1, 2. 1) ¿Imatataj waquin autoridäcuna rurapäcushga Jehovapa sirvejnincunata chiquir, y hermanunchicunaga imataj rurapäcurgan? 2) ¿Imanirtaj gaticachashga caycarpis cushishga caycashwan? (Garancho caycaj fotupitapis parlacamuy).

 CANAN wichanga 30 naciuncunacho y sitiucunapitapis maschomi Jehovapa ali wilacuyninta yachachicunapaj autoridäcunaga mana munapäcunchu. Chaymi waquin hermanunchicunata carcelcho wichgaraycächin. ¿Imanir? Paycunaga Jehová munashgannomi cawapäcun. Bibliapita yachacun y yachacushganpita waquincunata yachachipäcun, y reuniuncunaman aywapäcun cristiano masincunawan shuntacänanpaj. Jina politicamanpis jaticanchu. Paycunata pasaypa chiquircaycaptinpis, Diosnin Jehovata cachaycunchu y pay munashganno jinala cawarcaycan b, y chaypita cushicärin.

² Maynachi chayno valiente hermanucunapa fotuncunata ricashcanqui y cushishgala carcaycajta cuentata gocushcanqui. Aumi, alapa cushicärin paycunawan Jehová cushi cushila caycashganta musyar, y Pay munashgannola cawarcaycashganraycurpis (1 Crón. 29:17). Jesús nergan: “Kushishqami kawapäkunqa Tayta Dios munashqanno kawashqanpita runakuna nakatsiptin. [...] Tsayno kaptinpis kushikäriy. Qamkunapaqqa gloriacho maynami Tayta Dios premiuta kamarishqa” (Mat. 5:10-12).

3. Hechos 4:19, 20 textucuna nishganno, ¿imatataj apostulcunaga rurargan gaticachashga caycarpis, y imanir?

³ Hermanunchicunaga gaticachashga carcaycan unay apostulcuna gaticachashga capäcushganno Jesucristupita yachachicushganraycur. Cutin cutinmi tribunal judío nishgan apostulcunata mandargan “Jesúspa jutincho imaypis mana wilakunanpaq” ni mana yachachinanpaj (Hech. 4:18; 5:27, 28, 40). ¿Imatataj apostulcuna rurargan? (Leiriy Hechos 4:19, 20). Musyapäcurganmi más autoridäyoj caj paycunata mandashganta lapan marcacunacho Jesuspita shumaj yachachipäcunanpaj (Hech. 10:42). Chauraga Pedruwan Juan waquin apostulcunapa jutincho mana manchacuypa nergan: ‘Nogacunaga Diostami cäsucushaj runacunata cäsucunapaj trucan’ y nirganpis Jesuspa jutincho jinala yachachicunanpaj. Chayga cargan chay juecescunata cayno tapupaycajno: ‘¿Manachu pengacärinqui? ¿Gamcunaga Diospita más autoridäyoj cashgayquitacu yarpapäcunqui?’.

4. Hechos 5:27-29 textucuna wilacushganno, ¿imataj apostulcunapita yachacunapaj caycan, y cristianucunaga chayta imanotaj rurashwan?

⁴ Apostulcunaga ali ejemplumi caycan canan wichan cristianucunapaj, chaymi paycunapis nipäcun: “Runakunata cäsukunäpa trukanqa Tayta Diostami cäsukärishaq” (leiriy Hechos 5:27-29). Jehová munashganno cawacushganpita y “Jesuspaj willacushanpita astiptin apostulcunaga cushicuran. Cushisha Israel mandajcunapa ñaupanpita aywacuran” y predicaycarganlami (Hech. 5:40-42).

5. ¿Ima tapucuycunapitataj yachacushun?

⁵ Unaycho apostulcuna rurashganga cay tapucuycunaman yarpachacächimanchi: runacunata cäsucunanpaj trucan Jehovalata cäsucuptin, ¿imanotaj “lapan autoridäkunata” cäsucärishgantapis ricachicurgan? (Rom. 13:1). ¿Y imanotaj noganchipis “mandaqkunata y autoridäkunata respitar” cäsucuycashganchita ricachicuycashwan, y más munayniyoj mandajninchi Jehovatapis jinala cäsucuycashwan? (Tito 3:1).

6. 1) Romanos 13:1 texto nishganno, ¿pïcunataj caycan “lapan autoridäkuna”, y imata rurartaj cäsucushwan? 2) ¿Ima nintaj Biblia gobernanticunapita?

⁶ (Leiriy Romanos 13:1). Cay versiculucho “lapan autoridäkunata” niptenga parlaycan runacunata gobernajcunapaj. Y cristianucunapis chay gobernanticunata o autoridäcunata cäsucunanchi. Paycunaga runacuna y carruncunapis ali purinanpaj camacächin, leycunata cumplichinmi, öraga Diospa sirvejnincunatapis yanapanmi (Apoc. 12:16). Chaymi Bibliaga mandamanchi impuestucuna y tributucuna paycunata paganapaj, jina respetuwan tratanapaj (Rom. 13:7). Chaura Jehovaga permitin chay gobiernucuna autoridäyoj cananpaj. Jesús chaypita shumaj tantiachergan gobernador Poncio Pilato tapupaptin. Poncio Pilato niptin, ¿manachu musyanqui cacharinäpaj o wanuchinäpäpis munayniyoj cashgäta? Jesús caynomi contestargan: “Llapantapis Tayta Diosmi camacächin. Pay mana camacächiptenga imata ruramänayquipäpis munayniqui manami canmanchu” (Juan 19:11). Pilatupa poderninnopis canan wichan gobernanticunapa o politicucunapa poderninga ushacajlami.

7. ¿Imacunachotaj gobernanticunata mana cäsucushwan, y paycunaga imataj musyapäcunman?

⁷ Lapan cristianucuna gobernanticunata cäsucunchi, leynincuna Jehovapa contrancho mana caycaptin. Ichanga Dios mana munashganta ruranapaj nimaptinchi o Dios imalatapis mandamashganchita ruranapaj michamaptinchi manami cäsucunchichu. Tantiarinapaj, öraga mozucunata ejercituman aywananpaj obligan. c O Biblianchita y publicaciunninchicunata mana utilizanapaj michäcunmanmi, jina yachachinapaj y reuniuncho juntacänapäpis. Gobernanticuna poderninta lutanpa utilizaptin, paycunata Jehovami juzganga. ¡Rurashgancunata Jehová ricaycanmi! (Ecl. 5:8).

8. ¿“Autoridäcuna” y “Munayniyoj” niptenga imacunachotaj jucnopa caycan, y chayta musyarga imanirtaj ali caycan?

⁸ “Autoridäcuna” nerga parlaycan más poderyoj cajpaj o waquincunapita más janancho caycajcunapäpis. Pero chayga manami niycanchu mejor-raj o lapancunapa janancho caycashganta. Chauraga lapancunapa janancho caycaj ninchi: “Munayniyoj”. Cay Pachacho gobernajcunata, “autoridäcuna” nir gayaptinpis, jucmi caycan pipitapis más autoridayoj y lapanpita janancho caycaj. Jehová más Munayniyoj cashganta nishpa chuscu cutimi Bibliacho yurimun (Dan. 7:18, 22, 25, 27).

9. ¿Imataj waquin visiuncunacho profeta Daniel ricargan?

⁹ Profeta Daniel ricashgan visiuncho ricächicurgan Jehová lapan autoridäcunapa más janancho caycashganta. Naupataga chuscu jatun bestiacunata ricargan, chayga cargan poderyoj naciuncuna unaypita y cananpitapis: Babilonia, Medopersia, Grecia y Roma; y canan wichan gobernaycaj Reino Uniduwan Estados Unidos naciuncuna (Dan. 7:1-3, 17). Nircurna Daniel ricargan tronuncho Jehová jamaraycashganta (Dan. 7:9, 10). Cay profeta ricashganga tantiachicun ima pasananpaj cajta cay Pachacho caycaj gobiernucunata.

10. Daniel 7:13, 14, 27 textucuna nishganno, ¿pïcunataj Jehová autoridäninta goycun, y chayga imataj paypita yachachimanchi?

¹⁰ (Leiriy Daniel 7:13, 14, 27). Daniel ricargan lapan gobiernucunata autoridäyoj cashganpita Jehová imano jorgushganta, nircur payman yäracoj cajcunata y más poderyoj cajcunatami autoridäyoj cananpaj churashga.  ¿Pïcunataj? “Runapa tsurinno” cajta Jesucristuta y “Tayta Diosman yärakuqkuna”, 144.000 cielupaj acrashga cajcunata (Dan. 7:18). Chaura claro caycan Jehovalami más Munayniyoj caycan, paylami derechuyoj autoridäninta pitataj goycunanpaj y pitataj jorgunanpäpis.

11. ¿Ima mastataj Daniel escribergan lapan gobernajcunapa janancho Jehová caycashganta musyanapaj?

¹¹ Daniel ricashgan visiunga masraj tantiachimanchi. Payga nergan: “Paymi ray cananpaj pitapis churan. Ray caycajtapis jorgurin”. Caytapis nergan: “Tsayno pasaptinmi pïmaypis musyanqa lapan mandaqkunapitapis Tayta Dios mas munayniyuq kashqanta. Paymi nacionta mandananpaq pitapis munashqan kaqta churan” (Dan. 2:19-21; 4:17). ¿Imaylapis Jehová mandaycajta jorgushga y jucta churashga? Aumi, chaynomi rurashga.

12. Juc ejempluwan tantiachicamuy unaycho reycunata Jehová imano jorgushganta (Dibujutapis ricay).

¹² Jehová ricächicurgan lapan autoridäcunapita más Munayniyoj cashganta. Ricärishun quimsa reycunata pasashganta. Egiptupita faraón Diospa sirvejnincunata esclavuno aruchergan, cutin cutinmi israelitacunata cachayta munarganchu. Ichanga Dios maquinpita jorgurgan y faraonta Puca lamarcho talpuchergan (Éx. 14:26-28; Sal. 136:15). Babiloniapa rey Belsasar juc fiestata rurargan y “jana patsacho kaykaq Tayta Diosta rabyanätsir”, y Jehovata adurananpaj trucan “goripita, guellaypita” dioscunatami adurargan (Dan. 5:22, 23). Dios ichanga chay ali tucoj runata pengacächergan. “Chay chacayllami” Belsasar wanuchishga cashga, y gobiernunta Media y Persia runacunapa maquincho churashga (Dan. 5:28, 30, 31). Palestinapa rey Herodes Agripa I apóstol Santiaguta wanuchishga, y apóstol Pedruta carcelman wichgachergan nircur wanuchinanpaj. Dios ichanga yarpashganta rurananpaj michashga. “Tayta Diospa anjilnin gueshyawan castigaran”, y Herodes wanurgan (Hech. 12:1-5, 21-23).

13. Juc ejempluwan tantiachicamuy shuntacashga naciuncunata Jehová imano ushacächishganta.

¹³ Jina Jehová ricächicurgan shuntacashga naciuncunapitapis más Munayniyoj cashganta. Payga israelitacunapa favornin sharcur cananeucunapita 31 reycunata wanurcächinanpaj, y Aunishgan Pachapita juc ishcay naciuncunata charicurcunanpäpis yanapargan (Jos. 11:4-6, 20; 12:1, 7, 24). Jina rey  Ben-Hadad 32 mandaj masincunawan shuntacaycur israelitacunata ushacächiyta munapäcuptinmi Jehová paycunata ushacächergan (1 Rey. 20:1, 26-29).

14, 15. 1) ¿Nabucodonosor y Darío reycuna imataj nipäcurgan Jehovapita? 2) ¿Ima nintaj juc salmuta escribej runaga Jehovapita y marcanpita?

¹⁴ Jehová cutin cutin más Munayniyoj cashgantami ricächicurgan. Babiloniapa rey Nabucodonosor, ‘Jehovalami alabanapaj caycan’ ninanpaj trucanga, poderninpita, calpanpita y munayniyoj cashganpita ali tucurgan, chaymi Jehovaga locuyächergan. Nircur juiciun yapay cutiycuptinna, Munayniyoj Jehová Dioslata alabargan, ‘Mandaj cayninga mana ushacajmi caycan’ nergan. Jina nerganpis payga munashgantami imatapis ruran y manami pipis chapata churapanchu (Dan. 4:30, 33-35). Chaypita Daniel, Jehová munashganno cawaptinmi leuncuna caycashgan uchcupita Jehová jorgurergan. Chayraycurmi rey Darío cayno mandargan: “Lapan nacionkunacho Daniel adorashqan Diosta mantsakuypa adorapäkunaykipaq. Paymi imayyaqpis kawaq Tayta Dios kaykan. Mandaq kashqanqa manami imaypis ushakanqatsu. Tsaynölami munayniyuq kashqanqa imayyaqpis kaykanqa” (Dan. 6:7-10, 19-22, 26, 27).

¹⁵ Juc salmuta escribej runaga nergan: “TAYTA DIOSMI mana camacächinchu payta mana rispitajcuna imata rurayta munaptinpis”. Jina nergan: “TAYTA DIOSTA rispitaj nasyun runacunaga cushishami cawanga. Paycunataga Tayta Diosmi payllata sirbinanpaj acrasha” (Sal. 33:10, 12). ¡Jehová munashganno cawashgaga cushicuypämi caycan!

16. ¿Imapitataj seguro caycanchi, y imanir? (Dibujutapis ricay).

¹⁶ Unaycho Jehová rurashganta ricashcanchina. Chauraga, ¿ichiclachona imataj Jehová ruranga? Seguro caycanchi jatun nacay wichancho Jehová sirvejnincunata salvangami (Mat. 24:21; Dan. 12:1). Aumi, chaytami ruranga chaychicaj juntacashga naciuncuna o  Gog de Magog nishgan lapan Pachacho Diospa sirvejnincunata atacaptin. Naciones Unidas nishganta yanapacojcuna 193 naciuncuna juntacaptinpis manami camäpacungachu Munayniyoj Diosta ni ejercituncunatapis ichipänanpaj. Jehová aunicun: “Chayno rurarmi waquin nasyun runacunataga musyachishaj munayniyoj, Santo Dios cashäta. Chaura achca nasyun runacunami rejsimanga. Chaynöpami paycunaga musyanga noga TAYTA DIOS cashäta” (Ezeq. 38:14-16, 23; Sal. 46:10).

17. ¿Imataj pasanga cay Pachacho lapan madajcunata y Jehová munashganno cawajcunata?

¹⁷ Gog nishgan atacaptinmi ushacaj guerra o Armagedón galaycamunga, y Jehovami ushacächenga “may-chaypapis aywar nasyun mandajcunata suldäruntinta” (Apoc. 16:14, 16; 19:19-21). Ichanga “jutsata mana ruraq runakunaqa Tayta Dios rikatsishqan nacioncho atska watami jawka kawanqapaq” (Prov. 2:21).

18. ¿Imataj rurananpätaj achca cristianucuna listo carcaycargan, y imanir? (Daniel 3:28).

¹⁸ Unaypitami achca cristianucuna más Munayniyoj mandajnin Jehovata cuyar carcelarashga cargan y cawaynintapis peligruman churargan. Imaycanopapis Jehová munashganno jinala cawacärin, unay quimsa hebreucuna achachaycaj hornucho wanuchishga cananpaj captinpis más Munayniyoj Jehovata cäsucärergan (leiriy Daniel 3:28).

19. ¿Imataj Jehová ricanga sirvejnincunata juzgananpaj, y imatataj cananpita ruraycashwan?

¹⁹ Unay salmista Davidga musyarganmi Jehová munashganno cawacuyga alapa ali cashganta. Paytami escribergan: “TAYTA DIOS, gammi jusganqui llapan runacunata. Imano cashätapis jusgamay. Nogaga manami ima mana allitapis rurashcächu” (Sal. 7:8). Caytapis nergan: “Qamman yärakurmi alilata ruraykä” (Sal. 25:21). Ima captinpis Jehovata cuyashpanchi y cäsucuptinchega imaypis alilami cawacushun. Chaynopa salmistanomi ricacushun: “Kushishqami kawarkaykan Tayta Dios munashqanno kawaq runakuna. Paykunami TAYTA DIOSPA leyninkunata cumplipäkun” (Sal. 119:1).