1. ¿Imanirtaj chaychica runacuna pantashgano carcaycan?

CAY munducho achca religiuncunami nipäcun ‘nogacunapis cristiano carmi Dios chasquimänanchipaj paylata adurar carcaycä’. Chaychi maychicaj runacuna pantashga caycar tapucärin: “¿Juclayla religiunlachu caycan, o lapan religiuncunatachu Dios chasquin?”. ¿Y noganchicunaga ima nishwantaj? ¿Seguruchu caycanchi Jehovapa testiguncunala rasunpa cajta yachachicuycashganchita y Dios munashgannola payta aduraycashganchita? Imanir seguro caycashganchipita tantiarcushun canan.

2. ¿Imanirtaj Pabluga seguro caycargan imaman creishgan rasunpa cashganta? (1 Tesalonicenses 1:5).

² Apóstol Pablupäga lapan yachacushgancuna rasunpa cajlami cargan (leiriy 1 Tesalonicenses 1:5). Payga segurumi chaypita caycargan, ¿imanirtaj chayta ninchi? Diospa Palabranta shumaj tantiapashganraycurmi, caytapis nerganmi: “Lapan qelqaraykaqkunaqa Tayta Diospa yarpayninkunami kaykan” (2 Tim. 3:16). Chaura shumaj yachacurmi tantiaycurgan Jesustapis quiquin Dios mandamushganta. Ichanga chay wichan pushacoj religiosucuna casuparganchu Jesús shamunanpaj wilacoj profeciacunata. ‘Diosta sirviycä’ nirpis ishcay cara capäcurgan, lutanpa imatapis rurapäcoj (Tito 1:16). Pablo ichanga Diospa Palabranpita manami nirganchu ‘caycajla conviëniman, caycajga mana’ nir. Payga calpachacurgan Dios munashgannola lapalanta runacunata yachachinanpaj (Hech. 20:27).

3. Rasunpa caj nänicho caycashganchita cuentata gocunapäga, ¿lapantarächuraj musyashun? (“ Jehová rurashganta y yarpashgantaga manami lapanta atipanchichu” nej recuadruta ricäriy).

 ³ Waquincunapis nipäcun ‘rasunpa caj religiunga yachachimashwanmi ima aycapaj tapucushganchicunata, Biblia chaypaj mana parlarpis’ nir. ¿Nishgancunaga rasunpachu? Pablupita masla parlarcushun. Cristianucunata “rasuncagta o mana rasuncagta […] shumag tantiyacäriy” nishgan carpis, wilacurganmi quiquinpis lapanta mana musyaycashganta (1 Tes. 5:21). Chaychi nergan runacunaga “janan-janallanmi yachan […] mauca espëjuwan ricacojnöpis sumäga manarämi tantiyanchïrächu” nir (1 Cor. 13:9, 12). Pabluga manami lapantarächu musyargan, canan wichan noganchicunanopis. Pero Jehovapitaga y voluntäninpitaga shumajmi yachacurcurgan, chaymi seguro caycargan rasunpa caj nänicho puriycashganta.

4. ¿Imatataj rurashwan rasunpa caj caminucho caycashganchipita seguro caycänapaj y imacunapitataj canan yachacurishun?

⁴ ¿Imanotaj seguro caycashwan rasunpa caj caminucho caycashganchita? Chaypäga Diosta aduranapaj Jesús ima yachachicushgantami tincuchishwan canan wichan imano aduraycashganchiwan. Cananmi yachacurishun rasunpa caj cristianucunaga: 1) imagencunata aduranchichu, 2) Jehovapa jutinta respetanchi, 3) rasunpa cajta cuyanchi, y 4) jucninchi jucninchi cuyanacunchi.

5. ¿Imanotaj Jehovata Jesús adurargan, y paynola imanotaj rurashwan?

⁵ Jesusga Papäninta amatar cuyarmi paylata adurargan cielucho caycar y cay Pachacho cashgan wichanpis (Luc. 4:8). Gatejnincunatapis chaynola rurananpaj nergan. Paycunaga yarpaylapis yarparganchu santucunata  adurananpaj. Juc espíritu Diosninchi caycaptenga, ¿piraj paytanoga cay Pachacho imatapis ruranman? (Is. 46:5). ‘Espiritutaga mana ricächu’ ¿nirchuraj pipis santucunata rezacur galaycunman?, ¿ima nishwantaj chaypita? Chunca Mandamientucunacho ishcay cajchomi Jehová cayno nergan: “Aduranayquipäga imatapis ama ruranquichu syëlucho caj-nirajta, cay pachacho caj-nirajta, lamar rurincho caj-nirajtapis. Chaycunapa ñaupanmanga ama gongurpacunquichu ni aduranquipischu” (Éx. 20:4, 5). Tayta Jehovata cuyarga jucla casucunapaj caycan chay mandamiento.

6. Canan wichan Jehovapa testiguncunaga, ¿picunanotaj Jehová Dioslata aduranchi?

⁶ Estudiaj runacunapis wilacamunmi, naupa cristianucunaga Jehová Diosninchilatash adurapäcoj. Unay cajcunapita wilacoj libro nishgannopis, naupa cristianucunapäga “pengacuypäshi canman” cargan aduracunan sitiucho santucunata churaptenga (History of the Christian Church). Canan wichan Jehovapa testiguncunaga chay wichan cristianucunanolami Jehovalata aduranchi. Santucunata, angelcunata ni quiquin Jesustapis adurar mañacunchichu. Runacunaga naciunnincunapa banderancunata o imaycancunatapis adurapäcunmi, noganchicunaga chaytapis ruranchichu. Waran waran mana gongaypami cayno Jesús mandacushganta casucunchi: “Tayta Diosllatami aduranqui” (Mat. 4:10).

7. ¿Ima nishwantaj Jehovapa testiguncunapita y waquin religiuncunapita?

⁷ Canan wichan maychicaj runacunami mana yamacaypa pushacoj religiosucunata gatirpan, naupanchopis umpurcarinrämi. Iglesiancunaman aywaycurmi libruncunatapis rantipan y guellayninwanpis yanapacärin. Ima wilapashgantapis lapanta casucärin. ¡Ni Jesusta ricarpis chaycunata rurarga cushicarcärinmanrächu! Noganchi ichanga maygan runatapis gatiräcur cacuycanchichu. Carguyoj hermanunchicunataga respetaytaga respetaycanchimi, pero cayno Jesús wilacushgantaga manami gongaycunchichu: “Wawqilami karkaykanki” (Mat. 23:8-10). Idulutanoga manami pitapis ricanchichu, religioso captinpis o naciunnincho mandacoj captinpis. ‘Paymi pushamaycan, naciunnïraycur cayta wacta rurashaj’ nirpis caycanchichu. Chay lapanta rurarmi waquincunano mana cawacur cristiano cashpanchi Dioslata aduranchi (Juan 18:36).

8. ¿Imanirtaj ninchi Jehovaga munan jutin respetashga cananta y waquincunatapis musyachinapaj?

⁸ Juc cutichomi Jesús mañacurgan Papäninpa jutin alabashga y respetashga cananpaj. Chaypitami quiquin Jehová cielupita sinchipa nimurgan ‘jutïtaga respetachishajmi’ nir (Juan 12:28). May chaycho yachachicushganchomi Jesusga Papäninpa jutinpita parlamurgan (Juan 17:26). Chaymi rasunpa caj cristianucunaga cushicushpanchi Diosninchipa jutinta apanchi y waquincunatapis musyachinchi.

9. ¿Imata rurartaj unay cristianucuna Diospa jutinta respetachergan?

⁹ Unay watacunacho naupa caj congregación yurimushganlachomi Jehová aunicurgan jutinraycur juc marcata sharcachinanpaj (Hech. 15:14). Chay cristianucunaga cushishga caycargan Diospa jutinta apar y waquincunata reguichishganpitapis. Pï maytapis Diospa jutinpita parlapargan y Dios escribichishgan librucunachopis chay jutita churapäcurgan. * Chaycho ricacämurgan Diospa jutinraycur  acrashga marca capäcushganta (Hech. 2:14, 21).

10. ¿Imanirtaj ninchi Jehovapa testiguncunaga quiquin Jehová jutinwan acramashganchi marca cashganchita?

¹⁰ ¿Jehovapa testiguncunaga Dios jutichipashgan marcachuraj caycan? Mä chaypita yachacushun. Canan wichan pushacoj religiosucunaga imaycata rurapäcush Diospa jutinta pipis mana musyananpaj. Traducishgan Bibliacunachopis chay jutita jorgarcärish y pipis mana parlananpaj wilacärish. * Pero alapa cushicuypaj caycan Jehovapa testiguncunala Diospa jutinta respetashganchita y alabaycashganchita. Manami noganchicunanoga pipis may chaycho wilacuycanchu chay jutipita. Waran waranmi ima rurashganchicunachopis calpachacunchi Diospa jutin ali ricashga cananpaj (Is. 43:10-12). 240 millonpitapis masraj Traducción del Nuevo Mundo Biblia ruracämushga y Diospa jutinga maycho yurimunanpaj cajchomi yurimun; manami jorgurishcanchichu waquincunanoga. Y publicaciunninchicunapis 1.000 idiumapitapis mascho ruracaycämun y Jehovapa jutinga cutin cutin yurimun.

11. ¿Imata rurartaj unay cristianucuna musyachicurgan rasunpa cajta cuyashganta?

¹¹ Jesusga musyarganmi Diospita lapan yachacushgancunaga rasun cajla cashganta y chaytaga cuyajmi. Cawayninchopis  practicamanmi churargan y waquincunatapis yachachirganmi (Juan 18:37). Jesuspa gatejnincunapis Diospita yachacushganchicunataga cuyanchimi (Juan 4:23, 24). Apóstol Pedrupis cristianuno cawacunapaj parlarmi ‘rasuncag yachachicuy’ cashganta nergan (2 Ped. 2:2). Unay cristianucunaga rasunpa cajta yachacushgancunataga cuyapäcojmi, manami tacucächirganchu chay wichan runacunapa yarpaynincunawan ni costumbrincunawanpis (Col. 2:8). Chaynolami canan wichan rasunpa cristianucunapis rasuncaj nänilacho purircaycan (3 Juan 3, 4). ¿Imanotaj chayta ruranchi? Diospita yachacushganchinola y Palabranpita yachacushganchinola cushi cushila cawacurmi.

12. ¿Imatataj rurapäcun pushaycämashganchi wauguicuna imalapis jucnopana tantianapaj captin y imanirtaj chayta rurapäcun?

¹² Jehovapa testiguncunaga manami nipäcunchu ‘Bibliapitaga lapantanami yachacushcä’ nir. Öraga manami shumaj tantiapäcushgachu Diospa yachachicuyninpita o congregaciunpita parlaj textucunatapis. Y caypitaga manami laquicurchu yarpachacushwan, Bibliaga wilacurgannami Dios yachachimashganchicunata ichiclapa ichiclapa tantianapaj (Col. 1:9, 10). Aumi, quiquin Jehovami yanapämanchi imacunapis ichiclapa ichiclapa musyacänanpaj, noganchicunaga pacienciawanmi shuyarpaycänanchi (Prov. 4:18). Pushaycämashganchi wauguicuna Bibliapa maygan textulapis jucnopa tantiacänanpaj cuentata gocäriptenga juclami wilacamun. Öraga chayno cambiucunata luta religiosucunapis rurapäcunmanmi pero rurapäcun runacunata cushichinalanpaj o quiquincuna alabashga cananlapaj. Ichanga Jehovapa testiguncunaga cambiucunata ruranchi Diosman más guelicunapaj y Jesús yachachimashganchino paylata aduranapaj (Sant. 4:4). Aumi, ima cambiucunapis ruracanga manami cay mundo yarpashganno yarpänapächu, sinoga Bibliata shumaj tantiapashga carmi. Rasunpa cajtaga cuyayculanchimi (1 Tes. 2:3, 4).

13. ¿Jucninchi jucninchicuna imata rurar caycänapätaj Jesús nergan, y chaytaga ruraycanchichu Jehovapa testiguncuna?

¹³ Unay cristianucunaga ali shongulanwanmi ima aycatapis rurapäcoj, pero imapitapis masga cuyanacärejmi. Jesús nergan: “Tsayno kuyanakäriptikimi pïmaypis musyapäkunqa discïpulükuna kashqaykita” (Juan 13:34, 35). Jehovapa testiguncunaga may chaycho cuyanacur juc shongula caycanchi, noganchilachomi ricacan mana chiquinacur juc familianola caycashganchi. Aumi, may chaycho juc castanola cawar cuyanacur caycanchi. Asambleanchicunacho, reuniunninchicunachoga amatar cuyanacunchi. Chayno cawacurmi cuentata gocunchi Jehová munashgannola paylata aduraycashganchita.

14. Colosenses 3:12-14 wilacushganno, ¿imacunata rurartaj jucninchi jucninchi amatar cuyanacunchi?

¹⁴ Biblia cayno nin: “Jucniqui-jucniquipis cuyanacur caway” (1 Ped. 4:8). Hermanunchicunawanga cuyanacunchi perdunanacur mana jagayachinäcushpanchimi. Calpachacunchimi imalanpis mana captin cushi cushila yanapänapaj, ofendimashganchi captinpis cuyaparmi yanapaycunchi (leiriy Colosenses 3:12-14). Aumi, chayno cuyanacurmi rasunpa cristianucuna caycanchi.

15. ¿Ima masta rurartaj unay cristianucunanola caycanchi?

¹⁵ ¿Ima masta rurartaj unay cristianucunanola canan wichan caycanchi? Chay wichan apostulcunanomi congregaciuncho ali churapänacushga  caycanchi: congregaciunta watucajpis caycan, ancianucunapis y siervo ministerialcunapis (Filip. 1:1; Tito 1:5). Jinamanpis unaynola noganchicunapis caycunacho Diosta casucunchi: casacurir-raj punucunapaj cajcho, yawar cajcho y pipis juchata ruraycur mana arrepenticuptin congregaciunpita gargushga captinpis (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Imatataj yachacunchi Efesios 4:4-6 textucunapita?

¹⁶ Jesusga wilacurganmi achca runacuna yangala ‘discipuluyqui caycä’ ninanpaj (Mat. 7:21-23). Diospa Palabranpis wilacurgannami cay ushanan tiempucunacho runacuna Diosninchiman ‘yäracoj-tucunanpaj’ (2 Tim. 3:1, 5). Pero Bibliaga tantiachicun imata Diosninchi chasquinanpaj, payga chasquenga ‘jucnayllaman yäracunapaj’ cashgantami (leiriy Efesios 4:4-6).

17. ¿Picunataj Jesusnola cawacur rasunpa caj religiuncho caycashganta nishwan?

¹⁷ Chauraga, ¿canan wichanga mayganta rasunpa caj religión caycan? Jehovapa testiguncunalami. Chaytaga ninchi Jesusno y chay wichan waquin cristianucunano Jehovalata adurashpanchimi. Manami imawanpis trucachinapaj canchu Jehovapa marcancho caycashganchita y paypita rasunpa cajta yachacushganchita. Chaura ama imaypis rasunpa cajta yachacushganchitaga jaguiycushunchu.