46 CAJ YACHACHICUY
49 CAJ CANCIÓN Jehovata cushichishun
¿Siervo ministerialno sirviyta munanquicu?
“Imatapis chaskir kushikushqantsipitapis mas kushikuypaqmi kaykan pitapis yanapashqantsi” (HECH. 20:35).
¿IMATAJ YACHACUSHUN?
Caycho yachacushun imanir hermanucuna siervo ministerialno sirvinanpaj calpachacunman y chayta imanotaj ruranman.
1. ¿Imatataj apóstol Pablo siervo ministerialcunapita yarpargan?
SIERVO ministerialcuna hermanucunata sirvin y imaycacunata rurashganga alapa alimi caycan. Chaymi apóstol Pablo paycunata y ancianucunata cuyar, Filipos marcacho caycaj cristianucunata cartacamushgancho saludargan (Filip. 1:1).
2. ¿Imanotaj sienticun hermanunchi Luis siervo ministerial cashganpita?
2 Ayca watayojpis achca hermanucuna siervo ministerialno cushishga sirvircaycan. Devan hermanunchi 18 watayojlaraj caycaptin siervo ministerialno sirvir galaycurgan. Ichanga Luis hermanunchiga 50 watayojna caycaptin cay carguta chasquergan. Pay imano sienticushganta caynomi nin: “Hermanucuna cuyamashganta ricar más cushi cushila siervo ministerialno sirviycä”. Payno waquincunapis chaynomi sienticärin.
3. ¿Imacunapitataj canan yachacushun?
3 Gam bautizashgana olgu captiqui, ¿manachu munanqui siervo ministerialno sirviyta? ¿Imanirtaj ali canman chayman yarpänayquipaj? Y Biblia nishganno, ¿imano runa canquiman siervo ministerial canayquipaj? Canan caycunapita yachacushun. Puntataga ricashun imatataj siervo ministerialcuna rurapäcun.
¿IMATAJ CONGREGACIUNCHO RURAPÄCUN SIERVO MINISTERIALCUNA?
4. ¿Imatataj rurapäcun siervo ministerialcuna? (Fotucunatapis ricay).
4 Waquin hermanucuna Diospa santo espiritunwan siervo ministerialno nombrashga caycan, paycuna imaycacunachopis ancianucunata congregaciuncho yanapacun. Waquincuna encargado caycan hermanunchicuna maycho predicananpaj, publicaciuncunapis cananpaj, jina yanapan Diospa wasin limpio y ali cuidashga caycänanpaj. Y waquincunana Salunman shamojcunata chasquin o audio y video churananpaj yanapacun. Imaycacunachopis yanapacuptin Jehovata alapa cuyan y pay munashganno cawapäcun. Jina cristiano masincunatapis shongupita cuyapäcun (Mat. 22:37-39). Chaura, ¿imataraj ruranman juc hermano siervo ministerial cananpaj?
Siervo ministerialcuna Jesusno waquincunata tucuynopa yanapacun. (4 caj parrafuta ricay).
5. ¿Imataraj ruranman pilapis siervo ministerial cayta munarga?
5 Bibliaga wilamanchi pilapis siervo ministerial cayta munarga imano runa canman (1 Tim. 3:8-10, 12, 13). Gamga siervo ministerial cayta munarga cay cargupa Biblia nishganta shumaj yachacunayqui y cawayniquichopis cäsucunayqui. Pero puntataga yarpänayqui imanirtaj siervo ministerial cayta munanqui.
¿IMANIRTAJ SIERVO MINISTERIAL CAYTA MUNANQUI?
6. ¿Imanirtaj hermanucunata sirviyta munanquiman? (Mateo 20:28; caycaj dibujutapis ricay).
6 Jesusman yarpäshun. Payga taytanta y runacunata cuyashpanmi imayca humilde aruycunatapis rurargan waquincunata sirvinanpaj (leiriy Mateo 20:28; Juan 13:5, 14, 15). Jehovata y hermanucunata cuyashpayquimi paymi bendecishunqui siervo ministerial cayta munashgayquita (1 Cor. 16:14; 1 Ped. 5:5).
Jesusga ruraynincunawan discipuluncunata yachachergan mana ali tucuypa waquincunata sirvinanpaj. (6 caj parrafuta ricay).
7. ¿Imanirtaj mana ali caycan pilapis quiquilanman yarpar siervo ministerial cayta munaptin?
7 Cay munduchoga reguishga runacunata alabapäcun. Pero Diospa sirvejnincunawanga manami chaynochu. Jesusno pï hermanupis waquincunata cuyaptin ima carguta chasquerga cristiano masincunata ali tucur dominayta munangachu. Ichanga quiquilanman yarpaj runa carga ima cargutapis chasquiptin cristiano masincunata shumaj ricangachu, ni waquincunata yanapananpaj humilde aruycunata rurayta munangachu (Juan 10:12). Jehovaga orgulloso cajcunata manami yanapanchu (1 Cor. 10:24, 33; 13:4, 5).
8. ¿Imataj Jesús apostulnincunata consejargan?
8 Öraga Jesuspa discipuluncunapis quiquilancunaman yarpar carguta munapäcurgan. Chayga pasargan Jesuspa ishcay discipuluncunawan: Juan y Santiago. Paycuna Jesusta mañacurgan Gobiernuncho importante carguta chasquinanpaj; Jesús cushicunanpaj trucan 12 apostulnincunata cayno nergan: “Mayqaykipis mandaq kayta munarqa ashmaynöla runa mayikita yanapay. Ali rikashqa kayta munarqa pïmaypaqpis esclävunöla kapäkuy” (Mar. 10:35-37, 43, 44). Cristiano masincunata yanapananpaj hermanucuna ima carguta chasquiyta munaptenga juc bendiciunmi congregaciuncho canga (1 Tes. 2:8).
¿IMATAJ YANAPÄSHUNQUI SHONGUPITA HERMANUCUNATA SIRVINAYQUIPAJ?
9. ¿Imanirtaj waquincunata shongupita sirviyta munanquiman?
9 Jehovata y hermanucunata cuyanquichi, chaymi waquincunata imalachopis yanapanqui. Capaz yarpanquichi ‘siervo ministerial caytaga munächu’ nir, pero waquincunata sirviptiquega cushicunquimi. Chaymi Jesús nergan: “Imatapis chaskir kushikushqantsipitapis mas kushikuypaqmi kaykan pitapis yanapashqantsi” (Hech. 20:35). Jesusga waquincunata sirvir cushishga cawacurgan, chaynolami gampis waquincunata sirviptiquega cushicunquimi.
10. ¿Imata rurartaj Jesús cushish caycargan? (Marcos 6:31-34).
10 Yarpäshun Jesús waquincunata yanapar cushish caycashganta (leiriy Marcos 6:31-34). Juc cuticho Jesús apostulnincunawan uticashga caycar chunyaj sitiuman aywacurgan jamapänanpaj. Pero achca runacuna Jesús yachachishganta wiyayta munar naupacärirgan. Jesusga paycunata ninmanchi cargan ‘tiempö manami canchu’. Chay horacho Jesús discipuluncunawan micushgarächu cargan, chaymi capazchi Jesusga ichiclata yacharcachir aywacunman cargan. Ichanga payga runacunata cuyapashpanmi imaycatapis yachachergan y cuentata gocurinanpäga “patsapis tardiyaykannami” (Mar. 6:35). Chaytaga mana munaycarlachu rurargan sinoga runacunata cuyashpanmi yachachiyta munargan. Jesús waquincunata yanapashganpita alapa cushishmi caycargan.
11. ¿Imanotaj Jesús waquincunata yanapargan? (Dibujo y fotutapis ricay).
11 Jesusga manami runacunata Diospita yachachirganlachu sinoga jucnopapis yanapargan. Milagrucunata rurar achca runacunata micachergan (Mar. 6:41). Chaynomi Jesús gatejnincunata yachachergan imano waquincunata yanapänanpaj. Canan wichanpis alimi caycan siervo ministerialcuna cristiano masincunata yanapacuptin. Imanoraj Jesuspa discipuluncuna cushicärergan Jesuswan achca runacunata “saksashqanyaq” micuyninta camaripashganta (Mar. 6:42). Jesusga manami juc ishcay cutila runacunata yanaparganchu sinoga runacunata cuyashpanmi imaypis yanapargan (Mat. 4:23; 8:16). Jesusga cushishga caycargan waquincunata yachachir y imaycachopis yanapacur. Gampis Jesusno cushishga caycanquiman waquincunata siervo ministerialno yanapacur.
Jehovata cuyar y hermanucunatapis sirviyta munarga imaycacunata ruranqui yanapanayquipaj. (11 caj parrafuta ricay). b
12. ¿Imanirtaj yarpashwanchu ‘congregaciuncho imalachopis yanapacuyta puedëchu’ nir?
12 Ama yarpachacuychu ‘imatapis manami yachächu, habilidoso cächu’ nir. Congregaciuncho imaycapis caycan yanapanayquipaj. Jehovata mañacurcur 1 Corintios 12:12-30 nishganta leiptiquega yanapäshunquimi. Chaychoga Pablo tantiachicurgan lapan Diospa sirvejnincunaga alapa valuryoj cashganta y cada ununchi imalachopis yanapacushwan. Siervo ministerialno manaraj yanapacuyta puedirga Jehovata sirviy y lapan maquiquicho caycashganta hermanucunatapis yanapay. Chayta ricarga ancianucuna puedishgayquita imalatapis ruranayquipaj nishunqui (Rom. 12:4-8).
13. Pilapis siervo ministerialman chayananpäga, ¿imanirtaj mana sasachu caycan?
13 Bibliaga nin siervo ministerialcuna Jehovawan amigo cananpaj, cushi cushila waquincunata yanapananpaj y Jehová munashganno cawananpaj. Chaytaga lapan cristianucuna rurananmi. Chauraga manami yarpaychu chayta cumplinayquipaj sasa cashganta. ¡Gam siervo ministerial cayta puedinquimi! ¿Imataraj más ruranquiman siervo ministerial canayquipaj?
IMATARAJ MÁS RURANQUIMAN
14. ¿Siervo ministerialcuna imano runataj canman? (1 Timoteo 3:8-10, 12).
14 Canan ricärishun imata nin 1 Timoteo 3:8-10, 12 (leiriy) a siervo ministerial cayta munajcunapaj. Siervo ministerialcuna “yäracuypaj’’ o respetashga runa canman. Chauraga, ¿congregaciuncho yanapacur mana asicuylapachuraj cacunman? Manami, cushishgami imatapis ruranman (Ecl. 3:1, 4). Paycuna aunicushganta cumplinman y congregaciuncho rurananpaj cajta ruranman. Chaynopa paycunata waquincuna respetacärenga.
15. Pilapis siervo ministerial cananpäga, ¿imano runataj mana canmanchu?
15 “Ishcay cara” canmanchu. Paycunaga rasunpa cajta parlaj canman y pitapis mana engañaj canmanchu (Prov. 3:32). “Guellaylapaj malgash canmanchu”. Y ima negociun captenga manami engañanmanchu. Y congregaciuncho guellayta ricaptin honrado canman, cristiano masincunapita ricuyananpaj manami aprovechacunmanchu.
16. 1) Siervo ministerial cayta munarga, ¿imataj mana ruranmanchu? 2) ¿Imanotaj siervo ministerialcuna cawacunman?
16 “Upyaj runa” canmanchu. Siervo ministerialcuna shincatacash mana purinmanchu, ni waquincuna upyaj runatano reguinmanchu. Jina “limpio conciencianwan caycanman”, Jehová mandashganta cäsucur cawacunman. Pantaj runa captinpis Diosta cäsucoj carga jaucala cawacushun.
17. ¿Imanotaj musyacanman juc hermano “carguta chasquinanpajna caycashganta”? (1 Timoteo 3:10; fotutapis ricay).
17 Pilapis siervo ministerial cayta munarga, puntata musyachicunman “ima carguta chasquinanpajna caycashganta”. Ancianucuna imata rurananpaj y imano ruracananpaj niptenga ruranman, jina shumaj tantiaycur Diospa marcanta pushaj hermanucuna nishgantapis cuentaman churanan. Chayno ruraptenga waquin hermanucuna ricanga ali calpachacuycashganta. Ancianucuna, bautizashga hermanucunata yachachiy siervo ministerial cananpaj (leiriy 1 Timoteo 3:10). Capaz congregaciunniquicho bautizacushga mozucuna 15 watayoj o menoslaraj caycan, Biblianta ali estudian, reuniuncunacho comentananpaj preparacun y predicaj yargun, paycunataga puedishganno imalachopis yanaparcunanpaj ninquiman. Chaynomi musyachicunga carguta chasquinanpajno caycashganta. Jina 17 watayojna o más captenga siervo ministerialman chayanman.
Ancianucunaga yanapanga wamralapita bautizacushga hermanuta chaynopa tiempuwanga carguta chasquinanpaj. (17 caj parrafuta ricay).
18. ¿Imataraj ruranman juc cristiano ali ricashga cananpaj?
18 Siervo ministerial cananpäga “manami ima juchapitapis acusashgachu” canman. Chayno captinpis Jesusno cristianucunaga mana cajpitami acusashchi canman. Y Jesuspis nergan chayno pasananpaj cajta (Juan 15:20). Ichanga Jesusno ali portacuptenga congregaciuncho ali ricashga canga (Mat. 11:19).
19. Siervo ministerial cayta munajcunaga, ¿imataraj más ruranman?
19 Siervo ministerial cayta munajcunaga “juc warmiyojlami canman”. Puntalapitana Jehová nergan juc runa juc warmilawan cacunapaj, chaytaga lapanchitami cäsucunanchi (Mat. 19:3-9). Cristianucunaga manami jucwan jucwan cacunmanchu (Heb. 13:4). Jina warmilanta cuyar manami jananpanmanchu (Job 31:1).
20. ¿Imata rurartaj juc runa familianta ali ricanman?
20 Siervo ministerialcunaga “warminta y churincunata alimi ricanman”. Chaypäga familianwan cada semana Bibliapita mana jaguiypa yachacunman. Jina cada cadala familianwan predicaj yargunman y wamrantapis yachachinman Diosta cuyananpaj y cäsucunanpäpis (Efes. 6:4). Chayno rurarga congregaciuntapis alimi ricanga (1 Timoteo 3:5).
21. Siervo ministerial canayquipäga, ¿imataraj ruranquiman?
21 Siervo ministerialman manaraj chayaptiqui, cay yachacushganchiman yarpachacur Jehovata mañacuy. Siervo ministerial imano cananpaj cajta Bibliapita yachacur cäsucuy. Jehovata y hermanucunata masraj cuyarga waquincunata shongupita sirvinquiman (1 Ped. 4:8, 10). Chaynopa cushi cushila hermanucunata yanapäcunqui y Jehová bendecishunqui siervo ministerial cayta munaptiqui (Filip. 2:13).
17 CAJ CANCIÓN ‘Cuyaparmi rurä’
a 1 Timoteo 3:8-10 texto nin: “8 Siervo ministerialcunaga yäracuypaj canman, jina ishcay cara, upyaj runa ni guellaylapaj malgash canmanchu; 9 sinoga Dioslamanmi yäracur limpio conciencianwan caycanman. 10 Puntataga musyachicunman ima carguta chasquinanpajna caycashganta; chauraga manami ima juchapitapis acusashgachu caycaptenga siervo ministerialcuna capäcunman”. Y 1 Timoteo 3:12 texto nin: “Siervo ministerialcunaga juc warmiyojlami canman. Warminta y churincunatapis alimi ricanman” (TNM).
b DIBUJO Y FOTUCUNAPA WILACUYCUNA: Ichoj cajchoga, Jesusga discipuluncunata shongupita cuyar yanapargan; alauga cajchoga, juc siervo ministerial edayashga hermanuta yanapaycan.
