1. ¿Imanirtaj imaycacuna caycan auquincunapita yachacunapaj?

 CAWAY vidanchichoga ali cajcunata acranapaj pilapis consejamänanchitami necesitanchi. Chaypäga congregaciuncho ancianucuna y pogushga cristianucunami caycan. Paycuna auquinna caycaptinpis, manami nishwanchu ‘consejuncunaga unaypaj imachi ali cashga’ nir. Jehovaga munanmi auquin cajcunapita yachacunapaj. Paycunaga imaycapa pasar yachacushga más yachaj y tantiaj capäcunanpaj (Job 12:12).

2. ¿Imatataj canan yachacushun?

² Unaychoga yäracoj sirvejnincunawanmi Jehovaga marcanta shacyächergan y pusharganpis. Yachacushun Moisespita, Davidpita y apóstol Juanpita. Paycunaga manami reguinacärirganchu y imacunapa pasashgancunapis manami igualchu cargan. Wanunanpäna caycar paycunaga más mozu cajcunata ali consejapargan. Y cutin cutin nipäcurgan Diosta cäsucärinanpaj. Jehovaga chay ali consejucuna Palabrancho yurimunanpämi escribichimush, y lapanchitami yanapämanchi auquinna caycarpis o mozularaj caycarpis (Rom. 15:4; 2 Tim. 3:16). Canan yachacushun cay quimsa runacuna wanunanpäna caycar ali consejacamushganpita.

 “ATSKA WATA KAWAPÄKUNKIPAQ”

3. Jehová yanapaptin, ¿imacunatataj Moisés rurargan?

³ Wanushgancamami Moisesga Jehovalata sirvergan. Payga profeta, juez, escribej y comandante cargan. Caway vidanchoga imaycata yachacurgan. Payga israelitacuna esclavo manana cananpaj Egiptupita jorgamurgan y Jehovapa achca milagruncunatapis ricarganmi. Diosninchi santo espiritunwan escribichergan Bibliapa galanan pichga librucunata, Salmo 90 cajtapis; capazchi Salmo 91 y Job librutapis.

4. ¿Pïcunatataj Moisés consejargan y imanirtaj chayta rurargan?

⁴ 120 watayoj wanunanpäna caycar, Moisés lapan israelitacunata shuntarcur yarpächergan paycunaraycu lapan rurashganta. Chaycho caycajcunapita waquin cajcunaga unaycho Egipto naciunta castigar, achca milagrucunata Jehová rurashganta ricapäcurganmi (Éx. 7:3, 4). Puca lamartapis chaquilapa chimpapäcurgan y faraonpa tropan ushacashgantapis ricapäcurgan (Éx. 14:29-31). Chunyaj jircachona caycar paycunata jinala Jehová yanapaycurgan (Deut. 8:3, 4). Prometishgan naciunman yaycunanpäna caycar, israelitacunata Moisés shacyächergan. a

5. Moisés wanunanpäna caycar, ¿israelitacuna imano cawacunanpätaj wilacurgan? (Deuteronomio 30:19, 20).

⁵ ¿Imatataj Moisés consejacurgan? (Leiriy Deuteronomio 30:19, 20). Payga israelitacunata yarpächergan ali cawayta chasquinanpäna caycashganta. Jehovata cäsucuptin, cuyaylapaj y wayumoj pachachoga achca watapami cawapäcunman cargan. Chaymi Moisés cayno nergan: “Tsay nacionchöqa mana sharkatsishqayki kuyaylapaq jatusaq markakunami listu kaykan. Tsay markakunachöqa imatapis mana pirwakuykarmi wayi juntata imaykatapis taripäkunkipaq. Yaku pözukunatapis uchkushqalatanami taripäkunkipaq. Üvatapis olïvutapis listu plantashqalatanami taripäkunkipaq” (Deut. 6:10, 11).

6. ¿Imanirtaj Dios jaguirgan waquin naciuncuna israelitacunata esclavutano apacärinanta?

⁶ Pero Moisesga israelitacunata nergan mana cäsucäriptenga ima pasananpaj cajta. Chay cuyaylapaj pachacho cawayta munarga Jehovapa mandätuncunata cäsucärinan cargan. Chaura Moisesga nergan Jehová Diosta cuyar ali cawayta acracärinanpaj. Israelitacuna ichanga cäsucärerganchu. Chaymi tiempuwanga esclavutano asiriucuna y babiloniucuna apacärergan (2 Rey. 17:6-8, 13, 14; 2 Crón. 36:15-17, 20).

7. Y noganchega, ¿imata yachacunchi Moisés wilacushganpita? (Foto y dibujutapis ricay).

⁷ ¿Y noganchega imata yachacunchi? Cäsucoj captinchirämi ali cawayta tarishun. Unay israelitacuna Prometishgan naciunman yaycunanpäna caycargan, chaynolami noganchipis mushoj pachaman yaycunanchipäna caycanchi. May chaychopis cay pacha cuyaylapaj canga (Is. 35:1; Luc. 23:43). Diablo demoniuncunawanpis manami canganachu (Apoc. 20:2, 3). Ima religiuncunapis lutanta Jehovapita yachachicunganachu (Apoc. 17:16). Gobiernucunaga pï runacunatapis nacachenganachu (Apoc. 19:19, 20). Fiyu runacunatapis ricashunnachu (Sal. 37:10, 11). Paraisucho caycajcunaga Jehovalatami cäsucäringa. Chaynopa tranquilula y cuyapänacur juc familianola cawapäcunga (Is. 11:9). Chauraga ¡ali cawaymi chayamunga!  Jehovata cäsucurga manami juc ishcay pachac watacunalacho cawacushun, sinoga para siemprimi (Sal. 37:29; Juan 3:16).

8. ¿Imanotaj juc misioneruta yanapargan mana wanuypa cawayman yarpachacushgan? (Judas 20, 21).

⁸ Mushoj pachacho mana wanuypana cawanapaj yarpachacur caycarga, ima problemapa pasarpis aguantaycäshunmi (leiriy Judas 20, 21). Jina mana yamacaypa mana ali munayninchicunawan luchaycäshun. África naciuncho achca watapa misioneruno yanapacoj juc hermanush mana alita mana rurananpaj luchaycash. Paymi nin: “Cuentata gocurirgä mana ali munaynëta mana venciptëga mana ushacaj cawayta ograrëmanchi cargan. Chaymi Jehovata cutin cutin ruwacurgä yanapämänanpaj, chaynopa ali concienciawan jinala payta sirviycänäpaj”.

“ALLI CAWANQUIPAJ”

9. ¿Ima pruebacunapataj David vidancho pasargan?

⁹ Rey Davidga Jehová munashgannomi cawargan. Jina payga cargan arpa tucaj, poesiacunata escribej, mana manchacuypa peliaj y profeta. Achca pruebacunatapis pasargan. Chiquicoj rey Saulpita gueshpipaylapa achca watacunapa chunyaj jircacunacho cawargan. Rey cashgan wichanpis wamran Absalón rey cayta munar wanuchiyta munargan. Chayraycu yapay gueshpicurgan salvacunanpaj. Pero problemacunapa pasar y juchalicushga carpis wanunancamami Jehovata mana jaguiypa sirvergan. Jehovaga Davidpita nergan: “shonqüpaqnömi kaykan”. Chaymi David consejacushganta wiyacunanchi (Hech. 13:22; 1 Rey. 15:5).

10. ¿Imanirtaj Davidga Salomón churinta consejargan?

¹⁰ Yachacushun David wamran Salomonta consejashganpita. Jehová Salomonta acrashga templuta sharcachinanpaj, chaycho israelitacuna Jehovata adurapäcunanpaj (1 Crón. 22:5). Paypäga achca aruy cargan y Jehová yanapänanta necesitargan israelitacunata pushananpaj. ¿Imataj David consejacush?

11. ¿Imatataj David Salomunta consejapash, y cäsucushgan wichanga imanotaj cawaynin cash? (1 Reyes 2:2, 3; dibujucunatapis ricay).

¹¹ ¿Imatataj David consejapash? (Leiriy 1 Reyes 2:2, 3, TDI). Salomonta nergan ‘Diosta cäsucuptiquega alimi cawacunquipaj’ nir. Y chaynomi cash achca watapa (1 Crón. 29:23-25). Salomonga templutapis sharcachishga, Bibliapa waquin librucunatapis escribishga y nishgancunaga yurimunmi waquin librucunachopis. Ali reguishga cargan rico y yachaj cashganpita (1 Rey. 4:34). Papänin nishgannopis Jehovata cäsucurlami alilaga cawacunan cargan. Pero auquinyarcurna lutan Dioscunata adurar galaycurgan. Chayraycu Jehovapa favorninta y yachaj cashgantapis  ograrergan, y mana ali rey ticrargan (1 Rey. 11:9, 10; 12:4).

12. ¿Noganchipis imataj yachacunchi David consejacushganpita?

¹² ¿Noganchega imata yachacunchi? Jehovata cäsucurga alimi cawacushun (Sal. 1:1-3). Jehovaga manami Salomontanoga imaycataraj gomäshunchu. Ichanga Diosta cäsucuptinchega yachayninta gomäshun ali cajcunata acranapaj (Prov. 2:6, 7; Sant. 1:5). Jehovapa consejuncuna yanapämanchi aruyninchicho, imata estudianapaj, guellay asuntucho y cushicuna ruraycunachopis. Cäsucoj captinchirämi paypitaga raquicäcushunchu, mana wanuypa cawaytapis tariyculäshunmi (Prov. 2:10, 11). Ali amigunchicunatapis tarishunmi y caway vidanchichopis alimi goyäshun castanchicunawanpis.

13. ¿Imataj yanapargan Carmenta cushishga cawacunanpaj?

¹³ Carmen, Mozambique naciunpita, ‘ali estudiashga cashganchiraj cushishga cawacushun’ nir yarpargan. Chaymi universidäman aywargan edificiucunata sharcachiyta yachacunanpaj. Payga wilacun: “Estudiashgäga alapa gustamarganmi. Tiempöpis cargannachu y uticashga caycargä. Universidächo siete y media tutapita seis tardicama goyargä. Reuniunman aywanapaj sasami cargan y Jehovapitapis ichic ichiclapa raquicärergä. Cuentata gocurgä ishcay patrunta sirvishgäta” (Mat. 6:24). Payga pasashganpita Jehovata mañacurgan y publicaciunchopis ashirgan shumaj consejucunata. Caytapis nin: “Chaycunaman yarpar pogushga hermanucunapaj y mamanëpa consejuncunata chasquir, universidäta jaguirgä y lapan tiempöwan Jehovata sirvir galaycurgä. Cananga cushishga sienticö. Ali acrashgäpita mana arrepenticöchu”.

14. ¿Imataj ruranapätaj Moisés y David consejargan?

¹⁴ Moisés y David Jehovata alapa cuyaparmi lapan mandatuncunata cäsucärergan. Edayashgana caycar wiyajcunata consejaycurgan, paycunano cäsucur mana jaguiypa Jehovata sirvipäcunanpaj. Ishcancuna nerganpis pilapis Jehovata mana cäsucuptin paypa bendiciunninta ograrinman. Canan wichanpis consejashgancuna yanapämanchimi. Tiempuwanna juc caj Diospa sirvejnin nergan Jehovalata sirvir caycänapaj.

 “PASAYPA KUSHIKÜ”

15. Cawashgan wichancho apóstol Juan, ¿imacunatataj ricargan?

¹⁵ Juanga cuyashgan Jesuspa discipulun cargan (Mat. 10:2; Juan 19:26). Payga Jesuswan runacunata yachachergan y milagruncunatapis ricargan. Jesús nacaycar y wanunanpäna caycaptinpis, Juanga laduncho caycargan. Nircur cawarimushgana caycar Jesusta ricargan. Jina cawashgan wichan ricargan cristianucuna walcalapita miraycushganta, ali “wilakuytaqa maytsaychöpis” wilacushga cashgancama (Col. 1:23).

16. Cartancunaga, ¿pïcunapätaj Juan escribimush?

¹⁶ Juan auquinna caycar, Apocalipsis libruta escribimurgan (Apoc. 1:1). Jinamanpis Jesuspita wilacoj Juan libruta escribirgan y quimsa cartacunatapis. Quimsa caj cartancho escribirgan Gayo jutiyoj cuyashgan cristianupita (3 Juan 1). Chay wichanpäga achca runacunatachi Juan yanapargan cristiano cananpaj. Juan escribimushganga canan wichanpis lapanchitami yanapämanchi.

17. 3 Juan 4 nishganno, ¿imata rurartaj alapa cushicunchi?

¹⁷ ¿Imataj escribimurgan Juan? (Leiriy 3 Juan 4). Juan guelgamurgan Diosta cäsucuptinchirämi cushishgala cawacunchi. Quimsa caj cartanta escribimushgan wichanga waquincunaga lutanta yachachicuycargan y congregaciuntapis raquicaycächergan. Chayno captinpis, waquincunaga jinala Diosta sirvircaycargan y Diospa mandamientun nishganno cawarcaycargan (2 Juan 4, 6). Cay yäracoj cristianucunaga Juanta y Jehovatapis cushicherganmi (Prov. 27:11).

18. ¿Imataj yachacunchi Juan escribimushganpita?

¹⁸ ¿Y noganchega imataj yachacunchi? Diosta mana jaguiypa sirviptinchega cushishgala goyäcushun (1 Juan 5:3). Jehovata cushichiptinchega noganchipis cushishgala caycanchi. Mayraj Jehová cushicun mana alicunata mana ruraptinchi y Palabranta chasquicuptinchi (Prov. 23:15). Cielucho angelcunapis alapa cushicärin (Luc. 15:10). Noganchipis cushicunchimi cristiano masinchicuna ima pruebacunapa o nacaycunapa pasarpis mana cachaypa Diospa sirvipäcuptin (2 Tes. 1:4). Chaymi Diablupa maquincho caycaj cay mundo ushacächishgana captenga, Jehovalata sirvishganchipitaga masraj cushicushunmi.

19. ¿Imataj juc hermana nergan waquincunata Bibliapita yachachishganta? (Fotucunatapis ricay).

¹⁹ Waquincunata Jehovapita yachachicuptinchega  cushichimanchi. República Dominicana naciunpita Raquel jutiyoj hermana wilacun, imapita más cushicuypaj rurayga Diospita waquincunata yachachishganchi. Payga achca runacunata Diosta sirvinanpaj yanapashga, chaypita cayno nin: “Bibliapita yachachiptë estudiantëcuna Jehovata cuyar galaycuptin paylaman yäracuptin y cambiucunata rurarga Jehovapa shongunta cushichiptin imanomi cushicuyculä. Yachachinapaj alapa calpachacushgä captëpis manami tincunchu cushishgala canan hora caycashgäwan”.

ALI YACHACUSHUN CAY QUIMSA YÄRACOJ RUNACUNA CONSEJACUSHGANPITA

20. ¿Imatataj noganchipis ruranchi Moisés, David y Juan rurashganno?

²⁰ Moisespa, Davidpa y Juanpa caway vidancunaga manami canan cawashganchinochu cashga. Imano captinpis paycunanola noganchipis Jehovata sirvir payta mañacunchi, payman yäracunchi y consejuncunatapis chasquicunchi. Paycunano convencido caycanchi cäsucoj captinchega Jehovapa bendiciuncunata chasquinanchipaj.

21. ¿Ima bendiciuncunataj caycan Moisés, David y Juanpa consejuncunata chasquicojcunapaj?

²¹ Chauraga chay quimsa auquincunapa consejuncunata chasquicushun y Jehovapa mandatuncunatapis cäsucushun. Chaynopa ali y achca watacunapa cawashun. Aumi, mana wanuypa cawaytapis tarishun (Deut. 30:20). Jehovapa shonguntapis cushichishunmi. Payga lapan aunicushgancunata cumplinmi y shamoj tiempucho mastarajchi ruranga (Efes. 3:20).