1, 2. Acabwan Manasés reycunaga, ¿ishcancunacho arrepenticärergan, y ima tapucuytaj caycan yachacunapaj?

UNAY ishcay reycunapita parlarcushun. Jucnin caj Israel marcacho mandacurgan y jucnin cajna tiempuwan Judá marcacho. Gobernapäcushgan wichanga ishcancunami Jehovata mana casucärirganchu. Marcancunata juchaman apapäcurgan, lutan dioscunata adurapäcurgan y wanuchicoj capäcurgan. Israelpa reyninga wanushgancama mana alicunalata rurargan; jucnin caj rey ichanga lapan mana alicunata rurashganpita arrepenticurgan y Diosninchega perdunargan. ¿Picunataj paycuna cargan?

² Acab reypita y Manasés reypita parlaycanchi. Ishcancunapitami yachacushun, imata rurartaj rasunpaga arrepenticushwan (Hech. 17:30; Rom. 3:23). Chauraga ¿imanotaj ricacämunman pipis rasunpa arrepenticushganga? Caypita yachacushganchimi tantiachimäshun ima juchata rurashga carpis Jehová perdunamänanchipaj. Naupataga chay reycuna cawaynincunacho imata rurashganta ricärishun. Nircurpis Jesús ima wilacamushganpita yachacushun.

3. ¿Imano reytaj Acab cargan?

³ Acabga Israel marcapa ganchis caj reynin cargan. Payga Jezabel jutiyoj warmiwan casaracurgan; cay warmipa papänin norte caj laducho caycaj Sidón marcapa reynin cargan.  Ichanga Acab nergan ‘imaycata charaj familiawan casaracuptëga Israel marcapaj alimi canga’ nir. Pero lapan rurashganga Jehovapa naupancho pasaypa mana ali cargan. Warmin rurashganta payga rurargan, Baal jutiyoj diosta adurar galaycurgan, templucunacho pasaypa mana alicuna ruracänanta permitergan, y wamracunatapis sacrificiupäshi rupachergan. Pasaypa mana ali carmi Jezabel warmiga, Jehovapa waquin profetancunata wanuchinanpaj mandargan (1 Rey. 18:13). Acabpita Biblia nin “waquin raycunapitapis mas piyur-raj” cashganta (1 Rey. 16:30). Jehovaga ricaycashgami Acabwan Jezabel lapan rurashgancunata. Israel marcanta laquipar y chaycho caycajcuna lapan arrepenticärinanpämi Elías profetanta mandargan. Pero Acabwan Jezabelga ichiclapis arrepenticärirganchu.

4. ¿Acabwan ima pasananpätaj Elías nergan, y nircur imanotaj ricacurgan?

⁴ Jehovaga manami ricaräcurlachu cacushga lapan mana alicuna pasacunanta. Eliaswan wilachicurgan Acabwan y Jezabelwan ima pasananpaj cajta, familiancunatapis ushajpaj ilgächinanpaj nergan. Acabga laquishgash ricacurgan Elías wilacushganpita y yangalash chay hora arrepenticuycashganno ricacurgan (1 Rey. 21:19-29).

5, 6. ¿Imanirtaj nishwan Acabga yangala arrepenticushganta?

⁵ Aumi, Acabga yangalami laquicushpan chay hora arrepenticurgan. Israel marcacho Jehovata adurapäcunanpaj trucan Baal diostami jinala adurapäcuycargan. Mana arrepenticushpan masraj mana alicunata rurargan.

⁶ Tiempuwan Judapa reynin Jehosafat-ta ruwacurgan siriucunawan luchananpaj, chaycho Jehosafat nergan Jehovapa profetantaraj naupata tapucunanpaj. Chaypita Acab cayno nergan: “Aw, kaykanmi TAYTA DIOSPA juk profëtan [...]. Itsanqa payta tapukuptï imaypis mana alikuna pasamänanpaq kashqantami niman. Tsaymi paytaqa pasaypa rabyapä”. Chay profetaga Micaya jutiyojmi cargan, y payga Acabta nergan mana alicunata rurashganraycur wanuyninlata tarinanpaj cajta. Chaychopis Acabga mana arrepenticurganchu, wilapashganlapita Micayatapis carcilcho wichgachergan (1 Rey. 22:7-9, 23, 27). Jehovapa profetanta preso charishga carpis wanunanpäga wilashgana caycargan; y chayno ruracargan, juc guerracho wanurgan (1 Rey. 22:34-38).

7. Acab wanushgana caycaptinpis, ¿imatataj paypita Jehová nergan?

⁷ Acab wanushgana caycaptin ¿ima mastataj paypita Jehová nergan? Chay wichanchoga Acabwanmi Jehosafat guerraman aywashga cargan. Chaypitami Jehú profetanwan wilachicurgan, caynomi Jehosafat-ta nergan: “¡Imanirtaq fiyu runata yanapar pelyaq aywashqanki! ¡Imanirtaq TAYTA DIOSPA contran runakunapa amïgun kanki!” (2 Crón. 19:1, 2). Acabcush arrepenticunman cargan manachi Jehuga paypita ninmanchu cargan ‘fiyu runa’ y “DIOSPA contran runakunapa amïgun” cashganta. Chauraga rurashganpita laquinärishga captinpis rasunpa cajchoga manami arrepenticurganchu.

8. ¿Rasunpachuraj Acab arrepenticurgan? ¿Imatataj chaypita yachacunchi?

⁸ ¿Imatataj Acabpita yachacunchi? Paywan ima pasananpaj cajta profeta Elías wilapaptenga, arrepenticuycashgannoshi ricacurgan, pero yangalami cargan. Lapan  mana alicunata rurashganta ricarmi cuentata gocunchi mana arrepenticushganta. Caypita yachacunchi pipis arrepenticuptenga shimilapita mana cananpaj, ruraynincunachomi ricacämunman. Chaymi cananga Manasespitana yachacushun.

9. ¿Imano reytaj cargan Manasés?

⁹ 200 watacuna pasarcuptenga Judá marcapa reynin Manasesna cargan. Ichanga Acabpita más mana alicunata rurashganpaj parlarmi Biblia cayno nin: “Mana alikunata rurarmi TAYTA DIOSTA pasaypa rabyanätsirqan” (2 Crón. 33:1-9). Payga luta dioscunapa altarninta sharcachergan y ganracuna ricacänanpäpis Jehovapa templuncho gueruta ichichergan. Ricacojcunawanpis, majiquerucunawanpis, brujucunawanpis arurganmi. ‘Jutsaynaq runakunatapis wanutsirqanmi’. “Juk diosta adorashpanmi tsurintapis altarcho” rupachergan (2 Rey. 21:6, 7, 10, 11, 16).

10. ¿Imanotaj Manasesta Jehová anyapargan y imatataj pay rurargan?

¹⁰ Acabnolami Manasespis Jehová mandashgan profetacunata casuparganchu. Chaypitami Jehová Diosga “camacächiran Asiria raypa mandaj suldäruncuna shamunanpaj. Paycunami Manasesta prësu charircur runsi cadinacunawan watarcur Babiloniaman” apacärergan. Ichanga chay naciuncho caycar ali cajcunata rurananpaj yarpachacurgan. Jehová Diospa “ñaupancho arpinticuran”. Caytapis ninmi Diospa Palabran: “Ñacashpanrämi Manasesga TAYTA DIOSTA mañacuran”. Aumi, Manasespa shongunga ñanpuyaycashgami. Jehovataga Diosnintanona ricargan y cutin cutin mañacurgan (2 Crón. 33:10-13).

11. ¿Imanirtaj nishwan Manasesga rasunpa arrepenticushganta? (2 Crónicas 33:15, 16).

¹¹ Jehovaga wiyarganmi Manasés mañacamushganta, payga ricarganmi ali shongulanwan cay runa mañacamushganta. Chayno ali runaman ticrashganpitami Diosninchega gobiernuntapis cutichergan. Manasesga calpachacurganmi rasunpa arrepentido cashgan ricacänanpaj. Acab rurashganta mana rurarganchu; lutan caj aduraciuntapis ushacächerganmi y pï maytapis nergan Jehovalata adurapäcunanpaj (leiriy 2 Crónicas 33:15, 16). Chay lapanta rurananpäga valurcharcur yaracushgarächi; más unayga culpanraycur waquincuna Diosta jaguiripäcurgan. Auquinyashgana carpis ali cajcunata rurarna galaycurgan. Josías wamrapäga ali awilunchi cargan, chaychi tiempuwanpis ali shonguyoj reyman chayargan (2 Rey. 22:1, 2).

12. ¿Imatataj yachacunchi Manasés imano arrepenticushganpita?

 ¹² ¿Imatataj yachacunchi Manasespita? Payga humilde runaman ticrargan, Jehovata ruwacushpan perdunananpaj mañacurgan y ali cajtana rurar galaycurgan. Dioslatana adurar galaycurgan y waquincunapis chaynola rurananpaj calpachacurgan. Jatun juchacunata rurashga cajcunapis, ali caycan Manasespita yachacunanpaj. Diosninchega amatar cuyacojmi y “perdonakuqmi” (Sal. 86:5). Pipis rasunpa arrepenticuptenga Taytalanchi Jehovaga perdunaycungami.

13. ¿Imataj tantiachimanchi imano arrepenticunapaj Jehová imata shuyarashganta?

¹³ Manasespitapis yachacunchi shimilanchipita mana arrepenticunapaj. Cayta tantiarcushun tantata ranticojpita parlar. Imaraj canman tantata rantinapaj aywar harinalata macyaycamaptinchi. Jina chay ranticoj nimashwan ‘tantataga harinawanmi ruranchi, chaylata apacuy’; ‘alimi, graciaslä’ ¿nirchuraj aywacushwan?, manachi ¿au? Imanomi tantata ranticoj ima mañacushganchita mana goycämanchichu. Chay japuyla pipis Jehovapa naupancho juchancunapitaga laquishgala caycanmanchu, shongupitarämi arrepenticunan. Chayno captinrämi Jehovaga pitapis yanapaycunga. Arrepenticur ima masta ruranapaj canan parlarcushun Jesús ima wilacamushganpita.

14. ¿Imano yarpachacurtaj chay aywacoj mozuga arrepenticuycargan?

¹⁴ Jesús wilacamurgan juc aywacoj mozupita, chaytaga tarinchi Lucas 15:11-32 textucunacho. Chay mozush piñacurir wasinpita aywacurgan caru marcapaj. Chay marcachoshi mana ali cawar galaycurgan. ‘Wasilächo caycarga manachi cayno nacaycämanchu’ nirshi yarpachacurgan. Chaypitana cuticamurgan y papäninta nergan perdunananpaj. Cay mozuga manami yarpachacunmanlachu cargan mana ali caminuta acrashganpita, ali cajcunata rurarnami galaycunan cargan.

15. ¿Imatataj rurargan aywacoj mozo rasunpa arrepentido cashganraycur?

¹⁵ ¿Imata rurartaj chay aywacoj mozuga arrepenticurgan? Carupitami wasinman cuticamurgan. Chayaycurlami papäninta cayno nergan: “Papä, qamta y Tayta Diostapis rabyanätsirmi jutsata rurashqä. Amana tsurikitanöqa chaskimaytsu” (Luc. 15:21). Chayno parlashganchomi ricacämurga Jehovatapis yapay sirviyta munashganta. Papäninpa favorninta chasquinanpäpis juc arojnintanola chasquinanpaj nergan (Luc. 15:19). Cay lapanta Jesús wilacamushganga cuyaylapaj caycan; ancianucunapis yachacunmanmi pipis jatun juchata ruraptin  arrepentido cashganta o manapis musyapäcunanpaj.

16. ¿Imanirtaj ancianucunapäga sasano canman pipis rasunpa arrepentido cashganpita cuentata gocärinanpaj?

¹⁶ Ancianucunapäga sasano canman pipis rasunpa arrepentido cashganpita cuentata gocunanpaj. Paycunaga manami musyanchu juchayoj cajcunapa shonguncho imacuna cashgan. Pipis ‘arrepentido caycä’ niptenga cawayninchomi chayga ricacämunman: ¿imanotaj canan mana ali rurashgancunata chiquiycan? Jinamanpis waquincunaga jatun juchapitapis más piyur-raj rurashga canman, chayno captenga öraga ancianucunaga seguro capäcunchu rasunpa arrepentido cashganpita.

17. 1) Parlashganchi waugui rurashganpita mana ali ricacuptinpis, ¿nishwanchuraj rasunpa arrepentido cashganta? 2) ¿Imataraj ruranman pï juchayojpis rasunpa arrepentido caycarga? (2 Corintios 7:11).

¹⁷ Imaraj canman juc waugui cayta ruraptin: payga casado caycarpis achca watacunapa juc warmiwan pacapaylapa cacun. Chaytaga manash musyanchu warminpis, ancianucunapis ni amiguncunapis. Pero nircur ancianucunaga musyarinshi ima pasaycashganta, y chay wauguita ‘cayta wacta rurashcanqui’ nipäcuptenga; payga ‘aumi, chaynomi, cananga arrepentido caycä’ nirshi parlaycamun. Chauraga, ¿rasunpa arrepentido caycashganta nishwanchuraj? Ancianucunaga manami musyarishganlawanchu juzgapäcunga. Cay runaga pacapaylapa achca watacunapami juchata ruraycashga, quiquinpis manami wilacamushgachu, juc caj ancianucunata wilapashga. Aumi, ancianucunaga pruebacunataraj ashinan, shumajraj ricanan rasunpa arrepentido cashganta o manapis (leiriy 2 Corintios 7:11). Caycunapa pipis pasaptenga öraga tiempuraj pasanan rasunpa arrepentido cashgan musyacänanpaj. Chauraga congregaciunpitaga gargushgarächi canga (1 Cor. 5:11-13; 6:9, 10).

18. ¿Imataraj ruranman congregaciunpita gargushga cajcuna rasunpa arrepentido captenga, y chayno ruraptenga imaraj pasanga?

¹⁸ ¿Imatataj ruranman pipis rasunpa arrepentido captenga? Lapan reuniuncunamanmi aywanan, mañacunanpaj y Bibliata estudiananpaj ancianucuna wilapashgantapis chasquicunmanmi. Chay juchaman yapay mana ishquinanpäpis calpachacunmanmi. Ali cajcunatana rurar galaycuptenga Taytalanchi Jehovaga perdunaycungami y ancianucunapis yanapangami congregaciunman cuticamunanpaj. Cay lapanchoga ancianucunaga calpachacärinmi Jehová munashganno pitapis juzgapäcunanpaj.

19. ¿Imataraj ruranman jucha rurajcuna rasunpa arrepentido caycarga? (Ezequiel 33:14-16).

 ¹⁹ Ricashganchinopis, pipis jatun juchata rurashganpitaga manami ninmanlachu ‘laquishga caycä chaypita’. Rasunpa arrepentido cashganga ricacämunga imano canan cawaycashganchomi. Guepaman jaguiycurmi lapan mana alicunata gongaycunman y Jehovata casucurlana galaycunman (leiriy Ezequiel 33:14-16). Imapitapis Jehovapa ricaynincho ali cananpämi calpachacunman.

20, 21. ¿Imatataj rurashwan jucha rurajcunata yanapänapaj?

²⁰ Jesús shumaj wilacamurgan “shamushcä juchallancho goyaycajcunata gayajmi arpinticur salbacunanpaj” nir (Luc. 5:32). Chaynolami noganchicunapis rurashwan. Chauraga, ¿imatataj rurashwan maygan amigulanchipis jatun juchata ruraptenga?

²¹ Upälala cacurga mana ali caj caminuta acracunanpämi yanapaycashwan. Pacapaylapa imatapis rurarga Jehovaga lapantami ricaycan (Prov. 5:21, 22; 28:13). Amigunchita rasunpa cuyarga ancianucunawan parlananpaj nishwan. Mana munaptenga, chaura quiquinchimi ancianucunawan parlashwan. Chayta rurarmi rasunpaga jucha rurajcunata yanapaycanchi. Jehovata sirvinantami imaypis munanchi.

22. ¿Imapitataj yachacushun shamoj caj yachachicuycho?

²² Y achca watacunapa pipis pacapaylapa juchacuna rurashganraycur ancianucuna congregaciunpita garguptenga, ¿nishwanchuraj mana cuyapar congregaciunpita gargushganta? Gatejnin caj yachachicuychona caypita parlarcushun. Jehovaga pitapis cuyaparmi anyapan, paynola noganchipis cashwan.