1. ¿Imatataj musyanchi cristianucunaga, y imapitataj seguro caycanchi?

 MUSYANCHINAMI yachachicuptinchi runacuna rabiacärinanpaj y shamoj tiempucho pior-rajchi canga (Dan. 11:44; 2 Tim. 3:12; Apoc. 16:21). Ichanga Jehová yanapämänanchipämi seguro caycanchi. ¿Imanotaj chayta musyanchi? Unaypita Jehová sirvejnincunata imalatapis rurananpaj mandaptenga imaypis paycunata yanapashga, sasa captinpis. Chaypita seguro caycänapäga, profeta Ezequiel Babiloniacho caycaj judiucunata predicananpaj imacuna yanapashganta ricärishun.

2. 1) ¿Imataj Jehová nergan Ezequiel yachachishgan runacunapita? (Ezequiel 2:3-6). 2) ¿Imataj cay yachachicuychoga yachacushun?

² Ezequiel yachachicushgan runacunaga, ¿imanotaj capäcurgan? Jehová nergan chay judiucunaga “mana wiyacoj”, “mana tantiyaj” y “yarpayniynaj” capäcushganta. Pasaypa fiyu cashacunano y alacrancunanomi cargan. Chaychi achca cuti Jehová Ezequielta nergan: “Ama manchacuychu” (leiriy Ezequiel 2:3-6). Chayta cumplinanpäga caycunami yanapargan: 1) Jehová cachashga captinmi, 2) espíritu santumi calpata goycurgan y 3) Diospa Palabranpita yachacurgan. ¿Chaycunaga imanotaj yanapashga, y noganchitapis imanotaj yanapämanchi?

3. ¿Ima wilacuycunataj Ezequielta shacyächergan, y imanotaj Jehová yanapänanpaj musyachergan?

³ Jehová Ezequielta nergan: “Cachashayqui” (Ezeq. 2:3, 4). Chayga alapachi shacyächergan. Yarparganchi Jehová Moisesta y Isaiastapis chayno nir cachashganta (Éx. 3:10; Is. 6:8). Jina Ezequielga musyarganmi chay profetacunata Jehová mandashganta sasa captinpis rurananpaj yanapashganta. “Cachashayqui” ishcay cuti Dios niptinmi, pay  musyarganmi Jehová yanapananpaj cajta. Jina Ezequiel libruchoga achca cuti escribiraycan: “TAYTA DIOS nogata cayno nimaran” (Ezeq. 14:2). Chaymanpis cutin cutin yurin cay palabracuna “TAYTA DIOSMI cayno nimaran” (Ezeq. 6:1). Chauraga Ezequielga convencido caycargan quiquin Jehová payta cachashganta. Jinamanpis taytan sacerdote captin wilarganchi Jehová profetancunata imaypis yanapashganta. Chaynomi Jehová Isaacta, Jacobta y Jeremiastapis nergan: “Nogaga gamwanmi caycä” (Gén. 26:24; 28:15; Jer. 1:8).

4. ¿Ima shacyächicoj wilacuycunataj Ezequielta shacyächergan?

⁴ ¿Imanotaj israelitacunaga Ezequiel wilacushganta chasquicärenga? Jehovami Ezequielta nergan: “Israel runacunami ichanga willapashayquita wiyashpanpis mana wiyacuyta munangapächu. Paycunaga manami noga willapashäta wiyacuyta munanchu” (Ezeq. 3:7). Cay profetata mana wiyacuptenga quiquin Jehovata wiyaycarganchu. Chay wiyashganga Ezequielta cushichirganchi, runacuna mana wiyacuptenga manami niycarganchu pay mana ali profeta cashganta. Jinamanpis wilacushgancuna cumplicuptenga chay judiucuna “musyanganami paycunacho profëta cashanta” (Ezeq. 2:5; 33:33). Chaycuna wiyacushganga Ezequielta shacyächirganchi jinala yachachicur caycänanpaj.

5. ¿Imanirtaj Isaías 44:8 wilacushganga shacyächimanchi?

⁵ Jehová noganchitapis cachamashganchita y testiguncunano acramashganchitapis musyarir shacyächimanchimi (Is. 43:10). Jehová Ezequielta “ama manchacuychu” nishganno, noganchitapis “balurchay, ama manchacuychu” nimanchi.  ¿Imanirtaj chiquimajninchicunata manchacushwanchu? Ezequielta cachashganno Jehová noganchitapis cachamanchi y yanapämanchimi (leiriy Isaías 44:8).

6. 1) ¿Imanotaj Jehová ricächimanchi yanapämashganchita? 2) ¿Imanotaj shogamanchi y shacyächimanchi?

⁶ Jehová yanapämänanchipaj nimanchi. Tantiarinapaj, “gamcunami testïgö canqui” manaraj nir, pay nergan: “Mayucunata chimpaptiquipis nogaga gamcunawanmi caycäshäpaj. Mayu yacupis manami apashunquipächu manami shenganquipächu. Nina chaupinpa päsaptiquipis manami rupashunquipächu. Gamcunachöga ninapis manami ratangapächu” (Is. 43:2). Yachachicuptinchi öraga mayu japuy chapacunapa y nina japuy pruebacunapa pasanchi, ichanga Jehovapa yanapacuyninwan yachachicuycarla caycanchi (Is. 41:13). Noganchitapis Ezequielta pasashganno pasamanchi: runacuna casi lapancuna manami chasquimanchichu. Musyanchimi runacuna mana wiyamaptinchipis, manami ninanchu mana ali testigo cashganchita. Mana jaguiypa yachachicuycashganchipita Jehová cushicushganta musyarga shogamanchi y shacyächimanchimi. Apóstol Pablo nergan: “Tayta Diosnami muruq kaqtapis parquq kaqtapis arushqanman tupu päganqa” (1 Cor. 3:8; 4:1, 2). Achca watapana juc pani precursorano yanapacuycaj nin: “Cushichimanmi calpachacushganchipita Jehová bendicimashganchita musyarir”.

7. ¿Imanoraj Ezequielga sienticurgan cada cadala visión ricashganta yarpaptin? (Garancho caycaj dibujuta ricay).

⁷ Diospa santo espiritun alapa poderyoj cashgantami Ezequielga ricargan. Juc visiuncho ricargan ángel japuy cawajcunata yanapashganta y juc carrupa jatun ruedancunata cuyuchishgantapis (Ezeq. 1:20, 21). Chayta ricaycurmi imano sienticushganta Ezequiel wilamanchi: “Rikaykurmi pampaman lätakuykurqä”. Pasaypa almirashga caycaptinmi Pachaman lätacuycurgan (Ezeq. 1:28). Cada cadala chay visiunta yarpaptin, capazchi masraj convencicurgan Diospa santo espiritun yanapaptin yachachicunanpaj puedishganta.

8, 9. 1) ¿Imataj Ezequielta Jehová mandargan? 2) ¿Ima mastaj Jehová rurargan Ezequielta sinchiyächinanpaj?

⁸ Jehová Ezequielta mandargan: “Runapa tsurin, parlanantsipaq sharkuy” nir. Chayno mandaptin y Diospa espiritun yanapaptinmi Ezequielga calpayoj ricacur sharcurgan. Pay escribirgan: “Tayta Diospa Espïritun noqaman yaykamur ichitsimarqan” (Ezeq. 2:1, 2). Nircur yachachicushgan wichanpis ‘Jehovapa maquin’ o espiritunmi yanapargan (Ezeq. 3:22; 8:1; 33:22; 37:1; 40:1). Chay espiritumi Ezequielta calpata gorgan “chucru uma, rumi shongu” judiucunata wilacunanpaj (Ezeq. 3:7). Jehová nergan: “Ticrachishayqui paycuna chucru uma cashanno sinchi canayquipaj, paycuna rumi shongu cashanno sumaj sinchi canayquipaj. Noga camacächishaj gagacunapitapis mas chucru caycaj asul rumino chucru canayquipämi. Paycunataga ama manchacuychu” (Ezeq. 3:8, 9). Chay nishganga Ezequielta cayno nishgannomi cargan: “Rumi shongo capäcushganpita manchacuychu. Nogami sinchiyächishayqui”.

⁹ Chaypitana Diospa espiritun Ezequielta pushargan maycho yachachicunanpaj. Pay escribergan: “Tayta Diosmi sumaj charisha apaycämaran”. Chay profeta visiuncho ricashgan tantiacunanpaj y shonguncho churananpäga juc semanarämi pasargan  (Ezeq. 3:14, 15). Nircur Jehová nergan juc pampaman aywananpaj y chaychomi payman espíritu yaycurgan (Ezeq. 3:23, 24). Chauraga Ezequiel predicananpaj listunami caycargan.

10. ¿Ima yanapacuytataj necesitanchi predicanapaj, y imanir?

¹⁰ ¿Cristianucunaga ima yanapacuytataj necesitanchi predicanapaj? Chayta musyanapäga Ezequielta yanapashganta yarpäshun. Manaraj yachachicur espíritu santumi calpata gorgan chayta rurananpaj. Ezequielno espíritu santo mana yanapämaptinchega, runacunata yachachiyta puedishwanchu. ¿Imanirtaj chayta ninchi? Satanasga contranchicho caycan y imaycatami ruraycan predicayta jaguirinapaj (Apoc. 12:17). Achcajmi yarpapäcun Satanás poderoso cashganta y pipis venciyta puedinchu. Ichanga noganchicuna runacunata yachachiptinchi payta venciycanchi (Apoc. 12:9-11). Mana yamacaypa predicaciunman yargurga ricachicuycanchi Satanasta mana manchacushganchita, chaynopa payta mana cajman churaycanchi. Chauraga pilapis contranchiman sharcuptin yachachicuycanchilami, chayga ricachicun espíritu santo calpata goycalämashganchita y Jehovapa nawinpaj ali caycashganchita (Mat. 5:10-12; 1 Ped. 4:14).

11. ¿Imanotaj espíritu santuga yanapämäshun, y jinala chasquiycänapaj imatataj rurashwan?

¹¹ Ezequielpa caranta y urcunta chucruyächishganga caytapis ricächimanchi: espíritu santumi yanapämanchi predicashganchi hora imayca chapacunata vencinapaj (2 Cor. 4:7-9). Chauraga, ¿imatataj rurashwan Diospa santo espiritunta jinala chasquiycänapaj? Mana uticaypa ruwacushun y Jehovaga wiyamäshunmi. Jesús discipuluncunata nergan: “Manakuptikiqa Tayta Dios kamaripäshunkimi. Ashirqa tarinkimi. Punkuta takakuptikiqa kichapäshunkimi”. ¿Imanotaj Jehová contestamäshun? “Manakuq kaqman Espíritu Santuta kachamunqa” (Luc. 11:9, 13; Hech. 1:14; 2:4).

12. Ezequiel 2:9-3:3 wilacushganno, ¿maypitataj rolluga cargan, y imatataj escribiraycargan?

¹² Ezequielga manami santo espiritulatachu chasquergan sinoga Diospa Palabranpitapis yachacurganmi. Juc visiuncho ricargan juc maquita rolluta apaycashganta (leiriy Ezequiel 2:9–3:3). ¿Maypitataj chay rollo yargurgan? ¿Ima wilacuytaj chaycho caycargan? ¿Y imanotaj Ezequielta yanapashga? Chay rolluga Jehovapa tronunpita yargurgan. Chuscu angelcunata Ezequiel ricashgan jucnintachi Jehová acrargan rolluta goycunanpaj (Ezeq. 1:8; 10:7, 20). Rolluchoga Jehovapa wilacuyninmi caycargan: Babiloniacho caycaj judiucunata ima pasananpaj cajta aypalami escribiraycargan, chaytami Ezequielga wilacunanpaj cargan (Ezeq. 2:7). Chay rollupa ishcan ladunpami escribiraycargan.

13. ¿Imataj Jehová Ezequielta nergan rolluwan rurananpaj, y imanirtaj rolluga mishquirgan?

¹³ Jehová profetanta nergan: “Saksashqaykiyaq kay rölluta mikuy”. Ezequielga cäsucoj cashpanmi lapanta micucurcurgan. ¿Chay visiunta imanotaj tantiashwan? Wilacunanpaj cashganta Ezequielga shumaj tantiacunan cargan y shonguncama chayanan cargan, chaynopa shongupita wilacunanpaj. Y cuentata gocurgan chay micucushganga “abëjapa mishkinnöraq mishkirqan” (Ezeq. 3:3). ¿Imanir? Ezequielpäga Jehovapa jutincho wilacunanpaj cajta alapa cushicuypämi cargan (Sal. 19:8-11). Profeta cananpaj Jehová acrashganpita Ezequielga alapa agradecido caycargan.

14. ¿Imataj Ezequielta yanapargan wilacur galaycunanpaj?

¹⁴ Nircurna Jehová Ezequielta nergan: “Nishqäkunata shumaq tantiyakur shonquykiman churakuy” (Ezeq. 3:10). Chayno niycargan rollucho escribiraycajta yarpänanpaj y chayman yarpachacunanpaj. Chaynopa Ezequiel masraj yäracunanpaj yanapanga y runacunata ima wilacunanpaj cajta shumaj tantiacunga (Ezeq. 3:11). Diospa wilacuynin shonguncho y shimincho caycaptinga Ezequiel listunami caycargan wilacur galaycunanpaj (Salmo 19:14 textuwan tincuchiy).

15. ¿Imataj shongunchicho caycänan jinala yachachicunapaj?

¹⁵ Yachachicuyta mana jaguinapäga Diospa Palabranpitami noganchipis yachacunanchi. Jehová lapan wilacushgantami shongunchicho chasquicunanchi. Cananga Jehová parlapämanchi Palabran Bibliawanmi. ¿Imatataj rurashwan Biblia nishganno ali cajcunata yarparaycänapaj, ima cuyashganchita y ima munashganchita ali cajcuna cananpaj?

16. ¿Imatataj Diospa Palabranwan rurashwan, y chayga imanotaj ruranchi?

¹⁶ Cuerpunchiga ali caycanga ali micuycunata shumaj cachuycur-raj micuptinchimi. Chaynolami yäracuyninchi sinchi caycänanpaj Bibliatami leinanchi y leishganchiman shumaj yarpachacunanchi. Rollupita visiunwan chaytami yachachimanchi. Jehovaga munan Palabranpita “sacsashganchiyaj” yachacunapaj y tantiacunapäpis. Caytaga ruranchi mañacuptinchi, leiptinchi y leishganchiman yarpachacuptinchi. Puntataga, mañacunchi leishganchita shongunchicho chasquicunapaj. Nircur Bibliata leinchi. Leita usharcurna leishganchiman shumaj yarpachacunchirämi. ¿Chayga imanotaj yanapämäshun? Cada cadala leishganchiman yarpachacuptinchega  shongunchi Diospa Palabranpita junta caycanga.

17. ¿Imanirtaj Bibliacho leishganchiman imaypis yarpachacunanchi?

¹⁷ ¿Imanirtaj mana gongaypa Bibliata leishwan y leishganchiman yarpachacushwan? Chaynoparämi calpanchi canga waquincunata Diospa Gobiernunpita predicanapaj, y ichiclacho juiciupita wilacuycunatachi wilacunapaj caycanga. Jinamanpis Jehová imano cashganman yarpachacuptinchega payman masraj guelicunchi. Chauraga mishqui micuyta micushgano caycanchi, chayga ninan jaucala caycashganchita y alapa cushicushganchipita (Sal. 119:103).

18. ¿Imapitataj cuentata gocärenga tiyashganchi marcacho runacuna?

¹⁸ Profeta Ezequielno mana captinchipis noganchega Diospa Palabrantami charanchi. Mana yamacaypa predicanapämi listo caycanchi. Jehová contrancho caycajcunata ushacächinanpaj tiempo chayamuptenga, runacuna ‘Diosga nogata yarpamashgächu ni pipis wilamashgächu’ niyta puedingachu (Ezeq. 3:19; 18:23). Chayrämi cuentata gocärenga wilacushganchega Diospa wilacuynin cashganta.  

19. ¿Maypitataj calpata tarishun mana yamacaypa yachachicunapaj?

¹⁹ ¿Maypitataj calpata tarishun yachachicuycarla caycänapaj? Ezequielta yanapashganno noganchipäpis cay quimsa yanapacuycunami caycan: Jehová cachamashganchi captinmi jinala predicaycanchi, espíritu santumi calpata gomanchi y Diospa Palabranpita sacsashganchiyaj yachacunchi. Jehová yanapamaptinchimi mana yamacaypa wilacunapaj, y último tiempo ushacashgancama imayca sasacunata aguantanapaj listo caycanchi (Mat. 24:13).