48 CAJ YACHACUY
Pruebacunapa pasaptiqui ali juiciuyoj canayquipaj calpachacuy
“Tayta Dios munashqanno kawanaykipaq shumaq tantiyakuy” (2 TIM. 4:5, MYL).
123 CAJ CANCIÓN Ali shongulanchiwan casucushun
IMAPITA YACHACUNAPAJ a
1. ¿Ima ninantaj ali juiciuyoj cayga? (2 Timoteo 4:5).
PROBLEMACUNAPA pasaptinchi sasami canman Jehovaman y marcanman yäracuycarla caycänapaj. Chaycunapa pasarga, ¿imataj yanapämashwan? Ali juiciuyoj cananchi, riccha ricchala caycänanchi y Tayta Diosman yäracunanchi (Leiriy 2 Timoteo 4:5). ¿Imatataj rurashwan ali juiciuyoj canapaj? Tranquilula caycashwan, shumaj tantiacushwan y imatapis Jehová ricashganno ricashwan. Chayno rurarga ali juiciunchita manami ograshunchu.
2. ¿Imatataj cay yachachicuycho ricärishun?
2 Pasashgan yachachicuycho ricashcanchi Diosta mana sirvejcuna nacachimashganchita. Cay yachachicuychoga ricärishun Jehovaman yäracuycarla caycänapaj, öraga sasami canman jinan congregaciuncho cay pruebacuna pasacuptin: juc hermano mana alipa tratamashganchita yarpaptinchi, corregishga captinchi y Jehovapa marcancho ima cambiulapis captin. Chaycunapa pasaycaptinchega, ¿imatataj rurashwan ali juiciuyoj caycänapaj y Jehovata y marcantapis mana cachaycunapaj?
JUC HERMANO MANA ALIPA TRATAMASHGANCHITA YARPAPTINCHI
3. ¿Imataj yarpachimashwan maygan hermanulapis mana alipa tratamashganchita yarpaptinchi?
3 ¿Imaylapis yarpashcanquichu responsabilidayoj juc hermano mana alipa tratashushgayquita? Chay hermanuga laquichishunayquipaj manachi munarganchu (Rom. 3:23; Sant. 3:2). Chayno captinpis shonguyquitami nanaycachergan. Chayman yarpachacur capazchi punuytapis puedishgayquichu, jina tapucushcanquichi: “Juc hermano chayno ruraptenga, ¿Jehovapa marcanchuraj cayga caycan?”. Chayta yarpanayquipämi Satanasga munan (2 Cor. 2:11). Chay mana ali yarpachacuycuna Jehovapita y marcanpitapis raquichimashwanmi. Chauraga maygan hermanulapis mana alipa tratashushgayquita yarpaptiqui, ¿imatataj ruranquiman ali juiciuyquita mana ogranayquipaj, y mana alicunata mana yarpanayquipaj?
4. 1) ¿Imataj José rurargan mana alipa tratashga carpis ali juiciunta mana ogrananpaj? (Génesis 50:19-21). 2) ¿Imataj yachacunchi José rurashganpita?
4 Rabiacuycarla ama cacuychu. Mozularaj caycaptin Joseta mayor caj wauguincunaga mana alipa tratargan. Chiquirgan, y hasta wanuchiytapis munapäcurgan (Gén. 37:4, 18-22). Y ashmay japuy ranticuycurgan. Chayraycur 13 watacunapa José imayca nacaycunapa pasargan. Chay horacho cayno imachi yarpachacurgan ‘canan problemacunapa pasaycaptë Jehová gongamashga’. Pero manami rabiacurganchu ni ali juiciunta ograrganchu y tranquilula cacurgan. Wauguincuna maquincho caycaptinpis vengacurganchu, chaypa trucan cuyapashpan perdonarganmi (Gén. 45:4, 5). ¿Imanirtaj chayno rurargan? Ali juiciuwan yarpachacuptinmi. Problemancunalaman yarpachacunanpaj trucanga Jehovapa voluntäninman yarpachacurgan (leiriy Génesis 50:19-21). ¿Imataj yachacunchi? Juc hermano mana alipa tratashuptiquega ama rabiacuychu Jehová culpayoj cashganta y gongaycushushgayquita yarpaychu. Chaypa trucan yarpay Jehová imano yanapaycäshushgayquita chay problemata aguantanayquipaj. Perdunaycunayquipaj calpachacuy, y Biblia nishgantapis yarpay: “Rasunpa kuyakuq runaqa imaykata ruraptinpis perdonanmi” (1 Ped. 4:8).
5. ¿Imataj Miqueas rurargan ali juiciunta mana ogrananpaj, mana alipa tratashga cashganta sienticuptin?
5 Sudamericapita Miqueas b jutiyoj juc ancianupita parlarcushun. Juc cutichoshi waquin ancianucuna mana alipa tratashganta sientirgan. Pay nin: “Imaypis chaypäga pasargächu. Alapa laquishga caycargä. Punuytapis puedejcächu, y ima ruraytapis mana puedir wagaj cä”. Chayno captinpis, Miqueas ali juiciunta ograrganchu y imano sienticushganta controlacunanpaj calpachacurgan. Cutin cutinmi Jehovata ruwacoj santo espiritunta y calpatapis aguantananpaj. Jina publicaciuncunachopis yachachicuycunata ashej. ¿Imataj yachacunchi? Maygan hermanulapis mana alipa tratashushgayquita yarpaptiquega, tranquilula caycänayquipaj y mana ali yarpachacuycunata mana yarpanayquipaj calpachacuy. Imalapis cashgachi chayno parlananpaj o rurananpaj, y chaytaga musyanquichu. Shonguyquicho caycajta lapanta Jehovata wilapay, y mañacuy pasashushgayquita pay ricashganno ricänayquipaj. Chayno ruraptiquega manami rasla juzganquichu chay hermanuta, y más facilmi canga perdunaycunayquipaj (Prov. 19:11). Yarpay, Jehovaga lapantami ricaycan y yanapäshunquimi aguantanayquipaj (2 Crón. 16:9; Ecl. 5:8).
CORREGISHGA CAPTINCHI
6. ¿Imanirtaj ali tantiacushwan Jehová cuyamashpanchi corregimashganchita? (Hebreos 12:5, 6, 11).
6 Corregishga captinchega shongunchitapis alapachi nanaycachinman. Nanachimashganchilaman yarparaycarga, corregishga cashganchita mana ali cashgantachi nishwan y noganchipaj mana cashgantanopis yarparchi galaycushwan. Jinapis cuentata manachi gocushwanchu Jehová cuyamashpanchi corregiycämashganchita (leiriy Hebreos 12:5, 6, 11). Rabiashgala caycarga Satanasmi atacamänanchipaj provechacunga. Payga corregishga cashganchita mana cäsucunapämi munan, manami chaylachu, Jehovapita y congregaciunpita carupäcunanchipäpis munan. Gam corregishga caycaptiquega, ¿imataj yanapäshunquiman ali juiciuwan imatapis yarpanayquipaj?
Pedro humilde cashpanmi consejashga y corregishga captin cäsucurgan. (7 caj parrafuta ricay).
7. 1) Dibujucunacho ricashganchino, ¿imacunacho yanapacunapätaj Jehová Pedruta churargan corregishga cashganpita chasquicuptin? 2) ¿Imataj yachacunchi Pedro rurashganpita?
7 Corregishga captiquega cäsucuy y cambiucunatapis ruray. Jesusga apóstol Pedruta waquin discipuluncunapa naupancho juc ishcay cutimi corregirgan (Mar. 8:33; Luc. 22:31-34). ¡Alapachi pengacurgan! Chayno captinpis Jesustaga manami cachaycurganchu. Chaymi Jehová bendiciycurgan, y congregaciuncho imaycacunacho yanapacunanpaj churargan (Juan 21:15-17; Hech. 10:24-33; 1 Ped. 1:1). ¿Imataj yachacunchi? Pengacushganchita juc laduman churar corregishga cashganchita y cambiucunata ruranapäpis calpachacushwan. Chayno ruraptiquega Jehová cushicur bendishunquimi y cristiano masiquicunatapis tucuynopa yanapacunquipaj.
8, 9. Bernardo corregishga captin, ¿imanotaj galanancho sienticurgan, y imataj yanapashga ali juiciuwan yarpänanpaj?
8 Mozambique naciuncho tiyaj Bernardo jutiyoj wauguipita parlarcushun. Corregishga car payta ancianuno mana yanapacunanpäna nergan. ¿Galanancho, imanotaj sienticurgan? Pay nin: “Alapa laquishga caycargä chayno corregishga cashgäpita”. ‘Cananga hermanucuna imaraj nipäcunga’ nir yarpachacoj. Bernardo wilacun: “Achca quillacunarämi pasargan cuentata gocunäpaj corregishga cashgäpita ali cashganta, y yapay Jehovaman y marcanmanpis yäracunäpaj”. ¿Imataj yanapargan?
9 Bernardo ali juiciuwan yarpachacur galaycurgan. Pay nin: “Ancianuno yanapacuptë waquin hermanucuna corregishga cashganta ali ricänanpaj Hebreos 12:7 textutami leipaj cä. Chauraga tapucushcä: ‘¿Caytaga pïcunataj cäsucunman?’. Jehovapa lapan sirvejcunami, y chaychoga nogapis caycämi”. Jehovaman y marcanman masraj yapay yäracunanpaj Bernarduga mastapis rurarganmi. Bibliata más tiempuraj leirgan, y leishganman yarpachacurgan. Paypita hermanucuna ima yarpapäcushgan jinala yarpachacuycaptinpis paycunawanmi predicananpaj yargoj, y reuniuncunachopis comentapäcoj. Tiempuwanga yapaymi anciano cargan. Gam corregishga caycaptiquega Bernarduno pengacächishushgayquilamanga yarparäcuychu, chaypa trucan concejashushgayquita ali chasquicuy y cambiucunatapis ruray (Prov. 8:33; 22:4). c Chayno ruraptiquega Jehovata y marcanta mana cachaycushgayquipita pay bendicishunquimi.
JEHOVAPA MARCANCHO IMA CAMBIULAPIS CAPTIN
10. ¿Ima cambiucunata waquin israelitacunata pruebaman churargan?
10 Jehovapa marcancho ima cambiulapis captin cäsucunapaj sasami canman. Cäsucuyta mana munaptinchega Jehovapitapis raquicäcushwanmi. Tantiarinapaj, Moisespa Leynincuna israelitacuna chasquiptin ima cambiucuna cashganman yarpäshun. Chaycamaga familiacho tayta cajmi sacerdote japuy familianta yanapaj, altarcunata sharcachir sacrificiucunata ruraj familiancunaraycur (Gén. 8:20, 21; 12:7; 26:25; 35:1, 6, 7; Job 1:5). Ichanga Ley captinna tayta cajcunaga chayta mana ruranmannachu. Jehová acrargan Aaronpa castancunata sacerdoticunano cananpaj y sacrificiucunata rurananpaj. Chaypita Aaronpa castan mana car maygan taytalapis sacrificiuta ruraptinga wanunmanchi cargan (Lev. 17:3-6, 8, 9). d ¿Chay cambiuraycurchuraj Coré, Datán y Abiram, y 250 jefecuna Moisespa y Aaronpa contrancho sharcupäcurgan? (Núm. 16:1-3). Manami musyanchichu. Imano captinpis, Coré yanapajnincunawan Jehovapa contranchomi caycargan. ¿Imataraj ruranquiman Jehovapa marcancho ima cambiulatapis mana tantiacuptiquega?
Cohatitacuna cantanticunano, puncuncunata täparajno y imaycancuna churarächishgancunata täparajno yanapacunanpaj nipäcuptin, cushishgala yanapacärirgan. (11 caj parrafuta ricay).
11. ¿Imataj yachacunchi Leví casta juc ishcay cohatitacunapita?
11 Jehovapa marcancho cambiucuna captin lapan shonguyquiwan yanapacuy. Israelitacuna chunyaj jircacunapa viajaycaptin Leví casta cohatita cajcuna ali aruychomi yanapacärej. Juc sitiupita juc sitiuman aywapäcuptin, juc ishcay cohatitacuna Diospa babulninta apaj israelitacuna ricaycaptin (Núm. 3:29, 31; 10:33; Jos. 3:2-4). ¡Chayga alapa alimi cargan! Ichanga Aunishgan Pachaman chayapäcuptin mananami caypa wacpa Diospa babulninta apapäcunnachu. Salomón mandacamushgan wichanga, juc ishcay cohatitacuna yanapacärej cantanticunano, puncuncunata täparajcunano y waquincunana välej imaycancuna churarächishgancuna täparar (1 Crón. 6:31-33; 26:1, 24). Unaycho alapa ali aruycho yanapacushga carpis, Biblia manami wilacunchu quejacärishganta y waquincuna ricananpaj aruycho arunanpaj mañacärishganta. ¿Imataj yachacunchi? Ima cambiulapis captin lapan shonguyquiwan yanapacuy, yanapacushgayquipita juccho yanapacunayquipaj captinpis. Chaytaga cushi cushila ruray. Yarpay, Jehovapa ricaynincho valuryoj cashgayquita manami imacunacho yanapacushgayquipitachu. Jehovapäga más ali caycan cäsucoj cashgayquimi (1 Sam. 15:22).
12. ¿Imanotaj Zaina sienticurgan Betelcho manana yanapacunanpaj payta nipäcuptin?
12 Oriente Mediopita Zaina paninchipita parlarcushun. 23 watapitapis masraj Betelcho cushishgala sirvirgan. Nircur ichanga pushacoj hermanucuna precursora especialno yanapacunanpaj nergan. Pay nin: “Chayga alapami laquichimargan. ‘Mana välëchu, y imalapis mana alichuraj ruraycurgä’ nir yarpachacoj cä”. Jina, masraj laquichej juc ishcay hermanucuna niptin: “Mas aliraj ruraptiquega manachi Betelpita cachaycushunquimanchu”. Juc tiempushi pasaypa laquishga caycar, cada pagas wagaj. Pero payga nin: “Imaypis manami dudargächu Jehovapita y marcanpitapis”. ¿Imataj yanapargan mana alicunata mana yarpänanpaj?
13. ¿Imataj Zaina rurargan laquishgala mana caycänanpaj?
13 Zaina mana alicunata mana yarpananpäga imacunapa pasaycashganpita leinanpaj publicaciunninchichomi ashirgan. Ali yanapashgan yachachicuyta jucta tarirgan 2001 wata, febrero quilla juc caj junajpita La Atalaya revistacho, chay yachachicuypa teman nin: “Usted puede afrontar el desánimo”. Chaycho tantiachicun Bibliapita juc libruta escribej Marcuspita, Zaina sienticushganno imachi sienticurgan jucnopa yanapacunanpaj captin. Zaina nin: “Marcos pasashganga alapa yanapämargan laquicuycarla mana caycänapaj”. Amiguncunaman yäracoj, hermanucunapita carupäcojchu, y mana ali sienticushganlaman yarparäcojchu. Tantiacurgan marcanta Jehová pushaycashganta, y ancianucuna paypa yarpachacushgantapis. Jinamanpis cuentata gocurgan runacunata yachachicunapaj Jehovapa marcanpaj más ali cashganta.
14. ¿Ima cambiucunata Vlado wauguipaj sasa cargan, y imataj yanapargan?
14 Eslovenia naciunpita 73 watayoj Vlado jutiyoj juc anciano mana tantiarganchu congregaciunnin juc congregaciunwan juclachacaptin, y shuntacashgan Salón wichgashga captin. Payga wilacun: “‘Chaylaraj alchapäcushcä cuyaylapaj Salonta imanir-raj wichgapäcun’ nirmi rabiacurgä. Carpintero cashpä juc ishcay mueblincunatami rurargä. Jinamanpis mayor hermanucunapäga chay cambiucuna más sasarämi cargan”. ¿Imataj rurargan shongupita yanapacunanpaj? Pay nin: “Diospa marcan cambiucunata rurashganga imaypis yanapämanchimi. Jina yanapämäshun shamoj tiempuchopis rasla yanapacunapaj”. ¿Jucnopa yanapacunayquipaj captin o congregaciunniqui juc congregaciunwan juclachacaptin, gampaj yanapacunayquipaj sasachu caycan? Ama yarpachacuychu, Jehová tantiashunquimi. Cushishgala yanapacuptiqui, y Jehovapita y marcanpita mana raquicaptiquega, imayca bendiciuncunatami chasquinquipaj (Sal. 18:25).
IMAYPIS ALI JUICIUWAN IMATAPIS YARPAY
15. ¿Imatataj rurashwan ali juiciuwan yarpanapaj congregaciuncho problemacuna yurircamuptin?
15 Ushacay junaj chayaycämuptinna manami almiracunchichu congregaciuncho problemacuna pasacuptenga, chayga Jehovapitapis raquichimashwanmi. Chaymi imaypis ali juiciuwan imatapis yarpashwan. Maygan hermanulapis mana alipa tratamaptinchega ama rabiacushunchu. Corregishga captinchi pengacächimashganchilamanga yarparäcushunchu, chaypa trucan consejucunata wiyacushpanchi cäsucushun. Y Jehovapa marcan ima cambiulatapis ruraptenga gustunchipäno mana captinpis, shongupita yanapacushun y cäsucushunpis.
16. ¿Imatataj ruranquiman Jehovaman y marcanman yäracuycarla caycänayquipaj?
16 Pruebacunapa pasaptiquega Jehovaman y marcanmanpis yäracuycarla caycänayquipaj puedinquimi. Chaypäga ali juiciuwanmi imatapis yarpanayqui, chayga ninan tranquilula caycanayqui, ali yarpachacunayqui y imapis Jehová ricashganno ricanayqui. Bibliacho Jehovapa sirvejnincuna gam pasashgayquino pasashgancunapita yachacur yarpachacunayquipaj calpachacuy. Jehovata ruwacuy yanapäshunayquipaj, y hermanucunapita imaypis raquicaychu. Chaynopa ima pasacuptinpis Jehovapita y marcanpita Satanasga manami raquicächishunquichu (Sant. 4:7).
126 CAJ CANCIÓN Waran waran riccha ricchala
a Congregaciuncho öraga imalapis captin sasami canman Jehovaman y marcanman yäracuycarla caycänapaj. Cay yachachicuychomi quimsalata ricärishun y imatataj rurashwan Jehovata y marcanta mana cachaycunapaj.
b Waquin juticuna trucachishga caycan.
c “¿Le gustaría recuperar su privilegio de servicio?” nishgan yachacuycho más consejucunata tarinqui, de La Atalaya del 15 de agosto de 2009, página 30.
d Ley mandashganno maygan familiapis aychata micuyta munarga tayta cajmi Tincuna Tolduman pishtananpaj apanan cargan. Pasaypa carucho tiyajcunami ichanga chayno rurananpaj manami obligaducho caycargan (Deut. 12:21).