Paul nin: ¡Alapa cushishgami carcaycargä! Noviembre quilla, 1985 wata warmëwan misiunerucunano Liberia (África Occidental) naciunman aviuncho viajarcaycargä. Senegal naciunchona caycar warmilä Anne nimargan “juc horalacho Liberia naciunchona caycäshun” nir. Pero nircur ilajpita cayno nimojta wiyashcanchi: “Liberia naciunman aywaj pasajerucuna aviunpita bajapäcuy, soldaducunaga autoridänincunata a las malas gargamushganraycu imayca peliacunami caycan. Chay naciunman aywashunnachu”. Chaura chunca junajcunapa Senegal naciuncho waquin misiunerucunawan quedacärergä. Noticiacunacho wiyapäcurgä Liberia naciuncho camiuncunawan achca ayacunata aparcaycashganta y mana cäsucur chacaypa wasinpita yargojcunata wanuchipäcushganta.

Anne nin: Nogacunaga manchacojmi capäcö. Wamrala cashgäpita chayno cä. Callita chimpaylatapis manchacömi. Chayno captinpis, Jehová mayman mandamashganchiman imanopapis aywayta munapäcurgä.

Paul nin: Ishcäcuna Inglaterra naciuncho yurishcä, Anne yurishgan marcaga marcäpita manami alapa caruchochu caycargan (8 kilómetros). Colegiuta usharcurlami precursorcunano yanapacur galaycärergä. Lapan tiempöwan Jehovata sirviyta munapäcurgä. Taytäcuna y Annepa mamanpis shacyächipäcamargan chayta rurapäcunäpaj y yanapäcamarganpis. 19 watayoj caycaptë Betelman invitamargan, y 1982 watacho Annewan casaracur ishcäcunana yanapacur galaycärergä.

Anne nin: Betelcho cushishga capäcurgä. Pero masga yanapacuyta munapäcurgä walcala publicadurcuna caycashgan sitiucunacho. Y Betelcho caycaj unay misionerucunawan parlar shongulächo chayta masraj munapäcoj cä. Quimsa watacunapa cada chacaycho ima munashganchipita Jehovata mañacärergä. Chaymi 1985 watacho 79 caj clase Galaad escuelaman aywanapaj invitapäcamaptin alapami cushicärergä. Chaypita Liberia naciunman, África Occidental cajman mandapäcamargan.

Paul nin: Permisuna captin punta caj aviunwan Liberiaman chayapäcuptë, ricapäcurgä chaycho  imayca mana alicuna pasaycashgancuna manaraj alchacashganta y runacunapis callicunacho libre puriyta mana puedipäcushgantaraj. Juc carrulapis bullata ruraptin, runacuna manchacur caypa wacpa gaparar gueshpej aywacärej. Jaucala ricacunapaj chacaycunapa Salmos libruta leipäcoj cä. Manchacuywan caycarpis, chasquishganchi asignaciunga gustapäcamargan. Warmilä Annega misionera cargan, y nogaga Betelcho John Charuk a hermanuwan aroj cä. Payga ali tantiacoj y hermanucuna imacunapa pasashgantapis shumaj reguejmi, chayno cashganpita noga alapa yachacurgä.

Anne nin: Liberiacho hermanucuna alapa cuyacoj, imayca mana alicunapa pasarpis Jehovata mana cachaypa sirvipäcushganta ricar, chaycho rasla yachacärergä. Paycunaga familiänomi cargan, consejuncunaga alapa yanapäcamajmi. Predicaciuncho carcaycaptë, runacunaga manami munapäcojchu rasla aywacärinäta. ¡Chayga shumajmi cargan! May chaychopis runacunawan rasla parlapacuyta galaycärej cä. Achca estudiucunata charapäcurgä, tiempöcunapis aypargannachu lapancunata yanaparcunapaj. ¡Chayga cushicuypämi cargan!

Paul nin: Chuscu watacunapa cawaynëcuna jauca cargan. Pero 1989 watacho jinan marcacho juc guerra galaycuptin lapan cambiargan. 1990 wata, julio quilla, ishcay caj junaj, gobiernupa contrancho caycaj runacuna Betelpa cercalancho shuntacärergan. Quimsa quillacunapa Betelcho wichgarashga carcaycargä, pipis yargupäcurganchu. Familiäcunatapis ricayta puedipäcurgächu. Sucursalcho arojcunawanpis parlanapaj sasami cargan. Runacuna munashgalanta rurapäcoj, micuypis pishergan y warmicunatapis violapäcoj. Chayno problemacuna 14 watacunapa caycargan, y chayraycu achcajmi nacargan.

Anne nin: May chaycho peliacuna y wanuchinacuypis caycargan. Callicunacho arman aptashga runacuna jatun wasicunaman yaycuycur imaycacunata suwapäcoj. Waquincunaga manami manchacojchu pitapis wanuchinanpaj. Carreteracunacho y Betel cercalanchopis achca ayacuna jitarpaycargan. Waquin hermanunchicunata y ishcay misionerucunatapis wanuchipäcurgan.

Achca Testigucunapis cawayninta peligruman churar juc tribupita caycaj hermanucunata pacaycurgan mana wanuchishga cananpaj. Waquin misionerucuna y betelitacunapis chayta rurapäcurgan. Betelcho juc sótano caycargan, chaycho guerrapita  gueshpejcuna waquin Testigucuna punupäcoj, y nogacunawan ganchis hermanucuna quedacärergan.

Paul nin: Peliajcunaga lapan junajcuna Betelman yaycuyta munargan mä pilatapis pacaycashganchita musyapäcunanpaj. Chauraga seguro carcaycänäpaj ishcay hermanucuna ventanapita ricachacoj y ishcaycunana puncucho carcaycargan. Puncucho caycajcuna maquincunawan juc señalta mana ruraptenga imapis pasanmanchu cargan. Pero maquincunata wajtanman churacäriptenga chayga niycargan chay peliajcuna pasaypa fiyu cashganta, chaura ventanapita ricachacojcunaga hermanucunata rasla pacaycunanpaj cargan.

Anne nin: Chayno captinpis juc cuticho chay runacunaga Betelman a las malas yaycurgan. Jatun bañucho jatun ropero caycargan chaycho pilapis pacacunanpaj. Chaura juc hermanata chayman apargä rasla pacacunanpaj. Pero armashga runacunaga, noga caycashgäman wichargan pasaypa rabiashga, chay runacunaga puncutapis jaytar galaycurgan y runä chayta ricar nergan: “Shuyay, warmë bañucho caycan”. Pero roperuman yaycuptin bullata rurargan, chaura manchacur pasaypa sicsicyar galaycurgä. Chayno caycashgäta ricar paycunaga cuentatachi gocunman cargan pilatapis pacaycushgäta. Chaymi puncuta manaraj quichaycur Jehovata yarpaynëlacho mañacurgä yanapamänanpaj. Nircur puncuta quichaycur, paycunata mana manchacurna saludargä. Jucnin cajga juc ladupa maquinwan tangaramargan y roperuta quichar cuchun cuchun ashergan; pero imatapis mana tarir waquin cuartucunamanna aywargan jinala ashipacunanpaj, ichanga imatapis tarirganchu.

Paul nin: Achca quillacuna nogacunapaj walca micuycunala cashga. Pero espiritual cajcho micuyga jinalami caycargan. Chay wichan, Betelcho cada tuta yachacushganchicunaga micuy japuymi cargan, chaycunaga shacyächipäcamarganmi.

Micuyniynaj o yacuynaj quedacushganchiraycu, Betelpita gueshpicuptinchi, chaycho pacaraycashga hermanucunaga wanuchishgachi canman cargan. Ichanga ayvecis, Jehová imaycanopapis mana shuyarashganchi hora micuyta camaripämaj canchi, chaynopa mana manchacur caycänapaj.

Sasacunapa pasarpis ricashcanchi Jehová yanapaycämashganchita. Hermanunchicuna salvacunanpaj cada cadala caypa wacpa gueshpicuycarpis, Jehovaman yäracuycarla capäcurgan. Waquincunaga nipäcoj “cayga yanapaycämanchi jatun nacay wichanpaj” nir. Congregaciuncunacho ancianucuna y mozu cajcunapis, valurcharcurgan waquincunata yanapananpaj. Guerracunapita gueshpicoj hermanucunaga caycashgan sitiucunacho yachachicur galaycärergan y monte rurincho reuniuncunatapis rurapäcoj. Reuniuncunaga yanapargan jaucala carcaycänanpaj y predicaciunpis yanapargan mana guelanaypa aguantananpaj. Hermanunchicunata yanapar ricashcanchi  ropacunata mañacunanpaj trucan maletinta mañacärej predicaciunninpaj. Imayca pasashganraycu runacuna laquishga caycar Bibliapita parlapashganchita shumaj wiyapäcoj. Testigucunaga pasaypa mana alicunapa pasarpis cushishga carcaycargan. Chacaycho achicyaraycämojnomi capäcoj, chayta ricar runacunaga almiracärej (Mat. 5:14-16). Hermanunchicuna cushi cushila caycashganta ricar waquin soldaducunapis Testiguman ticrapäcurgan.

Paul nin: Quimsa cuticho Liberia marcapita ratula yargushcanchi pero ishcay cutichoga juc watapaj cashga. Juc misionera cayno nergan imano sienticushganchipita: “Galaad escuelacho yachachimashcanchi may chaychopis lapan shonguwan arunapaj, y chayta rurashganchi. Chaymi alapa sasa cargan hermanunchicunata jaguirinapaj”. Pero juc naciuncho caycarpis Liberiacho caycaj hermanucunata jinala yanapar siguishcanchi.

Anne nin: Mayo quilla 1996 wata nogacuna ishcay hermanucunawan sucursalpita carruwan importante documentucunata apaycashganchi. 16 kilómetrucunano viajanäpaj caycargan chay documentucuna seguro caycananpaj. Pero carruwan aywaycaptë ilajpita soldaducuna armanta pashtachir galaycurgan. Chaura quimsäcunata carrupita yargunapaj nipäcamargan pero Paulta carruwan apacurgan. Manchacashga carcaycargä. Nircur ricashcä Paul shamuycajta pero frentinpa yawar jutuycargan. Yarpashcä Paulta disparashganta pero chayno captenga japayta manachi puedinmanchu cargan. Carrupita jorgur tangariptinmi frentinta tacargan, chaymi yawar shutuycargan.

Chaypita ricapäcurgä soldaducunapa carruncho manchacashga runacuna junta caycashganta, chaymi guepalanpita charicurcur viajapäcurgä. Choferpis rasla manejar galaycuptin casi ishquipäcurgä. Ruwacärergä parananpaj, pero manchacashga caycar jinala manejargan. Chayno captinpis, charicushgala viajapäcurgä. Manchacashga y nanapäcushga chayashcanchi.

Paul nin: Ropäcunapis lapcha y ganra caycargan. Jucnin jucnin ricanacur almiracushcanchi imano cawacuycashganchita. Chaylacho caycargan balacunawan dañashga juc helicopterupis. Chaylacho punupäcurgä y warayninga chaywan Sierra Leona cajman aywapäcurgä. Imaycapa pasar mana wanushganchipita cushicurpis hermanulanchicunapäga yarpachacuycashcanchimi.

Anne nin: Sierra Leona Freetown betelchoga lapancuna cuidapacamajmi. Pero cada junajcuna unaycho imacunapa pasashgäcunaman yarpar pasaypa manchacur laquicurgä. Y chacaypapis ali punuycaptë ilajpita sudar y sicsicyar riccharamoj cä, ‘cananga imaraj pasamanga’ nir yarpaj cä. Jämaynëpis ushacaycashgannomi cargan. Paul macalaycamar ishcäcuna mañacoj cä. Canciuncunatapis cantapäcoj cä tranquilala cashgäcama. Juiciüta ogracashgäta yarpaj cä y misionera manana canäpaj cajtapis yarpaj cämi.

Pero manami gongashächu chay semanalacho ishcay revistacunata chasquishgäta. Jucmi cargan ¡Despertad! 8 de junio 1996 watapita. Titulun cayno cargan: “Qué hacer ante los ataques de pánico”, chayta leircur-raj tantiargä imacunapa pasaycashgäta. Jucnin caj revistana cargan La Atalaya 15 de mayo 1996 watapita. Titulunmi cargan: “¿De dónde proviene su fuerza?”. Chaycho yurimurgan pilpish alan rachish caycaptinpis jinala vuelashganta y micuynintapis ashishganta, chaycho tantiargä noganchicuna mana alicunapa pasarpis Jehovapa yanapacuyninwan waquincunata yanapayta puedishganchita. Leishgäcunaga Jehová tiempulancho gopäcamashgan micuy japuy cargan (Mat. 24:45). Jina chay temacunapita maslata yachacurgä y publicaciuncunatapis ashirgä. Tiempuwanga más alina ricacurgä.

Paul nin: Liberia naciunman cada cadala cutir wasinchicho caycashganchino sienticurgä. 2004 watapäga, 20 watacunanomi chaycho caycashganchi. Guerrapis ushacarganna, sucursalchopis cambiucuna caycargan. Chayno caycaptinchi juc ladupana mandapäcamargan.

 Sasami cargan hermanunchicunapita raquicäcunapaj. Paycunawanga familiano junto caycashganchi. Galaad escuelapita yargur familianchicunata jaguishganchi, y ricashganchi imano Jehová bendecimanchi payta sirviptinchi. Chaymi listo carcaycargä Ghana naciunmanna aywacärinäpaj.

Anne nin: Liberia naciunpita aywaptinchi alapa wagacärergä. Pero ali tantiacoj edayashgana hermanunchi Frank nimashganchega yarpachipäcamashga. Pay nergan: “Nogacunapita gonganayqui”. Nircur nergan: “Musyämi chayta mana ruranayquipaj cajta. Pero lapan shonguyquiwan arunayquipaj chaycho caycaj hermanucunamanpis yarpänayqui. Mushoj aruyniquega Jehovapitami shamun”. Pay nimashganchega shacyächimashcanchi mushoj naciuncho hermanucunata mana reguirpis chayno cushish carcaycänäpaj.

Paul nin: Ghana naciuncho hermanunchicunata rasla cuyar galaycushcanchi, familianchicunaman ticrargan. Chaychoga achcajmi Testigo cargan. Paycunaga Jehovata cuyapäcoj y cushishga sirvipäcoj. Pero 13 watacunana Ghanacho caycar, nipäcamargan Kenia África oriental sucursalman aywapäcunäpaj. Jaguishganchi hermanunchicunata laquiparpis, Keniacho caycaj hermanucunata rasla cuyar galaycushcanchi. Cananyajmi cay naciuncho caycanchi y imaycacuna ruranapaj caycan

Anne nin: Achca watacunapa Jehovata servishgächo mana alicunapa pasargä y manchacurgäpis. Y ima pasashganchiraycu horaga ima gueshyapis o laquicuypis charimashwanchi, Jehovaga chay lapancunapita libramanchichu. Cada cadala armacunata pashtajta wiyaptëga pasaypa manchacö y maquëcunapis ushuncäcunmi. Pero yachacurgämi Jehovaman yäracunäpaj, y horaga pay calpata goman waquin hermanucunawan. Jinapis yachacurgä espiritual cajcho ali caycaptinchega, Jehová yanapämäshun pay gomashganchi carguta ali cumplinapaj.

Paul nin: Öraga waquincuna cayno tapupäcaman: “¿Gustashunquicu canan caycashgayqui naciunga?” nir. Ima naciuncuna shumaj captinpis, ayvecis imayca mana alicuna pasanman. Chaymi, masga gustamanchi chaycho caycaj hermanunchicuna. Paycunaga familianchino caycan. May chaypita captinchipis Jehovata adurashpanchi juc yarpayla canchi. Yarpashcanchi hermanunchicunata shacyächinapaj, pero cuentata gocushcanchi paycuna noganchita shacyächimashganchita.

May chay naciunman aywarpis cuyashga hermanulanchicuna caycargan. Y congregaciunpita mana yargucurga hermanunchicuna familianchi japuy caycan. Segurumi carcaycä, Jehovaman yäracuptinchega calpanta gomäshun voluntäninta ruranapaj (Filip. 4:13).