinomi cargan, chaychomi waquincuna reypaj aroj.

Ricashganchino guelgashga cajcunacho Marduka jutiyoj runapita parlaptenga, Ester librucho Mardoqueo runapita parlashgannomi parlaycan. Chay wichanlacho juc marcalacho cawapäcurgan y ishcancuna reypa palaciuncho arurgan. Chay lapancuna tantiachicun Marduka y Mardoqueuga juc runala cashganta.