1-2. ¿Imataj ancianucuna rurapäcun?

 CAPAZCHI siervo ministerialno yanapacuycanqui, ichanga ichiclana pishishunqui ancianuno yanapacunayquipaj. ¿Manachuraj munanquiman ancianuno hermanunchicunata masraj yanapacunayquipaj? (1 Tim. 3:1).

² Ancianucunaga predicaciuncho Diospita yachachicun, congregaciunchopis hermanucunata shacyächin. Jina paycuna ali rurashganta y ali parlashgantapis ricar hermanucunaga Jehovaman masraj yäracun. Chaymi Bibliaga nin paycunaga shumaj regaluno caycashganta (Efes. 4:8).

3. ¿Imataj ruranman pilapis anciano cananpäga? (1 Timoteo 3:1-7; Tito 1:5-9).

³ Cayman yarpay: Pilapis imalachopis arunanpäga, habilidäninpitami canga imacho arunanpaj. Ichanga, ¿imataraj ruranman pilapis anciano cananpaj? Anciano canayquipäga manami ali yachachicoj cashgalayquipitachu, sinoga Biblia nishganmanmi cäsucunquiman (leiriy 1 Timoteo 3:1-7 y Tito 1:5-9). Caycho yachacushun ancianucunaga hermanucunapaj y waquin runacunapäpis ali ricashga cananpaj, jina familianta ali cuidananpaj y hermanucunata yanapananpäpis.

IMANOTAJ ALI RICASHGA CANQUIMAN

4. ¿Ima ninantaj “mana jamurpashqa” cayga?

⁴ Ancianucunaga “mana jamurpashqa” canmanchu. Congregaciuncho hermanucunapaj y mana Testigo cajcunapajpis  ancianucunaga “ali rikashqa kanman”. Capazchi runacunaga jamurpäshunquiman Testigo cashgayquipita, ichanga manami jamurpäshunquimanchu mana alicunata rurashgayquipita (Dan. 6:4, 5). Y gamtaga, ¿mana cristianucuna y cristianucunapis ali ricashunquicu?

5. ¿Imanotaj ancianucunaga “alilata ruraq” canman?

⁵ Ancianucunaga ali shonguwan “alilata ruraq” canman. Chayno car waquincunata felicitarin y waquincuna imaycapa pasaptin cushishga yanapacun (1 Tes. 2:8). ¿Imanirtaj ancianucunaga cushi cushila hermanucunata yanapacunman? Paycunaga tiemputa jorgun congregaciuncho caycajcunata uysha michejnomi ali ricananpaj (1 Ped. 5:1-3). Imaycata rurananpaj captinpis cushi cushilami rurapäcun (Hech. 20:35).

6. ¿Imata rurartaj pipis pachächicoj caycan? (Hebreos 13:2, 16; fotutapis ricay).

⁶ Manami reguishgalanchiwanchu ali shongu cananchi, sinoga pï maywanpis “patsatsikuq” o posadachicoj carga alitami ruranchi (1 Ped. 4:9). Bibliapita parlar juc libro cayno nin: “Pipis pachächicoj carga wasinman ali shongulanwan jäpa runacunatapis chasquin”. ¿Waquincunaga ninmanchuraj gam pachächicoj cashgayquita? (leiriy Hebreos 13:2, 16). Pipis ali pachächicoj carga listumi caycan necesitajcunata imalatapis macyarcunanpaj o pitapis wasincho chasquinanpaj, chaymi cushishga chasquin congregaciunta watucamojcunata y discursamojcunatapis (Gén. 18:2-8; Prov. 3:27; Luc. 14:13, 14; Hech. 16:15; Rom. 12:13).

7. ¿Imanirtaj ancianucunaga “qellaylapaq mana wanuq” canmanchu?

⁷ “Qellaylapaq mana wanuq” canmanchu. Manami imaycayoj charananlapaj yarparaycanmanchu. Rico carpis wacchala carpis Diosta sirvinanpaj lapan rurashgancunami puntacho caycanman (Mat. 6:33). Jehovata adurananpaj, familianta cuidananpaj y congregaciuncho yanapacunanpäpis tiempunta ali camacächicun. Jina imalachopis guellayninwanpis yanapacun (Mat. 6:24; 1 Juan 2:15-17). ¿Imataraj gampita runa masiquicuna ninman? ¿Guellaylapaj wanur imaycata ashiycular cacushgayquitaraj? ¿O charashgayquilawan contentula  cashgayquitachuraj nipäcunman? (1 Tim. 6:6, 17-19).

8. ¿Imata rurartaj pilapis “shumaq yarpachakurir imatapis ruraq” y geniunta controlacoj canman?

⁸ Ancianucunaga lapan rurashgancunacho “shumaq yarpachakurir imatapis ruraq” y geniunta controlacojmi. Chayno cashganraycu micular upyalar manami puricunchu, vesticurpis ali vesticunga y tiempuntapis ali camacächenga, cay mundo runacunapa costumbrincunatapis manami ruranchu (Luc. 21:34; Sant. 4:4). Geniuntapis controlanmi pipis peliata ashiypaptin. Jina ancianucuna “mana upyaq” canmanchu, ni pipis ninmanchu ‘payga upyalar purin’ nir. Chauraga, ¿runa masiquicuna gampita ninmanchuraj controlacoj y ali yarpachacoj cashgayquita? (Luc. 21:34; Sant. 4:4).

9. ¿Imanotaj juc anciano “ali yarpayniyuq” y ordenado canman?

⁹ Ancianuga “ali yarpayniyuq” car Biblia nishganman shumaj tantiaycur imatapis ruran. Ima asuntupita decidinanpäga lapanta musyaycur-raj ruran (Prov. 18:13). Chaymi Jehová munashganno ali cajcunata rurananpaj decidin. Anciano ordenado runa carga tiempunta shumaj camacächir temprano o nishgan hora maymanpis chayan. Chayta rurarga waquincunapis paypita alimi parlanga. Canan yachacushun ancianucuna imano familianta ali ricananpaj Biblia nishganta.

IMANOTAJ FAMILIAYQUICUNATA ALI CUIDANQUIMAN

10. ¿Imanotaj juc anciano familianta ashmanman o cuidanman?

¹⁰ Pilapis ancianuman chayananpaj familiayoj carga “warminta y tsurinkunata shumaq ashmaq” canman. Paycunapis Diosta cäsucunanpaj ancianucunaga cuyacuywanmi familianta tratan, jinamanpis yarpachacun familianwan juntula Diosta sirvinanpaj. ¿Imanirtaj chayta ninchi? Apóstol Pablo nishganno juc tayta familianta shumaj mana cuidarga, ¿imanoparaj congregaciunta ricanman? (1 Tim. 3:5).

11, 12. Pilapis anciano cayta munarga, ¿imanotaj familianta ricanman? (Fotucunatapis ricay).

¹¹ Wamrayquicuna 18 watayoj o menuslaraj captenga yachachinquiman “cäsukuq y respitakuq kananpaq”. Chaypäga wamrayquicunata cuyapaylapami yachachinayqui. Öraga paycunaga imalapitapis asicun y puclayta gustan; chayno captinpis taytacunaga yachachinman respetacoj, cäsucoj y ali portacoj cananpäpis. Jina taytacunaga wamrancunata yanapanman Dioswan amigo cananpaj, cäsucunanpaj y tiempuwan bautizacunanpäpis.

¹² Ancianucunapa wamrancunaga “Tayta Diosman yärakur alilata ruraq kanman y mamanta taytanta cäsukuq kanman”. Diosta sirvej wamran jatun juchata ruraptin, yarparcushwan imanir chayman chayashganta. Taytan shumaj mana ricashga captenga, capazchi mana preparaduchu caycan anciano cananpaj (ricay La Atalaya 15 de octubre 1996 watapita, 21 caj página, 6-7 caj parrafucuna).

IMANOTAJ CONGREGACIUNCHO YANAPACUNQUIMAN

13. ¿Imataraj ruranman pilapis ñanpu shongu y “mana runa tukuq” car?

¹³ Congregaciuncho ali shongulanwan yanapacojcuna captenga alapa agradecicuypaj caycan. Pipis ñanpu shongu captin pï maywanpis alimi goyäcunga. Chayno ali runa carga más facilmi canga waquincuna ima nimashganchitapis ali chasquicunapaj. Waquin ancianucunawan reuniuncho caycar  ima acuerdupis ruracaptin ganas ganasla yanapanacunga. “Mana runa tukuq” car quiquin munashgannola imatapis ruracänanpaj shuyaranmanchu. Chaypa trucanga waquincuna nishgantapis chasquicunmi (Gén. 13:8, 9; Prov. 15:22). Ancianucunaga “pitapis achäquita mana ashipaq” y “imapitapis mana rabyakuq” canman. Toscuyparaj manami parlanmanchu, chaypa trucanga ali shimilapa y cuyapacoj waquincunawan canman. Parlarcaycaptin ima acuerdumanpis mana chayaptin imalatapis ruranmi tranquilula carcaycänanpaj (Sant. 3:17, 18). Pipis olguyparaj parlaptin ali shimilapami contestamun (Juec. 8:1-3; Prov. 20:3; 25:15; Mat. 5:23, 24).

14. 1) ¿Imanirtaj pipis anciano cananpäga chaylaraj bautizacushga canmanchu? 2) ¿Imatataj ruranga “Dios munashqanno kawaq” runaga?

¹⁴ Diosman “tsayraq yärakuqkunaqa” ancianucuna canmanchu. Ali y pogushga cristiano cashgan ricacämunanpäga, bautizacushganpita tiempulami pasanman. Anciano carguta manaraj chasquerga, Jesusnomi humilde canman y Jehovalata sirvinanpämi listo caycanman (Mat. 20:23; Filip. 2:5-8). “Dios munashqanno kawaq” captenga, Paypa mandatuncunatapis y congregaciunpaj mushoj wilacuycuna chayamuptinpis ganas ganasla cäsucunga (1 Tim. 4:15).

15. ¿Pipis anciano cananpäga ali discursamojchuraj canman?

¹⁵ Diospa Palabrancho nin ancianucunaga “shumaq yachatsikuq” cananpaj, pero chayga manami ninanchu ali discursamojraj cananpaj. Waquincunaga ali discursamoj mana captinpis, predicaciuncho caycarga y waquincunata watucamoj aywarga shacyächiylapa y ali tantiachicuylapa yachachicun (1 Corintios 12:28, 29 y Efesios 4:11 textucunawan tincuchiy). Chayno captinpis, pipis anciano cayta munarga calpachacunman maycho yachachicurpis ali yachachicoj  cananpaj. Y, ¿imatataj ruranman ali yachachicoj cananpaj?

16. ¿Imacunata rurartaj ali yachachicoj canquiman? (Fotutapis ricay).

¹⁶ Diospa Palabrancho “yachakushqannöla ali yachatsiq katsun”. Maygan anciano ali yachachicoj cananpäga, congregaciuncho y pilatapis consejaptin Diospa Palabran nishgannolami tantiachicunman. Bibliata y publicaciunninchicunatapis ali tantiaparir lein (Prov. 15:28; 16:23). Pilatapis Bibliata leipaptenga aseguracunraj quiquin ali tantiashganta, y yachachicurpis wiyaycajcunapa shongunman chayananpaj calpachacun. Unay ancianucunata ashin consejunta wiyananpaj, chaynopa ali yachachicoj cananpaj (1 Tim. 5:17). Ancianucunaga waugui panicunata cuyapaylapa “shakyätsinqa”, pero pitapis consejananpaj captenga consejanga y waquincunata correginanpaj “shumaq tantiyatsinqa”. Cuyacoj carga y Diospa Palabran nishgannola yachachicurga ancianucunaga Jesusno ali yachachicoj capäcunga (Mat. 11:28-30; 2 Tim. 2:24).

IMAYPIS ALILATA RURAY

17. 1) ¿Imamanraj siervo ministerialcuna yarpachacunman anciano cayta munarga? 2) ¿Imamanraj ancianucunapis yarpachacunman juc hermano ima cargutapis chasquinanpaj caycaptin? (“ Ancianucunaga aliraj tantiarcunman pipis carguta chasquinanpaj caycaptin” nej recuadruta ricay).

¹⁷ Yachacushganchina imacunataraj hermanucuna ruranman anciano cananpaj, capazchi cayman yarpar waquin siervo ministerialcuna ninman ‘quevä imaypis anciano cashaj’ nir. Pero yarparcunmanmi Jehová ni marcanta pushajcunapis shuyaranchu imalachopis mana pantananpaj cashganta (1 Ped. 2:21). Caytapis gongashwanchu: Jehovaga santo espiritunwan pitapis yanapanga anciano cananpaj (Filip. 2:13). ¿Gamtaga imalapis pishiycashunquirächu más ali cristiano canayquipaj? Chayno captenga Jehovata mañacuy, publicaciuncunacho chaypita yachacuy  y waquin ancianucunapa consejuncunatapis ashiy.

18. ¿Imataraj lapan siervo ministerialcuna ruranman?

¹⁸ Canan yachacushganchino lapanchicunami, anciano carpis o mana carpis calpachacunanchi más ali cristiano canapaj (Filip. 3:16). Siervo ministerial caycarga, mana yamacaypa calpachacuy ancianuman chayanayquipaj. Jehovata mañacuy yachachishunayquipaj congregaciuncho más yanapacunayquipaj. Chayta rurarga voluntäninta ruranayquipaj listo caycanqui y congregaciunchopis ali yanapacunqui (Is. 64:8). Jehová Diosga bendiciunnintami goyculäshunqui anciano canayquipaj lapan calpachacushgayquipita.