Cada cadala yachacunayquipaj ayvecis ganaspis canchu y aburridupis sienticunquiman. Aumi, öraga chaynomi sienticunchi. Pero calpachacunanchi y tiemputapis jorgunanchi necesitashganchita ruranapaj. Bañacunanchipäga tiemputa jorgunchi y calpachacunchipis, pero nircurga ¡alimi sientucunchi! Chaynolami Bibliata estudiaptinchipis “Diospa palabranwan maylashqa” o bañashgano sienticunchi (Efes. 5:26). Caycunata ruraptiqui yanapäshunquipaj:

• Juc horariuta ruray. Cada cadalami Bibliata publicaciuncunawan mana gongaypa estudiananchi, chayga ali cawanapaj yanapämäshun (Filip. 1:10). Horariuta rurashgayquega ricananlacho caycanman, puncuyquicho o refriquipa punculanchopis. Alichi canman celularniquicho juc alarmatapis churaptiqui chay hora manaraj chayaptin yarpänayquipaj.

• Puedishgalayquita ruray. Waquincunaga juc horapitapis maslata estudiapäcun, waquincunami ichanga ichic ichiclapa estudiayta puedipäcun. Chaymi puedishgalayquimanno horariuyquita ruray. Estudianayquipaj hora ganasniqui mana captenga, calpachacuy 10 minutucunalapis yachacunayquipaj. Chayta ruraptiquega alimi canga. Capazchi maslatapis yachacuyta munanquiman (Filip. 2:13).

• Imata estudianayquipaj tiempulawan acray. Estudianayqui horacho chaylaraj imata yachacunayquipäpis yarpachacuptiquega tiempuyquipis mana cangachu (Efes. 5:16). Gustashgayqui temacunata juc listacho anotacurcuy, chaynopa estudiashgayqui horacho mayna musyanquipaj imata yachacunayquipäpis. Y estudiaycaptiquega gustashushgayqui más temacuna captin anotacurcuy yapaycho maslata estudianayquipaj.

• Quiquiquiwan estricto caychu. Mana gongaypa cada cadalami estudianayqui. Chaypaj puedishgalayquita ruray, ayca tiempo estudianayquipaj, ima tema y imay hora, imalapis pasaptenga cambiayta puedinquimi.

Cada cadala mana gongaypa Bibliata estudiaptiquega achca bendiciuncunami cangapaj: Jehovawan más amigo canquipaj, cawayniquicho alimi decidinquipaj y cushishgapis sienticunquimi (Jos. 1:8).